Markos 4

U Talinghaga tungkul tu Mágsabug

(Mateo 13:1-9; Lukas 8:4-8)

1Nadid, nagtoldu a huway ti Jesus tu bihebi nu Minalno ti Galilea. Sakay immangay hod nikuna u tunay ti kakpal a tolay, kanya simmakay siya tu abang sakay dummitaw siya a nággetnod. U tolay hide ay hod be tu bihebi nu minalno, 2sakay tinolduwan na hide ti makpal a bagay tu pamamag-itan nu talinghaga. Konna he u kinagi na: 3“Mágsaneg kam! Tehhod a essa a tolay a limmuwas para magsabug ti bine. 4Tu págsabug na ay tehhod a bine a netákneg tu dilan. Dimmemát u manok hide sakay kinákkutem de itod hide a bine. 5Tehhod be a bine a netákneg tu mabito-bito. Maski awan ti taga-luta, alisto a timmubu u bine hide. 6Pero nalanás labe hide nikuna a simminggit u sinag, dipo awan madisalad u gimot de, kanya natay. 7Tehhod be a bine a netákneg tu masaet a kalamonan; immoya u lamon hide inilongan na u bine a timmubu, kanya awan nagbunga u bine hide. 8Sakay te netákneg be a bine tu maganda a luta. Timmubu iye sakay immoya, sakay nagbunga ti makpal, te tággi tállo a pulo sakay ánnám a pulo, sakay tággi datos a butil u bawat essa.” 9Kinagi pa ni Jesus, “Hikam a mágsaneg ay dapat moy iye a pakasanigán sakay intendiyán.”

U Layunin nu Talinghaga

(Mateo 13:10-17; Lukas 8:9-10)

10Nikuna a mágge essa dálla ti Jesus ay ummadene nikuna u sangan tu mágsaneg hide kaguman u disepulus na hide. Inaged de a ipaliwanag na u talinghaga. 11Kinagi nide ni Jesus, “Nepagkaluub nikam u karapatan a matukuyan u lihim tungkul tu pághare nu Diyos, pero tu agum ay nekagi iye tu pamamag-itan nu talinghaga. 12Tánni,

‘Maski ketan de ay awan di pade maintendiyan,

sakay makánsanigán man hide ay awan hide makaintendi.

Dipo ni makaintendi nakwa hide ay nagsise hide tu kasalanan de hide

sakay napatawad nakwa hide.’”

U Gusto a Kagiyán nu Talinghaga tungkul tu Mágsabug

(Mateo 13:18-23; Lukas 8:11-15)

13Káttapos ay tinanung hide ni Jesus, “Awan moy pad beman la naintendiyan i talinghagaan iye? Kodya moy a maintendiyan u agum pa hide a talinghaga? 14Iye u gusto a kagiyán nu talinghaga: u insabug nu mágsabug ay u Upos nu Diyos, 15sakay u bine hide a netákneg tu dilan ay u tolay hide a nakasaneg tu Upos nu Diyos. Pero tu káddemát ni Satanas ay inagew na u Upos nu Diyos a nasaneg de.

16U kapareho nu bine a netákneg tu mabito-bito a luta ay u nágsaneg hide tu Upos nu Diyos sakay tinanggap de a te kasayaan u Upos nu Diyos. 17Pero awan naggimot u upos nu Diyos tu puso de, kanya awan hide nanatile. Nikuna demattan hide nu sari-sare a kahirapan oni págdusta dipo tu upos nu Diyos, ay pagdaka hide a immatras.

18Sakay u agum a bine a netákneg tu kalamonan ay u tolay hide a nakasaneg tu upos nu Diyos, 19pero dipo tu kabalisaan ti biyag, págmahal tu pilak, oni kákkasoh tu sari-sare a bagay, u Upos nu Diyos ay nawan tu puso de kanya awan iye nagbunga.

20Iye be u kapareho nu bine a nesabug tu maganda a luta. Hide u tolay a nágsaneg sakay nangtanggap tu Upos nu Diyos sakay mágbunga-bunga ti makpal; tehhod a tágtatallo a pulo, te tágga-ánnám a pulo sakay tehhod a tággidatos.”

Awan ti Lihim a Awan Mehayag

(Lukas 8:16-18)

21Sakay kinagi pa nide ni Jesus, “Taban beman u simbuwan sakay takáppán tu págtakalan o kaya itagu tu sahok nu táttidugen? Awan beman kapag nataban dán ay idátton itod tu talaga a págtupuwan? 22Awan ti netagu a awan melantad, sakay awan ti sekreto a awan mehayag.” 23Kinagi ni Jesus “Hikam a mágsaneg hide, dapat moy iye a isipán sakay intendiyán.”

24Indugtung na pa, “Intendiyán moy ti mapiyya u nasaneg moy. U panukat a ginamit moy tu agum ay siya be u panukat nikam, sakay mas pa hona.#4:24 U essa pa a gusto a kagiyán ni iye ay iyatad nu Diyos u karunungan nikitam ayun ni sakodya kitam a ka sigasig a magadal tu upos na oni mágsaneg. 25Dipo u tehhod dán ay atádden pa, pero u awan ay alapán pa maskin u badit a katoy nikuna.”#4:25 U gusto a kagiyán ni iye ay u tolay a mágsaneg sakay maniwala ay madag-dagen pa u tukoy na, pero u tolay a awan mágsaneg sakay awan mangtanggap ay maibutan pa nikuna u sabadit a natukuyan na.

U Talinghaga nu Bine a Timmubu

26Kinagi pa ni Jesus, “U pághare nu Diyos ay konna tu essa a nagsabug tu bine tu buked na.#4:26-29 Basaán tu Mateo 13:24-30. 27Mátdug siya ti gibi sakay umikat ni aldew dán. Pero u bine ay magtubu sakay umoya, pero awan na tukoy ni kodya. 28U luta u magpatubu sakay magpabunga tu mula; lumuwas pa u duun na, bagu u ohay; sakay káttapos ay makpal a butil. 29Sakay ni naluto dán ay aniyán dán iye nu kekkao, dipo odas dán a aniyán.”

U Talinghaga nu Bukál nu Mustasa

(Mateo 13:31-32, 34; Lukas 13:18-19)

30Sakay kinagi pa ni Jesus, Hádya tam pa a meparehas u kahariyan nu Diyos? Ánya a katalinghaga u gamitán tam para mepaliwanag iye? 31“U pághare nu Diyos ay kapareho nu bukál nu mustasa, iye u pinakabadit tu atanan a bukál. 32Pero ni memula dán sakay tumubu dán ay magin pinakamalangkaw iye tu atanan a mula; sakay magpinget pa ti mágkabaál. Kaya maare a paglobunan nu manok hide u pinget na a malidum.”

U Pággamit tu Talinghaga hide

33Konna hod u págtoldu ni Jesus tu tolay hide, maggamit siya ti makpal a talinghaga, ayun tu kaya de a pággintendi. 34Awan siya nagtoldu tu tolay hide a bakán a tu pamamag-itan nu talinghaga, pero ipaliwanag na labe tu disepulus na hide u atanan ni hidi-hidi dálla.

Pinaimang ni Jesus u Bagyo

(Mateo 8:23-27; Lukas 8:22-25)

35Nadid, tu kagibiyan ni itod a aldew ay kinagi ni Jesus tu disepulus na hide, “Umahabes kitam ti dibilew.” 36Kanya linakaden de u katolayan sakay simmakay hide tu abang a sássakayan ni Jesus. Tehhod a agum pa abang a náksabay nide. 37Mentaras a mággabang hide ay inabut hide nu mabegsák a bagyo, salpuk-salpukán nu dáddakkál a tagmák u abang de kaya halus maputat dán ti limas. 38Tidug ti Jesus a nakapunganan tu dipos nu abang. Linukag siya nu disepulus na hide, “Maisto, awan ka beman ti pák-alam maski malimás kitamon?”

39Immikat ti Jesus sakay pinaimang na u pahás ay tu tagmák. Kinagi na tu pahás, “Umimang ka dán!” sakay kinagi na tu tagmák, “Lumantap ka dán!” Ummimang ngane u pahás sakay limmantap u diget. 40Káttapos ay kinagi na tu disepulus na hide, “Bakin a manteng kam? Hanggan pad beman nadid ay awan kam pad la ti pánnampalataya nikán?”

41Garabi u ánteng de sakay nagtaka hide. Kinagi de tu bawat essa, “Ti deya wád iye? Maski u pahás sakay u tagmák ay sumunud nikuna!”

Currently Selected:

Markos 4: MBJC

Highlight

Copy