Lukas 5
5
Dinulaw ni Jesus u Appat a Kadipalonguwan a Disepulus
(Mateo 4:18-22; Markos 1:16-20)
1Nadid, essa a aldew mentaras mangaral ti Jesus tu baybay nu diget a Genesaret ay kinadahupodupan siya nu dapat a kakpal a tolay dipo gusto de a mágsaneg tu upos nu Diyos. 2Sakay netan na u duwwa a abeng a keddung. Nakaawas dán u mángngikan hide sakay maguges dálla hide tu pante de hide. 3Summakay siya tu essa a abeng a kao ni Simon, sakay kinagiyan na siya a itágtaw na ti sabadit u abeng. Nággetnod siya tu abeng sakay nagtoldu tu tolay hide.
4Káttapos na a nagtoldu ay kinagi na ni Simon, “Angay kam mamante ditaw tán makalap kam.”
5Timmábbeg ti Simon, “Maisto, sagibi kami dán a nanilág pero awan kame ti nalap. Pero dipo kinagi mo ay isáklad ko a huway u pante hide.” 6Konna ngane hod u ginimet de. Dapat a kakpal u nalap de a ikan kaya ngahe-ngahe a mapisad u pante de hide. 7Kanya pinayadden de u kaguman de hide tu essa a abeng tán patulung. Kanya tinulungan di hide. Naputat ti ikan u duwwa a abeng kaya ngahe-ngahe dán a omállád. 8Pákketa ni Simon Pedro tu nangyare ay limmuhud siya tu atubang ni Jesus sakay kinagi na, “Adeyuwanák mo Panginoon, dipo makasalananák a tolay.”
9Grabi u taka na ay tu agum na hide dipo tu kakpal nu nalap de a ikan, 10konna bi hod di Santiago ay ti Juan a anak ni Zebedeo a kasosyo ni Simon. Kinagi ni Jesus ni Simon, “Dyan ka manteng! Sapul nadid ay bakán dán a ikan alapán muway nan magakit ka dán ti tolay a maniwala nikán.”
11Nikuna nedek di dán u abeng de hide ay linakaden de itod a atanan sakay immunonod hide ni Jesus.
Pinagpiya ni Jesus u Kinetong a Tolay
(Mateo 8:1-4; Markos 1:40-45)
12Nikuna katoy ti Jesus tu essa a banuwan ay immadene nikuna u essa a kinetong a lállake. Limmuhud siya sakay nákkekakagbi ni Jesus, “Panginoon ni gustuwán mula ay mapagpiyyaák mo.”
13Tinawiden siya ni Jesus sakay kinagi na, “Gusto ko a magpiyya ka!” Sakay pagdaka a nawan u ketong na. 14Sakay kinagiyan siya ni Jesus, “Dyan mo iye kagi-kagiyán maskin deya. Nan angay mo ipeta tu saserdote hide sakay magalay ka sigun tu inyutus ni Moises. Sa iye mángpatunayay tu tolay hide a nagpiya ka dán.”
15Pero mas lalo pa a nekalat u baheta tungkul ni Jesus, kaya nagdemáttan u grabi't kakpal a tolay tán mágsaneg sakay mapagpiyya u saket de hide. 16Pero pirmi a umangay ti Jesus tu parang sakay hod siya a magdasal.
Pinagpiya ni Jesus u Essa a Paralitiko
(Mateo 9:1-8; Markos 2:1-12)
17Essa, aldew mentaras magtoldu ti Jesus ay te mággetnod a Pariseo#5:17 Pariseo: U gurupo nu relilyoso hide a Judio a pirme a sumássunud tu kautusan ni Moises sakay tu agum pa a batas tu itod pa. Iye hide a tolay ay pirmi nakatuun tu kalinisan. sakay u maisto hide nu Kautusan. Gábwat hide tu iba-iba a banuwan ti Galilea, ti Judea sakay ti Jerusalem. Atoy ni Jesus u kapangyariyan nu Diyos a magpapiya tu te saket hide. 18Nadid, tehhod a dummemát a sangan a tolay a te usung a paralitiko#5:18 Paralitiko: Iye u tolay a awan na meahikad u bággi na. a kumákkatdug. Ipilit de a isaddáp tu bilay tánni meangay tu atubang ni Jesus. 19Pero awan hide makasáddap dipo tu kakpal nu tolay. Kanya immunek hide tu atáp sakay linákwaban de sakay intonton de tu bállog nu katolayan u págkatdugan nu paralitiko tu atubang ni Jesus. 20Nikuna ketan ni Jesus u pánnampalataya de ay kinagi na tu paralitiko, “Anak, napatawad ka dán tu kasalanan mo hide.”
21U maisto hide nu Kautusan sakay u Pariseo hide ay nággisip-isip sakay namágguhon-uhon hide, “Deya ben iye a tolay a magkukunware a Diyos? Awan beman Diyos la i maariyay a magpatawad ti kasalanan?”
22Pero tukoy ni Jesus u katoy tu isip de kaya kinagi na nide, “Bakin magisip kam ti konna hina? 23Ánya mas alistuway a kagiyán ko, ‘Napatawad dán u kasalanan mo hide,’ oni kagiyán ko, ‘Tumaknág ka sakay maglakad?’ 24Nadid, patunayan ko nikam a u Anak nu Tolay ay te kapangyariyan ti lutaáy a magpatawad ti kasalanan,” kinagi na tu paralitiko, “Tumaknag ka, tawidán mo i págkatdugan muwe sakay sole ka dán!” 25Pagdaka a immikat u lállake sakay inagkat na u kakkatdugan na tu atubang nu katolayan sakay nagsole a nágpapuriyán tu Diyos. 26Nagtaka u atanan a kotay hod sakay grabi u ánteng de. Nagpure hide tu Diyos sakay kinagi nu balang essa nide, “Netan tamon nadid u makataka-taka a bagay!”
Dinulaw ni Jesus ti Levi
(Mateo 9:9-13; Markos 2:13-17)
27Káttapos ni pangyayariyan itod ay limmuwas ti Jesus tu bilay. Netan na u essa a mágsingeh ti buwes, u ngahan na ay ti Levi. Mággetnod siya tu págsingihan ti buwes. Kinagi nikuna ni Jesus, “Kumuyog ka nikán.” 28Tummáknág ti Levi sakay tulos na a linakadan u atanan sakay immunonod siya sakay nagserbi ni Jesus.
29Sakay káttapos ay hinandaan ni Levi ti Jesus ti dakál a handaan tu bilay na. Nák-atubang ni Jesus a kuman u agum hide a mágsingeh ti buwes sakay u agum pa hide a tolay. 30Nágganasasan u Pariseo hide sakay u maisto hide nu Kautusan. Kinagi de tu disepulus hide ni Jesus, “Bakin mákpággatubang kam a kuman sakay uminom ti mágsinge he hide ti buwes sakay tu agum pa hide a makasalanan?”
31Tinábbeg hide ni Jesus, “Awan kailangan nu awan ti saket u mággamot nan u te saket la. 32Awanák he immangay para tulungan u tolay hide a magkagi a malinis hide nan kayaák a immangay he ay para tulungan a magsise u makasalanan hide.”
Nagtanung hide Tungkul tu Págkulásyon
(Mateo 9:14-17; Markos 2:18-22)
33Te sangan a tolay a nagkagi: “Pirme a magkulásyon sakay magdasal u disepulus hide ni Juan; konna bi hod u disepulus nu Pariseo hide. Pero bakin i disepulus muwe hide ay mágkakanán la sakay mággainumán?”
34Timmábbeg ti Jesus, “Pagkulásyonán moy beman u bisita hide tu kasalan a kaguman de pálla u lállake a kinasal? 35Dumemát u aldew a mehiwalay dán u kinasal, saka palla hide a magkulasyon.”
36Kinagi be ni Jesus nide u essa a talinhaga, “Awan maare a mangtabas ti essa a risato tu bigu a damit para iyáppol tu date dán a damit. Mara ni konna he i gimitán moyay ay masida u bigu a damit sakay ni bigu iyappol moyay ay awan mebagay tu date dán a damit. 37Awan be ti magasák ti bigu a alak tu date dán a pággasákkan a koblet ni hayup. Ni konna he i gimitán moyay ay mapisad u date a pággasákkan sakay mágkebut u alak sakay tulos a masida u pággasákkan. 38Ni bigu a alak u iyasák moy ay dapat a bigu be u pággasákkan. 39Sakay awan be ti masoh a manginom tu bigu a alak mara ni nakainom dán hide tu date a alak. Nan kagiyán de a, ‘Masarap u date a alak.’ ”
Currently Selected:
Lukas 5: MBJC
Highlight
Share
Copy
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
