مَرقُس 15

محاکیمَه پیلاتُسی وَریکا

1سوکهَ خون، جَخت سَران کاهینِن، ایسبیه ریشونَّه و توراتی موعَلیمونَّه و یَهودی شوورا گِردِ آدَمونَّه، گَفه ژَنِرا نِشتین. اَیِن هَتَه کن عیسی بالِنِشون دَبَستَه بَه بَردِشونَه و رومی والی پیلاتُسی دَست آداشون. 2پیلاتُس عیسی کا دَپَرسِستَه: «تِه یَهودیون پادیشا ایشَه؟» عیسی جَواب داشَه: «تِه اِشتَن، واتِر!» 3سران کاهِینِن بَرکَه ایتهام بَی اَژَنینَه. 4پیلاتُس هَنی اَیکا دَپَرسِستَه: «هیچ جَوابی نیشَدا؟ دَیَس چنتَه بَتِه ایتَّهام بَژَن!» 5ولی عیسی هَنی جَوابی آنِداشَه، اَنَ کن پیلاتُس حَیرون آبَه.

6پیلاتُسیرا رَسم هِست بَه کن هرسال پِسَخَه عیدَ موقه، ایلَه زیندانی مَردومی اینتیخابینه، اَوونرا آزاد اَکَریَه. 7ایی کاولَه یاغیونکا شورش کردِ و آدَم کِشتِه خونه زیندان بین، چَوون دِلَکا مِردی بَه کن چَی نوم باراباس بَه. 8جَماعت پیلاتوسی وَر آمینَه و اَیکا اَپیشون بَه، اَ هَه رسمی کن اوزون چَوونرا اَنجوم اَدَریَه، هَنی اَنجوم بدَرِ. 9پیلاتُس اَوونکا دَپَرسِستَه: «بَپیرونه یَهودیون پادیشا شِمَرا آزاد آکَم؟» 10پیلاتُس اِمی خونِه اِمِش واتَه کن سَر آگِنَه بَه سَران کاهِینِن عیساشون زِرَ خونِه بَی تَسلیم آکَردَیَه. 11اَمّا سَران کاهِینِن جَمعییَتی تحریک کردِشون تا پیلاتوسی کا بِخان عیسی جِگا باراباسی چَوونرا آزاد آکَرِ. 12پیلاتُس هَنی اَوونکا دَپرسِستَه: «پس اَ مِردی نَه کن شِمَه بَی یَهودیون پادیشا خِلِه بکَرون، بَینَه چِبکَرم؟» 13جماعت هَنی لَسَّه آداشون کن: «اَی صَلیبی سَر بکش!» 14پیلاتُس اَوونکا دَپَرسِستَه: «چیرا؟ چِه بدی ایی کَردَشه؟» ولی اَیِن تَتَّه لَسَّه نَه سَس آداشون: «اَی صَلیبی سَر بکش!» 15پس پیلاتُس کن اَپیشبَه جماعتی راضی غَم بَرِ، باراباسی چَوونرا آزاد آکَردِشَه و دستور داشَه کن عیسی شَلاق ژِ بَه دوملَه اَی صَلیبی سَردِرِ بکِشن.

عیسی دَسپَر گَتِه

16اَموقه سربازِن، عیساشون والی کاخی سِرارا بَردِشون و لَشکَری گِردِ سَربازون یَندِ وَر خِلِه کَردِشونَه. 17اَیِن ایلَه اَرغَوانیَه ردایی عیسیاشون دَکَردَ و تاجی چِغیکا دَوَتِشونَه و عیسی کَلَّکا آناشون. 18اَموقه دَمندین چَیرا تَعظیم کَردِ و اَواجینَه: «سلام بَر یهودیون پادیشا!» 19اَیِن لِسینه چَی کَلَّه اَژَنین و عیسی سَریکا توو پِکَرین، چَی نَ کا زِنگ اَژَنینَه و بوکَه خوروستِه نَه چَیرا تعظیم اَکَرین. 20عیسی دَسپَر گَتِه بَه دوملَه، اَرغَوانییَه ردا چَی جَندَکیکا بَروَردِشون، و چَی شِندِری بَی دَکَردِشونَه. چَی بَه دوملَه اَشون بَردَ تا صَلیبی سَردِرِ بَی مِخَه کو بِکَن.

عیسی صلیبی سَر مِّخَه کو کَردِ

21اَسربازن راه دِلکا ایی نفرِشون ویندَ کن چَی نوم شمعون بَه. شَمعون قیرَوانی آدَمونکا و اِسکندَر و روفوسی دَدَ بَه و زَمینی سَردِرِ کَشتو کاریکا کایبَه آمِه. سربازن اَشون دیم پِنوعَه تا عیسی صَلیبی بوعَرِ. 22پس عیساشون جِگاایرا بَردَ کن چَی نوم جُلجُتا بَه کن چَی مَعنی جوم جَومَه جِگا اَ. 23اَیِن شَراوی کن مُرینَه یَندِ گِنَه بَه بَی آداشونَه کن بِنجِه، ولی عیسی اَی نِنتِش. 24چَی بَه دوملَه عیساشون صَلیبی سَردِرِ مِخه کو کَردَ و چَی شِندِرون اِشتَن دِلَکا رسَت کَردِشون. اَیِن اِمی خونه کن مَلوم ببو گِرَم تیکه، کِرَم گِلَه رَست بَبی، قورعه دَرَفندِشون.

25ساعت نَه اِ صب بَه کن عیساشون صلیبی سَردِرِ مِخه کو کردَ. 26چَی تَقصیر نومَه سَردِرِ نِوِشتَه آبَه: «یَهودیون پادیشا.» 27دِ گِلَه پِتارچی نی عیسی نَه صَلیبی سَر مِخ ژِشون، ایلَه عیسی راستَه وَریکا و اَیلَه چَی چَپَه وریکا.» 28اِنتَرَکه مَوقَدَّسَه نِوشتَه اون اَ نِوشتَه اَنجوم بَه کن باتی: «اَ خطا کارون کاولَکا بَه حیساب آمَه.» 29اَیِنی کن اَ راکا دَیوَرینَه اِشتَن کَلَه اون تم اَدَرین، زبونینه اَواجینَه: « تِه کن اَپیربَه مَعبَدی ویراوونی و سِه روجی دِلَکا اَی هَنی سِی آکَری، 30اِشتَن نیجات بِدَ و صَلیبیکا ویرا!» 31هِنتَرَکِه سران کاهینِن و توراتی موعَلیمِن نی اِشتَن جمعی دِلَکا عیسی دَسپَر اَگِرینَه و اَواجینَه: «دیَرَ کَسون نیجاتِش دوعَه، اَمّا اِشتَن نیَشا نیجات دوعه! 32بَرزِن وعدَ آدوعَه مَسیح، خدا قامی پادیشا، ایسَه صَلیبیکا ویرا تا بِوینَم و ایمان بوعَرم.» اَ دِ نَفر کن عیسی نَه مصلوب آبَه بینَه نی، عیسی زَبون اَدَرینَه.

عیسی مَردِ

33ناهاری موقِه ساعت دانزَ کا تا ساعت سه، ظِلَمات گرد اَ مَملَکَتی گَتِشه. 34آختاو ویگِنی موقه ساعت سه کا، عیسی تَتَه لَسَّه نه سَس آداشَه: «ایلویی، ایلویی، لَمّا سَبَقتَنی؟» یَعنی «اَی چمن خدا، چمن خدا، چیرا بَمن آهَشتَرَ؟» 35بَعضین کن اَ جِگاکا مَند بین وَقتی اِمی دَرَستَشون، واتِشون: «دیَسَه اِلیاسِ پَیغمبَری کا خِلِه کَردِ.» 36ایی نَفر ویریتَه و ایلَه ایسفنج پِگَتِشَه و زِز آبَه شَراویکا ویخاستِش و چَی به دوملَه چویی سَر پِناشَه و عیسی گَوی وَر بَردِشَه تا بِنجِه و واتِش: «بومونَه دَیَسم، اِلیاس پَیغمبَر بومَیَه تا بَی صَلیبی سَریکا ویوَرِ؟» 37عیسی تَتَّه لَسَّنَه سَس آداشَه و آخِرین نَفَسِش کَشتَه. 38هَه موقِه مَعبَدی پَردَ کَفا تا بن جیزِریستَه و دِ پارَ آبَه. 39وَقتی سربازون فَرماندَ کن عیسی نَ کا پا مَند بَه، ویندِشَه اَ چِنتَه اِشتَن آخِرین نَفَسی کَشتِش، واتِش: «واقییَن کن اِم مِرد خدا زوعَه بَه.»

40چَن گِلَه ژِنونکا دوریکا کایبن تَمشا کَردِ. اَ ژِنون دِلَکا مَریَم مجدَلیَه، مریمی کن گِچَه یَعقوب و یوشا نَنَه بَه، و سالومِه نی دَرِبینَه. 41اِم ژِنِن هَنگومی کن عیسی وِلَته جَلیلیکا بَه، بَیکا پِیرَوی و خِیدمَت اَکَرینَه. خَیلی دییَرَ ژِنونکا نی کن عیسی نَه اورشَلیمیرا آمَه بینَه، اَجِگاکا مَند بین.

عیسی دفن کردِ

42اَ روج، ’تَهَیَه‘ روجِ بَه، کن یَهودییِن اَ روجیکا بَشتن عیدیرا آمادَ اَکَرین، یعنی ایی روج موقدسَه شنبکا بَه نَه. پس دییَرمازی موقِه 43ایلَه مِردی کن چَی نوم یوسف بَه و شهر رامه آدَمونکا بَه، جرئت کردشه و رومی والی پیلاتُسی وَر شَه وعیسی مَیّتی خاستِش. یوسوف، یهودی شورا ایلَه مُحترمَه آمونکا ب و خدا پادیشایی چَم بَرا بَه. 44پیلاتُس وقتی درستِشه کن عیسی اَنه زو مَردَیَه تعجوب کردِش. پس سَربازون فَرماندَ خِلِه کَردِشَه تا دپَرسِه عیسی مَردَیَه یا نِه. 45وقتی پیلاتُس اَ فرماندَکا درَستِش کن عیسی مَردَیَه، دِ هَشتِشَه کن یوسوف، عیسی مَیتی بِبرِ. 46یوسوف نی کَتانَه کَفنی خِریشَه و مَیِتی صَلیبی سَریکا ویروَردِش. یوسوف عیسی میتی اَ کتانَه کَفنیکا پِپِشتِشَه و تِربَه ایکا کن کازَ مَغاری دِلَکا تاشتَشون بَه آناشَه. چَی بَه دوملَه یالَه کازی تِربَه دَهَنه را گِلِل آکَردِش. 47مریم مَجْدَلیّه و یوشا نَنَه مریم، ویندِشون کن عیسی مَیِّتی کِرَم جِگاکا آناشونَه.

Currently Selected:

مَرقُس 15: CTB

Highlight

Copy