مَتّی 27

یهودا خودکشی

1وَقتی صِب آبَه، گرد سران کاهنِن و ایسبیه ریشن جَم آبینه، و عیسی زِرَبَرا یَندِنه گَفه ژِنه کَردشونه کن عیسی بِکشن. 2پس چَی بالی دَبَستشونه وبَردشون پیلاتُسی وَر کن رومی فرماندار به.

3وَقتی چَی تسلیم‌آرَکَر کن یَهودا به، ویندِشَه عیساشون محکوم کَردَیَه، اِشتَن کاریکا پَشمون آبَه و سی گِله نقرَاینَه سکه سران کاهینن و ایسبیه ریشون آگاردنستشَه و واتِش: 4«اَز گناخ کَردَمه و باعیث بیمَه ایلَه بیگناخی خونی ویکَرِن.» ولی اَیِن جواب داشونه: «بَمَش رَبطی نیَ، اِشتَن بَموستیش!» 5پس یهودا نقرَاینَه سکه‌ اون معبدیکا زَمینی سَردِرِ ویکَردشَه و شَه و اِشتَنش جیبَستَه. 6سران کاهینِن سکه‌ اون زَمینیکا جم آکَردشونَه واتِشون: «اِمی خاطر کن اِم سکَّه اِن خونَه پولَه، شرعا درست نیَه اَوون معبدی خَزانکا دَکَرم.» 7پس گَفه ژَنِه کَردِشونَه و اَپولینه گوله سازی زمین خریشونَه تا اَجِگا، خَلکی قَوراسون ببو. 8اِمی خونه تا اومروج اَ جگا «خونه زمین» باتینَه. 9اِنتَرَکِه، اِرمیای پَیغمبَری پیشگویی حقیقَتینَه اَنجوم بَه کن واتَش بَه: «اَیِن سی گلَه نقرَاینَه سکه پِگَتشون، یعنی پولی کن خدا قام چَی سَر آناشونَه 10و اَینه گوله سازی زَمینی خریشونَه، هَته کن خداوند بَمن واتَش به.»

عیسی پیلا تُسی حِضوریکا

11ولی عیسی والی نَ کا پامَندَ. والی اَیکا دَپرسِستَه: «تِه یهودی پادیشا ایشَه؟» عیسی جواب داشه: «ته اِشتَن اِنتَرَ باتیشَه!» 12ولی هَنگومی کن سران کاهینِن و ایسبیه ریشن وِرَ ایتِّهام بَی اَژَنین، عیسی هیچ جوابی نِداشَه. 13پس پیلاتُس اَیکا دَپرسِستَه: «دَنیشَرست چَنه وِرَ چیون اِشتِه زرَبَرا شاهیدی بَدان.» 14ولی عیسی حتی ایله ایتهامونکا نی جواب آنِداشه، جوری کن والی بَرک تَعَجوب کَردِشَه.

15والیرا رسم اِست بَه کن پِسَخَ عیدَ روجیکا ایلَه زیندانی، مردمی اینتخابینه آزاد آکَرِ. 16و اَیِن ایلَه بَد نومَه زیندانی دارین کن چَی نوم باراباس بَه. 17پس هَنگومی کن مردم جَم آبینه، پیلاتُس اَوونکا دَپرسستَه: «بَپیرونَه کِرَم گِلَه شِمَرا آزاد آکَم، باراباسی یا عیسی کن بَی مَسیح نی خِلِه بَکَن؟» 18پیلاتُس اِمی خونه اِمی اَواجیَه کن، اَزنیَه قامی یالِن عیساشون زرَ خونِه چَی تسلیم آکردشونَه. 19و هِنتَه نی، هَنگومی کن پیلاتُس دیوون کَردِ تختی سَردِرِ نشت بَه، چَی ژِن پیغومی چَیرا عندِشَه، واتش: «تِه اِم صالحه مِردینَه کاریر مَبو، اِمی خونه کن امروج خاوی چَی خونه ویندَمه کن اَ خاو بَمن بَرکه عذاب داشَه.» 20ولی سران کاهینِن و ایسبیه ریشن، قامی آدَمون دیم پنوعَشون بهَ تا باراباسی آزادی وعیسی مَردِ درخواست بکن. 21پس وَقتی والی دَپرسستَه: «بَپیرون کِرَم گله اِم دِ کا شِمرا آزاد بکَم؟» مردوم جواب آداشونَه: «باراباسی!» 22پیلاتُس اَوونکا دَپرسستَه: «پس عیسی کن بَی مسیح باتین بَینَه چبکرم؟» گرد واتِشون: «اَی صَلیبی سَر بکش!» 23پیلاتُس دَپرسِستَه: «چیرا؟ چِه بدی ایی کَردَشه؟» ولی اَیِن تَتّه لَسَّه نَه سَس آداشون: «اَی صَلیبی سَر بکش!»

24وَقتی پیلاتُس بَویندیَه کن کا دَمردَ سیناو کَردِ و حتی اَتَرسیه کن شورش ببو، واتشَه چَیرا آو بوعَرن و اِشتَن بالون مردمی چَمی نَ کا شوشتِشه و واتِش: «اِم مِردی خون چمن مِلیکا نییَه. شِمَه اِشتَن بَومستسیرون!» 25مردم گرد جَوابیکا واتِشون: «چَی خون چَمه مل و چَمَه خردَنون ملیکا ببو!» 26چَی به دوملَه پیلاتُس، باراباسی چَوونرا آزاد آکردشَه و عیساش شَلاق ژشَه و آداشَه تا اَی صلیبی سَردِرِ بکِشن.

عیسی دَسپَر بَگَتین

27پیلاتُسی سَربازِن، عیساشون والی کاخی صِرا را بَردَ و گردِ سربازِن چَی دوور جم آبین. 28اَیِن عیساشون لوت آکَردَ و اَرغَوانیَه ردایی بَی پوشام نیشون. 29و چغیکا تاجی دَوَتشونهَ وچَی کلّه کا آناشون و چویی چَی راستَه بال آداشون. اَموقه چَی نَ کا زنگ ژشونه دَسپَرگَتِنَه اَواجین: «زِندَ باد یَهودیون پادیشا!» 30وچَی سَریکا تو پِکَردشون و چو چَی بالیکا ویرَگرین و چَی کلّه اَژنین. 31چَی دَسپَر گَتِه بَه دوملَه، ردا چَی جَندکیکا برَوَردشون و چَی شندری بَی پوشام نیشون. چَی به دوملَه اَشون بِرِن بَردَ تا اَی مَصلوب بکَن.

عیسی صَلیبی سَر شِه

32هَنگومی کن کایبین بِرنیرا شِه، شَمعون نومَه مِردی گِنینَه کن قیرَوانی آدَمونکا بَه و اَی دیم پناشونه تا عیسی صلیبی پِگِرِ و چَی پِشتیکا بوعَرِ. 33وَقتی جگاییرا کن چَی نوم جُلجُلتا بَه و چَی معنی جوم جومَه جِگا بَه، آرَستین، 34عیساشون شَراوی کن زردابینه یَندِ گنه بَه آداشون. وَقتی عیسی اَی چَشتشه نَپیشبه بِنجِه. 35هَنگومی کن عیساشون صلیبی سَر مِخ ژِشون چَی شندرون رَست کَردِ خونه اِشتَن دِلَکا قورعه دَرفندشون. 36و چَی به دوملَه اَجگا کا نشتین و بَیکا نیگَبانی داشون. 37اَیِن چَی جُرمی تخته لَتَه ایی سَریکا نِوِشتَشونَه و چَی کَلَّه سَریکا صَلیبی سَر ژِشون: «اِمَه عیسی، یهودیون پادیشا.»

38دِ پتارچی نی عیسی نَه صلیبی سَر بَردشون، ایله چَی راستَه وَریکا واَیلَه چَی چَپَ وریکا. 39اَیِنی کن اَ راکا دَیوَرینَه اِشتَن کَلَه اون تم اَدَرین، زبونینه 40اَواجینَه: « تِه کن اَپیربَه مَعبَدی ویراوونی و سِه روجی دِلَکا اَی هَنی سِی آکَری، اِشتَن نیجات بِدَ! اَگَم خدا زوعَه ایشه صَلیبیکا ویرا!» 41هنته نی سران کاهینِن و توراتی موعَلیمِن و ایسبیه ریشن نی بَی دَسپَر اَگِرینَه، اَواجینَه: 42«دیَرَ کَسون نیجات داشَه، اَمّا اِشتَن نیَشا نیجات بدَرِ! اَگَم خدا قامی پادیشا اَ، ایسَه صَلیبیکا ویرا تا بَی ایمان بوعَرم. 43اَ خدا سَردِرِ توکل دارِ؛ پس اَگَم خدا بَی رَی بَداشتی، ایسَه اَی نیجات بِدَر، اِمی خونه کن اَ اَواجیَه کن: ”اَز خدا زوعَه ایمَه“.» 44و هنته نی اَ دِ پتارچی نی کن بَینه، مصلوب بَه بینه، عیسی زَبون دَرَکرین.

عیسی مَردِ

45ناهاری موقه، ساعت دانزَّرا، تا آختاو ویگِنی موقه، ساعت سه را، ظِلَمات گردِ اَ وِلَتی گَتشه. 46آختاو ویگِنی موقه ساعت سه کا نِزِک بَه کن، عیسی تَتَه لَسَّه نه سَس آداشَه و واتش: «ایلویی، ایلویی، لَمّا سَبَقتَنی؟» یَعنی «اَی چمن خدا، چمن خدا، چیرا بَمن آهَشتَرَ.» 47بَعضین کن اَ جِگاکا مَند بین وَقتی اِمی دَرَستَشون، واتِشون: «اِم مِرد اِلیاسِ پَیغمبَری خِلِه بکَیَه.» 48ایله اَوونکا جَخت ویریتَه و اسفنجی وَردشَ و اَی زِز آبه شَراویکا ویخاشَه و چویی سَر آناشَه و عیسی گَوی وَر بَردشَه تا بِنجِه. 49ولی بَقییَه واتِشون: «صَبر بکَرَ بِوینم اِلیاس چَی نیجات دوعِه را بومَی؟» 50عیسی ایکَرَ دیَر تتَه لسَّه نه سَس آداشَه و مردَ. 51جَخت معبدی پَردَ کَفا تا جیر پِرَزریستَه دِ پارَ آبَه و زمین لَرزِستَه و کازِن اِشکاتینَه. 52قَورِن آج آبین و خَیلی مقدّسه آدَمونکا کن مردَ بینَه زندَ آبین. 53اَیِن قَورونکا بِرِن آمینه و عیسی زندَ آبِه بَه دوملَه، اَینَه موقدّسَه شَهریرا کن هَه اورشَلیمَه، شینه و بَشتَن خَیلیون آمونِستشون. 54وَقتی سربازون فَرماندَ و سربازنی کن مامور بینه تا عیساکا نیگَبانی بِدَن، بومه لَرزَ و گرد اِم ایتفاقن بَویندینه بَرک تَته وَسه دَگنِستینه و ترسستین و واتِشون: «واقییَن کن اِم مِرد خدا زوعَه بَه.» 55خَیلیِ ژِنونکا نی اَجگاکا مَند بین و دوریکا کایبین تَمشا کردِ. اَیِن وِلَته جَلیلیکا عیسی دومله رَونَه آبَه بینه تا بَی خیدمت بکَن. 56چَوون دِله کا مریم مَجْدَلیّه و مریم یعقوب و یوسوفی نَنَه، و زبدی زوعَه اون نَنَه نی دَرِ بینَه.

عیسی دفن کَردِ

57دیَرماز، ثیروتمندَ مِردی یوسوف نوم کن رامه آدَمونکا به آمَه، اِم مرد نی عیسی ایلَه شاگِردونکا بَه، 58اَ پیلاتُسی وَر شَه و عیسی مَیتی درخواست کردشهَ. پیلاتُس دستور داشه کن عیسی مَیتی بَی آدَرِن. 59یوسوف مَییِتی پِگَتشه پاجا اَ کَتانَه کَفَنیکا پِپشتش. 60وتازَ تربَه ایکا کن یوسوف اِشتَنرا، کازَ مَغاری دِلَکا تاشتَش بَه، آناشه. چَی به دوملَه یاله کازی تِربه ناریرا گلل آکردشَه و شَه. 61مریمِ مَجْدَلیّه و اَیلَه مَریم نی اَ جِگاکا تربه نَ کا نِشت بینه.

تِربه کا پاستِه

62سَوسَه، کن « تهیه روجی» بَه دومله به، یعنی اَ روجی کن یَهودیِن موقدسَه شنبه را آمادَ آبون سَو سَه، سران کاهینِن و فَریسیون فرقه عالیمِن، پیلاتُسی وَر شینه، واتِشون: 63«آقا! اَمه یادَ کن اَ دِرو اَواج وقتی زندَ بَه، اَواجیَه کن ” اَز سه روجی بَه دوملَه زندَ آمَب.“ 64پس دستور بِدَ تِربَکا تا سوّمَ روجیرا نیگَبانی بدَرن، نِکَرِ چَی شاگردِن بان مَییِتی بدزدن و مردمی بواجن کن عیسی مَردِ به دوملَه زندَ آبَه یَه، کن اَگَم اِنتَرَ بِکن، چَی آخِرین حیلَه اَوّلَه حیلَکا بَدتَر بَبی.» 65پیلاتُس جواب داشه: «شمه اِشتَن ایی کاولَه نیگَبان دارَ. بشه و هَته کن صلاح بَموستیرون اَیکا نیگَبانی بدَرَ.» 66پس اَیِن شینه و تِربه کازی مُهر و موم کَردشون وچَنگِلَه نیگَبان اَجگا کا آنا شونه تا تِربکا حیفاظت بِکَن.

Currently Selected:

مَتّی 27: CTB

Highlight

Copy