مَتّی 9
9
ایلَه شِلی شفا دوعِه
1عیسی لاتیکَه ایکا دَنشتَه و دَیراچه اَوَر، اِشتَن شهریرا آمَه.
2چند نفر، ایلَه شِلَه مِردی کن جیکَری سَر خِت بَه، عیسی وَر وَردِشونَه. عیسی وَقتی چَوون ایمانی بَویندی، شِله مِردیش واتَه: «بَلَمه، دلی زبق بدا، اِشتِه گناخِن بخشیدَ آبین.» 3اِم هَنگومیکا، توراتی بعضی معَلیمونکا بَشتَنَه واتِشون: «اِم مِرد کِفر باتی.» 4ولی عیسی کن چَوون فکری اَزنیَه واتِش: «چیرا اِشتَن دِلیکا شَیطونیه فِکر بَکَرون؟ 5کِرَم گِلَه واتِه راحَت تَرَ: ” اِم کن اِشتِه گناخِن بخشیدَ آبَیَه،“ یا اِمکن ”پِب و گَل بِژَن“؟ 6ولی اِمی خاطر کن بزنَه اینسانی زوعَه زَمینی سَردِرِ اِم زاکینی دارِ تا گِناخون بِبَخشِه.» - شِلَه مِردی واتِش: - «پِب اِشتَن جیکَری پِگِه و کَرا بش.» 7اَ مِرد راست آبه و کَرا شَه. 8وَقتی مردووم اِم ایتفاقی بَویندینَه، تَرسِستین و خدایی کن اِنتَرَ زاکینی آدَمون بَخشِستَشَه، سِتایِش کَردِشون.
عیسی مَتی صَلا ژِشَه
9وَقتی عیسی اَجگا کا کایبَه شِه، مردی کن چَی نوم مَتّی بَه و خراج ویگَتِه جگا دَکَکا نِشت بَه ویندِشَه. عیسی مَتَّاش واتَه: «چمن دوملَه بِه!» متّی راست آبَه وچَی دوملَه رَونَه بَه.
10وقتی کن عیسی مَتّی کَکا سفرَ سَر نِشت بَه، خَیلی خَراج ویگِرن و گناخکارونکا نی آمینَه و بَینَه و چَی شاگردونَّ هَم سِفَرَ آبین. 11وَقتی فَریسیون فرقه عالیمِن اِمی ویندشون و عیسی شاگِردِنِشون واتَه: «چیرا شمَه اِستا خَراج ویگِرون و گناخکارونَّ غذا بَردی؟» 12ولی وقتی عیسی اِمی دَرستشَه، واتِش: «اَیِنی کن آزاری اینَه دوختورِشون بَپیستیَه نِه اَیِنی کن سَقینَه. 13بِشَه و اِم کلامی مَعنیکا سرآگِنه کن: ”اَز رحمَت بَپیمَه، نِه قِربونی.“ اِمی خونه کن اَزآمه نیمه تا صالِحَه آدَمون صَلا بِژَنِم، بَلکَم آمَه ایمَه تا گِناخکارون توبه کَردِرا صَلا بژَنِم.»
سوال روجَه خونِه
14اَموقه یَحیی شاگردِن عیسی وَرآمین و واتِشون: «چیرا اَمه و فَریسیون روجَه بَگَتیمون، ولی اِشتِه شاگردِن روجَه نینَّگَت؟» 15عیسی جواب داشَه: «مَگَم بَبی وَیواَوَری مِیمانِن تا زمانی کن بَگ اَوونَّه دَرِ، عازیَه بیگِن؟ ولی روجِنی بومَنَه کن بَگی اَوونکا وینَّگَت، اَموقه اَیِن روجَه بَگَتینَه. 16هیچ‌کَم تازَ پارچَه ایی کن آو دَشه نییَه، کَنه شندریکا پینیک نیَژ، اِمی خونه کن پینیک شِندریکا جیرَوَجیست و شندری پِزَریستَه جگا ویشتَر بَبیَه. 17و هَته نی تازَ شَراوی کَنه تولوقیکا دَنینَکرد، اِمی خونه کن اَگَم اِم کاری بِکَن، چون تازَ شَراویرا هَنوزَنی گاز هِستَه، تولوقون پِرَزارنست و شَراو ویرَبِن و تولوقِن هیچ بَنَّش. بَسکم تازَ شراوی تازَ تولوقونکا دنَّکرد تا هر دِ سالم بومونِن.»
ایلَه کِلَه زِندَ آکَردِ و ایلَه ژِنی شفا آدوعَه
18هَه حالیکا کن عیسی اِم گَفون چوونرا اَواجیَه، یَهودیون عیبادَتگا ایلَه رَئیسونکا، چَی وَر آمَه و چَی نَکا زِنگ ژِشَه و واتِش: «چمن کلَه هِم ایسَه مَردَ. ولی تِه بِه و اِشتِه بالی چَی سَریکا بِنَه کن زِندَ آرَبن.» 19عیسی پِبَه و اِشتَن شاگردونَّه بَینه شَه. 20هَه هَنگومیکا، ژِنی کن دانزَ سال بَه خونریزی داری، عیسی پِشتیکا بَی نِزِک آبَه وچَی ردا پَرَ دَست آسا کَردِشَه. 21اِمی خونه کن اَ ژِن بَشتَنَه واتَش بَه: «اَگَم حتی چَی ردا دَست آسا بکَم شفا بَگَتیم.» 22عیسی آگَردستَه و بَی ویندشهَ و واتِش: «کِلَمَه، اِشتِه دلی زبق بِدا، اِشتِه ایمان بَتِه شفا آدوعَشَه.» جَخت، اَ ژِن شفا گَتِشَه. 23هَنگومی کن عیسی اَ رئیسی کَه دِلَه دَرمَه ونوحَه اَخونِن و آدَمِنی اَوینیَه کن نارَ و عازیَه اَکَرین. 24واتشَه: « بَرشَه بِرن. اِمی خونه کن کِلَه مَرد نَی، بَسکَم ختَه.» ولی اَیِن عیساشون بوکَه خوروستِه گَتَه. 25عیسی وَقتی آدَمون بِرِن بَرکَردش، دَله دَشهَ و کلهَ بالی گَتِشَه و اَ راست آمَندَ. 26اِم ایتفاقی خَبَر اَ مَنطَقَه اِم سَر اَ سَریکا پَخش آبه.
دِ ناوینا شفا دوعِه
27هَنگومی کن عیسی اَجگا اَشیَه، دِ گِلَه ناویناَ مِرد چَی دوملَه اَوریجینَه و جِکَّله اَژَنینَه: «داوودِ پادیشا زوعَه، اَمه رَحم اَکَن!» 28وَقتی کن عیسی کَه دِلَه دَشَه، اَ دِ مِرد چَی وَر آمین. عیسی اَوونکا دَپرسستَه: «ایمان دارَ کن بَشامَه اِم کاری اَنجوم دوعِه؟» اَیِن جواب داشونَه: «ها، آقا!» 29چَی بَه دوملَه عیسی چَوون چَمی دَست آسا کَردِشَه و واتِش: «شِمَه ایمانی اندازَ شِمَرا اَنجوم ببو.» 30جَخت چَوون چَمِن آج آبین. عیسی اَیِنِش غَدِقَن کردَ واتِش: «حواسرون ببو کن کَسی اِم ایتِفاقیکا سَر آمَگِنِه.» 31ولی اَیِن بِرِن برشینَه و اِم ایتیفاقی خَبَری اَ مَنطَقه گِردِ جگااونکا پخش آکَردشون.
32هَه حالیکا کن اَیِن بِرِنیرا اَشینَه، پَریانیَه مِردی کن گِنگ بَه، عیسی وَر وَردشونَه. 33وَقتی کن عیسی پَریانی اَیکا بِرِن بَرکردشَه، اَ گِنگَ مردِی زون آج آبَه. آدَمِن تَته وَسَّه نه اَواجینَه: «اِنتَرَ چیی ایی هرگز ایسرائیلیکا ویندَ شون نی!» 34ولی فَریسیون فرقه عالیمِن واتِشون: «عیسی پَریانون رَئیسی کاریَرینَه، پریانون بِرِن بَرَکرد.»
35عیسی گردِ شهرِن و آوادیِون اَگَردیَه، وعیبادَتگا اونکا اَوون آموج اَدَریَه وخدا پادیشاهی خَشَه خَبَری اییلام اَکَری و هر داج و آزاری شفا اَدَریَه. 36وَقتی عیسی جَماعتش ویندَ، چَی دل چَوون حالیرا سیجیستَه اِمی خونه کن هِنتَه بی شونَه پَسِنی شیوار تَتَه وَسَّه کا بین و ویسیستَه بینَه. 37پس اِشتَن شاگردِنِش واتَه: «اَکین وِرَ، ولی کاریگَر کمه. 38پس، اَکینی صاحیبیکا خاشتو خازینَه دَرخواست بکَرَ کن اِشتَن اَکینی دورنوستِه خونه کاریگر بَینِه.»
Currently Selected:
مَتّی 9: CTB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
