مَتّی 10
10
رسالت دانزده شاگرد
1عیسی اِشتَن دانزَ شاگردی اِشتَن وَر خِلِه کَردِشَه و اَیِنِش اینجار و زاکین داشَه تا شَیطونیه روحون بِرِن بَرکَرِن و هر داج و آزاری شفا بدَرن. 2اَ دانزَ رسولی نوم اِم بَه: اَوَل، شَمعون کن بَی پِطروس نی اَواجینَه و چَی برا آندریاس؛ زبدی زوعَه اِن، یعقوب و چَی برا یوحنی؛ 3فیلیپُس و بَرتولْما؛ توما و خَراجَ ویگرَ مَتّی؛ حَلفای زوعَه یعقوب و تَدّای؛ 4شَمعون وطن پرست و یهودا اَسْخَریوط کن عیساش خَیانَت کَردَ.
5عیسی اِم دانزَ نفری عَندِشَه و اَیِنِش واتَه:«غَیریهودیون وَر مَشَه و سامِریون هیچ کِرَم شَهرونکا دَله دَمَشَه. 6بَلکَم تاکَه قامِ اسرائیلی گین آبَه پَسون وَر بِشَه. 7هَنگومی کن بَشیرون، اییلام بکَرَ و بِواجَه کن آستامونی پادیشاهی نِزِکَه. 8آزاریون شفا بدَرَ، مَردَ اون زِندَ آکَرَ، جذانیون پاجا بکَرَو پَریانون بِرِن بَرکَرَ. مفت ویندَرونه و مِفتَه نی آدَرَ. 9شِمَه دالَه اونکا هیچ طِلِه یا نِقرَ یا مِسینَه سِکَه اِشتَنَه پِمَگِرَ. 10شمهَ سفری خونه، کولَه‌بار یا ایضافَه شَوی یا پا غَب یا دَسته لس پِمَگِرَ؛ اِمی خونه کن کاریگری روزی، چَی حَقَه. 11هر شهر یا آوادی ایکا کن دَله دَشیرون با ایتیبارَ آدَمی دوملَه بگَردَ و تا زمانی کن اَ شهریکا مَندیرون چَی کَکا بومونَه. 12وَقتی کَه ایی دِلَه دَرمینَه، ”سلام بواجَه.“ 13اَگَم اَکَه آدَمِن لَیاقَتِشون ببو، شِمَه سلامی بَرکت چَوون سَریکا بَنِشتیه، وگَر نِه شِمَه سلامی برکت شِمَرا آرَگَردِست. 14اَگَم کَسی شمَش قِبول نِکردَ و یا شمَه گَفونِشون گوش آنِکردَ، اَ کهَ یا شهریکا شِه موقِه، شمَه لنگون سری خاکی ویراشونه. 15حَییقتا بَشِمَه باتیمَه، دیوون کَردِ روجیکا، مجازاتی تَحمل کَردِ شَهرِسُدوم وغَمورَّه آدَمونرا راحت تر بَبی، تا اَ شَهری آدَمونرا.
16«اَز شمَه، پَسون شیوار وَرگون دِلَرا رَونَه بَکَم. پس نَلَتی شیوار هوش ببَه و کَفتِری شیوار معصوم ببَه. 17مردومیکا برحذر ببَه. اَیِن شمه دادگا اون دَست آنَّدا و اِشتَن عیبادَتگا اونکا بَشِمَه شَلاق بَژَنَه. 18بَشِمَه چمن خونه والییون و پادیشاهون وَردَراکِنِن تا چمن خونِه، اَوونرا و غَیر یَهودیونرا شاهیدی بِدَر. 19وَقتی شمَه تسلیم بکَن، تَفشیش دَنِگِنَه کن چِنتَرَ گَف بژَنَه یا چِه بواجَه. اِمی خونه کن اَ موقه کا، اَچیی کن پی بواجه بَه شمَه عطا بَبیَه. 20اِمی خونه کن اواج شمَه نینّه، بَلکَم شمَه آستامونیَه دَدَ روحَه کن شمَه زونینَه گَف بَژَیَه. 21برا اِشتَن برا و دَدَ اِشتَن خردنی مَرگیرا تَسلیم بَکَیَه. خردَنِن، اِشتَن دَدَ نَنَه زِرَ بَرا راست آنَّب و چَوون مردِ باعیث بَبَینه. 22مردوم گِرد چمن نومی خونِه شِمَکا نیفرَت بَداشتین. اَمّا هَرکم تا آخیر تاو بوعَر، نیجات بَگتی. 23وَقتی شهریکا بَشمَه اَیذَت و آزار کردِشون، دییَرَ شهریرا بیوریجه. حَییقتا بَه شمَه باتیمَه، نارتراز اِمکن بشاعَه قام ایسراییلی گردِ شَهرونرا بِشَه، اینسانی زوعَه بومَیَه.
24«نِه شاگرد اِشتَن اِستا کا کَفاتَرَ و نِه وَزیَر اِشتَن اَربابیکا. 25شاگردیرا هِم وَسّه کن اِشتَن اِستا شیوار آبو و وَزیَریرا کن اِشتَن اَربابی شیوار ببو. اَگَم کَه رئیسی بَعَلزِبول خِلِه بَکَن، چَنَ ویشتَر چَی کَه آدَمون بَدَنومینَه خِلِه بَکَن؟
مَترسه
26«پس، اَوونکا مَترسه. هیچ پوشامنیَه چیی ایی نیَه کن دیار آمَبو و هیچ نون آکَردَ چیی نیَه کن مَلوم مَبو. 27گَفِنی کن اَز ظِلَماتیکا بَشمَه واتِمَه، روشونیکا بواجَه و اَچیی کن شمه گوشیکا یَواشَلِه واتِه بَیَه، بومون سَردِرِ اییلام بکَرَ. 28اَیِنی کا کن فقط جَندَکی بَکشتینهَ و نینَّشا روحی کِشتِه کا مَترسه؛ خداکا بِترسه کن بَشای هِم روح و هِم شمه جَندَکی جَندمیکا نیفله آکَرَ. 29مَگَم دِ گله کیجَه ایی قرانیرا نینَّخرَت؟ با اِم همه، حتی ایلَه کیجه نی بیدون شمه آستامونیَه دَدَ زَمینی سَر بَنیَگنست. 30حتی شمَه کَلّه ذلفون گردی اَشمَردَشونه. 31پس مترسَه، اِمی خونَه کن شمَه ارزش هَزاران کیجَه کا ویشتَرَ.
32«هَر کم مردومی وَر اِشتَن گَوینَه بواجه کن چمن شِنَه، اَز نی اِشتَن گَوینه چمن آستامونیَه دَدَ وَریکا، باتیمَه کن اَ چمن شِنَه. 33ولی هر کَم مردمی وَر بَمن حاشا بِکَر، اَز نی چمن آستامونیه دَدَ وَریکا، بَی حاشا بَکَمَه.
34«فکر مَکَرَ آمَه ایمَه تا زَمینی سَردِرِ صلح بوعَرم. آمَه نیمَه تا صلح بوعَرم، بَسکَم آمَه ایمَه تا شمشیر بوعَرم. 35اِمی خونِه کن اَز آمه ایمَه تا:
«”زوعَه دَدَ زِرَبَرا،
کله نَنه زِرَبَرا و
وَیو، خِسِرگی زِرَبَرا راست آکَم.
36هَر کَسی کَه آدَمِن چَی غَنیمِن بَبین.“
37«هَر کم اِشتَن دَدَ یا نَنه بَمنکا ویشتَر رَی بدارِ چمن لایِق نییَه؛ و هر کم اِشتَن زوعَه یا کله بَمنکا ویشتَر رَی بدارِ چمن لایق نییَه. 38هر کم اِشتَن صلیبی پِنگِر و چمن دوملَه نا چمن لایِق نییَه. 39هر کم اَپیشه اِشتَن جانی غَم بَرِ اَی اَز دَست آرَدا و هر کَم اِشتَن جانی چمن خونِه اَز دَست بدَرِ اَی غَم بَردیَه.
40«هَر کمی شمه قِبول بکَرِ بَمن قبول کَردَشه و کَسی کن بَمن قِبول بکَرِ اَ کن بَمن روَنه آکردشَه قِبول کَردَشه. 41هر کم ایلَه پَیغمبری اِمی خونِه کن پَیغمبرَ، قِبول بکَرِ، پَیغمبری مِژدی ویرَگَت و هر کم ایلَه صالِحه آدَمی اِمی خونه کن صالِحَه قِبول بِکَر، صالِحه آدَمی مژدی ویرَگت. 42هر کَم ایلَه اِم گِچونکا اِمی خونه کن چمن شاگردَ، حتی ایی گوله سَرینَه آو آدَرِ، آمین بَه شمَه باتیمَه، اَصلا بی مژد نیَمَند.»
Currently Selected:
مَتّی 10: CTB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
