انجیل لوقا 1
1
مقدمه
1عالیجناب تِئوفیلوس، تا ایسَه وِرَ آدَمِنی تَقَلا کَردَشونَه اَ چییونی نِوِشتِه کن چَمَه دِلَکا ایتّفاق دَگِنِستَه بَه، 2دِرست هَتَه کن اَیِنی کن اِم چییون شِروو بِه کا اِشتَن چَمینَه وِیندَشونَه و اَیِنی کن خدا کَلامی پاسَری یِنین، اِم ایتّفاقون حَکایَتی اَمَشون آراستِنِستَه، 3اَز نی کن گردِ چییون، شِرووکا دیقَّتینَه بَرَّسی کَردَمَه، مَصلَحَتی اِنتَرَ ویندِمَه کن اَوون تَرتیبینَه شِمَرا عالیجناب تئوفیلوس بِنوسم، 4تا موطمَعین بِبَه اَ چیی اِنی کن آموج گَتَرونَه، دِرِستَه.
تَعمید اَدَرَ یحیی دِنیا آمِه پیش گویی
5هیرودیسی زَمونَکا کن یَهودیَه پادیشا بَه، اَبیا کاهینون کاولَکا کن مَعبَدی عالم بینَه، کاهِنی زندَگی اَکَریَه کن چَی نوم زَکَریا بَه. چَی ژِن اِلیزابِت نی هارونِه کاهینی نَتاجیکا بَه. 6اَیِن هَر دِ، خدا حِضوریکا صالح بینَه و خداوندی گِردِ حِکمون و فِرمونون بی عَیب اَنجوم اَدَرینَه. 7اَمّا اَیِن خِردَنی نِدارین، اِمی خونِه کن اِلیزابِت نازا بَه و هَر دِ پیر بین. 8ایی روج کن مَعبَدیکا خیدمَت کَردِ زَکَریا کاولَه نوبَه بَه و زَکَریا خدا حِضوریکا خیدمت کاهِنی اَکَریَه، 9کاهینِنون رَسمی شیوار، خداوندی مَعبَدی موقَدَسَه جِگا دِلَه دَشِه و بوخور سوتِه قورعه، زَکَریا نومیرا دَگِنِستَه. 10بخورسوتِه موقِه، جَماعَتْ گِرد بِرنیکا دِوا اَکَرینَه 11کن ایکَرَایی خداوندی ایلَه فرشتَه، هَتَه کن بوخورسوتِه جِگا راستَه وَریکا پا مَند بَه، زکریا را اَیر آبَه. 12زکریا چَی ویندِ کا تَتَه وَسَّه دَگِنِستَه و برک تَرسِستَه. 13ولی اَ فِرشتَه بَی واتِشَه: «زکریا، مَتَرس! اِمی خاطر کن خدا اِشتِه دِوا دَرَستَشَه، اِشتِه ژِن، اِلیزابِت تِرا زوعَه ایی بَزَندیَه، و تِه چَی نومی یَحیَی آشَنا. 14تِه خَشی و شادیکا پَتلَمَه بَبیشَه و خَیلیی اِن نی چَی دِنیا آمِه کا خَش آنَّب، 15اِمی خونِه کن اَ خداوندی چَمیکا یالَه شَخصی بَبییَه. یحیی نِباید هرگز شَراو و عَرَق لِوِ بژَنِه، حتی اَموقه کن نَنَه لوَکارَ نی، خدا مُوقَدسَه روح کا پَتلَمَه بَبیَه، 16و خَیلیون خدا قامیکا، بَه خداوند، چَوون خدا طَرَف آرَگاردِنِست. 17یحیی ایلیاسِه پَیغَمبَری روح و زبقینه، خداوندی کا نارتَر بومَیَه تا دَدَ اون دِلی خِردَنون طَرَف آگاردِنِه و نافِرمونون آموج بدَرِ کن اِشتَن بابا اون شیوار خداوندی رَی بدارِن، تا ایلَه حاضیرآمادَ قامی خِداوَندیرا آمادَ بکَرِ.» 18زکریا فرشتَکا دَپرسِستَه: «اِمی کِرَم جِگاکا بزنِم؟ اِمی خونه کن اَز پیرَ مِردیمَه و چمن ژِن نی پیرَ ژِنیهَ.» 19فرشتَه جواب داشَه: «اَز جبرائیلیمهَ کن خدا حِضوریکا پا بَمَندیم. خدا بَمن رَونَه آکَردَشَه تا بَتِنَه گَف بژَنم و اِم خَشهَ خَبَری تِرا بوعَرم. 20دَیَس، تا روجی کن اِم چییِن اَنجوم بِبون، تِه گنگ آشَبِن و گَف نیشَشا ژ. چون چمن گَفون کن چَی وَقتیکا اَنجوم بَبیَه، باوَر نِکَردِرَ. 21جَماعَت زکریا مُنتَظیر بین. اَیِن زَکَریا وِر مَندِ مَعبَدی موقَدَسه جِگاکا تَعَجوب کَردَشون بَه. 22وَقتی زکریا بِرِنیرا آمَه، نَشایَه اَوونَه گَف ژِ، پس اَیِن سَر آگِنینَه رؤیایی مَبَعدی موقَدَسَه جِگاکا ویندَشَه، اِمی خونِه کن تاکَه ایشا اَکری و نَشایَه گَف ژِ. 23وَقتی زکَریا اِشتَن پاسَری بِه نوبَه تَمون آکَردِش، اِشتَن کَرا ویگَردِستَه.
24اَ روجوون بَه دوملَه، چَی ژِن اِلیزابت خامیلَه پِرمَه و پِنج ماه اِشتَنِش مَردومی چَمیکا نون آکَردِشَه. اِلیزابِت اَواجیَه: 25«خداوند اِم کاری مرا کَردَشَه. اَ اِم روجِون دِلَکا بَمن لُطف کَردَشَه تا نوم بَندومی ایی کن چمن سَریکا بَه، مَردومی دِلَکا پِگِرِ.»
عیسی دِنیا آمِه پیشگویی
26الیزابتی خامیلَگی شَشومین ما دِلَکا، جبرائیلِ فرشتَه خدا وَریکا وِلَتِه جَلیلی ایلَه شَهری دِلَرا رَونَه آبَه کن اَ شَهری نوم ناصِرَ بَه، 27تا باکِرَ کِلَه ایی وَر بشو کن چَی نوم مریم بَه. مریم، یوسوف نومَه مِردی پَیوَندی بَه و یوسوف داوودِ پادیشا اودومیکا بَه. 28فرشتَه مَریَمی وَر شَه و واتش: «سلام بر تِه، اَی تِه کن خدا چَمیکا خاجَتی ایشَه، خداوند تِنَه دَرییَه.» 29ولی مریم چَی گَفون دَرَستِه خونِه بَرک تَتَه وَسّه دَگنِستَه و اِشتَنَه فِکر کَردِشَه کن اِم چِنتَرَ سلامی بَه. 30فرشتَه بَی واتِش: «مریم، مَتَرس! اِمی خونِه کن خدا چَمیکا خاجَتی آبَه ایشَه. 31دَیَس تِه خامیلَه آشَبن و زوعَه ایی دِنیا بوعَردیش و چَی نومی عیسی آشَنا. 32اَ یالَه شَخصی بَبیه و بَی خدایِه موتعالی زوعَه خِلِه بَکَنَه. خِداوندْ خدا، چَی بابا، داوودِ پادیشا تختِ پادیشاهی بَی عَطا بَکَیه. 33اَ تا اَبد یعقوبی نَتاجی سَردِرِ سلطنت بَکَیَه وچَی پادیشاهی هرگز تَمون آنیَبن.» 34مریم فِرشتَکا دَپرسِستَه: «اِم چِنتهَ ایمکان بَداشی، اِمی خونِه کن اَز باکِرَایمَه؟ 35فرشتَه بَی واتِشَه: «خدا موقدسَّه روح اِشتِه سَر نازل بَبیَه و خِدای مُتعالی خِنَر اِشتِه سَردِرِسا بَرَفَند، اِمی خاطِر، اَ دِنیا آمَه خِردَن، موقدَّس و خدا زوعَه خِلِه بَبیَه. 36دَیَس اِلیزابِت نی کن اِشتِه خیشَه، پیریگیری موقِه خامیلَه آبَه یَه وایلَه زوعَه اِشتَن لَوَکا دارِ. اَ کن نَشایَه خِردَن وَردِ، ایسَه شَش ماهَه کن خامیلَه پِرمَیَه. 37اِمی خونِه کن خدا وَریکا هیچ چیی غَیر مومکین نیَه!» 38مریم واتِشَه: «اَز خداوندی کَنیزیمَه. اَ چیی ایی کن چمن خونِه واتِرَ مِرا اَنجوم ببو.» اَموقه فرشتَه چَی وَریکا شَه.
مریم اِلیزابتی ویندِ را بَشی
39اَ روجون دِلَکا، مریم پِبَه و بتاو بتاوینه شهریرا شَه کن یَهودیَه کومونکا بَه، 40مَریم زکریا کَه دِلَه دَرمَه و اِلیزابِتیش سلام واتَه. 41وقتی کن اِلیزابِت مَریَمی سلامی دَرَستِشَه، چَی خِردَن چَی لَوَ دِلَکا وَشتو و واز آرمَه و اِلیزابِت خدا موقَدَّسَه روحکا پَتلَمَه آبَه، 42الیزابت تَته لَسّه نَه واتِش: «ژِنون دِلَکا، تِه خدا چَمیکا خاجَتی ایشَه و بَتِه بَرَکت آدوعَشَه، و اِشتِه خردن کن اِشتِه لَوَکارَ نی خدا چَمیکا خاجَتیَه. 43اَز کی بِبوم کن چمن سَروَری نَنَه، چمن وَر با؟ 44چون اَموقه کن اِشتِه سَلامی سَس، چمن گوش آرَستَه، خِردَن خَشیکا چمن لَوَ دلَکا وَشتو و واز آرمَه. 45خَشی اَ ژِنی حالیرا کن باور کَردِشَه اَ چیی ایی کن خداوندی طَرَفیکا بَشون واتَیَه، اَنجوم بَبیَه.»
مریم خداوندی ستایش بَکَی
46مریم واتِشَه:
«چمن جان خداوندی عَظَمتی ستایش بَکَی
47و چمن روح چمن نیجات اَدَرَ خدا خونه، خَشی بَکَیه،
48اِمی خونِه کن اَ اِشتَن کَنیزیی گِچ گیری سَردِرِ نَظَر کَردَشَه.
چیمی بَه دوملَه، گردِ اودومِن بَمن خَسمَند خِلِه بَکَنَه،
49چون اَ کن قادِرَ، مرا یالَه کارون کَردَشَه، چَی نوم قودوسَه.
50چَی رَحَمت اودوم اودومی بَه دوملَه، اَیِنیرا یَه کن بَیکا بَتَرسِستین وبَی حورمت بَکَن.
51خداوَند اِشتَن بازونَه، قودورَ کار کَردَشَه
و اَیِن کن اِشتَن دِلی فِکرونکا یالَه نارینهَ، وِلاخ آکَردَشه؛
52فَرمان رَوا اون، چَوون تختِ پادیشاهی سَریکا، بِنیرا دَرا کِنییَشَه
و فروتَنون دَوراشتَشَه؛
53اَنِشتا اون چاکَ چیونَّه سیر آکَردَشَه
ولی ثیروَتمَندون تَیهَ بال عَندَشَه.
54اَ اِشتَن رَحمَتی یاد آرَفَندِشهَ و
اِشتَن پاسَری، قام یَهودی بالی گَتَشَه،
55هَته کن چَمَه بابا اون، یعنی اِبراهیمِه پَیغَمبَریرا و چَی اودومیرا وَعدَ آدوعَش بَه کن تا ابَد اِم کاری بکَرِ.»
56مریَم حِدودَن سِه ماه اِلیزابتی وَر مَندَ و چَی بَه دوملَه اِشتَن کَرا ویگَردِستَه.
یحیی دِنیاآمه
57زمانی کن اِلیزابِتی زَندِ وَقت آرَستَه، اَ زوعَه ایی دِنیا وَردِشَه. 58خَمسوعَه اِن و خیشِن اَموقه کن دَرستِشون خداوند چِه یالَه رَحمتی الیزابتیرا کَردَشَه، اَینَه خَشی کَردِشونَه.
59هَشتومَه روجیرا، آمینَه چِلَینَه خِردَنی سِنَت بکَرن و اَپیشون بَه چَی دَدَ زکریا نومی چَی سَریکا بِنَرن. 60ولی چلَینَه خِردَنی نَنَه واتِش: «نِه! چَی نوم پی یحیی ببو.» 61اَیِن بَی واتشونَه: «اِشتِه خیشونکا کَسی اِنتَرَ نوومی داشتَش نیَه.» 62پس ایشا نَه، چلَینَه خِردَنی دَدَ کا دَپَرسِستین کن بَپیشَه خِردَنی نومی چه پِنَرِ. 63زکریا خواستِشَه چَیرا تَختَه لَتَه ایی بوعَرن، و چَی سَریکا نوِشتِش: «چَی نوم یحیی اَ!» و گرد تَعَجُوب کَردِشون. 64جَخت، چَی زون آج آبَه و خداش ستایش کَردَ. 65چَوون خَمسوعَه اِن گرد تَرسِستین. و یَهودیَه کومون هَمَه جِگاکا، مردوم گِردِ اِم ایتفاقون خونه گَف اَژَنینَه. 66هر کَم اِم گَفون دَرَرَسی، اِشتَن دِلیکا فکر اَکَریَه کن: «اِم خِردَن چِنتَرَ کَسی آرَبن؟» اِمی خاطِرکن خداوندی بال بَینَه دَرِبهَ.
زکریا پیشگویی کَردِ
67اَموقه خِردَنی دَدَ زکریا، خدا موقَدَسَه روح کا پَتلمَه آبَه و اِنتَرَ پیشگویی کَردِشَه:
68چَمَه قامی خداوند خدا، متبارک ببو،
اِمی خونِه کن اَ اِشتَن قامی کاریَری را آمَه یَه و چَوون راخنیِه خِریَشَه.
69اَ اِشتَن پاسَری داوود پادیشا اودومیکا ایلَه قودورَ نیجات اَدَری، چَمَرا رَونَه آکَردَشَه، 70هَتَه کن گِذَشتَکا اِشتَن موقَدَسَه پَیغَمبَرون زونینَه وَعدَ آدوعَش بَه کن،
71اَمه، چَمهَ غَنیمونکا
و گردِ اَینی کن اَمه کا نیفرت بَداشتین بالیکا، نیجات بدَرِ؛
72تا اَ رَحمَتی کن چَمَه بابا اون وَعدَ آدوعَش بَه آمونه
و اِشتَن موقَدَسَه عَهدی یاد آرَفَنِه؛
73هَه قَسمی اَنجوم بدَرِ کن
چَمَه بابا، ابراهیمِ پَیغَمبَریرا هَردِشَه،
74کن، اَمه چَمَه غَنیمون بالیکا براخنِه،
تا بی اِمکن چیی ایکا بتَرسَم بَی عیبادَت بکرم،
75چَی حِضوریکا،
موقَدَس و صالِح بِه نَه، چَمَه عُمری گِردِ روجِن.
76بَلَمَه، بَتِه خِدایهِ موتعالی پَیغَمبَر خِلِه بَکَنَه؛
اِمی خونِه کن خِداوَندیکا نار تَر بَشیشَه، تا چَی راه آمادَ آکَری،
77تا چَی قامی حیکمت بِدَری
کن چَوون گِناخون بَخشِستِنَه، نیجات بَگَتینَه.
78اِمی خونه کن چَمَه خِدارا پورَّحمَته دِلی هِستَه،
و اِمی خاطرَ کن، صِبَه آختاو آستامونی کَفاتَرین جِگاکا چَمَه سَر پِرَرا،
79تا اَیِنی سَردِرِکن ظِلَماتیکا ومرگی سا کا بَمَندین، شَپَق بژَنِه،
و تا چَمَه لِنگون صلح و سَلامتی مَسیریکا هیدایت بکَرِ.»
80اَ خِردَن یال آرَبیَه و چَی روح قودور آرَبیَه، و تا روجی کن بَشتن، خدا قامیرا آمونه وَیا وونیکا زندَگی اَکَریَه.
Currently Selected:
انجیل لوقا 1: CTB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
