บราเกะ ลารี 15
15
ลาฆู บือญาญี นะ มูซา
(บราเกะ ลารี 14.13-14; ลาฆู มือญาญี 78.12-14)
1วะตู อีตู_ มูซา ฌางัน ลูมอฮ อิซราเอน_ มือญาญี ลาฆู อีนี_ มือญือมัฮ กะ ตูฮัด_ จะ_
“กู นะ มือญาญี ปูฌี กะ ตูฮัด บือซัยํ เดะ อาตัซ เลอ_ ซาเบะ ญา ฌือนัฮ ฌางัน ลาฆู นู บือซัยํ โตระ ดัฮ
กูดา ฌางัน ตาฮัน กูดา_ ญา กีปัซ ฆูโฆยํ กะ ลาโวจ
2ตูฮัด บือซัยํ เดะ อาตัซ เตอ_ บรี กู ตือฆัยํ อูรัจ_ ฌาดี ลาฆู มือญาญี นะ กู
ญา เลอ นู ตูโลก กู_ บรี ลือปัซ
ญา เตอ นู ฌาดี ตูฮัด นะ กู_ กู นะ บรี ซือลามัจ กะ ญา
ฌาดี ตูฮัด นะ อาโปก เดะ กู_ กู นะ มือโอจ บรี ซือลามัจ กะ ญา
3ตูฮัด ญา ฌาดี บือกะ ซือมียา บือปรัก
ปือนามา นะ ญา_ ฌาดี ตูฮัด บือซัยํ เดะ อาตัซ เลอ.
4“โกะ ซือตรี บือปรัก_ ฌางัน กาวัด ตาฮัน นะ ฟาโร เตอ_ ตูฮัด ญา รีวัก ปี กะ ลาโวจ
โกะ กือปาลา ตาฮัน นู บาฌิ เดะ กาวัด นะ ฟาโร โปด_ ตาลับ เดะ ลาโวจ มีรัฮ ดัฮ
5อาเย อาโปฮ กูญา
กูญา ตาลับ เดะ อารอก_ บือกะ บาตู เลอ
6โอ ตูฮัด บือซัยํ เดะ อาตัซ_ ตางัน โซะ กานัน นะ เกา_ มือฆัฮ โตระ
โอ ตูฮัด เออ_ ตางัน โซะ กานัน นะ เกา_ บูวัจ บรี โกะ ซือตรู ฌาฮานัม ฮาบิฮ เลอ
7ฌางัน ลาฆู มือฆัฮ นู บือซัยํ โตระ นะ เกา_ เกา บือเลฮ จรือเกาะ โกะ ซือตรู ดัฮ
เกา ซูโรฮ ลาฆู มูซัยํ นะ เกา_ ตูนู กูญา บือกะ ตูโงน ปาดี
8อาเงน ตรือเบะ เดะ ลูบัก ฮีโดก นะ เกา_ บูวัจ บรี โกะ อาเย อาโปฮ ตีงี ซือรูโลยํ
อาเย โปด_ อาโปฮ ตีงี บือกะ ดีนิง
อาเย เดะ อารอก เตอ_ ตือฆัยํ ดัฮ เลอ
9โกะ ซือตรู มือเลา จะ ‘กู นะ ตูโรจ อูเซ รีฆะ บรี ดัด
กู นะ ราปัซ โกะ ซือบารัก มาแรฮ ปาฮาฆิ
กู นะ บูวัจ ฌางัน กูญา บือกะ ฮาตี นะ กู บือคานะ
กู นะ ซีตะ ปือดัก_ ตางัน นะ กู นะ บูวัจ บรี กูญา ฌาฮานัม เลอ.’
10ตูฮัด เออ_ เกา บูวัจ บรี อาดา อาเงน ตีโยะ มาแรฮ_ อาเย เดะ ลาโวจ โปด_ อาโปฮ กูญา ฮาบิฮ
กูญา ตาลับ เดะ อาเย นู บือดรัซ อีตู_ ซือรูปา บือกะ ตีมัฮ ฮีตับ.
11“โอ ตูฮัด บือซัยํ เดะ อาตัซ_ เดะ โกะ ตูฮัด ซือมูฮา_ ตูฮัด นู ดีฮา นะ ซือรูปา บือกะ เกา เลอ
นู ดีฮา นะ บือฆาจะ_ บาฌิ บือซรี_ ซือรูปา เกา
นู ดีฮา บูวัจ ลาฆู บือกรือฌา นู มือฆัฮ?
12ตูฮัด อาเงา ตางัน กานัน นะ เกา
ดือนียา โปด_ ตือลัด กูญา ดัฮ.
13“ตูฮัด เออ_ เกา บาวา โกะ ลูมอฮ บักซา นู เกา บือเลฮ ตือบุซ ดัฮ_ ฌางัน ลาฆู ซายัก นู กือฌะ กือมัซ
บาวา กูญา มาโซะ มาแรฮ รอจ กะ ตือปัจ นู จรัฮ บาฌิ นะ เกา_ ฌางัน ลาฆู มือฆัฮ เลอ
14โกะ ลูมอฮ บักซา ซือมูฮา ดืองัยํ ดัฮ_ ปาคัจ ตาโกจ ญาวา กือตัยํ
โกะ ลูมอฮ นังฆรี ฟีลิซะเตีย กูญา บราซา ตาโกจ โตระ
15ซูโงฮ โกะ กือปาลา นังฆรี เอโดม_ ปาคัจ ฆาโดฮ ฮาตี
โกะ กือปาลา นังฆรี โมอับ โปด_ ตาโกจ ญาวา กือตัยํ
ลูมอฮ นังฆรี คานาอัน ซือมูฮา_ กือลาจุ ดัฮ
16ลาฆู บราซา ตาโกจ_ ฌางัน ลาฆู ตือกือฌุจ โตระ_ อาดา เดะ ฮาตี นะ กูญา
กรานา ลาฆู มือฆัฮ เดะ ตางัน นะ ตูฮัด_ กูญา บราดู ซืองะ_ ซือรูปา บือกะ บาตู
โอ ตูฮัด บือซัยํ เดะ อาตัซ เออ_ ตือดะ โกะ ลูมอฮ ซือมียา นะ เกา ลาลู ปี ดัฮ
โกะ ลูมอฮ บักซา นู เกา ตือบุซ เตอ โปด_ ลือปัซ ปี ดัฮ
17ตูฮัด บือซัยํ เดะ อาตัซ เออ_ เกา บาวา ลูมอฮ กูญา มาโซะ มาแรฮ_ บรี กูญา ดูโดะ กือฌะ_ เดะ บูเกะ นะ เกา
ฌาดี ตือปัจ นู ตูฮัด มาแรฮ ดูโดะ ดัฮ_ ตูฮัด เออ
ฌาดี ตือปัจ มือญือมัฮ_ นู ตางัน นะ เกา บือเลฮ ตืองะ ดัฮ_ โอ ตูฮัด เออ
18ตูฮัด บือซัยํ เดะ อาตัซ_ นะ อาดา ปือบือลา ปี ซือลาลู เลอ.”
19ซาเบะ จะ_ กาลา กาวัด กูดา นะ ราฌา ฟาโร_ ฌางัน ซือตรี กูดา_ ฌางัน โกะ กาวัด ตาฮัน กูดา นะ ญา_ ตูโรด ปี กะ ลาโวจ เตอ_ ตูฮัด บือซัยํ เดะ อาตัซ โปด_ บูวัจ บรี อาเย เดะ ลาโวจ มือนีแลฮ ปาเระ_ มาแรฮ อาโปฮ เลอ. ตาปี โกะ ลูมอฮ บักซา อิซราเอน_ บือฌาลัด ปี เดะ อาตัซ ตานัฮ ตูโฮยํ_ ตืองัฮ ลาโวจ อีตู.
ลาฆู มือญาญี นะ มิเรียม
(กีรา 26.59)
20กะฆีเตอ มิเรียม_ นีบีนี นู ตูโดฮ ปือมือเลา นะ ตูฮัด_ นู จา นีบีนี นะ อาโรน โปด_ ญา ปือฆัก บรานา. โกะ นีบีนี ซือมูฮา โปด_ ปือฆัก บรานา_ บือฌาลัด มารือมา มือนารี ปี ฌูฆา. 21มิเรียม ญา ฌาดี กือปาลา มือญาญี จะ
“กือนา มือญาญี ปูฌี กะ ตูฮัด บือซัยํ เดะ อาตัซ เลอ_ ซาเบะ ญา ฌือนัฮ ฌางัน ลาฆู นู บือซัยํ โตระ ดัฮ
กูดา ฌางัน ตาฮัน กูดา_ ญา กีปัซ ฆูโฆยํ กะ ลาโวจ.”
อาเย ปาเฮะ ฌาดี อาเย ตาวัยํ
22ลือปัซ อีตู_ มูซา บาวา โกะ ลูมอฮ อิซราเอน_ ตรือเบะ เดะ ลาโวจ มีรัฮ_ ปี กะ ฮูตัด ชูระ_ บือฌาลัด เดะ ตือปัจ ตานัฮ ตูโฮยํ นู ลือฆา_ ตีฆา อารี โปด_ เตด ดาปัจ อาเย ลาลู. 23กาลา มาแรฮ รอจ กะ ตูโปะ มารัฮ_ กูญา นะ โอะ อาเย เดะ ตูโปะ มารัฮ อีตู เตด บือเลฮ_ ซาเบะ อาเย ปาเฮะ. ซาเบะ กะฆีเตอ_ กูญา ตืองะ ปือนามา จะ_ มารัฮ.#15.23 เดะ บาซา ฮีบรู_ ปือมือเลา จะ “มารัฮ” ฌาดี จะ “ลาฆู ปาเฮะ.” 24โกะ ลูมอฮ ซือมียา โปด_ ปาคัจ บือซูงุจ ฌางัน มูซา_ มือเลา จะ “ลูมอฮ กีตา นะ อาเมด นามา โอะ?” 25มูซา ญา บือซูระ มีตา เดะ ตูฮัด บือซัยํ เดะ อาตัซ. กะฆีเตอ_ ตูฮัด ตูโญะ บรี ญา ลีฮัจ_ ปูโฮด กายู ซา ปูโฮด. กาลา ตูโฮะ ปูโฮด กายู อีตู ปี กะ อาเย_ อาเย โปด ตาวัยํ ดัฮ.
เดะ ตือปัจ อีตู_ ตูฮัด บือซัยํ เดะ อาตัซ ตืองะ ปือมือเลา ฮูโกบ_ ฌาดี ฮาดัจ ฮูโกบ บรี กะ กูญา ดัฮ. ตูฮัด เตอ_ ลกลีฮัจ ฮาตี นะ กูญา เดะ ตือปัจ อีตู_ 26ญา มือเลา จะ “ดัฮ กาเญา ซือมูฮา นะ มือนีงัย กะ ซือวารา นะ ตูฮัด บือซัยํ เดะ อาตัซ_ ตูฮัด นะ กาเญา_ บูวัจ ลาฆู นู บาฌิ ตือปัจ_ โซะ ฮือลด มูคา นะ ญา_ จีเฮะ ตือลีงา_ มือนีงัย ปือมือเลา ฮูโกบ นะ ญา_ บูวัจ ตูโรจ ฮาดัจ ฮูโกบ นะ ญา ราตา ฌือแนฮ เตอ_ โกะ ปือญาเกะ แนฮฌือแนฮ นู กู บือฌาดี บรี อาดา เดะ ลูมอฮ อียิบ เตอ_ กู นะ เตด บรี ญา บือฌาดี เดะ ลูมอฮ กาเญา ลาลู. ซาเบะ จะ_ กู นี เลอ_ นู ฌาดี ตูฮัด บือซัยํ เดะ อาตัซ_ นู ฌาดี บูมอยํ นะ กาเญา.”
27ลูมอฮ กูญา มาแรฮ รอจ กะ ตูโปะ เอลิม_ นู อาดา ตลาฆา อาเย ซือบุยํ ดูวา บือลัซ บีฌี_ อาดา ปูโฮด อินทะพาลัม#15.27 ปูโฮด อินทะพาลัม ฌาดี ปูโฮด ตีงี ซา ฌือแนฮ_ นู นะ บือตูโมฮ เดะ ตือปัจ ตานัฮ ตูโฮยํ. ญา ลีฮัจ ซือรูปา บือกะ ปูโฮด กลาเม_ ตาปี บูวัฮ นะ ญา ดือมิ_ ลือมัฮ_ มาแนฮ_ มากัด บาฌิ. ซียับ ซือโบจ จะ_ ต้นอินทผลัม. มือลายู จะ “ตามัยํ.”_ ตูโฌฮ ปูโลฮ (70) ปูโฮด. ลูมอฮ กูญา เตอ_ ตืองะ โกะ รูมัฮ กาฌัก กาเยด ดาปิก อาเย โซะ อีตู เลอ.
Currently Selected:
บราเกะ ลารี 15: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
