انجیل لوقا 11

خداوند عیسی دِوا کَردِ

1ایی روج عیسی جِگا ایکا دِوا اَکری. وَقتی چَی دِوا تَمون آبَه، ایلَه چَی شاگردونکا بَی واتشَه: «چَمَه سرور، دوا کَردِ اَمه آموج بِدَ، هَته کن یحیا اِشتَن شاگِردِنِش آموتَه. 2عیسی اِینِش واتَه: «وَقتی دِوا بَکَرون، بِواجَه:

«”اَی آستامونیَه دَدَ،

اِشتِه نوم موقدّس ببو،

اِشتِه پادیشاهی با.

3چَمه روجَه نونی هَر روج اَمه عطا اَکَن.

4چَمَه گِناخون بِبَخش،

اِمی خونِه کن اَمه نی چَمه گِردِ قَرضدارون بَبخشِستیمون.

و اَمه وَرداوَردیکا مَوَ“‌.»

5و اَیِنِش واتَه: «کِرَم گِلَه شِمَه کا ایلَه رَفِق بدارِ، نیمَه‌ شَو چَی وَربشو و بواجِه: ”رَفق، سه گِلَه نون بَمن قرض آدَ، 6اِمی خونه کن ایلَه چمن رَفِقِن سَفَریکا آرَستَه یَه، و چی اییم نیَه تا چَی نَ کا بِنَرم،“ 7و چَی رَفِق کَه دِلَکا جواب بدَرِ: ”بَمن زَمَتیکا دَمَفَن، ایسَه دِ بَرَنگا اَچَرکَردَیَه، و چمن خردَنِن بَمِنهَ ختَه جِگاکانهَ. نِمَشا جِگاکا پِبوم و چی ایی بَتِه بِدَرِم.“ 8بَشِمَه باتیمَه، حتی اَگَم رَفِق گیری خونِه پِمَبو تا بَی چیی آدَرِ، رَفِقی سِمِج گیری خاطر پِرَب و چیی ایی کن اَ بَپیشَه بَی آرَدا.

9«بَه شمَه باتیمَه، بِپییَه کن بَشِمَه آدوعِه بَبیَه؛ بگَردَ کن پَیدابَکرون؛ بوکوعَه کن بَر شمهَ نار آج آرَبن. 10اِمی خونِه کن هَر کَم بَپیشَه، بِه دَست بوعَردی؛ و هر کَم بگَردِ، پَیدا بَکَی؛ و هر کَم بکو، بَر چَی نَ کا آج آرَبن. 11شِمَه دِلَکا دَدَ ایی هِستَه کن اَگَم چَی زوعَه بَیکا مای بخا، مای جِگا نَلَتی چَی دَست آدَرِ؟ 12یا اَگَم آگلَه بخا، بَی عقرب آدَرِ؟ 13پس اَگَم شمَه کن آوشَریرون بَموستیرون کن چِنتَه چاکَه خلا اون شَمَه خِردَنون بدَرَ، چَنَه ویشتَر آستامونیَه دَدَ، خدا موقَدَسَه روح اَ کَسِنی دَرِکن اَیکا بَپیشونَه.»

عیسی و بِعِلزِبول

14عیسی ایلَه گِنگَه پریان ایی نَفَریکا بِرِن بَرَکَریَه. وَقتی کن اَ پَریان اَ مِردیکا بِرِن بَرشَه، گِنگَ مِرد گَف آرمَه و مردوم حَیرون بینَه. 15ولی بَضی اَوونکا واتِشونَه: «عیسی، پَریانون رَئیس بِعَلزَبولی کاریَرینَه پَریانون بِرِن بَرَکَرد.» 16بَضیِن عیسی وَرداوَرد کَردِ خونِه، هَی اَیکا آستامونیَه نِشونَه ایی اَپیشون بَه. 17اَمّا عیسی کن چَوون فِکری اَزنیَه واتِشَه: «هر مملکَتیکا کن اِشتَن زِرَبَرا تقسیم ببو، نیفیت آرَبن و هر کَه ایی کن اِشتَن زِرَبَرا تقسیم ببو ویرَریست. 18اَگَم شَیطون نی اِشتَن زِرَبَرا تقسیم ببو، چِنتَه چَی پادیشاهی دَوام بوعَردی؟ اِمی خونِه کن شِمَه باتیرون اَز بِعَلزبولی کاریَرینَه پَریانون بِرِن بَمَکَرد. 19اَگَم اَز بِعَلزَبولی کاریَری نه پَریانون بِرِن بَمَکرد، شمَه شاگردِن چیکی کاریَری نَه اَوون بِرِن بَنَّکَرد؟ پس شِمَه شاگِردِن شِمَه سَردِرِ دیوون بَکَنَه. 20ولی اَگَم اَزخِدا خِنَرینَه پَریانِن بِرِن بَمَکرد، پس خدا پادیشاهی شِمَه سَر آمَیَه. 21وَقتی ایلَه قودورَ مِردی کن کامیلا مُسلَّحَه اِشتَن کَه کا پاستِه، چَی مال در امان بَمَندیَه. 22ولی وَقتی کن کَسی اَیکا قدور تَر بَی هِژما ببَرِ و چَی سَر پیروزآبو، اَ اَصلَحَه اِنی کن چَی سَردِرِ توکول کَردَشهَ بَیکا ویرَگَت، وچَی دارایی پِرَتارِست. 23هر کم بَمِنه نیه چمن زِرَبَرا یَه، و هر کم بَمِنَه جمع آنِکَرِ، ولاخ بَکَی.

شَیطونیَه روح آگَردِستِه

24«هَنگومی کن شَیطونیَه روح کَسی کا بِرِن بومَی، بی آوَ جِگا اونرا بَشیَه تا ایستراحَتیرا جِگا ایی بِوینِه. ولی وَقتی جِگا ایی پَیدا نییَکَرد باتیَه: ”اِشتَن هَه کَرا کن اَیکا آمَه ایمَه آمَگَردِست.“ 25وَقتی کن اَ جِگارا بومی، بَویندیَه کن اَ کَشون گزِ ژَیَه و مورَتَب کَردَشونه، 26چَی بَه دوملَه بَشیه و هفت گِلَه روح اِشتَنکا آوشَرتَر بوعَردیه، واَیِن گرد دِلَه دَنَش و اَجگاکا بَمَندین. آخیر بَسَر، اَ آدَمی حال چَی اَوَّله حالیکا بَدتَر آرَب.»

27هَتَه کن عیسی کایبَه اِم چییون واتِه، ژنی جمعیتی دلَکا تَته لَسَّه نَه واتشَه: «خَشی اَ ژنی حالیرا کن تِش زَندیَه و بَه تِه شِت آدوعَشَه.» 28ولی عیسی واتشَه: «خَشی اَیِنی حالیرا کن خدا کَلامی دَنَّرست و اَی اَنجوم بَدانَه.»

یونوس پَیغَمبَری نِشونَه

29وَقتی کن عیسی دووری جمعییَت هَتَه کایبَه ایضاف آبِه، عیسی واتِش: «اِم اودوم، چِه آوشَرَ اودومیَه. اَیِن نِشونَه ایی بَپیشونَه! ولی نِشونَه ایی اَوون آدوعِه نیبن غَیر اَز یونوس پَیغَمبَری نشونَه. 30چون هَته کن یونوس پَیغَمبَر نینوا آدَمونرا نشونَه بَه، اینسانی زوعَه نی، اِم اودومیرا نِشونَه بَبیَه. 31دیوون کَردِ روجیکا مَملَکَت صَبا مَلَکَه، اِم اودومی آدَمونَّه زِندَ آرَب و اَوون محکوم بَکَیَه، اِمی خاطیرکن اَ، دِنیا اَوَریکا آمَه تا سلِیمونِه پادیشا حِیکمَتی دَرَسهِ، ایسَه بِوینَه، کَسی اِم جِگاکارَ کن سلِیمونِه پادیشاکا یالتَرَ. 32نینوا آدَمِن دیوون کَردِ روجیکا اِم اودومی آدَمونَّه زِندَ آبون و اَوون مَحکوم بکَنَه، اِمی خونه کن نینوا آدَمِن یونوس پَیغَبَری پَیغومی خونِه توبَه کردِشونَه، ایسَه بِوینَه کَسی اِم جِگاکارَ کن یونوسیکا یالتَرَ.

جَندَکی چرا

33«هیچ‌ کم چرا رشون آنییَکَرد تا اَی نون آکَرِ یا قَدرَ ایی چَی سَریکا آنَرِ، بَلکَم چرا، چرا پایه سَر آرَنا تا اَیِنی کن دِلَه دَران شَپَقی بوینِن. 34اِشتِه چَم اِشتِه جَندَکی چرایَه. وَقتی اِشتِه چَم سَق ببو، گردِ اِشتِه وِجود نوریکا پَتلمَه بَبیه. ولی وَقتی کن اِشتِه چَم مچم ببو، اِشتِه جَندَک ظِلَماتیکا پَتلمَه بَبیَه. 35پس حواسِرون جَم ببو نِکِر نوری کن شِمَه دِلَکارَ ظِلَمات ببو. 36پس اَگَم گردِ اِشتِه جَندَک نورینَه پَتلَمَه ببو و هیچ جِگایی اَیکا تاریک مَبو، اَموقه هِنتَه زمانی کن چِرا نور بَتِه دتاوِیستیَه، کامیلا رِشونیکا بَبیشَه.»

بِرامِه، فَریسیِن و شَریعَتی قاضیون حالیرا

37وَقتی کن عیسی کایبَه گَف ژِ، ایلَه فَریسیون فِرقَه عالیمونکا عیساش غَذا هَردِرا صَلا ژِشَه. پس عیسی چَی کَرا شَه و سِفرَ سَرنشته. 38وقتی اَ فَریسی ویندِشَه کن عیسی یَهودیون رَسمی شیوار غذا هَردِ بَه نَ، اَول اِشتَن بالون نِشوشتِش، خَیلی تعجوب کردشَه. 39خِداوندعیسی بَی واتش: «شمه فَریسین قَدرَ و باخشاوی بِرنی پاکیَه بَکَرون، اَمّا شمَه باطین طَمَع و شَرارَتینَه پَتلَمه یَه! 40اَی نافَمِن، مَگَم اَ کن بِرِنی سِی آکَردَشه، دِلَش نی سِی آکَردَ نی؟ 41اَمّا اِشتَن صَدَقَه اون اَ چییِونیکا بدَرَ کن شِمَه وِجودیکارَ، اَموقه لازم بَبیَه کن شِمَه وِجود پاجا ببو.

42«بِرامِه شِمَه حالیرا اَی فَریسیِن! اِمی خونه کن شمه توراتی، دَه یَک آدوعَه حِکمی، حتی پوینَه و شِوِد و دییَرَ سَوزییونرا بجا بوعردیرون، ولی عیدالتی وخدا مُحَبَتی نادیدَ بَگَتیرون. بی اِم کن اِمون نادیدَ بیگِرَ اَ چییون نی پی اَنجوم بدَرَ. 43برامِه شِمَه حالیرا اَی فَریسین! اِمی خاطرکن رَی بَداشتیرون عیبادَتگا اون چاک تَرین جِگاکا بنشَه و مردوم کوچَه و بازاریکا بَشِمَه سلام بِواجن. 44بِرامه شمَه حالیرا! اِمی خاطر کن شمَه هِنتَه قَورونی شیوارینَه کن دیار نینَّه و آدَمِن بی اِم کن بِزنن چَوون سَریکا دَیوَرِن.

برامه شمَه حالیرا اَی فریسیِن و شَریعَتی قاضیِن

45ایله شَریعَتی قاضیِن عیسی جَوابیکا واتش: «اِستا، ته اِشتِه اِم گَفونَّه بَمَه نی ایهانت بَکَش.» 46عیسی واتشَه: «برامِه شِمَه حالیرا نی، اَی شَریعتی قاضییِن، اِمی خونه کن سنگینَه بارِون مردومی دوشی سَرپِنَرَ، و شِمَه حاضیر نینَّه کاریَریا حتی اَنگشتی بَی بِژَنَه. 47برامه شِمَه حالیرا اِمی خاطِر کن، شِمَه پَیغَمبرونی را، کن شمَه بابااون اَیِنِشون کِشتَه یَه، تِربهَ سِی آکَرَ! 48اِنتَرَکِه شِمَه اِشتَن بابااون کَاری شاهِیدینَه و چَوون کاری تَائید بَکَرون. اِمی خونِه کن اَیِن پَیغَمبَرِنِشون کِشتهَ و شمه چَوون تربَه اون سِی آکَرَ. 49اِمی خاطِیرَ کن خدا حِیکَمت واتش ” از چَوونرا پَیغَمبَرِن و رسولِن رَونَه بَکَمَه. اَمّا بعضیون بَکِشتینَه و بعضی اَوونکا اَیذَت آزار بَکَنَه.“ 50پس، گردِ پَیغَمبَرون خون کن چَوون خونی، دِنیا شِروو بِه کا تا ایسَه ویکَردَ شونه، اِم اودومی مِلیکارَ - 51هابیلی خونیکا بیگِه تا زَکَریا خون کن چَی خونی قِربونَه جگا و مَعبَدی موقدسَه جِگا وَسَطیکا ویکَردِشونَه. ها بَه شمَه باتیمَه کن اِم اودومی آدَمِن گرِدِ اِم چیون خونِه حیساب پس آنَّدا. 52بِرامِه شِمَه حالیرا اَی شَریعَتی قاضییِن! اِمی خاطِر کن شِمَه اَ بَرَنگا ایی کن خدا آزنِستِه را آج آرَب چَی اَچَری ویگَتَرونَه. نِه اِشتَن دِلَه بَشیرون و نِه بَشتیرون اَیِنی کن بَپیشونَه دِلَه دَشون، دِلَرا بِشون.»

53وَقتی عیسی اَ جِگاکا بَرشَه، توراتی مُعَلیمِن و فَریسیِن غَضَّبینه عیسی دوور جَم آبین وتقلا دَرِ بین کن اَی تحریک بکن تا خَیلی چییون خونه گَف بژَنِه 54و جیخِتَه بین تا چَی واتَه گَفینه اَی دوم دَرَفَنِن.

Currently Selected:

انجیل لوقا 11: CTB

Highlight

Copy