Okyɔɔkyɔ 25
25
IFɛstusu gbɔ iPol ikwɔ
1Ngwi iFɛstusu gyuutɔ kye egbe eta nɛ, o dzata iSisiria lu iJerosalin, 2imbe na engyukwo ama ofifɛ bɛyi engyukwo emi iJuda ba mbon wa gbe itɔdzɛ obube mgbi iPol tonkɛ esɛ. 3A si byakpa mina abɔ oyaaya mbi iFɛstusu gbɛɛ, no tobyi ama kye nyinɛ iPol luba iJerosalin maama, ali ma a le wewo owa kwo ofɛ ngwɔn. 4IFɛstusu nu uka gbɛɛ, <<A kye iPol dzɛkɛ iSisiria, ma ani abuen kpaa n le kɛ ele dzikan-dzikan. 5Yeba non kyɔ obube yɔ, ni ama ogbe ema teyi angbeka wafɔ yi ani ka gbɔ obube ngwi o kyɔ ma, mi imbe nani.
6Ngwi iFɛstusu kye egbe egyata naadi iwyo yi ama nɛ, o si lu iSisiria, tegblifan nɛ o kwu ela gbɛɛ nu ma kwakye mi opiikwɔ di noola gbɛɛ nu ma kye iPol ba mbi ongwu. 7Ngwi iPol wa to nɛ, emi iJuda ama nkyɛ mi iJerosalin ba ma loka won, gbe odzɛ okwulewo ama nli otsitsi ba le tukwun ewo.
8Ta iPol si natsondu gbɛɛ: <<N kyungwɔ obube onyi mi ikpewo ola mgbi emi iJuda naadi ozu okwukwo osunu Imgbasho mi iJerosalin hona iSidza ba.>>
9Ngwi i mina iFɛstusu okyungwɔ gbɛɛ no kpa emi iJuda nɛ, o nya iPol gbɛɛ, <<O ka gbela okɛ iJerosalin azukwu ni ani ka fwo abu ikwɔ mi itɔdzɛ obube ntonɛ wɛ?>>
10IPol gbɛɛ: <<Ani kwudzɛ mi opiikwɔ mgbi iSidza onɛnɛni, li imbe ngbuo gbɛɛ a ka gbɔ ani ikwɔ aani. Abu abuabu ye saan n kyɔ emi iJuda obube onyi ba. 11Kini ani kyɔ obube yɔ, n fwa okwulu ba. Kpaa ni odzɛ obube ngwi emi iJuda gbe tukwu ani ewo nɛ li otsitsi bayɔ, inggisɛ onyi sulu ofɛ okye ani wo ma abɔ ba. N tɛkyɛ ni iSidza abuon fwo ani ikwɔ!>>
12Ngwi iFɛstusu kye bwalu ondu yi ama osɔ ikwɔ yan nɛ, o nya iPol gbɛɛ: <<O tɛkyɛ nu iSidza nɛ li mbi iSidza o ka kɛ!>>
IFɛstusu tsɛwodzɛ yi Utɔ Agripa
13I kye ongwɛ egbe gwee nɛ Utɔ Agripa yi iBɛnisi kaka iSisiria oka kye mmwɛ nu iFɛstusu. 14Ngwi i yɛɛ gbɛɛ a ka la egbe ibyibyi mi imbe na nɛ, iFɛstusu kponya odzɛ mgbi iPol na yi utɔ. O gbɛɛ: <<Inggisɛ oka dzɛ mmɛnɛ ma ngwu iFelisi dzanta wo obawi. 15Onɔ ngwi ani kɛ iJerosalin ma, engyukwo ama ofifɛ yi engyukwo mgbi emi iJuda gbe odzɛ obube tukwun ewo di gbɛɛ nu ma ngwɔn ikwɔ.
16N nya ma gbɛɛ yama li aletɔ mgbi emi iRoma okye inggisɛ nu ama ngbe odzɛ obube le tukwun ewo ba, sede a ka nun ofɛ no natsondu ewon mi odzɛ obube ngwi a gbe tukwun ewo mani. 17Onɔ ngwi a ba mmɛnɛ yi ani ma, ani mbe onɔ yi ikwɔ na wuba, kpaa n byakpa kwu ela ni a kwakye mi ozu ikwɔ tegblifan si nu ma kyon ba. 18Ngwi ama ogbe odzɛ tukwun ewo kyato ogbɔdzɛ nɛ, a yama kwu iyi ungwɔ obube ama ani tsɛwɛ ma ba. 19Ungwɔ ngwi a yɛ kyɔ yɔ, a yɛ le gbɔ onɔgbɛ biyan mi ikye odzɛ Imgbasho mgbi ama bɛyi odzɛ mgbi inggisɛ ikwukwɔ ngwu a kwun di iYesu ngwu iPol le tso gbɛɛ o dzɛ oshishe nani. 20I wo ani ɛndɛ dafi n ka kya mi itɔ ikwɔ nɛ mani; nghanɛ n yɛ byun ita ni o ka gbela kɛ iJerosalin nu ma ka kya mi itɔdzɛ ntonɛ yɔ. 21Ngwi iPol tɛkyɛ gbɛɛ nu ma kye ongwu nu dafi oweka mgbi ongyufa dzɛ ma nɛ, n woola gbɛɛ nu ma kwunewo ongyon saan nghataa ba onɔ ngwi ani ka kyon kɛ mbi iSidza mani.>>
22Ta Agripa nya iFɛstusu gbɛɛ, <<I mina ani ofwo ongyulɔ nɛ abuen.>> O gbɛɛ, <<Ekeka ta o ka fwon.>>
IPol mi inai Agripa
23Tegblifan nɛ, Agripa yi iBɛnisi wewo datu kaka ozu okwakye yi engyukwo oblakwutsɛ ama olɔngbɔ-lɔngbɔ bɛyi ama ogbe inggisɛ teyi mi ogalu nani. IFɛstusu si woola nu ma kye iPol kaka ifun. 24IFɛstusu gbɛɛ: <<Utɔ Agripa yi ema ama nto mmɛnɛ yi eyi duu, ema di ongyulɔ nɛ lɔɔ! Emi iJuda duu biibɛ yi ani mi iJerosalin bɛyi iSidzaria mmɛnɛni, le feela gbɛɛ o mɛ ngwi o ki dzɛ oshishe wuba. 25N difwi gbɛɛ o kyungwɔ mɛ ondu ikwu ba, kpaa ikyegbɛɛ o kye akwɔ mgban kɛ mbi ongyufa nɛ, n kye weka okyon dɛsɔ lu iRoma. 26Nghaduu n sulu itɔdzɛ onyonyi ngwi n ka lɔ nu Ugabaidu ikye inggisɛ nɛ ba. Nɛ n kyon ba inai ema duu, onghaangha duu yɔ mbi abu utɔ Agripa, azukwu ni ema kyan di kana n ka tu itɔdzɛ ngwi n ka lɔ. 27Lubana i tso ozoyeye ba, olɔ itɔdzɛ obube ikye inggisɛ obawi ba ta kyon dɛsɔ lu mbi Ugabaidu.>>
Currently Selected:
Okyɔɔkyɔ 25: UTR
Highlight
Share
Copy
Want to have your highlights saved across all your devices? Sign up or sign in
©2024 Initiative for the Translation and Development of African Languages
