Markos 5

Pinagpiyya ni Jesus u Lállake a Sináddáp nu Madukás a Ispirito

(Mateo 8:28-34; Lukas 8:26-39)

1Nadid ay nakademát dán hide tu dibilew nu minalno, tu lugar nu Garaseno hide. 2Tu káawas ni Jesus tu abang ay tinagbu siya nu essa a lállake a sináddáp ni madukás a ispirito. 3Mámmágyan siya tu páglábbángngan. Awan dán ti makabilod nikuna maskin kadena pa u gamitán de. 4Sangan di dán siya a beses a igapus ti kadena tu kamát na ay tu tikád na, pero bágsot-bágsután nala. Awan dán ti makabilod nikuna. 5Aldew ay ti gibi ay mágpapákhawán siya tu páglábbángngan sakay tu buki-buked, sakay táttalinguwan na be u sadile na tu mágkatadám a bito.

6Adeyo palla ti Jesus ay netan dán siya nu lállake. Nagginan siya a paadene ni Jesus sakay limmuhud tu atubang na. 7Sakay pinumákhaw siya ti mabegsák, kinagi na, “Jesus, Anak nu Kataas-taasan a Diyos, ánya i pákalam muway nikán? Ipananto mo tu ngahan nu Diyos a awanák mo pahirapan!” 8Kinagi na iye dipo inyutus ni Jesus, “Madukás a ispirito, lumakad ka ti tolayan iye!”

9Tinanung siya ni Jesus, “Ánya ngahan muwáy?”

“Kakáppalan, u ngahan ko dipo makpal kame,” kagi na. 10Sakay nákkekagbi u madukás a ispirito ni Jesus a diyan na hide paadeyuwán ti lugaran itod.

11Nadid, tu digdig nu buked ay te kababuyan a magsábbuk. 12Nákkekagbi ni Jesus u madukás a ispirito, kinagi na, “Ni maare ay pasáddáppán mu kame dálla tu kababuyan.” 13Pimmayag ti Jesus, immibut u mágkadukás a ispirito tu lállake sakay simmáddáp hide tu kababuyan. Káttapos ay nággaginanán a padegson u mahigit a duwwa a libu a babuy tu tunay ti langkaw a pang-pang a diri-diretso a sinumegbu tu dinom kanya nágkalimás hide.

14U mággalaga hide tu babuy ay nággaginanán hide a patamo tu banuwan tu babaryo sakay imbaheta di hod u nangyare. Kanya immangay hod u tolay hide para ilingán de u nangyare. 15Tu káddemát de tu kán Jesus ay netan de u lállake a sináddáp ni madukás a ispirito a mággetnod nakabadu dán sakay mahusay dán siya. Nikuna a ketan nu tolay hide ay nanteng hide. 16Imbábbaheta nu tolay hide u netan de a nangyare tu lállake a date a sináddáp nu mágkadukás hide a ispirito sakay tu kababuyan.

17Dipo ti iye ay nákkekagbi u tolay hide ni Jesus a lumakad siya tu banuwan de.

18Nikuna a sumakay dán ti Jesus tu abang ay nákkekagbi nikuna u lállake a date a sináddáp ni mágkadukás a ispirito a kuyugán na siya, 19pero awan pimmayag ti Jesus, nan kinagi na tu lállake, “Sumole ka dán tu pamilya mo sakay ibaheta mo nide u atanan a ginimet niko nu Panginoon sakay ni kodya naka a kinagbiyan.”

20Kanya limmakad u lállake sakay immangay ti Decapolis sakay imbaheta na hod u ginimet nikuna ni Jesus. Sakay nagtaka u atanan a nakasaneg tungkul tu pangyayare.

Nabiyag u Anak ni Jairo sakay Nagpiyya u Bábbey a Makándigiyan

(Mateo 9:18-26; Lukas 8:40-56)

21Simmakay ti Jesus tu abang sakay nagsole ti dibilew. Katoy palla siya tu bihebi nu minalno ay kinadahupodupan dámman siya nu tunay ti kakpal a tolay. 22Katoy bi hod u essa a puno tu sinagoga a ti Jairo u ngahan na. Pákketa na ni Jesus ay lummuhud siya tu táttikádden na 23sakay nákkekagbi, “Magipepatay dán u anak ko a dalagita. Mahabag ka, ni maare ay mákkuyog ka nikán sakay itupo mo i kamát muwe nikuna, tán magpiyya siya sakay mabiyag!”

24Nákkuyog nikuna ti Jesus. Pero immunonod be nikuna u tuna't kakpal a tolay, kanya halus maáldit dán siya. 25Kaguman be hod tu mamággálditan u essa a bábbey a sapulo ay ti duwwa dán a taon a mágdadigiyán. 26Makpal a hirap u nadanas na tu págpagamot na tu sari-sare a mággamot. Naubus na dán u atanan a ari-ariyan na tu págpagamot, pero awan nagpiyya nan lalu pa a himmigpit u saket na. 27Nikuna a nabaheta na u makataka-taka a ginimet ni Jesus ay nákpágálditan siya tu tolay hide para matawiden nala u damit ni Jesus. 28Dipo naisip nu bábbey: “Ni makahap kula i damit nae ay magpiyyaák dán.” 29Pagdaka ngani a ummimang u págdigi na sakay naramdaman na a nagpiyya dán siya.

30Agad be a nabate ni Jesus a te nagpiyya dipo tu kapangyariyan na, kanya simmuleg siya tu tolay hide sakay tinanung na hide, “Ti deya i nangkahapay ti badu kuwáy?”#5:30 Basaán tu Lukas 5:17.

31Kanya timmábbeg u disepulus na hide, “Bakin itanung mo ni ti deya i nangkahapay ti badu muwe? Tuna't kakpal i katolayane a mamággálditan!” 32Pero tulos-tulos la a summuleg ti Jesus para ilingán na ni ti deya i nangkahapay tu badu na. 33Palibhasa tukoy nu bábbey u nangyare, kanya immadene siya a magpágpág ti ánteng sakay limmuhud tu atubang ni Jesus. Sakay kinagi na u buo a tatahoden tungkul tu nangyare nikuna. 34Pero kinagi nikuna ni Jesus, “Anak, pinagpiyya ka nu pánnampalataya mo. Kadmudán sakay pamayapaan mo isip muwe. Nagpiyya ka dán.”

35Mentaras a kauhunán ni Jesus u bábbey ay dimmemát u sangan a tolay a gábwat tu bilay ni Jairo. Kinagi de ni Jairo, “Patay dán u anak mo. Dyan mo dán abalaán i maistuwe.”

36Pero awan pinansin ni Jesus u kinagi de. Nan kinagi na ni Jairo, “Dyan ka manteng, sumampalataya ka la.”

37Sakay awan pinayagen ni Jesus a mákkuyog u katolayan maliban di Pedro sakay u matkaka a di Santiago ay ti Juan. 38Káddemát de tu bilay ni Jairo ay netan ni Jesus a mabalisa u tolay hod hide, sakay makánsangitán hide. 39Tu kássáddáp na tu bilay ay kinagi na tu tolay hide, “Bakin a marebuk kam sakay makánsangitán? Awan patay i anake nan tidug la siya.”

40Dipo tu kinagi na ay kinatawaan siya nu tolay hide. Pero pinaluwas na hide a atanan maliban tu tállo a disepulus sakay tu dáddakál nu anak, sakay simmáddáp hide tu páppágyanan nu anak. 41Tinawiden ni Jesus u kamát nu anak sakay kinagi na, “Talita koum,” u gusto na a kagiyán ay “anak, umikat ka!”

42Kaya pagdaka a immikat u anak sakay naglakad, sakay nagtaka a tahod u atanan tolay hod. U anak ay sapulo ay ti duwwa dán a taon. 43Sakay mahigpit hide a kinagiyan ni Jesus a dyan de kagiyán maskin ti deya u nangyare. Káttapos ay inyutus na a atádden de ti makan u anak.

Currently Selected:

Markos 5: MBJC

Highlight

Copy