انجیل لوقا 13
13
توبه بکَرَ
1هَه موقِه، چَن نَفَر اَجگاکا بین و عیسا نَه جَلیلییِنی خونِه گَف ژِشونَه کن، وقتی کن کایبین قربونی کردِ، پیلاتوس اَیِنِش ایی جوری کِشتَش بَه کن چَوون خونی چَوون قِربونییون خونینَه یَکَی آکَردَش بَه. 2عیسی اَیِنِش جواب دوعَه: «گَمون بَکَرون اِم جلیلیِنی کن اِنتَرَ زجِر کَشتَشونَه، جلیلی دییَرَ آدَمونکا گِناخکارتربین؟ 3بَشِمَه باتیم کن اِنتَه نیَه، ولی اَگَم توبَه نِکَرَ شِمَه گِرد چَوون شیوار نیفلَه بَبیرون. 4و یا گمون بَکرون اَ هَجدَ نفر کن سْیلوآمی قَلَه چَوون سَریکا ویریستَه و اَیِنِش کِشتَه، گِردِ دییَر آدَمونیکا کن اورشَلیمیکا زندَگی اَکَرینَه خطاکارتر بین؟ 5بَشِمَه باتیم کن اِنتَه نیَه، ولی اَگَم توبَه نِکَرَ شِمَه گِرد چَوون شیوار نیفلَه بَبیرون.
اِنجیلَه داری مَثَل
6چَی بَه دومله عیسی اِم مَثَلی وَردشه: «مِردی اِنجیلَه داری اِشتَن اَنگِرَ باغیکا کَشتِشَه، اَموقه کن اَپیش بهَ چَی میوۀ بچینِه چی ایی چَی سَریکا پَیدا نِکَردشَه. 7اِشتَن باغَه وونی واتِش: ”دَیَس ایسَه سه سالَه کن اَز اِم جِگارا بومَمَه و اِم اِنجیلَه داری سَردِرِ میوَ دوملَه بَگَردِستیم، ولی چیی پَیدا نِمَکَرد. اِمی دبیر، چیرا دَدار خاکی هیچ آکَرِ.“ 8باغَه وون جواب داشَه: ”چمن سرور، بَرزِن اوسال نی اِم دار بومونِه. تا اَز چَی دووری گیت بکَم و کود آدَم، 9اَگَم پَشه سال میوَ وَردِشه کن خَیلی چاک؛ اَگَم نِوَردِش اَموقه اَی دَبیر.»
عیسی ایلَه شِلَه ژِنی شفا آداشَه
10ایلَه موقدسَه شَنبه روجونکا، عیسی یَهودیون ایلَه عیبادَتگا اونکا آموج اَدَریَه. 11اَجگاکا ژنی به کن ایلَه روحی اَی هَژدَ سال علیل آکَردَش بَه. چَی پِشت کَنگورَ آبه بَه و اَصلا نَشایَه راستامَندِ. 12وَقتی کن عیسی اَش ویندَ، اِشتَن وَر خِلِه کَردِشَه و واتش: «اَی ژِن تِه اِشتَن عِجِز گیریکا رَخیشَه!» 13چَی بَه دوملَه عیسی اِشتَن بالی اَ ژِنی سَریکا آناشَه و اَ ژِن جَخت دیک پا مَندَ و خِداش شکرکَردَ. 14اَمّا عیبادتگا رَئیس اِمیکا کن عیسی موقدسَه شنبَه روجیکا شفا آداشَه، برک آسرَنگِسته و مردومی واتِش: «هَفتَه دِلَکا شَش روج کاریرا تَیین بَیَه، اَ روجون دِلَکا بِرَ شفا بیگِرَ، نِه شنبَه روجیکا.» 15خداوند عیسی چَی جوابیکا واتِش: «اَی دِسَرَ کَرچَنگِن! هیچ کِرَم شمَکا موقدسَه شنبَه روجی دِلَکا اِشتَن گا یا اولاغی طَولَه کا آج آنیَکَرد و آو دوعِه خونِه بِرون نیَبَرد؟ 16نِباید اِم ژِن کن ابراهیمِ پَیغَمبَری نَتاجیکارَ و شَیطون هَژدَ سال بَی اسیر دَروَردَش بَه، موقدسَه شنبه روجیکا اِم ایسارَتیکا بِرَخِه؟» 17وَقتی عیسی اِم گَفون ژِشَه، گِردِ اَیِنی کن عیسی زِرَبَرا بین خَجالَت زَدَ آبین، ولی گِردِ مَردوم گِردِ کارِنِ پور شکوه و پور جَلالَی کن عیسی اَنجوم اَدَریَه خَشی اَکَرینَه.
خَردَلَه دونَه و خَمیرازی مَثَل
18چَی بَه دوملَه عیسی واتش: «خدا پادیشاهی چِه بَمَندیَه؟ اَی چه چیی تشبیه بکَم؟ 19اَ هنتَه خَردَلَه دونَه ایی شیوارَ کن مِردی اَی پگَتِشَه و اِشتَن باغیکا کَشتِش. اَ دونَه پِرمهَ و داری آبَه کن آستامونی پَرَندَاِن آمینَه و چَی بَشو خالی سَریکا لونهَ سِی آکَردِشون.»
20عیسی هَنی واتِش: «خدا پادیشاهی چه چیی تشبیه بکم؟ 21اَ هنته خَمیرازی شیوارَ کن ژنی اَی پِگَتِشه و سه کِنجَه آردَ نه یَندِ ژِشه تا گِردِ خمیر عَشتَه.»
تَنگَه بَرَنگا
22عیسی هَته کن اورشلیمی طرف را دَرِبَه، شَهرون و آوادیونرا اَشیَه و آموج اَدری. 23ایی نفر عیساکا دَپرسِسته: «چمن سرور کَمَه آدَمِنی نیجات بَگتین؟» عیسی اَیِنِش واتَه: 24«چَتین تَقَلا بکَرَ تا تَنگه بَرَنگاکا دِله دَشه، اِمی خونه کن بَشِمَه باتیم، خَیلیِن تَقلا بَکَنه تا دِلَه دَشون، ولی نینَّشا. 25وَقتی کن کهَ صاحیب پِبو و بَرَنگا دَبَستِه، هَتَه کن بِرنیکا پا مَندیرون، بَرَنگا بَکوستیرون و باتیرون: ”چَمَه سَروَر بَرَنگا چمَرا آکَه“! اَموقه اَ جواب آرَدا: ”نِمَموست کِرَم جِگاکا آمَه اینَه.“ 26چَی بَه دوملَه شِمَه باتیرون: ”اَمهَ بَتِنهَ هَردِمونه و هِنتِمونه و تِه چَمه کوچه اونکا آموج اَدَریشَه.“ 27اَمّا اَ بَشِمَه باتیَه: ”واتِمَه کن نِمَموست کِرم جِگاکا آمَه اینَه. اَی بدکارِن بَمنکا رَت آبه!“ 28اَموقه ای کن ابراهیم پَیغَمبَر، اسحاق، یعقوب و گِردِ پَیغَمبَرون، خدا پادیشاهی دِلَکا بِوینَه، ولی بوینَه کن شِمَشون اَ جِگاکا بِرون بَرفَندَیَه، بَبِرَمِستیرون و اِشتَن گازون یَندِ سَر بَسونوستیرون. 29مردوم شرقو, و غَربُ و شمالو و جنوبیکا بومَنهَ وخِدا پادیشاهی سِفرَ سَر بَنِشتینَه. 30ها، اَیِنی کن آخِرینَه اَوَل بَبین، و اَیِنی کن اَوَلینَه آخر بَبینَه.»
عیسی قورصَه شهر اورشَلیمی خونه
31اَ هَنگومیکا، چَنگِله فَریسیون فِرقَه عالیمونکا عیسی وَرآمین و واتِشون: «اِم جگا کا دییَرَجگا ایرا بش، اِمی خاطر کن هیرودیس حاکم اَپیشه بَتهِ بکشه.» 32عیسی اَیِنِش واتَه: «بشَه و اَ روآسی بِواجَه: ”اُمروج و سو سَه پریانون بِرِن بَمَکَرد و مردمی شفا آمَدا و سوّمَه روجیکا اِشتَن کاری تَمون آمَکَرد. 33اَمّا اومروج و سو سَه و پَشیرا پی اِشتَن راه ایدامَه بِدَرم، اِمی خونه کن مومکین نییه هیچ پَیغَمبَری غَیر از شهر اورشَلیم دییَرَ جِگا اییکا بکشن.“ 34اَی اورشلیم، اَی اورشلیم، اَی شَهری کن پیغَمبَرون بَکشتیش و اَیِنی کن اِشتِه وَر رَونَه بَبین سِنگسار بَکَش! چَنکَرَاَپیم بَه هنته کَرگی کن اِشتَن کیجه اون اِشتَن پَرون بنیکا جَم آرَکَرد، اِشتِه خِردَنون ایی جِگاکا گِرد آکَرم اَمّا نَپیربَه. 35دَیَس شِمَه که آهَشتَشونَه و تَیَه. بَه شمَه باتیمَه کن دِ بَمن نینَّویند تا زمانی کن بِواجَه: ”موتبارَکَ اَ کن، خداوندی نومینَه آ.“
Currently Selected:
انجیل لوقا 13: CTB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
