บราเกะ ลารี 14
14
กูญา ลากัฮ ลาโวจ มีรัฮ
1ตูฮัด บือซัยํ เดะ อาตัซ มือเลา ฌางัน มูซา จะ 2“กือนา มือเลา ฌางัน โกะ ลูมอฮ อิซราเอน_ บรี อาเลฮ ปาเระ_ ปี ตืองะ รูมัฮ กาฌัก กาเยด นะ กูญา_ โซะ ฮือลด ตูโปะ ปีฮะฮีโรด_ เดะ ตืองัฮ ตูโปะ มิกดน ฌางัน ลาโวจ_ โซะ ฮือลด ตูโปะ บาอัน-เซโพน_ ตืองะ โกะ รูมัฮ กาฌัก โซะ อีตู_ นู ดาปิก ลาโวจ 3ราฌา ฟาโร นะ มือเลา รอจ กะ ลูมอฮ บักซา อิซราเอน จะ ‘ลูมอฮ กูญา บักซัจ ปี มาแรฮ เดะ ตือปัจ ตานัฮ อีตู. ตือปัจ ตานัฮ ตูโฮยํ นู ลือฆา อีตู_ ซือกัจ กูญา ตาโรฮ ดัฮ.’ 4กู นะ บูวัจ บรี ราฌา ฟาโร_ ฮาตี กรัซ เลอ_ ญา นะ อูเซ ตูโรจ ลูมอฮ กาเญา. กะฆีเตอ กู นะ กือนา มือโอจ_ กรานา ราฌา ฟาโร ฌางัน โกะ ลูมอฮ ตาฮัน นะ ญา_ นะ บูวัจ บรี โกะ ลูมอฮ อียิบ ตาฮู จะ_ กู ฌาดี ตูฮัด บือซัยํ เดะ อาตัซ.” ลูมอฮ อิซราเอน โปด_ บูวัจ ตูโรจ ปือมือซัด กะฆีเตอ.
5กาลา ราฌา นะ ลูมอฮ อียิบ_ ตาฮู จะ_ โกะ ลูมอฮ ซือมียา อีตู_ ลารี ปี ดัฮ_ บูวัจ บรี ฮาตี นะ ราฌา ฟาโร_ ฌางัน โกะ ลูมอฮ ซือมียา ซัยํบือซัยํ โปด_ รีบัย ดัฮ_ เดะ ลาฆู นู นะ ปลือปัซ ลูมอฮ อิซราเอน_ มือเลา จะ “นามา กีตา บูวัจ กะฆีนี? บูวัจ นามา กีตา ปลือปัซ ลูมอฮ อิซราเอน_ บรี ลือปัซ เดะ ลาฆู ฌาดี ปราโซฮ นะ กีตา เลอ?” 6กะฆีเตอ ราฌา ฟาโร โปด_ ซียะ ซือตรี กูดา_ ฌางัน โกะ ลูมอฮ ตาฮัน นะ ญา_ ปี ซามา. 7ญา อาเมด ซือตรี บือปรัก นู บาฌิ_ นัม ราตุซ (600) บูวัฮ_ ฌางัน โกะ ซือตรี บือปรัก ซิกอาซิก ซือมูฮา เดะ นังฆรี อียิบ_ อาดา โกะ ตาฮัน ดูโดะ เดะ ซือตรี บือปรัก ราตา บูวัฮ. 8ตูฮัด บือซัยํ เดะ อาตัซ บูวัจ บรี ฟาโร_ ราฌา นังฆรี อียิบ_ กรัซ ฮาตี ดัฮ_ กะฆีเตอ ญา อูเซ ตูโรจ ลูมอฮ อิซราเอน_ นู ตืองัฮ บือฌาลัด ตรือเบะ ปี_ ฌางัน ฮาตี บรานี เลอ 9โกะ ลูมอฮ อียิบ_ อูเซ ปี_ อาดา กูดา ฌางัน ซือตรี บือปรัก นะ ราฌา ฟาโร_ อาดา ฌางัน โกะ ตาฮัน กูดา_ ฌางัน กาวัด ตาฮัน นะ ญา ซือมูฮา_ มาแรฮ ดัด โกะ ลูมอฮ อิซราเอน_ นู ตืองะ โกะ รูมัฮ กาฌัก กาเยด นะ กูญา_ โซะ บีดิก ลาโวจ_ ดาปิก ตูโปะ ปีฮะฮีโรด_ ฮือลด ตูโปะ บาอัน-เซโพน.
10กาลา ราฌา ฟาโร_ มาโซะ มาแรฮ ดาปิก_ ลูมอฮ อิซราเอน โปด_ กูญา ลางอฮ ปาลา ลีฮัจ บือฆารี_ ลูมอฮ อียิบ ตูโรจ มาแรฮ_ บูวัจ บรี กูญา ตาโกจ โตระ. โกะ ลูมอฮ อิซราเอน บือซูระ มีตา ตูโลก เดะ ตูฮัด บือซัยํ เดะ อาตัซ. 11กูญา ตาญา มูซา จะ “ฮอย ลูบัก ตานัม บาดัด เดะ นังฆรี อียิบ เฆอ_ นู เกา บาวา ลูมอฮ กามี ตรือเบะ มาแรฮ_ มาตี เดะ ตือปัจ ตานัฮ ตูโฮยํ นู ลือฆา? บูวัจ นามา เลอ_ เกา บาวา ลูมอฮ กามี ตรือเบะ เดะ นังฆรี อียิบ? 12ลูมอฮ กามี มือญาเระ กะ เกา_ เดะ นังฆรี อียิบ ดัฮ_ บูกัด เฆอ_ จะ_ ‘ปลือปัซ บียัยํ ซา ลูมอฮ กามี_ บรี กามี บือกรือฌา กะ ลูมอฮ อียิบ เลอ’? ซาเบะ ลาฆู บือกรือฌา กะ ลูมอฮ อียิบ เตอ โปด_ บาฌิ เดะ นู นะ มาแรฮ มาตี เดะ ตือปัจ ตานัฮ ตูโฮยํ นู ลือฆา.”
13ตาปี มูซา มือเลา ฌางัน โกะ ลูมอฮ ซือมียา จะ “ฌางัน ตาโกจ เลอ_ กือนา บือดีรี กือฌะ กือมัซ_ นาตี ลีฮัจ ลาฆู ฮีโดะ นู มาแรฮ ดาตัก เดะ ตูฮัด บือซัยํ เดะ อาตัซ_ นู ตูฮัด นะ บูวัจ บรี กะ กาเญา_ เดะ อารี อีนี. ซาเบะ จะ_ ลูมอฮ อียิบ_ นู กาเญา ลีฮัจ เดะ อารี อีนี_ ตะเดะ อีนี ปี_ นะ เตด บือเลฮ ลีฮัจ ปูลัก ดัฮ. 14ตูฮัด บือซัยํ เดะ อาตัซ_ ญา นะ บือปรัก ฆาตี กาเญา. โซะ กาเญา เตอ_ กือนา ดูโดะ ซืองะ เลอ.”
15ตูฮัด บือซัยํ เดะ อาตัซ มือเลา ฌางัน มูซา จะ “บูวัจ นามา_ เกา มาแรฮ มือญาเระ ลาฆู ซูซัฮ กะ กู? กือนา ปือซัด ลูมอฮ อิซราเอน_ บรี บือฌาลัด ปี ซือรูโลยํ กะ โซะ ฮือลด. 16โซะ เกา_ กือนา อาเกะ ตูกัจ นะ เกา_ อาเงา ตางัน ปี กะ โซะ ลาโวจ_ บูวัจ บรี ลาโวจ อีตู บือปือจัฮ_ บีดา ลูมอฮ อิซราเอน นะ บือเลฮ ลาลู ปี กะ ลาโวจ_ นะ บือเลฮ บือฌาลัด เดะ อาตัซ ตานัฮ นู ตูโฮยํ เลอ. 17โซะ กู โปด_ นะ บูวัจ บรี ลูมอฮ อียิบ กรัซ ฮาตี_ อูเซ ตูโรจ มาแรฮ_ กะฆีเตอ กู นะ บือเลฮ ซาโมจ ลาฆู มือโอจ_ กรานา ราฌา ฟาโร ฌางัน โกะ ลูมอฮ ตาฮัน_ โกะ ซือตรี บือปรัก_ ฌางัน โกะ ตาฮัน กูดา ซือมูฮา นะ กูญา. 18กาลา กู บือเลฮ ซาโมจ ลาฆู มือโอจ_ กรานา ราฌา ฟาโร ฌางัน โกะ ซือตรี บือปรัก_ โกะ ตาฮัน กูดา นะ ญา ดัฮ_ ลูมอฮ อียิบ โปด_ นะ ตาฮู จะ กู นี เลอ_ ฌาดี ตูฮัด บือซัยํ เดะ อาตัซ.”
19โซะ ฮูลู บาลัก นะ ตูฮัด_ นู บาวา โกะ ลูมอฮ ตาฮัน นะ อิซราเอน เตอ_ บาลิ ปี ดูโดะ โซะ บลากัก. ตีฮัก กือมูวัง นู อาดา โซะ ฮือลด โปด_ ปาเระ มาแรฮ ดูโดะ โซะ บลากัก กูญา_ 20ฌาดี จะ_ มาแรฮ ดูโดะ ซามา ตืองัฮ ลูมอฮ ตาฮัน นะ อียิบ_ ฌางัน ลูมอฮ ตาฮัน นะ อิซราเอน_ อาดา กือมูวัง ฌางัน ลาฆู กือลับ_ บูวัจ บรี มาลับ จรัฮ ดัฮ. ฮาบิฮ มาลับ อีตู โปด_ กูญา ดูวา บือลัฮ_ เตด บือเลฮ มาโซะ ดาปิก.
21กะฆีเตอ_ มูซา อาเงา ตางัน นะ ญา_ ปี กะ โซะ ลาโวจ. ตูฮัด บือซัยํ เดะ อาตัซ โปด_ บูวัจ บรี อาดา อาเงน ตือฆัยํ_ ตีโยะ มาแรฮ ดาตัก เดะ โซะ อาตัซ มาตา อารี_ ตีโยะ อาเย_ เดะ มาลับ อีตู ซือมาลับ_ บูวัจ บรี ลาโวจ กริก_ ฌาดี ตานัฮ ตูโฮยํ_ อาเย บือปือจัฮ ดูวา บือลัฮ. 22ลูมอฮ บักซา อิซราเอน โปด_ ปาคัจ ลาลู ซามา ตืองัฮ ลาโวจ_ บือฌาลัด เดะ อาตัซ ตานัฮ ตูโฮยํ. โซะ อาเย เตอ_ ตีงี ดูวา บือลัฮ_ ซือรูปา บือกะ ดีนิง_ โซะ กีรี ฌางัน โซะ กานัน นะ กูญา. 23โกะ ลูมอฮ อียิบ_ อูเซ ตูโรจ กูญา ปี_ กะ ตืองัฮ ลาโวจ_ อาดา ฌางัน โกะ กาวัด กูดา_ ฌางัน โกะ ซือตรี บือปรัก_ โกะ กาวัด ตาฮัน กูดา ซือมูฮา_ นะ ราฌา ฟาโร. 24วะตู มูกัยํ กือลับ ลาฆี_ ตูฮัด บือซัยํ เดะ อาตัซ_ ญา ตีญุง ลีฮัจ ดาตัก เดะ ตีฮัก อาปี_ ฌางัน ตีฮัก กือมูวัง_ ลีฮัจ บือฆารี โกะ ลูมอฮ ตาฮัน นะ อียิบ_ บูวัจ บรี ตาฮัน อียิบ กือลาจุ. 25ญา บูวัจ บรี แระฆีแระ ซือตรี ตือโฆฮ_ ฌู นะ ปี เตด บียัซ. กะฆีเตอ โกะ ลูมอฮ อียิบ_ กูญา ปาคัจ มือเลา จะ “บรี กีตา ลารี ปี_ เดะ ลูมอฮ อิซราเอน เลอ_ ซาเบะ จะ ตูฮัด บือซัยํ เดะ อาตัซ_ ญา บือลาวัด ฌางัน ลูมอฮ อียิบ ฆาตี กูญา.”
ลูมอฮ ซือมียา อูเซ_ มาตี ฮาบิฮ
26วะตู อีตู_ ตูฮัด บือซัยํ เดะ อาตัซ_ มือเลา ฌางัน มูซา จะ “กือนา อาเงา ตางัน_ ปี กะ โซะ ลาโวจ_ บีดา บรี อาเย มือนีแลฮ ปาเระ มาแรฮ_ อาโปฮ ลูมอฮ อียิบ_ ฌางัน โกะ ซือตรี บือปรัก_ โกะ ตาฮัน กูดา นะ กูญา.” 27กะฆีเตอ_ มูซา อาเงา ตางัน_ ปี กะ โซะ ลาโวจ_ รอจ วะตู บือบีฮัก_ อาเย เดะ ลาโวจ โปด_ มือนีแลฮ ปาเระ_ ดาลับ บือกะ นู ลามา. โกะ ลูมอฮ อียิบ_ ปาคัจ ลารี เดะ อาเย นู บือดรัซ_ ตาปี ตูฮัด บือซัยํ เดะ อาตัซ_ ญา กีปัซ โกะ ลูมอฮ อียิบ_ เดะ ตืองัฮ ลาโวจ เลอ. 28อาเย โปด_ มือนีแลฮ อาโปฮ โกะ ซือตรี บือปรัก ฌางัน โกะ กาวัด ตาฮัน กูดา_ ฌาดี จะ_ กาวัด ตาฮัน ซือมูฮา_ นะ ราฌา ฟาโร_ นู อูเซ ตูโรจ กูญา_ มาโซะ ปี กะ ลาโวจ. เตด ลือเบฮ ซืออูรัก โปด. 29โซะ ลูมอฮ อิซราเอน_ บือฌาลัด ปี ตูโรจ ตานัฮ ตูโฮยํ เดะ ตืองัฮ ลาโวจ_ อาดา อาเย ตีงี ดูวา บือลัฮ_ ซือรูปา บือกะ ดีนิง บีดา กูญา_ เดะ โซะ กานัน_ ฌางัน โซะ กีรี.
30กะฆีนี เลอ_ เดะ อารี อีตู_ ตูฮัด บือซัยํ เดะ อาตัซ_ ญา บือเลฮ ตูโลก โกะ ลูมอฮ อิซราเอน_ บรี ลือปัซ เดะ ตางัน นะ ลูมอฮ อียิบ. โกะ ลูมอฮ อิซราเอน_ กูญา ลีฮัจ บาดัด นะ โกะ ลูมอฮ อียิบ_ โซะ ปาตัย บีดิก ลาโวจ เลอ. 31โกะ ลูมอฮ อิซราเอน_ กูญา ลีฮัจ ลาฆู บือกรือฌา บือซัยํ โตระ_ นู ตูฮัด บือซัยํ เดะ อาตัซ บือเลฮ บูวัจ ฌางัน ลูมอฮ อียิบ. กะฆีเตอ โกะ ซือมียา โปด_ ตาโกจ เดะ ตูฮัด_ ปือจายา ตูเฮะ กะ ตูฮัด บือซัยํ เดะ อาตัซ_ ปือจายา กะ มูซา_ ซือมียา นู ฌาดี ปราโซฮ นะ ตูฮัด ฌูฆา.
Currently Selected:
บราเกะ ลารี 14: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
