مَرقُس 14

عیسی بِیت‌عَنْیا دِلَکا

1دِ روج، پِسَخَه عیدیکا و فَطیرَ عیدیکا مَندَ بَه. سَران کاهنِن وتوراتی مُعَلیمِن راهی دوملَه اَگَردینَه کن حیلَنه عیسی ویلاخِنِن و بِکِشن، 2اِمی خونه کن اَیِن اَواجینَه: «عیدَ روجونکا مَبو، نِکَرِ مردوم شورش بِکَن.»

3وَقتی عیسی بیتِ عَنیا آوادی دِلَکا، شَمعون جِذانی کَکا سِفرَ سَر نِشت بَه، ایلَه ژِن مَرمَرینَه غَبینَه کن عَطرینه روعَن اَیکا دَرِ بَه، عیسی وَر آمَه. اَ عطرینه روعَنی خالِیصَه سُنبُلیکاشون گَته بَه و بَرک گِرون بَه. اَ ژِن اَ غَبِش چاکِنِسته وعَطرینه روعَنِش عیسی سَریکا ویکَردَ. 4بَعضی اَیِنیکا کن اَجِگاکا مَند بین برک آسرَنگِستین و یَندِنَه واتِشون: «چیرا پی اِم عَطرینه روعَن اِنتَرَکِه هیچ بَرشو؟ 5اَ عطرینه روعَنی اَبییَه سِصَد دیناریکا نی کفاتر خِرَتِه و چَی پولی گیدَلیون دوعِه.» و اَیِن اَ ژِنی برکَه چَمای کَردِشون. 6ولی عیسی اَیِنِش واتَه: «اَ ژِنینَه کار مدارَ. چیرا بَی اَیذَت بکَرون؟ اَ قَشنگه کاری چمن حَقّیکا کَردَشَه. 7اِمی خونه کن گیدَلییِن اوزون شمَه دووریکا مندینَه و هَر وَقت اَپیرونَه بَشارون اَوونرا آرَسَه، ولی اَز اوزون شِمَه وَر نیمه مَند. 8اِم ژِن اَ چیی کن چَی اینجاریکا بَه، اَنجوم داشَه. اَ اِشتَن اِم کارینَه، چمن جَندَکی نار تَر دَفن کَردِرا، عطر ژشَه و حاضیر آکردِش. 9حَییقتا بَه شمَه باتیمَه، گِرد دِنیا،هر جِگایی کن خدا پادیشاهی خَشَه خَبَر اییلام ببو، اِم ژِنی کاری نی چَی یادیرا جیگیر بَکَنَه.»

یهودا عیسی خَیانت بَکی

10اَموقه یهودا اَسْخَریوط کن ایله اَ دانزَ شاگردیکا بَه، سَران کاهِینون وَر شَه تا عیسی چَوون تَسلیم بکَرِ. 11اَیِن وَقتی یَهودا گَفِنِشون دَرَستَه، خَش آبینَه و بَی پولَه وَعدَ آداشون. یَهودا نی فِرصَتی دوملَه اَگَردیَه تا عیسی چَوون تَسلیم بکَرِ.

پسخه عیدی سور شاگردونَّه

12فَطیرَ عیدی اَوَلین روجیکا کن پِسَخی وَرَ قِربونی بَکَن، عیسی شاگِردِن اَیکا دَپَرسِستین: «بَپیرَ کِرم جگا را بشَم و پسَخَه عیدی سوری تِرا آمادَ آکَرم تا بَری؟» 13عیسی دِ گِلَه اِشتَن شاگِردونکا عَندِشَه و اَیِنِش واته: «شَهری دِلَه دشَه؛ اَجِگاکا مِردی آوَ کَتلَه نَه شِمَنَه سَراسَر بَبی، چَی دوملَه بِشَه. 14هر کَه ایکا کن اَ مِرد دِلَه دَشَه، اَ کَه صاحیبی بِواجَه، ”اِستا باتی، چمن میمان خونَه کِرَم جگا کارَ تا پِسَخَه عیدی سوری اِشتَن شاگِردونَّه بَرم؟“ 15اَ یالَه بالاخونه ایی کن جیکَردَشونه و آمادَ یَه بَشِمَه آمونِه. اَجِگاکا پِسَخَه عیدی سوری اَمَرا آمادَ بکَرَ.» 16اَموقه شاگِردِن شَهریرا شینَه و گِردِ چییون هَتَه کن عیسی اَیِنِش واتَه بَه ویندِشون و پسَخَه عیدی سوری آمادَ آکَردِشون.

17وَقتی شَو آبَه، عیسی اِشتَن دانزَ شاگِردینَه اَجِگارا شَه. 18هَنگومی کن سِفرَ سَریکا نِشت بینَه و کایبین غَذا هَردِ، عیسی واتِش: «حَییقتا بَه شمَه باتیمَه کن ایلَه شِمَکا کن بَمِنَه غَذا بَردی بَمن غَنیمی تَسلیم بَکَیَه.» 19شاگردن بَرزَخ آبین وایلَه اَیلَه دوملَه عیساکا دَرَپَرسِینَه: «اَ آدَم اَزیم؟» 20عیسی واتِش: «اَ ایلَه شِمَه دانزَ نَفرییکارَ، هَه کن اِشتَن نونی مِنَه قَدرَکا ویرَخاست. 21اینسانی زوعَه را هَته کن چَی خونِه موقدسَه نِوشتَه اونکا نِوشتَه بَیَه اَنجوم بَبی، ولی برامِه اَ کَسی حالیرا کن چَی خَیانَتی خونه اِم ایتفاق اینسانی زوعَه سَردِرِ با. چَیرا بِیتَر بَه کن هَرگز دِنیا مَعای.»

22سوری هَردِ موقه عیسی نونِش پِگَتَه و شِکرکَردِ بَه دوملَه، پِزارنِستِش و شاگِردون آداشَه و واتِش: «اِمی بیگِرَ، اِم چمن تَنَ.» 23چَی بَه دوملَه گولَه پِگَتِشَه و شِکر کَردِ بَه دوملَه، شاگردِنِش آدوعَه و اَیِن گِرد اَیکا هِنتِشون. 24و اَیِنِش واتَه: «اِم چمن خونَه کن تازَ عهدی بَینَه موهر بَکَم. چمن خون خَیلیونرا ویرَب. 25حَییقتا بَه شمَه باتیم کن، اَنگِری اَکینیکا دِ نیمِنت تا روجی کن خدا پادیشاهی دِلَکا، چَی تازَ بِنجم.»

پطروسی حاشا کَردِ پیشگویی

26اَیِن ایلَه سِروود حمد و ستایش خَندِشون، چَی بَه دوملَه کوه زَیتونیرا شین. 27عیسی اِشتَن شاگِردِنش واته: «شِمَه گِرد، بَمن آهَرزَ. اِمی خونه کن زَکریای پَیغمبری کیتاویکا نِوشتَه آبَیَه،

«”شونَه بَژَم

و پَسِن وِلاخ آنَّب.“

28ولی چمن زندَ آبه بَه دوملَه، شِمَکا بَه نَه وِلَته جَلیلیرا بَشیم.» 29پِطروس عیساش واتَه: «حتی اَگَم گِرد وَس وَسَه بِبون، اَز هَرگز وَس وَسه نیمَب.» 30عیسی بَی واتِش: «حَییقتا بَتِه باتیمَه کن هِم شَنا، سوکی دِ کَرَ خَندِ بَه نَه، تِه سه کَرَ بَمن حاشا بَژَش!» 31ولی پِطروس وِرَ تَاکیدینَه واتِش: «اَگَم لازم ببو بَتِنَه بِمِرم نی، بَتِه حاشا نِمَکَرد.» شاگِردِن گرد هِم گَفی ژِشونَه.

عیسی جِتْسیمانی باغیکا دوا بَکَی

32اَموقه اَیِن جِگا ایرا شین کن چَی نوم جِتسیمانی بَه. عیسی اِشتَن شاگِردِنِش واتَه: «وقتی کن اَز دِوا بَکَم، شِمَه اِم جِگاکا بِنِشَه.» 33عیسی پِطروس و یَعقوب و یوحَناش اِشتَنَه بَردِشَه. عیسی بَرک بیقراربَه و تَتَه وَسَّه کا دَگِنِستَه بَه 34و اَیِنش واتَه: «چمن جان قورصَه خونه کا مَردِ. شمَه اِم جِگاکا بومونه و بیدار بِبَه.» 35عیسی تیکَلیی نَرا شَه، اِشتَن صَفَتی خاکی سَر ناشَه و دِوا کَردِشَه کن، اَگَم بَبی اَ عذابَه ساعت اَیکا بِگذرِ. 36عیسی هنته نی واتِش: «اَبّا، دَدَ، گِردِ چییون اَنجوم دوعه ترا ایمکان بداشتی. اِم عذابی گولَه بَمنکا رَت آکَه، ولی هَنی اَ چیی کن اَز بَپیمه اَنجوم مبو، بَسکَم اَ چیی کن تِه بَپیرَ اَنجوم ببو.» 37وَقتی عیسی اَ شاگردون وَرآگَردِستَه ویندشه کن اَیِن خِتین، پس پِطروسیش واتَه: «شَمعون خِتیشَه؟ نَشاشَه ایی ساعت بیدار بِومونی؟ 38بیدار بومونَه و دِوا بکَرَ تا وَرداوَردیکا دَنِگِنَه. حَییقتا کن روح اِشتیاق دارِ،اَمّا جَندَکیرا تاو نیَه.» 39عیسی ایکَر دییَر شَه و هَنی هَه دِوا کَردِشَه. 40وَقتی آگَردستَه، ویندِشه کن اَیِن هَنوزَنی خِتین، اِمی خونِه کن چَوون چَمِن خَیلی سَنگین آبَه بین. اَیِن نَزنینَه عیسی چِه جوابی بدَن. 41عیسی سوّمین کَرَرا شاگِردون وَر آمَه و اَیِنِش واتَه: «هَنوزَنی خِتیرونه و ایستراحَت بَکَرون؟ دِ وَسَّه! تَعین بَه ساعت آرَستَیَه. ایسَه اینسانی زوعَه گناخ کارون دست تسلیم بَکَنه. 42پِبه، بشَم. دَیسَه اَ کن بَمن خَیانت بَکَی، کا آمه.»

عیسی ویلاخیسته

43عیسی هَتَه گَف اَژَنیَه کن ایکَرَایی، یهودا کن ایله اَ دانزَ شاگِردیکا بَه، جَماعَتینه کن سَران کاهینن و توراتی موعَلیمن و ایسبیَه ریشون طَرَف بین و لِسو شَمشیرینَه کایبین آمِه، راکا آرَستَه. 44اَ خائینَه شاگرد، اِشتَن هَمراهون ایشایی آدوعَش بَه و واتَش بَه: «اَ کَسی کن بَینَه ماچینِه بَکَم، هَیَه؛ بَی بیگِرَ و چَی بردِ موقه اِیحتیاط بکَرَ.» 45پس وَقتی یهودا اَ جِگارا آرَستَه، جَخت عیسی وَر شَه و واتِش: «اِستا!» و بَینَه ماچینِه کَردِشه. 46اَموقه اَ آدَمِن عیسی سَردِرِ ویبین و اَی ویلاخِنیشونَ. 47ایی نفر عیسی هَمراونکا کن اَ جِگاکا پامَند بَه اِشتَن شمشیری دَراکِنیشَه و بَینَه، یالَه کاهِینی پاسَری ژِشَه و چَی گوشی آبیردِش. 48عیسی اَیِنِش واتَه: «مَگَم اَز پتارچی ایمه کن لِسو شمشیرینَه چمن گَتِه را آمَه اینَه؟ 49اَز هَمه روج معبدیکا شِمَنه دَرِ بیمه و آموج اَدَریمه و شمَه بَمن نِگَتِرون. ولی برزَموقدسه نِوشته اِن اَنجوم ببو.» 50اَموقه شاگردِن گِرد اَی آهَشتشونَه، ویریتین.

51جوانی کن فقط ایی تیکه کتانَه پارچه‌ای نَه اِشتَن جَندَکی دَپوشامونیَش بَه، عیسی دوملَه رَونَه آبَه. اَیِن اَشون نی گَتَه، 52اَمّا اَ، اَ کتانه پارچه کن اِشتَن دووریکا پِپِشتَش بَه وَر آداشَه و هَتَه لوت ویریتَه.

محاکمه در وَریکا شورای یهود

53اَیِن عیساشون یالَه کاهِنی وَر بَردَ. سَران کاهینِن و ایسبیَه ریشِن و توراتی موعَلیمن، گِرد اَ جِگاکا جَم آبَه بیین. 54پِطروس نی دوریکا عیسی دوملَه شَه تا یالَه کاهِنی کَه صِرارا آرَستَه. پس اَجِگاکا، آرا وَریکا، نیگَبانونَّه نِشتَه و کایبَه بَشتَن گَرم آکَردِ. 55سران کاهینِن و گِردِ شوورا آدَمِن عیسی زِرَ بَرا شَهادَتی دوملَه بینه تا اَی بِکِشن، ولی چیی ایی پَیدا نِکَردِشون. 56اِمی خاطر کن هَر چَنَه خَیلییِن عیسی زِرَبَرا دِروعَه شَهادَت آداشونَه، اَمّا چَوون شَهادَتِن یَندِنَه جور نِبَه. 57اَموقه چَن نَفر نَرا آمینَه و عیسی زِرَبَرا دِروعَه شَهادَت داشونَه و واتِشونَ: 58«اَمه اِشتَن دَرستِمونَه کن عیسی اَواجیَه، اِم مَعبَد کن اینسانی بالینه سِی آبَه یَه ویراوونِم و سِه روجی دِلَه، دییَرَ مَعبَدی سِی آمَکَرد کن اینسانی بالی سِی آکَردَ چی مَبو.» 59اَمّا حتی چَوون شَهادَتِن نی یَندِنَه جور نِبینَه. 60اَموقه یالَه کاهین راست آبَه و گِردی نَ کا عیسی کا دَپَرسِستَه: «هیچ جَوابی نیشَدا؟ اِم چِه گَفِه اینه کن اِم مِردِن اِشتِه زِربَرا کان شاهیدی دوعه؟» 61ولی عیسی ساکیت مندَ و جَوابی نِداشَه. هَنی یالَه کاهِن اَیکا دَپَرسِستَه: «تِه وعدَه آدوعَه مَسیح، مُتِبارَکَ خدا زوعَه ایشَه؟» 62عیسی بَی واتِش: «هِستیمَه، و اینسانی زوعَه بَویندیرون کن خدای قادِری راستَه بالی وَریکا نِشتَه، و آستامونی خِروونَّه بومَیَه.» 63اَموقه یالَه کاهین اِشتَن شِندِری پِزارنِستِش و واتِش: «دِ شاهیدِمون چیرایَه؟ 64چَی کِفرَ گَفی دَرِستِرون. شِمَه تصمیم چِچیَه؟» اَیِن گِرد عیساشون محکوم کَردَ و واتِشون چَی جزا مرگَ. 65اَموقه بعضیِن عیسی سَریکا دَمندین توو ویکَردِ؛ اَیِن عیسی چَمِنِشون دَبَسته و هَتَه کن بَی اَژَنینَه، اَواجینَه: «غَیب بواج !» نیگَبانِن نی اَی گَتِشونَه و ژِشون.

پِطروس عیسی حاشا بَکَی

66هَنگومی کن هَنوزَنی پِطروس بنیکا صِرا دِلکا بَه، یالَه کاهِنی ایلَه کَنیزونکا نی اَجِگا را آمَه 67و پطروسی ویندِشَه کن آرا وَریکا کا اِشتَن گَرم آکَردِ. اَ ژِن بَی دَیَتِشَه و واتِش: «تِه نی عیسای ناصِرینَه بیشَه.» 68ولی پِطروس حاشا ژِشَه و واتِش: «نِمَموست وسَر آنیمَگِنِست چه کاش واته!» اِمی واتِشَه و کَه دروازَ طرف شَه. اِم هَنگومیکا سوکی خَندَ. 69هَنی اَ کنیزی چَم پِطروسی گِنَه و اَیِنی کن اَجِگاکا پامَند بینِش، واتَه: «اِم مِرد ایلَه اَوونکارَ.» 70ولی پِطروس هَنی حاشا ژِشَه. تیکَلیی کن گِذَشتَه، اَیِنی کن اَجِگاکا پامَند بین، هَنی پطروسی واتِشون: «حتما تِه نی ایلَه اَوونکاشَه، اِمی خونه کن جَلیلی ایشَه.» 71ولی پِطروس دَمندَ بَشتن نفرین کردِ و قسم هَردشه واتِش: «اِم مِردی کن شمَه باتیرون، اَز آنیمَموست!» 72جَخت، سوک دِوومین کَرَ را خَندِشَه. اَموقه پِطروس یاد آرَفَندِشه کن چِنتَه عیسی بَی واتَش بَه: «سوکی دِ کَرَ خَندِ به نَه، تِه سِه کَرَ بَمن حاشا بَژَشَه.» پس چَی دل پور آبَه و بِرَمِستَه.

Currently Selected:

مَرقُس 14: CTB

Highlight

Copy