โยฮัน 21
21
เยซู ปลีฮัจ กะ โกะ มูเระ เดะ ลาโวจ ฆาลิลี
1ลือปัซ ลาฆู อีตู_ เยซู บือเลฮ ปลีฮัจ ปูลัก กะ โกะ มูเระ นะ ญา_ เดะ ลาโวจ ทิเบรียัด.#21.1 ฌาดี จะ_ ลาโวจ ฆาลิลี. ฌาดี กะฆีนี เลอ_ 2อาดา เปโตร_ โทมัด นู กูญา บลาโลก จะ บือกือมัยํ_ นาทานาเอน_ ซือมียา ตูโปะ คานา โซะ นังฆรี ฆาลิลี_ ฌางัน นานะ นะ เซเบดี ดูวา บราดี_ ฌางัน มูเระ นะ เยซู ดูวา อูรัก ลาฆี เตอ_ กูญา ซือมูฮา ดูโดะ บือซามา. 3เปโตร มือเลา กะ กูญา จะ_ “กู นะ ปี รีฆะ อีกัด.”
โกะ มูเระ นู ซิกอาซิก โปด_ กูญา จะ_ “กามี โปด_ นะ ปี ซามา เลอ.” กะฆีเตอ_ กูญา ซือมูฮา ปาคัจ ตูโรด กะ ปราฮู_ ปี มาซามา. ตาปี เดะ มาลับ อีตู กูญา รีฆะ อีกัด เตด บือเลฮ ลาลู เลอ. 4ตานา จรัฮ ปาฆี_ เยซู ญา บือดีรี โซะ ปาตัย. ตาปี โกะ มูเระ อีตู_ กูญา เตด ตาฮู จะ_ ฌาดี เยซู. 5เยซู ตาญา กูญา จะ_ “โอ ดัง_ กาเญา บือเลฮ อีกัด ดัฮ เฆอ?”
กูญา ตีกัฮ จะ_ “ฮอย เตด บือเลฮ เลอ.”
6เยซู มือเลา ฌางัน กูญา จะ_ “กือนา ปลือปัซ ปูกัจ โซะ ซือบือลัฮ กานัน ปราฮู เลอ_ กาเญา นะ บือเลฮ อีกัด.” กะฆีเตอ_ กูญา ปลือปัซ ปูกัจ_ บือเลฮ อีกัด บาญะ_ ตือดะ ซีตะ ปูกัจ เตด บียัซ.
7มูเระ อีตู นู เยซู ซายัก_ ญา มือญาเระ กะ เปโตร จะ_ “อีตู เลอ_ ตูฮัด.” ตานา เปโตร ดืองัยํ จะ_ ฌาดี ตูฮัด_ ญา โปด_ อาเมด บาฌู มาแรฮ ปือแญะ_ ซาเบะ ซา ญาวา เลอ. กะฆีเตอ ญา ตรือโฌด กะ ลาโวจ. 8ตาปี โกะ มูเระ นู ซิกอาซิก_ กูญา บาวา ปราฮู มาโซะ กะ ปาตัย_ อีเระ ปูกัจ นู ลือกัจ อีกัด อีตู_ บือมาแรฮ ฌูฆา_ ซาเบะ จะ_ กูญา เตด บราปา ฌาโวฮ เดะ ปาตัย_ ฌาโวฮ ฆามะ ลีมา ปูโลฮ ดือปา บือเลฮ. 9ตานา มาแรฮ กะ ปาตัย ดัฮ_ กูญา ลีฮัจ อาดา ฮารัก บลือกัจ อาปี ดัฮ_ อาดา อีกัด ตูนู เดะ อาตัซ อาปี_ อาดา ตือโปก โรตี ฌูฆา. 10เยซู มือเลา ฌางัน กูญา จะ_ “อาเมด อีกัด ซือตืองัฮ_ นู กาเญา บารู บือเลฮ ซีงี_ มาแรฮ ตูนู เลอ.”
11กะฆีเตอ_ เปโตร ญา ตูโรด ปี กะ ปราฮู_ อีเระ ปูกัจ นู ลือกัจ อีกัด_ บือมาแรฮ กะ ปาตัย. อาดา อีกัด บือซัยํ ปือนอฮ_ ซือราตุซ ลีมา ปูโลฮ ตีฆา (153) อีโกยํ. ตาปี อีกัด บาญะ กะฮามี โปด_ ปูกัจ เตด จีแจะ เลอ. 12เยซู มือเลา ฌางัน กูญา จะ_ “มาแรฮ มากัด เลอ.” โกะ ลูมอฮ มูเระ_ ฮอย ซาปา โปด_ นะ บรานี ตาญา เยซู จะ_ “เกา ฌาดี ซาปา?” ซาเบะ กูญา ตาฮู ดัฮ จะ_ ฌาดี ตูฮัด เยซู เลอ. 13เยซู ญา อาเมด ตือโปก โรตี บรี กะ กูญา. ญา อาเมด อีกัด บรี กะ กูญา ฌูฆา.
14นี เลอ_ รอจ กะ ตีฆา กาลี ดัฮ_ นู เยซู บือเลฮ ปลีฮัจ กะ โกะ มูเระ_ ลือปัซ นู ญา ฮีโดะ ปาเระ เดะ มาตี ดัฮ.
เยซู ฌางัน เปโตร
15ตานา ซูดัฮ มากัด ดัฮ_ เยซู มือเลา ฌางัน เปโตร_ นู อาดา ปือนามา อาซิก จะ_ ซีโมน_ ตาญา กะฆีนี จะ_ “ซีโมน_ นานะ นะ โยฮัน เออ_ เกา ซายัก กู บาญะ เดะ โกะ ซือมียา อีนี เฆอ?”
ญา ตีกัฮ จะ_ “ซูโงฮ เลอ ตูฮัด_ เกา ตาฮู จะ_ กู ซายัก เกา.”
เยซู ปือซัด กะ ญา จะ_ “บรี เกา ปือบือลา โกะ อานะ กาเมก นะ กู เลอ.” 16เยซู ตาญา รอจ กะ ดูวา กาลี จะ_ “ซีโมน_ นานะ นะ โยฮัน เออ_ เกา ซายัก กู เฆอ?”
ญา ตีกัฮ กะ เยซู จะ_ “ซูโงฮ เลอ ตูฮัด_ เกา ตาฮู จะ_ กู ซายัก เกา.”
เยซู มือเลา ฌางัน ญา จะ_ “บรี เกา ฌาฆา ปือบือลา โกะ กาเมก นะ กู เลอ.” 17เยซู ตาญา มาโซะ รอจ กะ ตีฆา กาลี จะ_ “ซีโมน_ นานะ นะ โยฮัน เออ_ เกา ซายัก กู เฆอ?”
เปโตร ญา ซูซัฮ ฮาตี_ นู เยซู ตาญา ญา รอจ กะ ตีฆา กาลี ดัฮ จะ_ “เกา ซายัก กู เฆอ?” กะฆีเตอ_ ญา มือเลา ฌางัน เยซู จะ_ “ตูฮัด เออ_ เกา ตาฮู ราตา ฌือแนฮ เลอ_ เกา ตาฮู จะ_ กู ซายัก เกา.”
เยซู มือเลา ฌางัน ญา จะ_ “บรี เกา ปือบือลา กาเมก นะ กู เลอ. 18กู นะ มือญาเระ ลาฆู นู ซูโงฮ กะ เกา จะ_ ตานา เกา ฌาดี อูรัก มูดา_ เกา บือเลฮ ซือซิก ลีปัจ กาเยด_ ซือและ เดะ ปีงัก นะ เกา_ บือฌาลัด ปี_ ตูโรจ กะ ฮาตี นะ เกา_ นู เกา บือคานะ นะ ปี. ตาปี ตานา เกา ตูฮา ดัฮ_ เกา นะ อูโญะ ตางัน_ บรี กะ โกะ ซือมียา อาซิก ซือซิก อีกัจ บรี กะ เกา_ นะ บาวา เกา บือปี ตือปัจ นู เกา เตด บือคานะ นะ ปี เลอ.” 19เยซู มือเลา กะฆีเตอ_ บีดา บรี ลีฮัจ จะ_ เปโตร นะ มาตี กะฮามี_ บีดา นะ บรี ลีฮัจ จะ_ ตูฮัด เดะ อาตัซ บือซรี บือซายา เลอ. กะฆีเตอ_ เยซู มือเลา ปูลัก จะ_ “กือนา ตูโรจ กะ กู เลอ.”
เยซู ฌางัน มูเระ นู ญา ซายัก
20เปโตร ญา กรือเลฮ กะ บลากัก_ ลีฮัจ อาดา มูเระ นู เยซู ซายัก_ ตูโรจ มาแรฮ. มูเระ อีตู เลอ_ นู ดูโดะ ญาแปะ เยซู_ กาลา เยซู ตืองัฮ ดูโดะ มากัด เตอ_ นู ตาญา จะ_ “ตูฮัด เออ_ ซือมียา นู นะ ซรัฮ เกา บรี กือนา รีฆะ_ ฌาดี ซาปา เลอ?” 21ตานา เปโตร ญา ลีฮัจ มูเระ นู อีตู ดัฮ_ ญา ตาญา เยซู จะ_ “ตูฮัด เออ_ โซะ ซือมียา อีนี_ นะ ฌาดี กะฮามี เลอ?”
22เยซู ตีกัฮ จะ_ “ดัฮ กู บือคานะ นะ บรี ญา อาดา ฮีโดะ_ ตือดะ กู นะ มาแรฮ ปาเระ เตอ_ บูกัด ฌาดี ลาฆู นามา นะ เกา. เกา เลอ_ กือนา ตูโรจ มาแรฮ กะ กู.”
23ซาเบะ กะฆีเตอ_ ปือมือเลา อีนี กรือจัย ปี ดัฮ_ เดะ ตืองัฮ ลูมอฮ ดีบราดี ปือจายา_ จะ_ มูเระ นู อีตู นะ เตด มาตี เลอ. ตาปี เยซู เตด บือเลฮ มือเลา จะ_ มูเระ อีตู นะ เตด มาตี. ญา อูซิ มือเลา จะ_ “ดัฮ กู บือคานะ นะ บรี ญา ฮีโดะ_ ตือดะ กู นะ มาแรฮ เตอ_ บูกัด ฌาดี ลาฆู นามา นะ เกา.”
24มูเระ อีตู เลอ_ นู มือเลา ฌาดี ซะซรี_ ปาซัน ลาฆู กะฆีนี_ นู ฌาดี ซือมียา ฆาแรฮ ตาโรฮ ลาฆู กะฆีนี ดัฮ. กามี ตาฮู จะ_ ปือมือเลา ซะซรี นะ ญา_ ฌาดี ซูโงฮ เลอ.
ปือมือเลา ปือญูดัฮ
25อาดา บาญะ ลาฆู ลาฆี_ นู เยซู บือเลฮ บูวัจ ดัฮ เตอ. มีเซ นะ ฆาแรฮ บรี ฮาบิฮ ราตา ลาฆู_ กู บรีงัจ จะ_ ดือนียา อีนี ฮอย ตือปัจ นะ ตาโรฮ โกะ ซูรัจ นู นะ ฆาแรฮ กะฆีนี เลอ.
Currently Selected:
โยฮัน 21: ULBIBLE
Highlight
Share
Copy
Want to have your highlights saved across all your devices? Sign up or sign in
