Okyɔɔkyɔ 24
24
A fwo iPol ikwɔ mi inai iFelisi
1Ngwi i kye egbe eda nɛ okwukwo inggisɛ ofifɛ Anania ba wa kaka iSidzaria yi engyukwo angbeka bɛyi inggisɛ oye ola iyin di iTetulɔ, a si gbe itɔdzɛ ngwi a le gbe odzɛ tukwu iPol ewo mi ele ma to iGɔna esɛ. 2Ngwi a kwu iPol ela kaka ifun nɛ, iTetulɔ kye itɔdzɛ mgbi elikwɔ mgban tso iFelisi gbɛɛ, <<Eyi to mi iyu mi abɔ abu onɔ she, inɛ mgbi abu odiidi na di ba yi okiyayi mi ɛsɛ nɛni. 3Ugabaidu iFelisi, mi ali imbe yi ali ofɛ duu, eyi gbela ungwɔnɛ di gbede nu abu kwuba. 4Nghaduu ombe abu onɔ bayɔ, n le bɔ gbɛɛ o ki shitukwu diyɛ fwo eyi gwee.
5<<Eyi difwi gbɛɛ inggisɛ nɛ li inggisɛ oteeye, o li tu ola eye wo mi idzidzɛ mgbi emi iJuda mi ɛsɛ duu. O li inggisɛ ogbe emi iNadzareti teyi mi eye 6o di fya okye ayiwi kaka ozu okwukwo osunu Imgbasho mi iJerosalin; nghanɛ eyi kpaklin. [Di mina ogbɔn ikwɔ mi ola mgbi eyi. 7Kpaa agyegika iLisia ba mfyumfye wa kyon kyi lafwa mbi eyi, 8kwu ama nkwun elikwɔ ntonɛ ela nu ma ba]#24:8 Ambulu nɛ dzɛ mi olɔɔlɔ angbeka ba., ni abu byi ma ita abuabu ta abu ka yagba otu otsitsi mi odzɛ ngwi eyi gbe le tukwun ewo ntonɛni.>>
9Emi iJuda ntona gbela wo odzɛ ngwi a gbe tukwun ewo ntonani, dile tso gbɛɛ odzɛ ntonɛ li otsitsi.
10Ngwi iGɔna kyɔ iPol abɔ gbɛɛ no gbɔdzɛ nɛ, o si wita ogbɔdzɛ gbɛɛ: <<Ani ye i kye onova ibyibyi ngwi abu li inggisɛ ogbiikwɔ mi ɛsɛ nɛni; nghanɛ n dzɛ yi atsa onatsondu ewen. 11O ka yagba byi inggisɛ angbeka fwo i ngha egbe iwyodefa waba ngwi ani kɛ iJerosalin oka sunu. 12Ama ogbe odzɛ tukwu ani ewo ntonɛ yama din le tangwodzɛ yi inggisɛ onyi mi ozu okwukwo osunu Imgbasho hona tu inggisɛ wo mi ozu okwakye mgbi emi iJuda naadi mbeka onyonyi mi ogalu ba. 13A dika yagba nu osa mi odzɛ onyi ngwi a gbe le tukwu ani ewo nɛ ba. 14Nghaduu, ani gbela dafi engyukwo mgbi ama tsɛwɛ gbɛɛ ofɛ mgbi Otsɛ ngwi ani le kyɛdɔ na li ayin ba mani. Kpaa ani kale sunu Imgbasho ngwi emi otsikyani sunu mani. Ani di noyɛyɛ mi alungwɔ ngwi a lɔ mi ola mgbi iMose bɛyi afɛ mgbi ama ogbɛɛsɛ duu 15ani di dzɛ yi ɛwɛ ogbe byiibyi mbi Imgbasho ungwonyi dafi inggisɛ ntonɛni, gbɛɛ emi osaan bɛyi emi imbali duu ka kyɛɛ mi ikwu. 16Nghanɛ ani li fya alonɔ ni itukwu mgbi ani dzɛ saan mi inɛ Imgbasho bɛyi inggisɛ.
17<<Ngwi ani wa dzɛma ba onova ibyibyi nɛ, n ba iJerosalin ikye okye umba wa nu emidɛn emi adzɛ di fifɛ nu Imgbasho. 18Ani fwɔlu ewani yɛɛ saan mi onɔ ngwi a tu ani mi ifyudɛ ozu okwukwo osunu Imgbasho le kyungwɔnɛ mani. Ibyi inggisɛ to yi ani hona ani ndeye yi inggisɛ oka ba. 19Nghaduu emi iJuda angbeka to ayɛsɛ mgbi Asia, ngwi i gbuo a ki to mmɛnɛ mi inai abu nu ma sulu obwɛndɛ obube ikpewo ani yɔ a ki kyɔ. 20Hona ama nto mmɛnɛnɛ nu ma gbɔ ungwɔ obube ngwu ma tu mbi ani mi onɔ ngwi ani kwudzɛ mi inai okwakye mgbi engyukwo emi iJuda mani. 21Li mi ikye ungwɔ onyi ngwi ani kyile ela esho onɔ ngwi ani kwudzɛ inai ma na ta: <Li itɔdzɛ mgbi okyɛɛ mi ikwu ngwi abu le gbɔ ani ikwɔ inɛ aani.> >> 22Nghanɛ iFelisi n ye odzɛ Ofɛ mgbi Otsɛ saan nɛ, tsamu egbe ikwɔ lu iyayi. O gbɛɛ, <<Ni iLisia okwukwo ogbakwu wa ba ta n ka ngyɛlu ikwɔ mgbi abu nɛni.>> 23O wo ongyukwo oblakwutsɛ ola gbɛɛ no nu ma ngyo iPol kpaa nu ma ka kyon tukwu ba di nu emi okan ofɛ nu ma tobyun mi imina mgban. 24Ngwi egbe nyɛ gwee nɛ, iFelisi yi owan iDrusila, nli ongyaa emi iJuda na waba. O dɛsɔ nu ma kye iPol ba wa fwon dafi o le gbɔdzɛ oyɛyɛ onuunu mbi iYesu iKrestu mani. 25Dafi iPol le tsuutsa mgbi odzɛ saan, yi obwa ewo fyii bɛyi ikwɔ ogbɔɔgbɔ nkyɛ iyayi nɛ, imio wo iFelisi man o gbɛɛ, <<I gyɔ ngha tsatso! O ka yagba lu. Nin wa tu onɔ ta, n ka dɛsɔ mbi abu.>> 26Mi itɔnɔ na, iFelisi tsɛwɛ gbɛɛ iPol ka kye akwatsa wo ongwu ondu, nghanɛ o tonya odɛsɔ mbon ba.
27Ngwi i nyɛ onova efa nɛ, iPoshiɔ iFɛstusu dɔkɛ utɔ gbikye iFelisi, kpaa ikyegbɛɛ i mina iFelisi okyumse yi emi iJuda nɛ, o dzata iPol mi obawi.
Currently Selected:
Okyɔɔkyɔ 24: UTR
Highlight
Share
Copy
Want to have your highlights saved across all your devices? Sign up or sign in
©2024 Initiative for the Translation and Development of African Languages
