บราเกะ ลารี 9
9
ลาฆู ฌาฮานัม นู ลีมา: ปือญาเกะ งรือลา เดะ กาวัด บือนาตัก
1ตูฮัด บือซัยํ เดะ อาตัซ ญา มือเลา ฌางัน มูซา จะ “ปี ซารี ฟาโร_ มือญาเระ จะ ‘ตูฮัด บือซัยํ เดะ อาตัซ_ ตูฮัด นะ ลูมอฮ ฮีบรู_ มือเลา กะฆีนี จะ “กือนา ปลือปัซ โกะ ซือมียา นะ กู ปี_ บีดา กูญา นะ บือเลฮ มือญือมัฮ กะ กู. 2ดัฮ เกา เตด ปลือปัซ บรี กูญา ปี_ ตาปี อาดา ตาฮัด กูญา ตาโรฮ_ 3ตางัน นะ ตูฮัด บือซัยํ เดะ อาตัซ_ นะ บูวัจ บรี โกะ กาวัด บือนาตัก เดะ บือนัก_ นู อาดา กาวัด กูดา_ ฌางัน กูดา บาซา ดือมิ_ กาวัด อูตัย_ กาวัด ลือมู_ กาวัด แบะ_ กาวัด กาเมก_ นะ กือนา ปือญาเกะ งรือลา_ นู นะ บูวัจ บรี รอจ กะ มาตี เลอ. 4ตาปี ตูฮัด นะ บูวัจ บรี กาวัด บือนาตัก นะ ลูมอฮ อิซราเอน_ อาซิก เดะ กาวัด บือนาตัก นะ ลูมอฮ อียิบ. บือนาตัก นะ ลูมอฮ อิซราเอน_ นะ เตด มาตี ลาลู.” ’ ” 5ตูฮัด บือซัยํ เดะ อาตัซ ญา ตืองะ วะตู ดัฮ_ จะ “มัฮปาฆี_ ตูฮัด นะ บูวัจ ลาฆู อีนี เดะ นังฆรี.”
6จรัฮ ปาฆี ตูฮัด บือซัยํ เดะ อาตัซ โปด_ บูวัจ กะฆีเตอ ดัฮ. โกะ กาวัด บือนาตัก นะ ลูมอฮ อียิบ_ มาตี ฮาบิฮ_ ตาปี โกะ บือนาตัก นะ ลูมอฮ อิซราเอน_ มีเซ จะ ซา อีโกยํ โปด_ เตด มาตี เลอ. 7ฟาโร_ ญา ซูโรฮ ซือมียา ปี ลีฮัจ บรี ซัฮ_ จะ_ โกะ บือนาตัก นะ ลูมอฮ อิซราเอน_ ซา อีโกยํ โปด_ เตด มาตี เลอ. ตาปี ฟาโร ญา อาดา กรัซ ฮาตี_ ตีเมา ปลือปัซ โกะ ลูมอฮ ซือมียา ปี เลอ.
ลาฆู ฌาฮานัม นู นัม: โกะ ปาแตด
(ปือมือเลา ฮูโกบ 28.27)
8กะฆีเตอ_ ตูฮัด บือซัยํ เดะ อาตัซ_ มือเลา กะ มูซา ฌางัน อาโรน จะ “กาเญา กือนา จือกะ ฮาบู_ มาแรฮ ดาตัก เดะ ตูกู_ บรี ปือนอฮ ตางัน_ กะฆีเตอ บรี กะ มูซา ลีปัยํ ปี_ กะ อาตัซ ลาแงะ โซะ ฮือลด มูคา นะ ฟาโร. 9ฮาบู อีตู นะ ฌาดี อาซะ_ ฮาญอจ ปี ราตา เดะ นังฆรี อียิบ_ บูวัจ บรี บือฌาดี ปาแตด มืองือโมก_ เดะ ญาวา โกะ ซือมียา ฌางัน บือนาตัก_ ราตา เดะ นังฆรี อียิบ.” 10กูญา ดูวา อูรัก_ ปาคัจ จือกะ ฮาบู เดะ ตูกู_ ปี บือดีรี โซะ ฮือลด มูคา นะ ฟาโร. กาลา มูซา ลีปัยํ ฮาบู_ โซะ อาตัซ ลาแงะ_ ฮาบู อีตู โปด_ บูวัจ บรี ฌาดี โกะ ปาแตด_ กรือจัย ปี ราตา_ เดะ โกะ ซือมียา_ โกะ บือนาตัก. 11โซะ ซือมียา บือฆูรู โปด_ เตด บรานี นะ บือดีรี โซะ ฮือลด มูคา นะ มูซา_ ซาเบะ โกะ ซือมียา บือฆูรู_ ฌางัน โกะ ลูมอฮ อียิบ ซือมูฮา โปด_ ฌาดี ปาแตด ราตา เดะ ญาวา นะ กูญา ฌูฆา. 12ตาปี ตูฮัด บือซัยํ เดะ อาตัซ_ ญา บรี กะ ฟาโร กรัซ ฮาตี_ ตีเมา มือนีงัย กะ มูซา ฌางัน อาโรน_ ซูโงฮ บือกะ นู ตูฮัด มือเลา ฌางัน มูซา ดัฮ เลอ.
ลาฆู ฌาฮานัม นู ตูโฌฮ: ฆูโตยํ ฌางัน ฮูฌัด บาตู
13ตูฮัด บือซัยํ เดะ อาตัซ มือเลา ฌางัน มูซา จะ “กือนา บีกัซ เดะ วะตู ปาฆี_ ปี บือดีรี โซะ ฮือลด มูคา นะ ฟาโร_ มือญาเระ จะ ‘ตูฮัด บือซัยํ เดะ อาตัซ_ ตูฮัด นะ ลูมอฮ ฮีบรู_ มือเลา กะฆีนี จะ “กือนา ปลือปัซ โกะ ลูมอฮ ซือมียา นะ กู_ บรี กูญา ปี มือญือมัฮ กะ กู. 14ซาเบะ กาลา อีนี_ กู นะ บูวัจ บรี ฌาดี ปือญาเกะ งรือลา แนฮฌือแนฮ นะ กู_ เดะ อีซี ญาวา นะ เกา_ ฌางัน โกะ ซือมียา ซัยํบือซัยํ นะ เกา_ ฌางัน โกะ ลูมอฮ ซือมียา นะ เกา ซือมูฮา_ บีดา เกา นะ บือเลฮ ตาฮู ซูโงฮ จะ_ ราตา เดะ ดือนียา_ ฮอย ซาปา นะ ซือรูปา บือกะ กู เลอ. 15ดูลู เดะ อีนี เตอ_ กู นะ อาเกะ ตางัน บูนอฮ เกา_ ฌางัน โกะ ลูมอฮ ซือมียา นะ เกา_ ฌางัน ลาฆู ฌาฮานัม_ บรี ลือแงะ ปี เดะ ดือนียา อีนี โปด_ บือเลฮ. 16ตาปี นู กู บรี เกา อาดา ฮีโดะ เตอ โปด_ บีดา นะ บรี เกา ลีฮัจ ลาฆู มือฆัฮ นะ กู_ บูวัจ บรี ปือนามา นะ กู_ นะ อาดา ซือมียา มือญาเระ ปี_ ราตา เดะ ดือนียา. 17เกา อาดา มือนูโญก ญาวา นะ บือลาวัด ฌางัน โกะ ลูมอฮ ซือมียา นะ กู_ ตีเมา ปลือปัซ กูญา ปี. 18ลีฮัจ เลอ_ มัฮปาฆี_ เดะ วะตู อีนี_ กู นะ บรี ฮูฌัด บาตู ฆูโฆยํ มาแรฮ บาญะ_ บือกะ เตด ดือละ อาดา เดะ นังฆรี อียิบ_ ตะเดะ ฮืนตะ นะ บือฌาดี นังฆรี มาแรฮ_ ฌู รอจ กะ ฮาดัจ อีนี เลอ. 19ซาเบะ กะฆีเตอ_ กือนา ซูโรฮ กูญา กือโปก กาวัด บือนาตัก_ ฌางัน โกะ ซือมียา_ นู อาดา เดะ บือนัก_ บรี กูญา มาโซะ มาแรฮ กะ ตือปัจ ลีนง_ ซาเบะ ซือมียา ราตา อูรัก_ ฌางัน โกะ บือนาตัก ราตา อีโกยํ เดะ บือนัก_ นู เตด บือเลฮ มาโซะ มาแรฮ กะ ดาลับ รูมัฮ_ นะ กือนา ฮูฌัด บาตู มาตี ฮาบิฮ.” ’ ” 20โกะ ลูมอฮ ซือมียา ซัยํบือซัยํ นะ ฟาโร_ นู ตาโกจ ปือมือเลา นะ ตูฮัด บือซัยํ เดะ อาตัซ โปด_ กูญา บรี กะ ปราโซฮ_ ฌางัน โกะ บือนาตัก นะ กูญา_ บาลิ มาโซะ กะ ดาลับ รูมัฮ. 21ตาปี ซือมียา นู เตด ปือดูลี กะ ปือมือเลา นะ ตูฮัด โปด_ อาดา ปลือปัซ บรี โกะ ปราโซฮ ฌางัน โกะ บือนาตัก นะ กูญา_ ดูโดะ เดะ บือนัก ลาฆี เลอ.
22ตูฮัด บือซัยํ เดะ อาตัซ มือเลา ฌางัน มูซา จะ “กือนา ฌูโญก ตางัน กะ ลาแงะ_ บีดา นะ บรี ฮูฌัด บาตู ฆูโฆยํ มาแรฮ_ ราตา เดะ นังฆรี อียิบ_ เตด จะ_ เดะ อาตัซ โกะ อูมัจ ซือมียา_ โกะ บือนาตัก_ ฌางัน โกะ ตาโระ_ โกะ รูโปจ ซือมูฮา_ นู อาดา เดะ บือนัก_ ราตา เดะ นังฆรี อียิบ.” 23กะฆีเตอ มูซา ญา ฌูโญก ตูกัจ_ กะ อาตัซ ลาแงะ. ตูฮัด บือซัยํ เดะ อาตัซ โปด_ บูวัจ บรี อาดา ซือวารา ฆูโตยํ_ อาดา ฮูฌัด บาตู_ ฌางัน อาปี_ ฆูโฆยํ มาแรฮ อาตัซ นังฆรี. ตูฮัด ญา บูวัจ บรี ฮูฌัด บาตู ฆูโฆยํ มาแรฮ เดะ นังฆรี อียิบ. 24อาดา ฮูฌัด บาตู ฌางัน กีลัจ มาแรฮ ซัจๆ ซามา ตืองัฮ. ฮูฌัด บาตู ฆูโฆยํ บาญะ_ บือกะ เตด ดือละ อาดา เดะ นังฆรี อียิบ_ ตะเดะ ตืองะ นังฆรี มาแรฮ. 25โกะ ซือบารัก ซือมูฮา_ นู อาดา เดะ บือนัก_ ราตา เดะ นังฆรี อียิบ โปด_ กือนา ฮูฌัด บาตู บือนาซา ฮาบิฮ ซือมูฮา_ ฌางัน โกะ ซือมียา_ โกะ บือนาตัก. ฮูฌัด บาตู โปด_ อาดา ฆูโฆยํ กือนา โกะ ตาโระ_ ฌางัน โกะ ปูโฮด กายู ราตา ฌือแนฮ_ รูโตฮ ปาตัฮ ฮาบิฮ. 26ลือเบฮ ซา เดะ นังฆรี โกเชน_ นู โกะ ลูมอฮ อิซราเอน ดูโดะ เตอ_ ฮอย ฮูฌัด บาตู ฆูโฆยํ ลาลู.
27ฟาโร ญา ซูโรฮ ซือมียา ปี_ บลาโลก มูซา ฌางัน อาโรน มาแรฮ_ มือเลา จะ “วะตู อีนี_ กู บูวัจ ดูซา ดัฮ เลอ. ตูฮัด บือซัยํ เดะ อาตัซ เตอ_ ญา บาฌิ ตือปัจ_ กู ฌางัน ลูมอฮ บักซา นะ กู_ ฌาดี ซือมียา ซาลัฮ. 28มีตา บรี เกา บือซาโวจ_ ปูโฌะ ตูฮัด บือซัยํ เดะ อาตัซ_ ฌางัน บรี อาดา ฆูโตยํ ฌางัน ฮูฌัด บาตู นะ ตูฮัด เลอ. กู นะ ปลือปัซ ลูมอฮ กาเญา ปี_ นะ เตด ตาฮัด ตาโรฮ ดัฮ เลอ.”
29มูซา มือเลา จะ “กาลา กู ตรือเบะ เดะ นังฆรี อีนี ดัฮ_ กู นะ อาเกะ ตางัน มือญาเระ กะ ตูฮัด บือซัยํ เดะ อาตัซ. ซือวารา ฆูโตยํ นะ ซืองะ_ ฮูฌัด บาตู โปด_ นะ เตด ฆูโฆยํ ดัฮ_ บีดา ราฌา นะ บือเลฮ ตาฮู จะ_ ดือนียา อีนี ฌาดี นะ ตูฮัด บือซัยํ เดะ อาตัซ. 30ตาปี โซะ ราฌา ฌางัน โกะ ลูมอฮ ซือมียา ซัยํบือซัยํ นะ เกา เตอ_ กู ตาฮู ดัฮ จะ_ กาเญา เตด ตาโกจ เดะ ตูฮัด บือซัยํ เดะ อาตัซ ลาฆี เลอ.”
31(ปูโฮด ปานัด_ ปูโฮด บรัซ บาลี_ กือนา ฮูฌัด บาตู_ บูวัจ บรี บือนาซา ฮาบิฮ_ ซาเบะ เดะ วะตู อีตู_ ปูโฮด บาลี ตืองัฮ นะ ตรือเบะ บูวัฮ_ ปูโฮด ปานัด โปด_ ตรือเบะ บูงา. 32โซะ บรัซ ซาลี_ ดูวา ฌือแนฮ เตอ_ เตด กือนา บูวัจ บรี บือนาซา_ ซาเบะ ญา บือตูโมฮ ลามัจ.)
33กาลา มูซา ญา ตีงัน ฟาโร_ ตรือเบะ เดะ นังฆรี ดัฮ_ ญา โปด_ อาเกะ ตางัน มือญาเระ กะ ตูฮัด บือซัยํ เดะ อาตัซ. ซือวารา ฆูโตยํ_ ฌางัน ฮูฌัด บาตู_ ซืองะ ดัฮ_ ฮูฌัด โปด_ เตด ฆูโฆยํ เดะ นังฆรี ดัฮ. 34ตาปี กาลา ฟาโร ลีฮัจ จะ_ ฮูฌัด ฌางัน ฮูฌัด บาตู_ ฌางัน ฆูโตยํ ฮอย ดัฮ_ ญา อาเลฮ บูวัจ ดูซา ปูลัก. ญา เตอ_ กรัซ ฮาตี_ เตด จะ_ ญา ฌางัน โกะ ซือมียา ซัยํบือซัยํ นะ ญา_ กูญา กรัซ ฮาตี ซือมูฮา. 35กะฆีเตอ_ ฟาโร ญา กรัซ ฮาตี_ ตีเมา ปลือปัซ โกะ ลูมอฮ ซือมียา อิซราเอน ปี_ ซูโงฮ บือกะ นู ตูฮัด บือซัยํ เดะ อาตัซ บือเลฮ มือเลา ดัฮ_ ฌางัน มูซา.
Currently Selected:
บราเกะ ลารี 9: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
