ปือบูวัจ 2
2
ซือมืองัจ นะ ตูฮัด ตูโรด มาแรฮ
1กาลา อารี บรามัย เพนเทคด รอจ ดัฮ_ ลูมอฮ มูเระ ซือมูฮา ดูโดะ บือซามา ซือตือปัจ. 2ดัดดัด_ อาดา ซือวารา บือซัยํ_ ดาตัก เดะ ลาแงะ_ ซือรูปา รีโบจ ตือฆัยํ_ บูงี มือฮาโมก เดะ รูมัฮ นู กูญา ดูโดะ อีตู. 3กูญา ลีฮัจ_ บือกะ จะ_ อาดา ญาลา อาปี_ ซือรูปา ลีดัฮ_ มาแรฮ ฌือแลว_ กือนา เดะ อาตัซ กูญา ซิกมาซิก. 4กูญา ซือมูฮา ซาโมจ ซือมืองัจ นะ ตูฮัด ปือนอฮ ดัฮ. กูญา ปาคัจ ฮึนตะ นะ มือเลา ปือมือเลา บาซา อาซิก_ ตูโรจ บือกะ นู ซือมืองัจ นะ ตูฮัด บรี กูญา มือเลา.
5วะตู อีตู_ เดะ นังฆรี เยรูซาเลม_ อาดา ลูมอฮ บักซา ยิว_ นู ตูเฮะ กะ ตูฮัด เตอ_ นู มาแรฮ เดะ โกะ นังฆรี ซือมูฮา_ ราตา เดะ ดือนียา เลอ. 6ตานา กูญา ดืองัยํ บูงี ซือวารา บือซัยํ อีตู_ ซือมียา บาญะ มาแรฮ บือซามา. กูญา ตือกือฌุจ_ กรานา ดืองัยํ โกะ มูเระ มือเลา_ ฌาดี ปือมือเลา บาซา นะ อีซี กูญา ตะอาซิก. 7กะฆีเตอ กูญา ปือและ ฮาตี ซูโงฮ มือเลา จะ_ “เอฮ_ ลูมอฮ ซือมียา นู มือเลา เตอ_ โบะ กูญา ฌาดี ลูมอฮ นังฆรี ฆาลิลี_ ราตา ซือมียา_ บูกัด เฆอ? 8กะฮามี เลอ_ นู กีตา ซือมูฮา ดืองัยํ กูญา มือเลา_ ฌาดี บาซา ตูโปะ นะ กีตา ซิกมาซิก? 9โซะ กีตา นี_ อาดา ซือมียา นังฆรี ปาเทีย_ นังฆรี มาดัย_ นังฆรี เอลาม_ นังฆรี เมโซโปเตเมีย_ นังฆรี ยูเดีย_ นังฆรี กับปาโดเซีย_ นังฆรี ปอนโตด_ นังฆรี เอเซีย_ 10นังฆรี ฟรีเจีย_ นังฆรี ปัมฟีเลีย_ นังฆรี อียิบ_ โซะ นังฆรี ลีบียา นู ดาปิก ซัยรีน. อาดา ซือมียา นังฆรี อีนี ซือมูฮา_ ฌางัน ซือมียา มาแรฮ เดะ นังฆรี โรม. อาดา ลูมอฮ บักซา ยิว_ ฌางัน ซือมียา มาโซะ ลาฆู ยิว. 11อาดา ซือมียา ปูเลา ครีด_ ฌางัน ลูมอฮ บักซา อาระเบีย_ กีตา ซือมูฮา ดืองัยํ ซือมียา อีนี_ มือเลา ลาฆู มือฆัฮ นู ตูฮัด บูวัจ ดัฮ_ ฌาดี ปือมือเลา บาซา นะ กีตา ตะอาซิก เลอ.”
12กะฆีเตอ กูญา ซือมูฮา ปือและ ฮาตี_ กูญา ซือบะ_ ตาญา ซามา กูญา จะ_ “ฌาดี กะฮามี เลอ?” 13อาดา ซือมียา ซือตืองัฮ_ อาฆัฮ ฆือละ_ มือเลา จะ_ “ลูมอฮ อีนี มาโบะ ซูโงฮ ดัฮ.”
เปโตร มือญาเระ ลาฆู นะ เยซู
14ตาปี เปโตร เตอ_ ญา บือดีรี บือซามา ฌางัน ลูมอฮ ปือญูโรฮ_ ซือบือลัซ อูรัก อีตู_ ญา มือเลา ฌางัน ลูมอฮ ซือมียา บาญะ. ญา มือเลา ซือวารา บือซัยํ_ จะ_ “เออ กาเญา_ ลูมอฮ บักซา ยิว_ ฌางัน ลูมอฮ ซือมียา_ นู ดูโดะ เดะ นังฆรี เยรูซาเลม_ มือนีงัย กะ กู เลอ_ กู นะ บรี กาเญา ตาฮู จะ_ ลาฆู อีนี ฌาดี กะฮามี. 15ลูมอฮ อีนี ฮอย เตด มาโบะ_ บือกะ นู กาเญา อีงัจ เลอ_ กรานา จะ ฌาดี วะตู ปูโกยํ ซือมีลัด ปาฆี เอฮ. 16ลาฆู อีนี ฌาดี ดัฮ_ ซือรูปา บือกะ ปือมือเลา นะ โยเอน_ ซือมียา ตูโดฮ ลาฆู นะ ตูฮัด นู จะ
17 “ ‘ตูฮัด เดะ อาตัซ มือเลา จะ_
เดะ วะตู โซะ ปือญูดัฮ_ กู นะ บูวัจ กะฆีนี
กู นะ อูแร ซือมืองัจ นะ กู_ กะ ลูมอฮ ซือมียา ซือมูฮา.
โกะ นานะ กีลากี นีบีนี นะ กาเญา_
นะ ตูโดฮ ลาฆู นะ ตูฮัด.
โกะ อูรัก มูดา_ โกะ อูรัก ตูฮา_
นะ มีปี ลีฮัจ ลาฆู นะ ตูฮัด เลอ.
18 โซะ ลูมอฮ ปราโซฮ กีลากี นีบีนี นะ กู โปด_
กาลา อีตู_ กู นะ อูแร ซือมืองัจ นะ กู_ เดะ กูญา
บรี กูญา นะ ตูโดฮ ลาฆู นะ กู เลอ.
19 กู นะ ปลีฮัจ ปือนานา นู มือฆัฮ_ นู ปือและ
เดะ ลาแงะ โซะ อาตัซ_
เดะ ดือนียา โซะ บาวัฮ โปด.
อาดา ซือรูปา ดารัฮ_ ซือรูปา อาปี_
ซือรูปา อาซะ เลอ.
20 มาตาอารี นะ กือลับ เตอ.
บูลัด นะ มีรัฮ โปด_ ซือรูปา กะ ดารัฮ_
ดูลู เดะ อารี อีตู. ฌาดี อารี บือซัยํ_
อารี บือซรี นะ ตูฮัด เตอ เลอ.
21 นะ ฌาดี กะฆีนี จะ_
ราตา ซือมียา นู บลาโลก กะ ตูฮัด บรี ตูโลก_
กูญา นะ ฮีโดะ ลือปัซ บาฌิ ดัฮ.’
ตูฮัด ญา จะ #
โยล 2.28-32
. ”
22เปโตร ญา มือเลา ลาฆี จะ_ “ลูมอฮ บักซา อิซราเอน เออ_ มือนีงัย เลอ กะ ลาฆู อีนี. อาดา เยซู ซือมียา ตูโปะ นาซาเรด เตอ_ ญา เลอ_ นู ตูฮัด เดะ อาตัซ ซูโรฮ มาแรฮ กะ กาเญา. ตูฮัด บือเลฮ ตูโลก ญา_ บรี บูวัจ ปือนานา ซีดี_ นู มือฆัฮ_ นู ปือและ ซูโงฮ_ เดะ ตืองัฮ กาเญา. กะฆีเตอ ญา บรี ลีฮัจ ซัฮ จะ_ นู ญา ซูโรฮ เยซู มาแรฮ. ลาฆู อีนี ซือมูฮา_ กาเญา ตาฮู ดัฮ. 23เยซู อีนี เตอ_ ตูฮัด ซรัฮ บรี กะ กาเญา_ บือกะ ญา บือกีรา ตือตู ดัฮ_ บือกะ ญา ตาฮู ดูลู เลอ. กะฆีเตอ กาเญา รีฆะ ญา_ บรี ลูมอฮ อูรัก ฌาฮัจ กาจิก ญา_ บรี มาตี เดะ กายู ปลีตัก. 24เยซู อีนี เลอ_ ตูฮัด บือเลฮ อาเกะ_ บรี ฮีโดะ ปาเระ ดัฮ_ บรี ลือปัซ เดะ ลาฆู ซูซัฮ ซาเกะ_ นู บรี มาตี ดัฮ. ลาฆู มาตี นะ ปือฆัก ญา_ นะ ฮูโกบ ญา_ ฮอย เตด บือเลฮ เลอ.
25“ ราฌา ดาวิด ดือละ มือเลา ปาซัน ญา ดัฮ_ จะ
“ ‘กู ฌือเงาะ ลีฮัจ ตูฮัด อาดา โซะ ฮือลด กู ซือลาลู.
ญา อาดา เดะ โซะ กานัน กู_
ตีเมา บรี กู ฆาโดฮ เดะ ลาฆู มานามา.
26 กะฆีเตอ_ กู ซูกา ฮาตี โตระ.
มูโลจ นะ กู มือเลา ลาฆู ปือมือเลา
นู บรี ซูกา ฮาตี.
กะฆีเตอ ฌูฆา_ ญาวา นะ กู โปด_
นะ นาตี_ จาดัก นะ ดาปัจ ตูฮัด.
27 กรานา เกา นะ ฮอย เตด ตีงัน กู_ เดะ นังฆรี ฮาตู.
เกา นะ ฮอย เตด บรี ปราโซฮ นู จรัฮ บาฌิ นะ เกา_
นะ กือนา บูโระ บูโซะ เดะ ฌีรัจ.
28 เกา บรี กู ลีฮัจ ฌาลัด_
นู บาวา ปี กะ ลาฆู ฮีโดะ ดัฮ.
เกา นะ ดูโดะ บือซามา ฌางัน กู_
บรี กู ซูกา ฮาตี_ ปือนอฮ ดัฮ #
มปต 16.8-11
.’ ญา จะ.”
29เปโตร มือเลา ลาฆี จะ_ “โกะ ดีบราดี เออ_ ปาซัน ราฌา ดาวิด_ นู บีลาแก นะ กีตา อีนี เตอ_ กู ฮาตี บรานี นะ มือเลา ฌางัน กาเญา จะ_ ญา โปด มาตี ดัฮ_ กือนา ตานัม ดัฮ. ฆูฮา ตานัม บาดัด นะ ญา_ อาดา ฌางัน กีตา_ รอจ กะ อารี อีนี เลอ. 30ตาปี ญา ฌาดี ซือมียา ตูโดฮ ลาฆู นะ ตูฮัด เลอ. ญา ตาฮู ปูลัก จะ_ ตูฮัด เดะ อาตัซ บือเลฮ อาเกะ มือเลา กือมัซๆ_ บือฌาญี ฌางัน ญา จะ_ ตูฮัด นะ บรี บือแนฮ นะ ญา_ ซืออูรัก_ ฌาดี ราฌา_ ซือรูปา บือกะ ญา.#มปต 132.11; 2ซม 7.12-13 31ดาวิด ตาฮู ลาฆู อีนี ดูลู_ กะฆีเตอ_ ญา มือเลา ปาซัน ราฌา นู บรี ซือลามัจ อีตู จะ_ ญา นะ ฮีโดะ ปาเระ เดะ มาตี. ญา มือเลา จะ ‘ตูฮัด นะ เตด ตีงัน ญา_ เดะ นังฆรี ฮาตู. ญาวา นะ ญา_ เตด นะ กือนา บูโระ บูโซะ#มปต 16.10 .’
32“เยซู อีนี เลอ_ ตูฮัด เดะ อาตัซ_ บูวัจ บรี ญา ฮีโดะ ปาเระ เดะ มาตี ดัฮ. กามี ซือมูฮา ฌาดี ซะซรี_ นู ลาฆู อีนี ฌาดี ลาฆู ซูโงฮ. 33กะฆีเตอ เยซู อีนี_ ญา กือนา อาเกะ ดัฮ_ ปี รอจ กะ โซะ กานัน นะ ตูฮัด_ นู อาโปก เดะ อาตัซ. กะฆีเตอ_ ญา ซาโมจ ซือมืองัจ นะ ตูฮัด_ บือกะ ตูฮัด บือเลฮ บือฌาญี ดัฮ. กะฆีเตอ เยซู โปด_ ญา บือเลฮ อูแร ซือมืองัจ นะ ตูฮัด กะฆีนี เลอ_ บือกะ กาเญา ลีฮัจ ดัฮ_ ดืองัยํ ดัฮ. 34ซาเบะ ราฌา ดาวิด เตด บือเลฮ ญาแญะ รอจ กะ อาตัซ ลาแงะ_ ตาปี อีซี ญา ตะอาซิก มือเลา จะ
“ ‘ตูฮัด บือซัยํ เดะ อาตัซ_
มือเลา ฌางัน ตูฮัด นะ กู จะ_
ดูโดะ เลอ_ โซะ ซือบือลัฮ กานัน นะ กู
35 ตือดะ กู นะ บูวัจ บรี ลูมอฮ ซือตรู นะ เกา_
นะ ฌาดี บือกะ ปาปัด_
นู ซาโมจ ตาปะ กากี นะ เกา #
มปต 110.1 .’
ดาวิด ญา จะ.
36“กะฆีเตอ_ บรี ลูมอฮ บักซา อิซราเอน ซือมูฮา_ ตาฮู ซูโงฮ จะ_ เยซู เตอ_ นู กาเญา กาจิก เดะ กายู ปลีตัก ดัฮ_ ญา เตอ_ ตูฮัด เดะ อาตัซ บือเลฮ บูวัจ บรี ญา ฌาดี ตูฮัด ดัฮ_ บรี ญา ฌาดี ราฌา นู บรี ซือลามัจ เลอ.” เปโตร ญา จะ.
ลูมอฮ ซือมียา มาแรฮ ปือจายา
37ตานา ลูมอฮ ซือมียา ดืองัยํ ดัฮ_ กูญา บราซา ฆาโดฮ ฮาตี_ มือเลา ฌางัน เปโตร_ ฌางัน ลูมอฮ ปือญูโรฮ นะ ตูฮัด นู ฆีลาฆี จะ_ “ดีบราดี เออ_ กามี นะ บูวัจ กะฮามี บาฌิ?”
38กะฆีเตอ เปโตร มือญาเระ กะ กูญา จะ_ “บรี กาเญา ราตา ซือมียา บราเลฮ ฮาตี เลอ_ ซาโมจ ลาฆู ซือลับ เดะ อาเย_ เดะ ปือนามา นะ เยซู คริด เลอ_ บีดา ตูฮัด นะ อาเกะ ดูซา นะ กาเญา. กะฆีเตอ กาเญา โปด_ นะ ซาโมจ ซือมืองัจ นะ ตูฮัด_ นู ตูฮัด นะ บรี. 39ซาเบะ จะ_ นู ตูฮัด บือเลฮ บือฌาญี กะฆีเตอ_ ญา บือฌาญี ฌางัน กาเญา_ ฌางัน กือมอน อานะ นะ กาเญา_ ฌางัน ลูมอฮ ซือมียา นู ดูโดะ ฌาโวฮ ซามา เตอ_ ฌาดี ราตา ซือมียา นู ตูฮัด นะ กีตา บลาโลก_ บรี มาแรฮ ซารี ญา เลอ.” ญา จะ.
40กะฆีเตอ เปโตร ญา มือเลา กือฌะ กือมัซ_ มือเลา บาญะ ลาฆู_ ปรีงัจ กะ กูญา จะ_ “บรี ญาวา นะ กาเญา ลือปัซ_ เดะ บักซา นู เตด บือฆูนา อีนี เลอ.” 41กะฆีเตอ_ ลูมอฮ ซือมียา นู ซาโมจ ปือมือเลา นะ เปโตร เตอ_ กูญา ซาโมจ ลาฆู ซือลับ เดะ อาเย ดัฮ. อารี อีตู_ อาดา ซือมียา นู มาโซะ ฌาดี มูเระ นะ ตูฮัด_ ฆามะ บือเลฮ ตีฆา รีบู (3,000) อูรัก ดัฮ. 42กูญา ปาคัจ ตูเฮะ มือนีงัย กะ ปือมือเลา_ นู โกะ ปือญูโรฮ นะ ตูฮัด อาฌัยํ เตอ_ ตูเฮะ เดะ ลาฆู บรามัย บือมุน บือซามา เตอ_ ตูเฮะ เดะ ลาฆู มากัด บือซามา#2.42 ซูรัจ ลามา จะ_ “ลือแปะ โรตี”. ปือมือเลา บาซา ลามา นะ ตูโญะ กะ ลาฆู มากัด บือกะ บีลัก อารี ฌูฆา. โกะ ซือมียา ปือจายา บียาซา มากัด นาซี บรามัย บือซามา_ บารู บูวัจ ลาฆู ลือแปะ โรตี_ บีดา บรีงัจ กะ ตูฮัด เยซู. ลีฮัจ 1 กร. 11.17-34. เดะ ลาฆู บือมุน บือซาโวจ_ กูญา ตูเฮะ ซือมูฮา.
43กะฆีเตอ ราตา ซือมียา ตาโกจ ซูโงฮ เดะ ตูฮัด. ลูมอฮ ปือญูโรฮ นะ ตูฮัด_ กูญา บูวัจ ปือนานา ซีดี_ นู ปือและ ซูโงฮ_ บาญะ ลาฆู. 44ลูมอฮ ซือมียา ปือจายา อาดา บือซามา_ อาเมด โกะ ซือบารัก นะ กูญา มาแรฮ บือมุน_ ฌาดี ซือบารัก ซามา บายา. 45ตือปัจ ตานัฮ นะ กูญา_ โกะ ซือบารัก นะ กูญา_ กูญา ฌูวัน_ อาเมด ดูเวะ มาแรฮ ปาฮาฆิ กะ ซือมียา นู ฮาฌะ. 46บีลัก อารี_ กูญา ซา ฮาตี บือมุน บือซามา_ เดะ รูมัฮ มือญือมัฮ ตูฮัด. กูญา ปี มากัด บือซามา#2.46 ลีฮัจ ลาฆู ปาซัน อีนี เดะ ตือนอซ 42. บือกะ เดะ รูมัฮ นะ กูญา ราตา_ ซูกา ฮาตี บรามัย มากัด บือซามา_ อาดา ฌางัน ฮาตี นู ลือฆา เลอ. 47กูญา ซือมาตา ปูฌี มือโอจ กะ ตูฮัด. ลูมอฮ ซือมียา อาซิก โปด_ มือโอจ กะ กูญา. บีลัก อารี_ ตูฮัด บรี อาดา ซือมียา นู นะ ลือปัซ เดะ ดูซา_ มาแรฮ มาโซะ บือซามา ฌางัน ลูมอฮ กูญา.
Currently Selected:
ปือบูวัจ 2: ULBIBLE
Highlight
Share
Copy
Want to have your highlights saved across all your devices? Sign up or sign in
