ปือบูวัจ ปือมือเลา มือญาเระ ดูลู
ปือมือเลา มือญาเระ ดูลู
ซูรัจ โกะ ปือบูวัจ นะ ลูมอฮ ปือญูโรฮ นะ ตูฮัด เยซู อีนี_ ฌาดี ซูรัจ นู ดูวา_ นู ลูกา ฆาแรฮ ดัฮ. ซูรัจ ลามูลา นะ ญา_ กือนา บลาโลก จะ ซูรัจ ลูกา - บรีตา นู บาฌิ ปาซัน นะ เยซู คริด. เดะ ซูรัจ นู ดูวา อีนี_ ญา มือญาเระ จะ_ ลือปัซ ตูฮัด เยซู บาลิ ปี กะ อาตัซ ลาแงะ ดัฮ_ โกะ ซือมียา นู ตูโรจ กะ ญา_ บือเลฮ บูวัจ ลาฆู นามา ซือตืองัฮ. โกะ มูเระ ดูวา บือลัซ อูรัก เตอ_ เยซู บือเลฮ ตืองะ ฌาดี โกะ ปือญูโรฮ นะ ญา. กะฆีเตอ_ ตูโรจ กะ ปือมือซัด นะ เยซู ตะอาซิก_ กูญา บือเลฮ ปี มือญาเระ บรีตา นู บาฌิ นะ เยซู_ เดะ นังฆรี เยรูซาเลม_ เดะ โซะ นังฆรี ยูเดีย_ นังฆรี ซะมาเรีย_ ตือดะ รอจ กะ ฮูโฌก ปือญูดัฮ เดะ ดือนียา (1.8). เยซู บือเลฮ บือฌาญี ฌางัน กูญา จะ_ ตูฮัด เดะ อาตัซ นะ ซูโรฮ ซือมืองัจ นะ ตูฮัด_ มาแรฮ บรี ปือนอฮ เดะ ฮาตี นะ โกะ ซือมียา ปือจายา_ บรี กูญา ฮาตี บรานี_ ปานัย อากัน_ บีดา นะ มือญาเระ บรีตา นู บาฌิ นะ เยซู_ บีดา นะ บูวัจ โกะ ปือนานา ซีดี_ นู มือฆัฮ ซูโงฮ. ซูรัจ ปือบูวัจ อีนี บรี ลีฮัจ จะ_ ปือมือเลา บือฌาญี อีตู รือมัก บาฌิ ดัฮ.
ลามูลา (ปาซัน 1 - 7)_ เดะ นังฆรี เยรูซาเลม_ โกะ ปือญูโรฮ มือญาเระ บรี โกะ ลูมอฮ บักซา ยิว ตาฮู จะ_ เยซู_ ซือมียา ตูโปะ นาซาเรด_ นู กือนา บูนอฮ มาตี เดะ กายู ปลีตัก_ ญา ฮีโดะ ปาเระ เดะ มาตี ดัฮ. กะฆีเตอ ตูฮัด เดะ อาตัซ บรี ลีฮัจ จะ_ เยซู ฌาดี ซือมียา อีตู_ นู ลูมอฮ ยิว อาดา นาตี_ ฌาดี ซือมียา นู ตูฮัด นะ ซูโรฮ มาแรฮ ดัฮ_ บีดา นะ ตูโลก อูมัจ ซือมียา ซือมูฮา บรี ฮีโดะ ลือปัซ บาฌิ ดัฮ. ซือมียา อีนี กือนา บลาโลก จะ_ ราฌา นู บรี ซือลามัจ_ บือกะ นู ซียับ จะ “พระคริสต์”. นู ฌาดี กะฆีนี_ ญา รือมัก ฌางัน ปือมือเลา ตูโดฮ_ นู โกะ ซือมียา ตูโดฮ ลาฆู นะ ตูฮัด บือเลฮ ตูโดฮ ลามา ดูลู.
ลือปัซ อีตู (ปาซัน 8 - 12)_ กูญา ปี กะ โกะ นังฆรี ปิกดาปิก_ มือญาเระ บรีตา นู บาฌิ นะ เยซู_ กะ ซือมียา บักซา ซะมาเรีย_ ฌางัน ซือมียา บักซา อาซิก ฌูฆา. ดูลู เตอ_ โกะ ลูมอฮ บักซา ยิว_ กูญา ตีเมา นะ บือซามา ฌางัน ซือมียา บักซา อาซิก. ตาปี โกะ ซือมียา ปือจายา ฆาโดฮ ตาฮู จะ_ ตูฮัด ซายัก กะ โกะ ซือมียา ราตา บักซา. ตูฮัด นะ บรี ซือมียา ราตา เดะ ดือนียา ฌาดี ลูมอฮ ซือมียา นะ ญา. ลูมอฮ ซือมียา นู ปือจายา_ เตด จะ ดูโดะ ซา ตือปัจ_ เฆอ จะ ดูโดะ ราตา เดะ ดือนียา เตอ_ กีตา บลาโลก จะ “ลูมอฮ นะ ตูฮัด”_ บือกะ นู ซียับ จะ “คริสตจักร”.
เดะ บลากัก (ปาซัน 13 - 28)_ ซูรัจ อีนี มือญาเระ ปาซัน นู เปาโล_ ฌางัน โกะ ฆูฆู นะ ญา_ กูญา ปี บาญะ นังฆรี_ บาญะ ตูโปะ_ มือญาเระ บรีตา นู บาฌิ_ ตืองะ โกะ ซือมียา นู ปือจายา ฌาดี ลูมอฮ นะ ตูฮัด_ ราตา ตือปัจ. เดะ บลากัก ญา ปี รอจ กะ นังฆรี โรม. ฮาดัจ อีตู_ นังฆรี โรม ฌาดี นังฆรี ลูวัก_ นังฆรี บือซัยํ โตระ เลอ. ราฌา บือซัยํ เดะ นังฆรี โรม_ นู ปือนามา จะ_ ราฌา ซีซา เตอ_ ญา มือฆัฮ ซูโงฮ_ ญา ฮูโกบ โกะ นังฆรี โซะ กือลีลิก ลาโวจ เมดีตาเรเนียน_ ราตา ซือมูฮา. ญา ซูโรฮ ซือมียา ซือตืองัฮ ฌาดี ฮูลู บาลัก นะ ญา_ ปี ฮูโกบ โกะ นังฆรี กะฆีเตอ. ญา ซูโรฮ โกะ ตาฮัน นะ ญา ปี ราตาๆ_ บรี โกะ ซือมียา นะ บือเลฮ ดูโดะ ซือนัง. เดะ ซูรัจ อีนี_ ฌาดี ซูรัจ นู ดูวา นะ ญา_ ลูกา บรี ลีฮัจ จะ_ โกะ ซือมียา ปือจายา กูญา บูวัจ กือนา ลาฆู ดัฮ_ ฌางัน ฮาดัจ ฮูโกบ นะ นังฆรี โรม. กูญา เตด บือลาวัด ฌางัน ลูวัก ลาลู เลอ_ ตาปี ฌาดี ซือมียา ซูกา ดูโดะ งะซืองะ.
เดะ ดาลับ ซูรัจ ปือบูวัจ อีนี_ นะ ดาปัจ ลาฆู กะฆีนี
1. กูญา ซียะ นะ มือญาเระ บรีตา นู บาฌิ (1.1-26)
2. กูญา มือญาเระ ตือปัจ นังฆรี เยรูซาเลม (2.1—8.3)
3. กูญา มือญาเระ เดะ นังฆรี ยูเดีย ฌางัน นังฆรี ซะมาเรีย (8.4—12.25)
4. ลาฆู บือกรือฌา นะ เปาโล (13.1—28.31)
- เปาโล ปี มือญาเระ บรีตา นู บาฌิ_ วะตู ลามูลา (13.1—14.28)
- กูญา บือมุน บือกีรา ปาซัน โกะ ซือมียา บักซา อาซิก นู ปือจายา (15.1-35)
- เปาโล ปี มือญาเระ บรีตา นู บาฌิ_ วะตู นู ดูวา (15.36—18.22)
- เปาโล ปี มือญาเระ บรีตา นู บาฌิ_ วะตู นู ตีฆา (18.23—21.16)
- เปาโล กือนา กานัก_ กือนา บือปี กะ นังฆรี โรม (21.17—28.31)
บาจา เลอ เดะ ซูรัจ ปือมือเลา นะ ตูฮัด
Currently Selected:
ปือบูวัจ ปือมือเลา มือญาเระ ดูลู: ULBIBLE
Highlight
Share
Copy
Want to have your highlights saved across all your devices? Sign up or sign in