Lukas 6
6
U Tanung Tungkul tu Aldew nu Káimang
(Mateo 12:1-8; Markos 2:23-28)
1Tu Aldew nu Káimang ay nagtaleb di Jesus tu katriguwan. Nagkádtoh u disepulus na hide tu ohay nu trigu sakay kinásselan de itod. 2Pero kinagi nu agum a Pariseo, “Bakin maggimet kam ti bawal tu Kautusan tu Aldew nu Káimang?”
3Tinábbeg hide ni Jesus, “Awan moy beman nabasa tu Kasulatan u ginimet ni David nikuna nagaláp siya sakay tu kaguman na hide? 4Awan beman simmáddáp siya tu bilay nu Panginoon sakay kimman tu tinapay a alay tu Diyos, a u saserdote la hide u tehhod a karapatan a mangkan hod? Inatádden na pa u kaguman na hide.”
5Sakay kinagi pa ni Jesus, “U Anak nu Tolay u makapángkagi ni ánya u dapat a gimitán tu Aldew nu Káimang.”
U Tolay a Awan Makabate u Kawanan na a Kamát
(Mateo 12:9-14; Markos 3:1-6)
6Tu Aldew nu Káimang ay summáddáp ti Jesus tu sinagoga sakay nagtoldu. Te essa a lállake a patay u kawanan na a kamát. 7Binábbantayan nu maisto hide nu Kautusan sakay nu Pariseo hide ti Jesus, ni magpapiyya siya tu aldew nu Káimang tánni tehhod hide a mesihe nikuna. 8Pero tukoy ni Jesus u katoy tu isip de, kaya kinagi na tu lállake a patay ti kawanan a kamát, “Karon he, angay ka tumáknag ti atubangay.” Immadene u lállake sakay timmáknág tu atubang de. 9Káttapos ay kinagi ni Jesus tu maisto hide nu Kautusan sakay tu Pariseo hide, “Tanungán takam nadid ánya i tamaay a págsunud tu kautusan tu Aldew nu Káimang. U maggimet ti maganda oni maggimet ti madukás? Iligtas u tolay oni mamuno?” 10Sakay inileng na hide a atanan sakay káttapos ay kinagi na tu lállake, “Iyolnat mo i kamát muwe!” Kaya tu páng-olnat na tu kamát na ay pagdaka a nagpiya.
11Pero grabi u iyamut nu maisto hide nu Kautusan sakay u Pariseo hide. Kanya namágguhon hide ni ánya u dapat de a gimitán ni Jesus.
Nángpile ti Jesus ti Sapulo ay ti Duwwa a Disepulus
(Mateo 10:1-4; Markos 3:13-19)
12Ti panahunan itod ay immangay ti Jesus tu bumábbuked sakay sagibi siya hod a nágdasal. 13Sakay tu kadimadimangan ay dinulawan na u disepulus na hide, sakay nangpile siya ti sapulo ay ti duwwa nide. Sakay nginahanan na hide a apostol na. 14Iye hide u ngaha-ngahan de, ti Simon a nginahanan ni Jesus a Pedro, sakay ti Andres a wadi ni Pedro, di Santiago, Juan, Felipe, Bartolome, 15Mateo, Tomas, sakay ti Santiago a anak ni Alfeo, ti Simon a makabayan,#6:15 Makabayan: Iye u gurupo nu Israelita hide a nagrebelde tu gubiyerno nu Romano tu panahun ni Jesus. 16ti Judas a anak ni Santiago, sakay ti Judas Iscariote a nángtokyon ni Jesus.
Nágtoldu ti Jesus sakay Nágpapiyya
(Mateo 4:23-25)
17Káttapos na a piliyán u disepulus na hide ay nanegson siya sakay tummáttaknág hide tu patag a lugar. Katoy hod, u kakpalan nu disepulus na hide sakay u makpal a tolay a gábwat ti Judea sakay Jerusalem, sakay u banuwan hide tu baybay nu Tiro sakay Sidon. 18Ummangay hod hide para mágsaneg, sakay mapagpiyya tu saket de hide. Pinagpiyya ngani hide ni Jesus, pate u páppahirapan hide nu mágkadukás a ispirito. 19Pinilit nu atanan a te saket a umadene nikuna tánni matawiden de siya, dipo tehhod siya a kapangyariyan a magpapiya tu atanan a te saket.
U Pinagpala hide sakay u Kakagbi hide
(Mateo 5:1-12)
20Immileng ti Jesus tu disepulus na hide sakay kinagi na,
“Pinagpala u mágkahirap hide nadid,
dipo paghariyan kam nu Diyos!
21Pinagpala u magaláp hide nadid,
dipo bássugán kam nu Diyos!
Pinagpala u mágsanget hide nadid,
Dipo magkahod kam ti kasayaan!
22Pinagpala kam ni kaiyamutan dikam, palayasán, insultuwán sakay kagiyan de a madukas kam dipo tu Anak nu Tolay. 23Magsaya kam ti itona a aldew, lumokso kam ti saya dipo grabi't kadakál u gantimpala moy ti langet. Dipo konna labe hod u ginimet nu nuno de hide tu prupeta hide.
24Pero kakagbi kam a mágkayaman hide nadid,
Dipo natamasa moy dán u kaginhawaan.
25Kakagbi kam a bássog hide nadid, dipo aláppán kam!
Kakagbi u mágtatawaán hide nadid,
Dipo maglungkut sakay magsasangitán kam!
26Kakagbi kam ni puriyán kam nu atanan a tolay, dipo konna bi hod u ginimet nu nuno di hide tu magkukunware hide a prupeta.”
Mahalán moy u Kadima moy
(Mateo 5:38-48; 7:12)
27“Pero kagiyán ko nikam a mágsaneg hide nadid. Mahalán moy u kadima moy hide sakay maggimet kam ti maganda tu maiyamut hide nikam. 28Pagpalaán moy u mángsumpa hide sakay idasal moy u mangape hide nikam. 29Ni dapangán dikam ay ipadapang moy pa u dilupot. Ni alapán de u alikábkáb mo ay iyatád mun pate u badu mo. 30Atádden mo u magaged niko sakay ni te nangalap tu kabiyagan mo ay dyan mu pesole. 31Gimitán moy tu agum u gusto moy a gimitán di be nikam.
32Ni u mahalán moy la ay u magmahal labe nikam, ánya wád matanggap moyay a piremyo a gábwat tu Diyos? Maskin u makasalanan hide a tolay ay makabeto be a magmahal tu mangmahal hide nide. 33Ni u paggimitan moy ti maganda ay u maggimet labi hide nikam ti maganda ay ánya wád matanggap moyay a piremyo a gábwat tu Diyos? Maskin u makasalanan hide a tolay ay maggimet labe ti konna hina. 34Sakay ni paáddiman moy laay ay u áasaan moy hide a makabayad nikam, ánya wád matanggap moyay a piremyo a gábwat tu Diyos? Maskin u makasalanan hide a tolay ay magpaáddem be tu kapareho de a makasalanan dipo tukoy de a makabayad hide. 35Nan mahalán moy u kadima moy hide. Mággimet kam ti maganda nide sakay magpaáddem kam a awan dán umasa ti ánya pa man a bayad. Tánni dakál u piremyo a matanggap moy. Tán hikam u magin anak nu Dakila a Diyos. Dipo siya ay makákkagbiyan tu mágkadukás sakay tu awan hide tumáttenggi ti utang a luub nikuna. 36Dapat makákkagbiyán kam, konna tu Ama moy a Diyos.”
U Pághatul tu Kapareho a Tolay
(Mateo 7:1-5)
37“Dyan kam humatul tánni awan kam hatulan nu Diyos. Dyan kam be magparusa tánni awan kam parusaan nu Diyos. Mágpatawaden kam tánni patawadán kam nu Diyos. 38Mangatád kam, tánni atádden kam be nu Diyos; ti tama a takal, natádtád sakay magsápway. Dipo ni ánya u ginamit moy a págtakalan tu agum ay itod be u gamitán nu Diyos nikam.”
39Tinanung be hide ni Jesus ti patalinhaga, “Maare beman a igiya nu buhák u kapareho na a buhák? Ni konna hod u gimitán de ay pareho hide a metápduk tu ábbut. 40Awan ti disepulus a mas higit tu maisto na. Pero ni matolduwan dán ti husto ay magin konna siya tu maisto na.”
41“Bakin bábbahángngán mo i puleng ni kapatkákka muwe? Pero awan mo mabaha-baháng i gaturoso muwe a puleng? 42Kodya mo a kagiyán tu kapatkákka mo a, ‘Kapatkákka, tulungan taka a mangibut ti puleng muwe, pero awan mo ketan u gaturoso mo a puleng?’ Mapagpakunware! Ibutan mu pa i gaturoso muwe a puleng, tánni maketa ka ti maganda para maibutan mo u puleng nu kapatkákka mo.”
Matengge u Tolay tu Gimet na
(Mateo 7:17-20; 12:33-35)
43“U maganda a kayo ay awan magbunga ti madukás. Konna labe hod tu madukás a kayo, awan iye magbunga ti maganda. 44Matengge u kayo tu pamamag-itan nu bunga na. Dipo awan ka makabudás ti bunga ni igus tu ponan a masaet. Sakay awan be makabudás ti bunga ni ubas tu ponan nu dawag. 45Konna labi iye tu tolay, u mabait a tolay ay makapangatád ti maganda dipo mabait siya. U madukás a tolay ay makapangatád ti madukás dipo putat ti kadukássan u puso na. Dipo ni ánya u lumuwas tu labi nu tolay ay siya labe u atoy tu puso na.”
U Duwwa a kalase a Tolay a Nagbilay
(Mateo 7:24-27)
46“Bakin dáddulawannák moy a, ‘Panginoon, Panginoon ko,’ pero awan moy labe gimitán u kákkagiyán ko? 47Kagiyán ko nikam, ni deyaman u umadene nikán sakay mágsaneg tu upos ko, sakay sumunud ay konna siya ti iye a talinhaga. 48Konna siya tu tolay a naggimet ti bilay. Uginimet na ay nagkotkot ti tuna't kadsalad sakay impundasyon na u bilay tu dakal a bito. Nikuna a nagdakál u dinom ay dinapalis na u bilay pero awan la nagahikad dipo matibáng u kákkagimet na. 49Pero ni deya man i mágsanigay tu upos ko sakay awan na igimet ay konna siya tu tolay a naggimet ti bilay a awan ti pundásyon. Nikuna magdakál u dinom sakay dinapalis na u bilay ay pagdaka a natumba sakay tulos a nasida.”
Currently Selected:
Lukas 6: MBJC
Highlight
Share
Copy
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
