مَتّی 25
25
مَثَل دَه باکرَ
1«آستامونی پادیشاهی هنتهَ دَ گِلَه باکرَکِله بَمندی کن وَیو رَفِقین و اِشتَن چِرا اون پِگَتِشونه وبَگی پیشوازیرا شین. 2پِنج نفر اَونکا جائیل و پنج نفر دیَر اَلمَند بینَه. 3جائیلَه کِلَه اِن اِشتَن چرا اون پِگَتشونَه، اَمّا اِشتَنَّ روعَن نِبَردشون. 4ولی اَلمَندَ کِلَه اِن اِشتَن چرا اونَّ غَبِنی کن روعَنینَه پَتلمَه به اِشتَنَه بَردشون. 5وَقتی بَگی آمِه عَری دَگنستَه گردی چَمِن سنگین آبَه، خاو آشینَه. 6نیمَه شوی دلَکا، تَتَه لَسَّه ایی راست آبَه کن اَواجیَه بَگ کا آمِه! چَی پیشوازیرا بِشَه!“ 7اَموقه گردِ باکرَ کِله اِن خاویکا پبین واِشتن چرا اون آمادَ آکَردِشون. 8نافَمَه کِلَه اِن اَلمَندَ کِلَه اِنِشون واتَه: تیکَلیی اِشتَن روعَنیکا اَمهَ آدَرَ، اِمی خونه کن چَمه چرااِن کاینه دَمریستِه.“ 9ولی اَلمَندَ کِلَه اِن جواب آداشون: اِم روعَن گردیرا وَسّ نیَه. بِیترَ بشَه و بازاریکا اِشتَرا بخِرَ. 10اَمّا هَنگومی کن اَیِن روعَن خریِه را شَه بینَه بَگ آرَستَه و کِلَه اِنی اِنی کن آماد بینَه، اَینه وَییو اَوَریرا شینَه و بَرنگا دَبَستَه آبَه. 11چَی بَه دوملَه، اَ دییَرَ باکرَ کِلَه اِن نی آرَستین و واتِشون: آقا آقا برَنگا چمَرا آج آکه!“ 12ولی بَگ اَیِنِش واتَه: ”حَییقتا بَشِمَه باتیمَه، اَز شمه آنِمَزنِست.“ 13پس حواسِرون ببو، اِمی خونه کن اَ روج و ساعتیکا خبرِرون نیَه.
اَمانَتَه پولی مَثَل
14«هنتهَ آستامونی پادیشاهی مِردی شیوار بَبیَه کن اَپیش بَه سَفَر بِشو. اَ اِشتَن پاسَریون خِلِه کَردِشَه و اِشتَن اموالی چَوون دَست آداشَه؛ 15هر کَمی چَی اینجاری اَندازَ داشَه، ایی نَفَری پِنج قنطار کن ایلَه کاریگَری صَد سالی مِژد بَه، ایی نَفَری دِ قنطار کن ایلَه کاریگَری چِل سالی مِژد بَه و دیَیری یَک قنطار کن ایلَه کاریگَری بِیس سالی مِژد بَه و چَی به دوملَه سَفَریرا شَه. 16مِردی کن پنج قنطار ویگَتَش بَه، جَخت شَه اَینه کاسبی کَردشَه و پنج قنطار بَر کَردِشَه. 17هِنتَرکه اَکَن دِ قَنطار داری، دِ قنطار دیَر بَرَ کِردشه. 18ولی اَ کن یَک قنطار ویگَتَش بَه، شَه و زَمینی پِکَندِشَه و اِشتَن اَربابی پولی جیگاش دوعَه.
19«خَیلی وَقت کن گذَشتَه، اَ پاسَرییون اَرباب ویگردستَه و اوونکا حیساب اَپیش بَ. 20مِردی کن پنج قنطار ویگَتَش بَه، پنج قنطار دیَر نی اِشتَنَه وَردشَ و واتِش: چمن سرور پنج قنطار چمن دَست آدارَ، بِفرما اِمَنی پنج قنطار دیَر کن بَر کَردَمه.“ 21چَی سَرور جواب داشَه: آفرین اَی چاکو و امینَه پاسَری! کمَه چیکا امین بیشه پس وِرَ چییونی اِشتِه دَست آمَدا. بِه و اِشتَن اَربابی خَشیکا شریک بِب!“ 22پاسَریی کن دِ قنطار ویگَتَش بَه نی نَ آمَه و واتِش: آقا دِ قنطار چمن دَست آدارَ، بفرما اِمَنی دِ قنطار دیَر کن بَر کَردَمه.“ 23چَی سَرور جواب داشَه: آفرین اَی چاکو و امینَه پاسَری! کمَه چیکا امین بیشه پس وِرَ چییونی اِشتِه دَست آمَدا. بِه و اِشتَن اَربابی خَشیکا شریک بِب!“ 24اَموقه پاسَریی کن یَک قنطار ویگَتَش بَه، نِزِک آمَه و واتِش: آقا، اِمی خونه کن بَموستیم تِه سخت گیرَ مِردی هِستیشه وجگا ایکا کن گَشتَر نیَه بَدورنوستیش و جگایی کا کن دونَه پِشَندر نی گرد آشَکرد، 25پس ترسِستیم و اِشتِه پولی زمینیکا نون آکَردِمه. بفرما، اِمَنی اِشتِه پول!“ 26ولی چَی سَرور جواب داشه: اَی بدکار و تنبلَه پاسَری! تِه کن بَموستیشَه جگایی کا کن کَشتم نی بَدورنوستیم و جگایی کا کن دونَه پِشَندم نی گرد آمَکرد، 27پس چیرا چمن پولی صرّافون آنِدارَ تا وَقتی سفریکا آگردِستمَه اَی چَی بَرنَه پس ویگِم؟ 28اَ قنطاری اَیکا ویگِرَ و اَ کن دَ قنطار دارِ بَی آدَرَ. 29چون هرکَمی کن دارِ بَی ویشتَر آدوعِه بَبیَه؛ ولی اَ کن نیشَه، حتی هه کن دارِ نی اَیکا وینَّگَت. 30اِم دَدارَ پاسَری بِرِنی ظِلَماتیکا بَرَفنه، جگایی کن بِرَمِستِه و گاز گازی سَر سونیستِه بَبیَه.“
دیوونَه روج
31«هَنگومی کن اینسانی زوعَه اِشتَن شکوه و جلالی نه وگردِ فرشتَه اونَّه با، اِشتَن پرشکوهَه پادیشاهی تختی سَردِرِ بَنشتیَه. 32و گرد قامِن چَی نَ کا حاضیر آنَّب و اَ هنتَه شونه ایی شیوارکن، پَسون بزونکا تاکَه آرَکَرد، آدَمون یَندِ کا تاک آرَکَرد؛ 33اَ پَسون اِشتَن راستَه وَریکا و بزون اِشتَن چَپَ وریکا آرَنا. 34چی بَه دوملَه پادیشا اَیِنی کن چَی راستَ وَریکا هستنینه باتیِه: اَی کَسِنی کن چمن دَدَ شِمَش بَرَکت آدوعَشَه، بِرَ و پادیشاهی‌ایی بَه میراث بِبَرَ کن دِنیا شِرو بِه کا، شمَرا آماده آبَه بَه. 35اِمی خونه کن اَنشتا بیمَه بَمن هَرد چی آدارون؛ تشی بیمَه بَمن آو آدارون؛ غریب بیمَه بَمن جگا آدارون. 36لوت بیمَه بَمن پوشامنیرونَه؛ آزاری بیمه بَمن عیادت کَردِرون؛ زندانیکا بیم چمن ویندِ را آمیرون.“ 37اَموقه صالِحه آدَمِن جواب دَرِن: چَمَه سَرور، کَینی تِه اَنشتا ویندمونه و بَه تِه هَرده چی آدامون یا تشی ویندمونه و بَه تِه آو آدامون؟ 38کَینی بَته غریب ویندمونه و به ته جگا آدامون و یا بَتِه لوت ویندِمون و شمَه پوشام نیمونه؟ 39کَینی بَته آزاری و یا زندانیکا ویندمونه و اِشتِه وینده خونِه آمیمون؟“ 40پادیشا چَوون جَوابیکا باتی: حَییقتا بَشمَه باتیمَه، اَچیی کن ایله چمن گِچترین برا اونرا کَردرونه مِرا کَردِرون.“ 41اَموقه اَیِنی کن چَی چَپَه طَرَفیکا هستبِین باتیَه: اَی ملعونِن، بَمنکا رَت آبه و اَ زَیرونَه آرا را بشَه کن ابلیس وچَی فرشتَه اونرا آمادَ آبَیَه، 42اِمی خونه کن اَنشتا بیمَه بَمن هَردَ چی نِدارون؛ تشی بیمه بَمن آو آندارون؛ 43غریب بیمه بَمن جگا ندارون؛ لوت بیمه بَمن نِپوشامنیرون؛ آزاری و زیندانی بیمه چمن وینده را نامیرون.“ 44چَی به دوملَه اَیِن جواب بَدانَه: چَمَه سَرور کَینی بَتِه اَنشتا و تشی و غریب و لوت و آزاری و زندانیکا ویندمونه و بته خیدمت نِکَردمون؟“ 45اَموقه پادیشا جَوابیکا باتیه: حَییقتا بَشِمَه باتیمَه، اَچیی کن ایله اِم گِچتَرینون را نِکَردرون، مِرا کردرون نیَه.“ 46پس اَیِن زیرونَه عذابیکا دَله دَنَّش، ولی صالحه آدَمِن زَیرونَه زندَگی دَله دَنَش.»
Currently Selected:
مَتّی 25: CTB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
