مَتّی 11
11
گَفِن عیسی دربارۀ یحیای تعمیددهنده
1وقتی کن عیسی اِشتَن دانزَ شاگردی دستور داشَه کن چبکَرن، اَجگا کا رَونَه آبَه تا چَوون شهرونکا آموج بِدَرِو چَوونرا گَف بژَنه.
2وَقتی یحیی زیندانیکا، مسیح کارون تَریفی دَرستشَه، اِشتَن شاگردون چَی وَر عَندِش. 3تا عیسی کا دَپَرسن: «تِه هَه ایشه کن پی با، یا دییَر کَسی مُنتَظیر ببَم؟» 4عیسی جَواب داشَه: «بشَه و اَچیی کن بَویندیرون و دَرَستَرونه یحیی را جیگیر بکَرَ. 5کن ناویناان چَمِن آج بَبین، شِلِن گَل بَژَن، جِذانین شفا بَگَتین، کَرَختِن کان دَرَستِه، مَردَاِن زندَ بَبینَه و خَشَه خبرگیدَلیونرا ایعلام بَبی. 6خَشی اَ کَسی حالیرا کن بَمن شَک نِکَرِ.»
7وَقتی یَحیی شاگردِن کایبین شِه، عیسی، یحیی خونِه، جَماعَتینَه گَف ژِشَه و واتشَ: چیکی ویندِرا وَیاوونیرا شَه بیرون؟ مِردی ویندِرا کن، هنتَه لَه لَه ایی کن وا اَی هَروَریرا بَبَردیَه چَی شیوار ببو؟ 8پس چِه چی ویندِراشیرون؟ مِردی ویندِ راکن نرمَه خاصَه شندری دَکَردشَه؟ اَیِن کن نَرمَه خاصَه شِندِر، دَنَّکرد پادیشاهون کاخونکا بمَندیَه. 9پس چِه چیی ویندِرا بِرِن شَبیرون؟ ایلَه پَیغمبری ویندِ خونِه؟ ها، بَه شمَه باتیمَه کن، یحیی ایلَه پَیغمبریکا نی کَفا تَرَ. 10یحیی هَیَه کن چَی خونِه، مَلاکییِ پَیغَمبَری کیتاویکا نِوِشتَه آبَیَه کن:
«”ایسَه اِشتَن قاصیدی بَتِکا بَه نَ رَونَه آمَکَرد،
تا اِشتِه راه اِشتِه نَکا آمادَ آکَرِ.“
11حَییقتا بَه شمَه باتیمَه کن، تعمیداَدَر یَحیی کا یالتَر نَنَه زَندَ نیَه. اِم حالینَه آستامونی پادیشاهیکا گِچ تَرین آدَم، یحیاکا یالتَرَ. 12تَعمید اَدَرَ یَحیی دوورَ تا ایسَه، آستامونی پادیشاهی بَرک ظِلم ویندَشَه و ظالیمَه آدَمِن زورینه بَپیشونه ای بدَست بوعرن. 13اِمی خونه کن گِردِ پَیغَمبرِن و تورات، تا یحیی دوورَ پیشگویی اَکَرینَه. 14اَگَم بپیَه قِبول بکَر، یحیی هَه اِیلیا اِ پَیغمبَرَ کن پی با. 15هر کم چَی گوش دَرَرَست، دَرَسِه.
16«ولی اِم اودومی آدَمون چه چیی تَشبیه بِکَرم؟ اَیِن هِنتَه خردَنِنی شیوارینَه کن کوچَه بازارونکا بَنِشتین و اِشتَن سَخُوبالون سَس آدَرن و باتین:
17«”شمَرا لَه لَه ژِمونَه، دوشرون نِکردَ؛
شِمَرا مَرثیَه خَندمون سینه نِژِرون.“
18چون یحیی آمَه کن نه بَردی و نِه بِنتی؛ باتینَه: ”پَریانییَه.“ 19اینسانی زوعَه، آمَه کن هِم بَردی و هِم بِنتی؛ باتیرون: ”دَیَسَه لَوَلِرت و عَرَخَه هَرَ مِردیَه و خَراج ویگِرن و گِناخکارون رَفِقَه.“ شِمَه کارِن ثابیت بَکَیَه کن شِمَرا عقل و حیکمَت نیَه.»
شَهرِنی کن ایمان نِوَردِشون
20اَموقه عیسی دمَندَ شهرِنی چَمای کَردِ کن چَوون شهرونکا ویشتَر موعجیزَ کَردش بَه، اِمی خونه کن اَیِن توبَشون کردَ نِبَه. 21عیسی واتِش: «برامِه شِمَه حالیرا، اَی خورَزینی آدَمِن! برامِه شِمَه حالیرا، اَی بِیت‌صِیْدا آدَمِن! اِمی خاطِرکن اَگَم موعجیزَاِنی کن شِمَه دِلَکا اَنجوم بَه، شَهرِنِه صور و صیدونی دِلَکا اَنجوم آرَبی، اَجگا آدَمِن خَیلی چیمی بَه نَه پَلاس دَرَکَرین و خاکَ پَشیکا اَنِشین و توبَه اَکَرینَه. 22ولی بَشِمَه باتیمَه کن دیوون کَردِ روجیکا، مجازاتی تَحَمل کَردِ صور و صیدونی آدَمونرا راحَت تَر ببَیَه، تا شِمَرا. 23و شمَه اَی کَفَرناحومی آدَمِن، شمَه اَپیرون بَه تا آستامون اِشتَن کلَّه دَرَورازَ؟ هرگز، بَسکم شِمَه تا جَندَمی جیر نیفیت بَبیرون، اِمی خاطر کن اَگَم موعجیزَاِنی کن شِمَه شَهرونکا اَنجوم بَه شَهر سُدومیکا اَنجوم بِبیستِه، اَ شَهر تا اومروج باغی اَمونیَه. 24ولی بَشِمَه باتیمَه کن دیوون کَردِ روجیکا، مجازاتی تَحَمل کَردِ سُدومی آدَمونرا راحت تَر ببَیَه، تا شِمَرا.»
چَمن وَر بِرَ
25اَموقه عیسی واتش: « دَدَ، آستامون و زَمینی صاحیب، بَته شِکر بکَم کن اِم چییون اَلمندون و اَفَهمونکا نون آکَردَرَ و اَینیرا کن خِردَنون شیوارین دیار آکَردِر. 26ها دَدَ اِمی خونه کن اِم، اِشتِه پور لُطفَه ایرادَ اِنتَرَ بَه. 27چمن دَدَ گردِ چیون چمن اِختیاریکا آنوعَشَه. هیچ کَم زوعَه، دَدَ شیوار آنیَموست و هیچ کَم دَدَ، زوعَه شیوار آنیَموست، و اَیِنی کن زوعَه بَپیستیَه، دَدَ اَوونرا دیار آکَرِ.
28« اَی گِردِ اَیِنی کن بَرک زَمَت بَکشتیرون و شمَه دوشی بار سنگینه، چمن وَر بِرَ، کن اَز بَه شمَه راحتی دَرِم. 29چمن یوغی دوشی سَر بیگِر و بَمنکا آموج بِوینَه، اِمی خونِه کن اَز مُلایِمیمَه و دِلیکا فروتَنیمَه وشِمَه جانیرا راحَتی بَویندیرون. 30چیرا کن چمن یوغ راحَت تَرَو چمن بارسِبک تَر.
Currently Selected:
مَتّی 11: CTB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
