مَتّی 26

عیسی کِشتِه نَقشَه

1وَقتی عیسی گرد اِم گَفون ژِشَه، اِشتَن شاگردِنِش واتَه: 2«بَموستیرون کن دِ روج دیَر، پِسَخَه عید آرَرَست و اینسانی زوعَه تسلیم بَکَنَه تا صلیبی سَردِرِ اَی بکشِن.»

3پس سَران کاهنِن وقامی ایسبیه ریشن یالَه کاهِنی کاخیکا کن قیافا نوم داری، گرد آبینَه 4و گَفَه ژِنَه کَردشونه کن چِنتَه حیلَنَه، عیسی دستگیر آکَرن و بِکشن. 5ولی اَواجینه: «عیدَ روجونکا مَبو، نِکَرِ مردوم شورش بِکَن.»

عیسی بِیت عَنیکا تَدهین بَبی

6اَموقه کن عیسی بِیت‌عَنْیا آوادیکا شَمعون جذانی کَکا بَه، 7ژنی مرمریَه غَبینَه کن گرونه عطرینه پَتلَمَه بَه چَی وَرآمه و هَنگومی کن عیسی سفره سَرنشت بَه، عطری چَی سَریکا ویکَردش. 8شاگردِن وَقتی اِمی بَویندین آسرنگستینَه واتِشون: 9«اِم اِیسراف چِه خونه اَ. اِم عطری بَبی گرون خرَتِه و چَی پولی گیدَلیون آدوعَه.» 10عیسی اِمیکا سَر آگِنَه و واتِش: «چیرا اِم ژنی اَیذَت بَکَرون. اِم ژِن قَشنگَه کاری مِرا اَنجوم دوعَشَه. 11اوزون گیدَلیون اِشتَنَه دارَ، ولی بَمن اوزون نینَّداشت. 12اِم ژن اِم عطری ویکَردِنه چمن جَندَکی سَردر، بَمن دَفن کَردِرا آمادَه کَردَشَه. 13حَییقتا بَه شمَه باتیمَه کن، گِرد دِنیا، هر جِگایی کن خدا پادیشاهی خَشَه خَبَر اییلام ببو، اِم ژِنی کاری نی چَی یادیرا جیگیر بَکَنَه.»

یَهودا عیسی خَیانَت بَکَردی

14اَموقه یهودااَسْخَریوط کن ایله اَ دانزَ شاگردیکا بَه، یالَه کاهنی وَرشَه 15و واتِش: «بَمن چه بَدارون اَگَم عیسی به شمه تسلیم بکَم؟» پس اَیِن سی گله نقرَاینَه سکَّه بَی آداشون. 16اَموقه کا، یهودا فِرصَتی دوملَه بَه تا عیسی چَوون تَسلیم بکَرِ.

پِسَخ شاگِردونَّه

17فَطیرَ عیدی اوَلَه روجی دِلَه کن هَه پِسَخَه عییدَ، شاگردِن عیسی وَرآمینه و دَپَرسِستین: «کِرَم جگا کا اَپیرَ تِرا آمادَ آکَرم تا پِسَخَه عیدی سوری بَری؟» 18عیسی اَینِش واتَه: شهری دِلَرا فلان شخصی وَر بشه و بَی بواجَه: «اِستا باتی: چمن وَقت نِزِک آبه یَه. اَپیمَه پِسَخَه عیدی سوری اِشتِه کَکا چمن شاگردونَّه بَرم.» 19شاگردِن هَته کن عیسی واتَش بَه کَردِشونه وپِسَخَه عیدی سوری آمادَ آکَردِشون.

20شَویرا و عیسی اِشتَن دانزَ شاگردینَه سِفره سَرنِشتَه. 21سوری هَردِ موقه عیسی واتِش: «حَییقتا بَشمَه باتیمَه، ایلَه شمَکا بَمن غَنیمی تَسلیم بَکَیَه.» 22شاگردن بَرزَخ آبین وایلَه اَیلَه دوملَه عیساکا دَرَپَرسِینَه: «آقا اَ آدَم اَزیم؟» 23عیسی جواب آداشَه: «اَ کن اِشتَن بالی بَمنَ قَدرَکا ویرَخاست، هَه بَمن خَیانَت بَکَیَه. 24اینسانی زوعَه را، هَته کن چَی خونِه موقدسَه نِوشتَه اونکا نِوشتَه بَیَه اَنجوم بَبی، ولی برامِه اَ کَسی حالیرا کن چَی خَیانَتی خونه اِم ایتفاق اینسانی زوعَه سَردِرِ با. چَیرا بِیتَر بَه کن هَرگز دِنیا مَعای.» 25اَموقه عیسی تسلیم‌آرَکر یَهودا، واتِش: «اِستا اَ آدَم، اَزیمَه؟» عیسی جواب داشه: «ته اِشتَن واتِرَ!»

26وَقتی کن کایبین سور هَردِ عیسی نونی پِگَتَه و شِکرکَردِ بَه دوملَه، پِزارنِستِش و شاگِردون آداشَه و واتش: «بیگِرَ بَرَ؛ اِم چمن تَنَ.» 27چَی به دوملَه گَولَه پِگَتِشَه شِکر کَردِ بَه دوملَه شاگردون آداشَه و واتِش: «شمَه گِرد اِمیکا بِنجَه. 28چون اِم چمن خونَه کن اِم تازَ عَهدی بَینَه موهر بَکَم. چمن خون ویرَب تا خَیلی آدَمون گِناخ بَخشیدَ آبو. 29بَه شمَه باتیم دِ اِم اَنگری اَکینیکا نیمِنت، تا روجی کن شمَنه، اِشتَن آستامونیَه دَدَ پادیشاهیکا چَی تازَ بِنجم.»

عیسی پِطروسی حاشا ژِ پیشگویی بَکَردی

30اَیِن ایلَه سِروود حمد و ستایش خَندِشون، چَی بَه دوملَه کوه زَیتونیرا شین. 31اَموقه عیسی اَینِش وتَه: «شَنا شِمَه گِرد بَمن تاک بَنارون. اِمی خونه کن زَکریای پَیغمبری کیتاویکا نِوشتَه آبَیَه:

«”شونَه بَژَمَه

و رَمَه پَسِن ولاخ آنَّب.“

32ولی چمن زندَ آبه بَه دوملَه، شِمَکا بَه نَه وِلَته جَلیلیرا بَشیم.» 33پِطروس جَوابیکا واتِش: «حتی اَگَم گِرد اِشتِه خونِه وَس وَسَه بِبون، اَز هَرگز وَس وَسه نیمَب.» 34عیسی بَی واتشَه: «حَییقتا بَتِه باتیمَه کن، هِم شَنا، سوکی خَندِ بَه نَه، تِه سه کَرَ بَمن حاشا بَژَش!» 35پِطروس واتِش: «اَگَم لازم ببو بَتِنَه بِمِرم نی، بَتِه حاشا نِمَکَرد.» شاگِردِن گرد هِم گَفی ژِشونَه.»

عیسی جِتْسیمانی باغیکا دِوا بَکَی

36اَموقه عیسی اِشتَن شاگردونَه جگایی راکن جِتسیمانی نوم داری شَه و اَیِنش واتَه: « اِم جگا کا بنشهَ تا اَز اَجگارا بِشوم و دِوا بِکَم.» 37عیسی، پِطروس و زِبِدی دِگله زوعَه اِشتَنَه بَردش. عیسی قورصَه داری و تَتَه وَسَه دَگِنَه بَه، 38چَی به دوملَه اَیِنش واتَه: «چمن جان قورصَه خونه کا مَردِ. شمَه اِم جِگاکا بومونه و بَمِنه بیدار بِبَه.» 39چَی بَه دوملَه عیسی تیکَلیی نَرا شَه و صَفتینَه خاکی سَر گنستَه و دوا کَردِشَه واتش: «چمن دَدَ اَگَم ایمکان بَداشتی اِم عَذابَه گولَه بَمنکا رَت آکَه، ولی نه چمن خواستَنَه بَلکَم اِشتِه ایرادَ نَه.» 40چَی به دوملَه اِشتَن شاگردون وَر آگَردسته و اَیِنش خاویکا ویندَ. پس پِطروسیش واتَه: «نینَّشا ایی ساعت منه بیدار بومونه؟ 41بیدار بومونَه و دِوا بکَرَ تا وَرداوَردیکا دَنِگِنَه. حَییقتا کن روح اِشتیاق دارِ، اَمّا جَندَکیرا تاو نیَه.» 42عیسی دِوومین کَرَرا شَه و دوا کردشَه و واتش: «چمن دَدَ اَگَم ایمکانِش نییَه کن تا اِم گولَه مَنجِم بَمنکا بِگذِرِ، پس اَچیی کن اِشتِه ایرادَ یَه اَنجوم ببو.» 43وَقتی آگَردستَه، ویندِشه کن اَیِن هَنوزَنی خِتین، اِمی خونِه کن چَوون چَمِن خَیلی سَنگین آبَه بین. 44پس اَوون اِشتَن حالیکا آهَشتشَه و شَه و سوّمین کَرَ هَه دوا جیگیر کردشه. 45چَی بَه دوملَه شاگِردون وَر آمَه و اَیِنِش واتَه: «هَنوزَنی خِتیرونه و ایستراحَت بَکَرون؟ ایسَه تَعیین بَه ساعت نِزِک آبَیه واینسانی زوعَه گناخ کارون دست تسلیم بَکَنه. 46پِبه، بشَم. دَیسَه اَ کن بَمن خَیانت بَکَی، کا آمه.»

عیسی تَسلیم و دَسگیر بِه

47عیسی هَنوزَنی کایبَ گَف ژِ کن یهودا کن ایلَه اَ دانزَ شاگردیکا بَه، یاله کاولَه اینَه کن لِسو شَمشیر دارین و سَران کاهِنون وقامی ایسبیَه ریشون وَریکا آمَه بین، را کا آرَستین. 48اَ خائینَه شاگرد، اِشتَن هَمراهون ایشایی آدوعَش بَه و واتَش بَه: «اَ کَسی کن بَینَه ماچینِه بَکَم، هَیَه؛ بَی بیگِرَ.» 49پس یهودا جَخت عیسی کا نِزِک آبَه و واتِش: «سلام، اِستا!» و اَینه ماچینِه کردشَه. 50عیسی بَی واتِش: «رَفق اَ کاریرا کن چَی اَنجوم دوعَه خونِه آمَه ایشَه اَنجوم بِدَ.» اَموقه اَ آدَمِن نَ آمینَه عیسی سَر ویبین و بَی ویلاخِنیشونَ. 51اِم هنگومیکا، ایلَه عیسی همراهونکا بالی شمشیری طَرَف بردشَه، اَی دراکنیشه و اَینَه یاله کاهنی پاسَری ژِشَه و چَی گوشی آبیردِش. 52ولی عیسی بَی واتِش: « اِشتَن شَمشیری قلاف بکَه؛ اِمی خونه کن هر کم شمشیر دَراکنه شمشیرینه اَی بَکشتین. 53فیکر بَکَشَه نِمَشا ایسَه اِشتَن دَدَکا بپیام و اَ نی ایسَه چمن آرَستِرا دانزَ لَشکَریکا نی ویشتر فرشتَه بَینِه. 54ولی اَگَم اِم کاری بِکَم، چِنتَه موقدسَه نیویشتَه اون پیشگویی کن چمن خونه یَه اَنجوم ببو؟» 55اَموقه کا، عیسی جَماعَتیش واتَه:«مَگَم اَز پتارچی ایمَهَ کن لِسو و شمشیرینَه چمن گَتِه را آمَه اینَه؟ اَز هر روج معبدیکا اَنشیم و آموج اَدَریم و بَمن نِگَترون. 56ولی اِمن گرد ایتفاق دَگنستَه تا پَیغَمبرون نِوِشتَه اِن اَنجوم ببو.» اَموقه شاگردِن گِرد اَی آهَشتشونَه، ویریتین.

عیسی یهودی شورا وَریکا موحاکیمَه بَبی

57چَی به دوملَه اَینی کن عیسی ویلاخونیَشون بَه اَشون، یاله کاهن قیافا وَر بَردشون. اَجگا کا توراتی موعَلیمن و ایسبیه ریشن جم آبَه بینَه. 58پِطروس دوریکا عیسی دومله شَه تا یاله کاهنی کَه صِرا را آرَستَه. پس دَله دَشه و نیگهبانونَّ نشتَه تا بِوینِه آخیر چِه بَبی. 59سران کاهینِن و گِردِ شوورا آدَمِن عیسی زِرَ بَرا شَهادَتی دوملَه بینه تا اَی بِکِشن، 60ولی هر چَنَه دروعَه شاهیدن نَ آمینه، اَیِن نِشاستشون رِقی پَیدا بکن کن بَینه بشان عیسی محکوم بکَن. آخیر بَسَر دِ نفر نَ آمینه 61واتِشون: «اِم مِرد واتَشَه، ”اَز بَشامه خدامَعبَدی ویراوِنِم و سِه روجیکا اَی تازَ سِی آکَرم.» 62اَموقه یالَه کاهین پِبه و عیساش واتَه: «هیچ جَوابی نیشَدا؟ اِم چِه گَفِه اینه کن اِم مِردِن اِشتِه زِربَرا کان شاهیدی دوعه؟» 63ولی عیسی هَنی گَف نِژِشَه. یالَه کاهن بَی واتِش: «اِشتِه زِندَ خدا سَر قَسم دَرم کن اَگَم ته وَعدَ آدوعَه مَسیح، خدا زوعَه هِستیشَه اَمه بِواجی.» 64عیسی جواب داشه: «ته ایسَه اِشتَن واتِرَ! ولی بَشِمَه باتیمَه کن چیمی بَه دوملَه، اینسانی زوعَه بَویندیرون کن خدای قادِری راستَه بالی وَریکا نِشتَه و آستامونی خِرون سَردِرِ آ.» 65اَموقه یاله کاهن اِشتَن کیلی پزاارنِستِشه و واتِش: «کفر واتشَه! دِ شاهیدِمون چیرایَه؟ ایسَه کن چَی کفری دَرَسترون، 66شمه حِکم چِچیَه؟» شوورا آدَمِن جواب داشون: «چَی جَزا مرگَ.» 67اَموقه عیسی صَفَتی سَرتو پِکَردشون و بَی ژِشونَه. بعضی نی بَی سلّه اَژَنینَه 68اَواجینَه: «اَی مسیح، ایسَه غَیب بواج کن کی بَتِه ژِشَه؟»

پِطروس عیسی حاشا بَکَردی

69اَموقه پِطروس کهَ بِرِنیکا سِراکا نِشت بَه کن ژنَه پاسَریی چَی وَر آمَه و واتِش: «ته نی عیسای جلیلینه دَرِبیشَه!» 70ولی پِطروس گردی وَریکا حاشا ژِشَه و واتِش: «نِمَموست چه کاش واتِه! 71چَی بَه دوملَه پِطروس کَه دَروازَ طَرَفیرا شَه؟ اَجگا کا دییَرَ ژنَه پاسریی اَی ویندشَه و اَیِنی کن اَ جِگاکا مند بینِش واتَه: «اِم مِرد نی عیسای ناصرینَه دَرِبَه!» 72هَنی پِطروس حاشا ژِشَه قسم هَردشه کن: «اَز اِم مِردی آنِمَزنِست.» 73تَیکَلیی بَه دوملَه، چَن نفری کن اَجِگاکا پا مَند بین نَ آمینَه پطروسی واتِشون: «شکی نیَه کن ته نی ایلَه اَوونکاشَه! اِشتِه لهجَه کا دیارَ!» 74اَ هَنگومیکا پِطروس بَشتَن لَنَت کَردِشَه و قسم هَردشه و واتِش: «اِم مِردی آنِمَزنست!» هَه موقِکا سوک خَندِشَه. 75اَموقه پِطروس عیسی گَفون یاد آرَفَندِشَه کن بَی واتَش بَه: «سوکی خَندِ بَه نَه سِه کَرَ بَمن حاشا بَکَشَه.» پس بِرِن شَه و بَرک برَمسِتهَ.

Currently Selected:

مَتّی 26: CTB

Highlight

Copy