บราเกะ ลารี 10
10
ลาฆู ฌาฮานัม นู ลาปัด: กาวัด บลาลัก
(โยเอน 1.2-4)
1ตูฮัด บือซัยํ เดะ อาตัซ_ ญา มือเลา ฌางัน มูซา จะ_ “เกา กือนา ปี บือดาปัจ ฌางัน ราฌา ฟาโร_ กรานา กู บูวัจ บรี กะ ราฌา_ ฌางัน โกะ ซือมียา ซัยํบือซัยํ นะ ญา_ กรัซ ฮาตี ดัฮ_ บีดา กู นะ บือเลฮ ปลีฮัจ ปือนานา นู มือฆัฮ นะ กู อีนี_ เดะ ซามา ตืองัฮ ลูมอฮ กูญา_ 2บีดา เกา นะ บือเลฮ จรือตา ลาฆู นู กู บือเลฮ บูวัจ_ กะ ลูมอฮ อียิบ_ บรี โกะ อานะ จูจู ดืองัยํ_ จะ_ กู บือเลฮ บูวัจ ปือนานา นู มือฆัฮ ฌูฆา เตอ_ บรี กะ กูญา ลีฮัจ_ บีดา บรี ลูมอฮ กาเญา นะ ตาฮู จะ_ กู ฌาดี ตูฮัด บือซัยํ เดะ อาตัซ.”
3กะฆีเตอ_ มูซา ฌางัน อาโรน_ มาโซะ ปี บือดาปัจ ราฌา ฟาโร_ มือเลา จะ_ “ตูฮัด บือซัยํ เดะ อาตัซ_ ตูฮัด นะ ลูมอฮ ฮีบรู_ มือเลา กะฆีนี จะ_ ‘เกา นะ ลาวัด ตีเมา มือนูโนะ กะ กู_ ลามา ตารา ดีฮา? กือนา ปลือปัซ ลูมอฮ ซือมียา นะ กู_ บรี กูญา ปี มือญือมัฮ กะ กู เลอ. 4ดัฮ เกา ตีเมา ปลือปัซ ลูมอฮ ซือมียา นะ กู ปี_ มัฮปาฆี กู นะ บรี กาวัด บลาลัก มาโซะ กะ นังฆรี นะ เกา. 5กาวัด บลาลัก_ ญา นะ ตูโรด มาแรฮ ปือนอฮ_ ฌู ลีฮัจ ฮอย เตด บือฆารี ตานัฮ. ญา นะ มากัด บือนา บารัก_ นู ลือเบฮ เดะ ฮูฌัด บาตู ญา ปรูโตฮ ดัฮ เตอ. โกะ ปูโฮด กายู นะ เกา_ นู บือตูโมฮ เดะ บือนัก ราตา โปด_ ญา นะ มากัด ฮาบิฮ เลอ. 6ญา นะ มาโซะ กะ รูมัฮ นะ ราฌา_ นะ มาโซะ กะ รูมัฮ นะ โกะ ซือมียา ซัยํบือซัยํ_ ฌางัน รูมัฮ นะ ลูมอฮ ซือมียา เดะ นังฆรี อียิบ ซือมูฮา_ ปือนอฮ ฮาบิฮ_ บือกะ โกะ ปะ มะ_ โกะ ญังมูญัง_ ฮอย เตด ดือละ ลีฮัจ ลาฆู กะฆีนี_ ตะเดะ อารี นู กูญา บือฌาดี มาโซะ กะ ดือนียา_ ฌู รอจ กะ ฮาดัจ อีนี เลอ.’ ” กะฆีเตอ มูซา โปด_ ญา อาเลฮ ตรือเบะ เดะ ราฌา ฟาโร ดัฮ.
7โกะ ซือมียา ซัยํบือซัยํ นะ ราฌา ฟาโร มือเลา จะ_ “ซือมียา อีนี_ นะ ฌาดี ตือปัจ ปือญรัจ_ นู นะ ซือกัจ กามี_ ลามา ตารา ดีฮา? บรี เกา ปลือปัซ ลูมอฮ ซือมียา อีตู_ บรี กูญา ปี มือญือมัฮ กะ ตูฮัด บือซัยํ เดะ อาตัซ_ ตูฮัด นะ กูญา. เกา เตด ตาฮู เฆอ จะ_ นังฆรี อียิบ ญา นะ ฌาฮานัม ดัฮ?” 8กะฆีเตอ_ มูซา ฌางัน อาโรน_ กือนา บาวา มาแรฮ บือดาปัจ ราฌา ฟาโร ปูลัก. ราฌา ญา มือเลา จะ_ “ปี มือญือมัฮ กะ ตูฮัด บือซัยํ เดะ อาตัซ_ ตูฮัด นะ กาเญา เลอ. ตาปี อาดา ซาปา นะ ปี ซือตืองัฮ?”
9มูซา ญา มือเลา จะ_ “กามี ซือมูฮา ปาคัจ ปี_ มารือมา ฌางัน โกะ อูรัก มูดา_ อูรัก ตูฮา_ ฆาโดฮ บาวา ปี โกะ นานะ กีลากี_ ฌางัน โกะ นานะ นีบีนี_ อาดา ฌางัน โกะ กาวัด แบะ_ กาวัด กาเมก_ กาวัด ลือมู_ ซาเบะ กามี ซือมูฮา ฆาโดฮ นะ บูวัจ ลาฆู บรามัย บารัก มากัด_ มือญือมัฮ กะ ตูฮัด บือซัยํ เดะ อาตัซ.” 10ราฌา ฟาโร มือเลา ฌางัน กูญา ดูวา อูรัก จะ_ “ดัฮ กู บรี กาเญา ปี_ ฌางัน โกะ นานะ นะ กาเญา ฌูฆา_ ตูฮัด บือซัยํ เดะ อาตัซ_ ญา อาดา ดูโดะ บือซามา ฌางัน ลูมอฮ กาเญา_ ซูโงฮ เลอ. กาเญา เตอ_ อีงัจ นะ บูวัจ ซาลัฮ ดัฮ. 11นะ ฮอย เตด ฌาดี กะฆีเตอ เลอ. กือนา บาวา ซา โกะ กีลากี ปี_ มือญือมัฮ กะ ตูฮัด บือซัยํ เดะ อาตัซ_ กรานา กาเญา บือคานะ ซา กะฆีนี เลอ.” กะฆีเตอ มูซา ฌางัน อาโรน กือนา โปรฮ_ บรี ตรือเบะ ปี ลือปัซ เดะ มูคา นะ ราฌา ฟาโร.
12ตูฮัด บือซัยํ เดะ อาตัซ ญา มือเลา ฌางัน มูซา จะ_ “กือนา อาเงา ตางัน ปี_ โซะ อาตัซ นังฆรี อียิบ_ บรี โกะ กาวัด บลาลัก ตรือบัก ตูโรด_ มากัด โกะ ตาโระ นู กูญา ตานัม เดะ บือนัก_ ราตา นะ นังฆรี อียิบ_ นู ลือเบฮ เดะ ฮูฌัด บาตู ญา ปรูโตฮ เตอ.” 13กะฆีเตอ_ มูซา ญา อาเกะ ตูกัจ ตูโญะ ปี โซะ อาตัซ นังฆรี อียิบ. ตูฮัด บือซัยํ เดะ อาตัซ โปด_ บูวัจ บรี อาดา อาเงน ตีมอยํ_ ตีโยะ ปี กะ นังฆรี ซียัก มาลับ. ตานา จรัฮ ปาฆี_ อาเงน ตีมอยํ โปด ญา ตีโยะ บาวา กาวัด บลาลัก มาแรฮ ดัฮ. 14กาวัด บลาลัก เตอ_ ญา งาปอ ปือนอฮ_ ราตา เดะ นังฆรี อียิบ ซือมูฮา. เดะ กาลา ดูลู_ ฮอย เตด ดือละ อาดา กาวัด บลาลัก บือซัยํ_ บาญะ กะฆีนี ลาลู_ ตะเดะ อีนี ปี โซะ ฮือลด_ นะ ฮอย ลาฆู กะฆีนี ปูลัก เลอ. 15ญา ตูโดก นังฆรี อียิบ_ ฌู กือลับ ฮาบิฮ_ ญา มากัด โกะ ตาโระ เดะ บือนัก_ โกะ บูวัฮ ราตา ฌือแนฮ_ นู ลือเบฮ เดะ ฮูฌัด บาตู ปรูโตฮ. ฮอย โกะ ปูโฮด ดาโวด ฮีเฌา ลาลู เตด จะ_ โกะ ปูโฮด กายู เฆอ จะ_ โกะ ตาโระ เดะ บือนัก_ ราตา เดะ นังฆรี อียิบ เลอ. 16กะฆีเตอ_ ราฌา ฟาโร ญา งูฆางู ซูโรฮ ซือมียา_ ปี ตูโรจ มูซา ฌางัน อาโรน มาแรฮ_ มือเลา จะ_ “กู บูวัจ ดูซา โซะ ฮือลด มูคา นะ ตูฮัด บือซัยํ เดะ อาตัซ_ ตูฮัด นะ กาเญา_ ฌางัน โซะ ฮือลด กาเญา ดูวา อูรัก ดัฮ ฌูฆา. 17มีตา บรี กาเญา อาเกะ ซาลัฮ อีนี นะ กู_ ซา กาลี เลอ_ กือนา ปูโฌะ มีตา เดะ ตูฮัด บือซัยํ เดะ อาตัซ_ ตูฮัด นะ กาเญา_ บีดา ญา นะ ตือจีฮัด กะ กู_ บรี กู ลือปัซ เดะ ลาฆู มาตี อีนี เลอ.”
18กะฆีเตอ มูซา โปด_ ตรือเบะ ปี_ ตีงัน ราฌา ฟาโร ดัฮ_ ญา บือซาโวจ มีตา เดะ ตูฮัด บือซัยํ เดะ อาตัซ. 19ตูฮัด โปด_ ญา บูวัจ บรี อาเงน ตีโยะ ปาเระ_ ฌาดี อาเงน บารัจ_ อาเงน ตือฆัยํ โตระ_ บาวา กาวัด บลาลัก ปี ฆูโฆยํ เดะ ลาโวจ มีรัฮ_ ฌู ฮอย เตด ลือเบฮ ซา อีโกยํ โปด_ ราตา เดะ นังฆรี อียิบ. 20ตาปี ตูฮัด บือซัยํ เดะ อาตัซ_ ญา บูวัจ บรี ราฌา ฟาโร กรัซ ฮาตี_ ตีเมา นะ ปลือปัซ ลูมอฮ อิซราเอน.
ลาฆู ฌาฮานัม นู ซือมีลัด: ลาฆู กือลับ
21ตูฮัด บือซัยํ เดะ อาตัซ มือเลา ฌางัน มูซา จะ_ “กือนา อาเกะ ตางัน นะ เกา_ ฌูโญก กะ อาตัซ ลาแงะ_ บีดา นะ บรี นังฆรี อียิบ_ กือลับ ฮาบิฮ_ ฌาดี ลาฆู กือลับ นู มือราบา บือเลฮ เลอ.” 22กะฆีเตอ มูซา โปด_ ญา อาเกะ ตางัน ฌูโญก กะ อาตัซ ลาแงะ_ บูวัจ บรี อาดา ลาฆู กือลับ ฮีตับ เดะ นังฆรี อียิบ_ ฌู รอจ กะ ตีฆา อารี. 23กูญา ลีฮัจ ฮอย เตด บือฆารี_ ฮอย ซาปา บีกัซ เดะ ตือปัจ นะ กูญา_ ตีฆา อารี. โซะ ลูมอฮ อิซราเอน เตอ_ กูญา อาดา จรัฮ เดะ ตือปัจ นะ กูญา เลอ.
24กะฆีเตอ_ ราฌา ฟาโร ญา ซูโรฮ ซือมียา ปี ตูโรจ มูซา_ มาแรฮ บือดาปัจ ฌางัน ญา_ มือเลา จะ_ “ปี เลอ ลูมอฮ กาเญา ปี มือญือมัฮ กะ ตูฮัด บือซัยํ เดะ อาตัซ. ตาปี บรี กาเญา ตีงัน โกะ กาวัด กาเมก_ กาวัด แบะ_ กาวัด ลือมู. โซะ โกะ นานะ เตอ_ กือนา บือปี เลอ.”
25มูซา ญา มือเลา จะ_ “ฆาโดฮ บรี กามี บาวา โกะ บือนาตัก มือนืองะ_ ฌางัน โกะ บือนาตัก ตูนู มือญือมัฮ_ บือปี ซามา_ บีดา ลูมอฮ กามี นะ บือเลฮ มือญือมัฮ_ กะ ตูฮัด บือซัยํ เดะ อาตัซ_ ตูฮัด นะ กามี. 26กามี ฆาโดฮ บาวา กาวัด บือนาตัก บือปี ซามา_ นะ ปูตุซ ซา อีโกยํ โปด_ ฮอย เตด บือเลฮ_ ซาเบะ กามี ฆาโดฮ นะ ปีเลฮ บือนาตัก เดะ กาวัด อีตู_ ปี มือญือมัฮ กะ ตูฮัด บือซัยํ เดะ อาตัซ_ ตูฮัด นะ กามี. กามี ฮอย เตด ตือตู จะ_ นะ อาเมด บือนาตัก นู ดีฮา_ มือญือมัฮ กะ ตูฮัด_ ตือดะ กามี นะ ปี รอจ กะ ตือปัจ อีตู เลอ.”
27ตาปี ตูฮัด บือซัยํ เดะ อาตัซ_ ญา บูวัจ บรี ราฌา ฟาโร ญา กรัซ ฮาตี_ กะฆีเตอ ญา ตีเมา ปลือปัซ ลูมอฮ กูญา ปี เลอ. 28ราฌา ฟาโร มือเลา ฌางัน มูซา จะ_ “ปี ญัฮ บูวัก เลอ_ ฌาฆา ญาวา นะ เกา บรี บาฌิ_ ฌางัน บรี เกา ลีฮัจ มูคา นะ กู ลาลู. ดัฮ เกา ลีฮัจ มูคา นะ กู อารี ดีฮา_ เกา นะ ฆาโดฮ มาตี อารี อีตู เลอ.”
29มูซา ญา มือเลา จะ_ “เกา มือเลา กือนา ดัฮ เลอ_ กู นะ เตด มาแรฮ ลีฮัจ มูคา นะ เกา ดัฮ เลอ” มูซา ญา จะ.
Currently Selected:
บราเกะ ลารี 10: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
