انجیل لوقا 2
2
عیسی مسیح دِنیا آمِه
1اَ روجون دِلَکا، فِرمونی رومی اِمپراطور، آگوستوسِیکا آمَه کن گردِ آدَمِنی کن رومی اِمپراطوریکا زندَگی اَکَرینَه پی سَر شُماری بِبون. 2اِم اَوَلین سَرشُماری بَه کن و کورینیوسی زَمونَه کا، کن سوریَه فرماندار بَه اَنجوم آبَه. 3پس، گِرد اِشتَن شَهریرا رَونَه بین تا چَوون نومی سَرشوماریرا بنوسن. 4یوسوف نی شَهرِ ناصِرَکا کن ولَتِه جَلیلیکا بَه، ولَتِه یَهودیَه، داوود پادیشا شَهریرا شَه، کن اَ شَهری نوم بیت لَحِم بَه، اِمی خاطِر کن یوسوف داوود پادیشا اودوم و نَتاجیکا بَه. 5یوسوف اَ جِگارا شَه تا اِشتَن پَیوَندی مَریَمینَه کن خامیلَه بَه سَر شُماریکا نوم نِویسی بِکرن. 6وَقتی کن اَجگا کا بینَه، مَرَیمی زَندِ وَقت آرَستَه. 7مریم اِشتَن اَولین خردَن کن زوعَه بَه دِنیا وَردِشَه. اَ، خِردَنی قونداقی دِلَکا پِپِشتِشَه و آخوریکا خِسام نیشَه، اِمی خونِه کن مِسافیر خونَکا چَوونرا جِگانِبَه.
شونَ اِن و فرِشتَه اِن
8هَه اَطرافی ایسبیتیکا شونَه اِنی بینَه کن شَویرا کایبین اِشتَن رَمَه پاستِه. 9خداوندی ایلَه فرشتَه چَوونرا اَیر آبَه و خداوندی شکوه و جَلالی نور چَوون دُووریکا دَتاوِستَه. شونَه اِن بَرک تَرسِستین، 10اَ فرشتَه اَیِنِش واتَه: «مَتَرسَه، اِمی خونِه کن شِمَرا ایلَه خَشَه خبَری وَردَمَه، یالَه خَشَه خَبَری کن اِم قامی گردِ آدَمونرا یَه. 11اِمی خونه کن اومروج داوودِ پادیشا شهریکا، نیجات اَدَری شِمَرا دِنیا آمَه یَه. اَ، وَعَدَ آدوعَه مسیح و خِداوَندَ.» 12نِشونهَ شِمَرا اِم بَبیَه، تَرَخِردنی بَویندیرون کن قونداقی دلَکا پِپِشتَشونَه و آخوری دِلَکا خِتَه.» 13ایکَرَایی ایلَه یالَه لَشکَر، آستامونی فرشتَه اونکا اَیر آبینَه کن اَ فِرشتَه نَه خدا ستایش اَکَرینَه و اَواجینَه:
14« آستامونی کَفا تَرین جِگاکا شکوه وجَلال خدا را ببو،
و زَمینیکا صلح و سلامتی آدَمونیرا ببو کن خدا اَوونکا راضیَه.»
15وَقتی فرشتَه اِن چَوون وَریکا آستامونیرا شینهَ، شونَه اِن یَندِ واتشون: «بِرَ بِیت لَحِمیرا بِشَم و اِم ایتفاقی کن دَگنستَیه و خِداوندْ اَمرا دیار آکَردَشَه، بِوینَم.» 16پس بِتاو بِتاوینَه شینَه و مریم و یوسوف و تَرَخِردَنی کن آخوری دِلَکا خِت بَه پَیدا کَردِشون. 17وَقتی تَرَخردَنی بَویندین، گَفی کن تَرَ خِردَنی خونِه، چَوونراشون واتَه بَه، جیگیر کردشون. 18گِردِ اَیِنی کن دَرَرَسینَه، شونَه اون گَفیکا تَعَجوب اَکَرینَه. 19ولی مریم، اِم چییون گردی اِشتَن یادیکا غَم هَریَه و اِشتَن دِلیکا چَوون سَردِرِ فکر اَکَریَه. 20شونَه اِن ویگَردِستینَه وهَر چیی خونِه کن دَرَستَشون بَه و ویندَشون بَه خِداشون شکر و ستایش کَردَ، چون هَر چیی کن اَیِنِشون واتَه بَه ایتفاق دَگِنِستَه.
21هَشتُمَه روجی آخِریکا، تَرَ خِردَنی سِنَت کَردِ وَقت آرَستَه، و چَی نومی عیسی پناشون. اِم هَه نومی بَه کن مَریَمی خامیلَه بِه، بَه نَ، اَ فرشتَه مَریَمی واتَش بَه.
عیسی مَعبَدیرا بوعَردین
22وَقتی موسی شَریعَتی رَسمی واتَنَه چَوون پاجا بِه روجِن تَمون آبین، یوسوف و مریم، تَرَ خِردَنی اورشَلیمیرا وَردِشون تا خداوندی تَقدیم بکَرن. 23دِرست هَتَه کن خداوندی شَریعَتیکا نوشتَه بَیَه کن: «رَمی اَولین دِنیا آمَه خِردَن، کن نِر ببو، خِداوَندیرا وقف ببو.» 24تا هَتَه کن خداوندی شَریعَتیکا نِوِشتَه آبَه یَه قربونی بکن، یعنی: «ایی گیتَه قُمری یا دِ گلَه کَفتِرَ کیجَه.»
25اَ زَمونَه کا، صالِحو و دیندارَ مِردی، شَمعون نوم، اورشلیمیکا زندَگی اَکَریَه کن خدا قامی اَراخِمونی مونتَظیر بَه و خدا موقَدسَه روح چَی سَریکا بَه. 26خدا موقدسَه روح شَمعونیرا دیارآکَردَش بَه، تا خداوندی مسیح نِوینِه، نیَمَرد. 27شَمعون خدا روح هِیدایَتینَه مَعبَدیرا آمَه و وَقتی کن عیسی دَدَ نَنَه تَرَ خِردَنِشون وَردَ تا شَریعَتی رَسمی خِردَنیرا اَنجوم بدَرن، 28شَمعون خِردَنِش اِشتَن کَشاکا گَتِشَه وخِداش ستایش کَردَ و واتِش:
29«اَی خداوند، ایسَه اِشتِه وَعدَ واتَنَه،
دِ اِشتِه پا سَری سَلامَتینَه اِم دِنیاکا ببَه.
30اِمی خونِه کن چمن چَمِن اِشتِه نیجاتی ویندَشَه،
31هَه نیجاتی ایی کن گردِ آدَمون چَمی نَ کا حاضیرآکَردَرَ،
32اَ نوری کن حَقیقَتی دییَرَ قامونرا دیار آرَکَرد.
و اِشتِه قامی عیزَّت بَبَخشِستیَه.»
33عیسی دَدَ و نَنَه، گَفِنیکا، کن عیسی خونِه شون واتَه بَه حَیرون آبینَه. 34شَمعون چَوونرا خَیرَ دِوا کَردِشَه و خردَنی نَنَه مَریَمی واتِش: «اِم خِردَن تَعیین بَیَه تا خَیلییِن خدا قامی دِلَکا بَرگِنِن و راست آبون، و اِم خِردَن ایلَه نِشونَه ایی بَبیَه کن چَی رودَکَر راست آنَّب. 35تا اِنتَرَکِه خَیلیون فکر کن اِشتَن دِلیکا دارن دیار آبو. شَمشیری نی اِشتِه دِلیکا ویرَش.»
36اَجگاکا پیرَ ژِنی حَنا نوم، کن پَیغَمبَر بَه اَمونیَه، اَ فِنوئیلی کِلَه و اَشیری طایِفَکا بَه. هَف سال حَنّا ایزدواجی بَه دوملَه چَی شو مَردَ، 37و چَی بَه دوملَه تا هشتاد و چار سالَگی ویوَ مَندَ بَه. اَ هیچ موقِه معبدی آنیَرزی، بَلکَم شَوانَه روج، روجَه و دِوا نَه خدا پَرَستش اَکَریَه. 38حَنّا نی، هَه هَنگومیکا نَرا آمَه و شروو کَردشَه خدا شِکر واتِه، و گردِ اَیِنی نَه کن اورشلیمی رَخِستِه چَم بَرا بینَه، عیسی خونِه گَف ژِشهَ.
39وَقتی کن یوسوف و مریم گردِ چییون خداوندی شَریعَتی واتَنهَ اَنجوم آداشون، اِشتَن شَهر، ناصِرَرا کن وِلَتِه جَلیلیکا بَه را ویگَردِستین. 40اَ خِردن یال وقودور آرَبیَه و حیکمَتیکا پَتلمه بَه و خدا را خاجَتی.
تازَ پِرَسَ عیسی مَعبَدیکا
41عیسی دَدَ و نَنه هر سال پِسَخَه عییدی خونِه اورشَلیمیرا اَشینَه. 42اَموقه کن عیسی دانزَ ساله آبَه، اَیِن عییدَ رَسمیرا اورشَلیمیرا شین. 43عیدَ روجون تَمون آبِه بَه دوملَه، وقتی چَی دَدَ نَنَه کایبین ویگَردِستِه، تازَ پِرَسَه عیسی اورشَلیمیکا مَندَ. ولی چَی دَدَ نَنَه اِمیکا بی خَبر بین، 44بَلکَم اِنتَرَفکراَکرینَه کن کاریوانی دِلَکارَ، ایی روج چَوون سَفَریکا گِذَشتَه. آخیر بَسَر شِروو کَردشون خیشون و آشنا اون دِله عیسی دومله گَردِستِه. 45و وقتی اَی نِویندِشونَه چَی دوملَه گَردِستِه خونِه اورشَلیمیرا آگَردِستین. 46سه روج کن گِذَشتَه، آخیر بَسَر اَی مَعبَدیکا ویندِشونه. عیسی مُعَلیمون دِلَکا نِشت بَه و چَوون گَفون گوش اَکَریَه و اَوونکا سوال دَرَپَرسی. 47هرکَمی کن عیسی گَفون دَرَرَسی، چَی فَهمیکا وچَی جَوابونکا کن اَدَریَه تَعَجوب اَکَریَه. 48اَموقه کن عیسی دَدَ نَنَه بَی اَجِگاکا ویندِشون خَیلی تعجوبِشون کَردَ. عیسی نَنَه بَی واتِش: «زَ چیرا اَمَنَه اِنتَرَ کَردِرَ؟ اِشتِه دَدَ و اَز وِرَ تَفشیشینَه اِشتِه دوملَه اَگَردیمون. 49عیسی واتِشَه: «چیرا چمن دوملَه اَگَردیرون؟ مَگَم نینَّموست کن اَز، پی چمن دَدَ کَکا بِبوم؟» 50اَمّا اَیِن سَر آنِگِنینَه کن عیسی چِه باتیَه. 51پس عیسی اَوونَّ رادَگِنِستَه و ناصِرَ را شَه و چَوون فِرمون آبَه. عیسی نَنَه گردِ اِم چییون اِشتَن دِلیکا غَم هَریَه.
52عیسی حیکمَتیکا و قَدو قامَتیکا یال آرَبیَه. اَ، هم خدا وَر خاجَتی بَه و هم مَردومی وَر.
Currently Selected:
انجیل لوقا 2: CTB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
