ปือบูวัจ 3
3
ซือมียา จาเปะ ลือฆา บาฌิ ดัฮ
1อาดา ซืออารี_ เปโตร ฌางัน โยฮัน ปี กะ รูมัฮ มือญือมัฮ ตูฮัด. ฌาดี วะตู ปูโกยํ ตีฆา_ นู โกะ ซือมียา บาญะ ปี บือซาโวจ. 2เดะ ปีตู รูมัฮ นู บลาโลก จะ_ ปีตู บือฆาจะ_ อาดา ซือมียา ซืออูรัก นู จาเปะ_ บือฌาลัด เตด บือเลฮ_ ตะเดะ ญา ดูโดะ เดะ อาปี. บีลัก อารี_ อาดา ซือมียา อูโซก ญา_ ปี กะ ปีตู อีตู_ บรี ญา มืองือแมง ดูเวะ_ เดะ โกะ ซือมียา นู มาโซะ กะ รูมัฮ มือญือมัฮ ตูฮัด. 3ตานา ญา ลีฮัจ เปโตร ฌางัน โยฮัน นะ มาโซะ_ ญา มีตา เดะ กูญา บรี ฮาฆิ ดูเวะ กะ ญา ซือตืองัฮ. 4กูญา ดูวา อูรัก ฌือเงาะ ลีฮัจ ญา_ กะฆีเตอ เปโตร มือเลา จะ_ “ลีฮัจ กะ กามี เลอ.”
5กะฆีเตอ ซือมียา อีตู ลีฮัจ กะ กูญา ดูวา อูรัก_ อีงัจ นะ บือเลฮ ดูเวะ ซือตืองัฮ เดะ กูญา. 6ตาปี เปโตร มือเลา ฌางัน ญา จะ_ “กู ฮอย ปีระ_ ฮอย มัซ ลาลู. ตาปี ลาฆู นู กู อาดา_ กู นะ บรี กะ เกา. เดะ ปือนามา นะ เยซู คริด_ ซือมียา ตูโปะ นาซาเรด_ บีกัซ บือฌาลัด เลอ.” ญา จะ.
7เปโตร ปือฆัก ตางัน โซะ กานัน นะ ญา_ ตูโลก ปือบีกัซ_ บือดีรี. ดัดดัด กากี นะ ญา_ ฌางัน บูกู กากี นะ ญา_ ตือฆัยํ อูรัจ ดัฮ. 8ญา มือลูปัจ_ บือดีรี_ ฌาลัด โปด_ บือเลฮ ดัฮ. ญา มาโซะ กะ ดาลับ รูมัฮ มือญือมัฮ ตูฮัด_ บือซามา เปโตร ฌางัน โยฮัน_ ซัจ บือฌาลัด_ ซัจ มือลูปัจ_ ซาแมน ปูฌี กะ ตูฮัด. 9โกะ ซือมียา ลีฮัจ บือฆารี ญา บือฌาลัด_ ซาแมน ปูฌี กะ ตูฮัด_ 10กูญา กราลา จะ_ ญา เตอ_ ฌาดี ซือมียา อีตู_ นู มืองือแมง ดูเวะ_ เดะ รูโซะ ปีตู นู บือฆาจะ อีตู. กะฆีเตอ_ กูญา ซือมูฮา ปือและ ฮาตี ซูโงฮ_ ลีฮัจ ลาฆู นู บือฌาดี ดัฮ.
เปโตร บรี ตาฮู ลาฆู นะ ตูฮัด
11กาลา ซือมียา อีตู อาดา ปือฆัก ตาฮัด เปโตร ฌางัน โยฮัน ลาฆี_ โกะ ซือมียา ซือมูฮา ปือและ ฮาตี โตระ_ ปาคัจ บลารี ปี กะ กูญา_ เดะ ตือปัจ นู ปือนามา จะ_ ปือทอยํ นะ ราฌา ซาโลมอน. 12ตานา เปโตร ลีฮัจ ซือมียา บาญะ อีตู_ ญา มือเลา ฌางัน กูญา จะ_ “ลูมอฮ บักซา อิซราเอน เออ_ บูวัจ นามา กาเญา ปือและ ฮาตี ลีฮัจ กะ ซือมียา อีนี? บูวัจ นามา กาเญา ฌือเงาะ ลีฮัจ กะ กามี? กาเญา อาคา จะ_ อีซี กามี ตะอาซิก ฌาดี ซือมียา มือฆัฮ_ ซือมียา บาฌิ โตระ_ กะฆีเตอ กามี บูวัจ บรี ซือมียา อีนี ฌาลัด บือเลฮ ดัฮ เฆอ? เตด โบะ. 13ตูฮัด นะ อับราฮัม ฌางัน อีซัก ฌางัน ยาโกบ เตอ_ ตูฮัด นะ โกะ บีลาแก นะ กีตา เตอ_ ญา เลอ บือเลฮ อาเกะ เยซู_ ซือมียา บือกรือฌา นะ ญา_ บรี ญา บือซรี ซูโงฮ. ตาปี ลูมอฮ กาเญา อาตัจ ญา_ กะ ปีลาด นู ฌาดี ฮูลู บาลัก นะ ราฌา. วะตู ปีลาด อีงัจ นะ บรี ญา ลือปัซ_ กาเญา กีปัซ ญา บูวัก ดัฮ. 14กะฆีเตอ_ กาเญา มือเลา กีปัซ ซือมียา อีตู_ นู บาฌิ บือซรี_ นู บาฌิ ตือปัจ. กาเญา มีตา เดะ ปีลาด_ บรี ปลือปัซ ซือมียา บูนอฮ ซือมียา_ ซืออูรัก. 15ซือมียา นู บาวา บรี ฮีโดะ เตอ_ กาเญา บูนอฮ ดัฮ_ ตาปี ตูฮัด เดะ อาตัซ_ บือเลฮ อาเกะ ญา_ บรี ฮีโดะ ปาเระ เดะ มาตี ดัฮ. กามี ฌาดี ซะซรี นู ลีฮัจ ลาฆู อีตู. 16ปือนามา นะ เยซู เตอ เลอ_ นู บูวัจ บรี อูรัก จาเปะ อีนี ตือฆัยํ อูรัจ ดัฮ_ ซาเบะ ญา ปือจายา กะ ปือนามา อีตู. ญา ฌาดี ซือมียา ซืออูรัก_ นู กาเญา ลีฮัจ บือฆารี ดัฮ_ นู กาเญา กราลา โปด. นู ญา ปือจายา กะ เยซู เตอ_ บือเลฮ บูวัจ บรี ญา ซือนัง ญาวา ดัฮ_ บือกะ กาเญา บือเลฮ ลีฮัจ บือฆารี เลอ.”
17“กะฆีเตอ_ ดีบราดี เออ”_ เปโตร ญา จะ_ “กู ตาฮู จะ_ นู กาเญา ฌางัน โกะ กือปาลา นะ กาเญา บูวัจ ฌางัน เยซู ดัฮ_ กาเญา บูวัจ ซาเบะ กาเญา เตด ตาฮู อารัฮ. 18ลามา ดัฮ_ ตูฮัด บือซัยํ บือเลฮ ซูโรฮ ลูมอฮ ซือมียา ตูโดฮ ลาฆู นะ ญา_ บรี กูญา มือเลา ตูโดฮ จะ_ ราฌา นู บรี ซือลามัจ นะ ตูฮัด_ นะ กือนา ซาเกะ โตระ. ลาฆู อีตู ตูฮัด บรี ฌาดี รือมัก กะฆีเตอ ดัฮ. 19กะฆีเตอ_ บราเลฮ ฮาตี เลอ. อาเลฮ ปี ซารี ตูฮัด_ บรี ญา บาโซฮ ดูซา นะ กาเญา. 20กะฆีเตอ_ ตูฮัด นะ บรี อาดา วะตู_ นู นะ บรี กาเญา ดูโดะ ซือนัง บาฌิ. ญา นะ ซูโรฮ เยซู มาแรฮ. ญา เตอ_ ฌาดี ราฌา นู บรี ซือลามัจ_ นู ตูฮัด ตืองะ ดัฮ_ กรานา กาเญา. 21ญา กือนา ดูโดะ เดะ โซะ อาตัซ ลาแงะ_ ตือดะ วะตู อีตู_ นู ตูฮัด นะ ตืองะ บือนา ซือมูฮา บรี ฌาดี บารู. ตะเดะ ดูลู นูตู_ ตูฮัด บือเลฮ บรี ตาฮู ปาซัน วะตู อีตู_ เดะ ปือมือเลา นะ โกะ ซือมียา จรัฮ บาฌิ_ นู ตูโดฮ ลาฆู นะ ญา. 22กรานา จะ_ มูซา บือเลฮ มือเลา ดัฮ จะ ‘ตูฮัด บือซัยํ เดะ อาตัซ_ ญา นะ ตืองะ ซือมียา ซืออูรัก_ เดะ นะบรานะ นะ กาเญา_ นะ บรี ญา ฌาดี ซือมียา ตูโดฮ ลาฆู นะ ตูฮัด_ ซือรูปา บือกะ กู. กาเญา กือนา มือนีงัย ลาฆู ซือมูฮา_ นู ญา นะ มือญาเระ กะ กาเญา. 23ราตา ซือมียา นู ตีเมา มือนีงัย กะ ซือมียา ตูโดฮ อีตู_ ญา เลอ_ นะ กือนา บือนาซา ปี_ เดะ ลูมอฮ ซือมียา นะ ตูฮัด#ปฮก 18.15,18-19; เลวี 23.29 .’ มูซา ญา จะ.”
24“ซูโงฮ เลอ” เปโตร ญา จะ_ “ตะเดะ ซามูเอน_ ฌางัน โกะ ซือมียา ตูโดฮ ลาฆู นะ ตูฮัด ซือมูฮา_ นู มาแรฮ เดะ บลากัก_ กูญา ซือมูฮา บือเลฮ ตูโดฮ ดูลู_ ปาซัน วะตู อารี อีนี. 25กาเญา เลอ_ ฌาดี ลูมอฮ ซือมียา_ นู นะ ซาโมจ บือนา ซือมูฮา_ นู โกะ ซือมียา ตูโดฮ อีตู บือเลฮ บือฌาญี ดัฮ. กาเญา อาดา บาฮาเฆด ฌูฆา_ เดะ ปือมือเลา บือปาคัจ อีตู_ นู ตูฮัด ตืองะ ฌางัน โกะ บีลาแก นะ กีตา ดัฮ. ตูฮัด บือเลฮ มือเลา ฌางัน อับราฮัม จะ ‘กรานา บือแนฮ นะ เกา เตอ_ ลูมอฮ ซือมียา เดะ ดือนียา ราตา_ นะ ดูโดะ ซือนัง ซือลามัจ เลอ#ลมล 22.18.’ 26กะฆีเตอ ตูฮัด ตืองะ เยซู_ นู ซือมียา บือกรือฌา นะ ญา_ บรี ญา มาแรฮ นะ บรี ซือลามัจ กะ กาเญา ดูลู_ นะ บรี กาเญา ซอก ซืออูรัก_ นะ อาเลฮ มาแรฮ ตีงัน โกะ ดูซา นะ กูญา.” เปโตร ญา จะ.
Currently Selected:
ปือบูวัจ 3: ULBIBLE
Highlight
Share
Copy
Want to have your highlights saved across all your devices? Sign up or sign in
