บราเกะ ลารี 16
16
ตือโปก มานา - บารัก มากัด ดาตัก เดะ ลาแงะ
1เดะ อารี ลีมา บือลัซ_ บูลัด ดูวา_ ตะเดะ วะตู นู กูญา ตรือเบะ มาแรฮ เดะ นังฆรี อียิบ_ โกะ ลูมอฮ ซือมียา นะ บักซา อิซราเอน ซือมูฮา_ กูญา บราเกะ ตรือเบะ ดาตัก เดะ เอลิม_ มาแรฮ รอจ กะ ตือปัจ ตานัฮ ตูโฮยํ นู ลือฆา นะ ซีน_ นู อาดา ดูโดะ เดะ ซามา ตืองัฮ ตูโปะ เอลิม ฌางัน บูเกะ ซีนัย. 2โกะ ลูมอฮ อิซราเอน ซือมูฮา โปด_ ปาคัจ บือซูงุจ กะ มูซา ฌางัน อาโรน_ เดะ ตือปัจ ตานัฮ ตูโฮยํ นู ลือฆา_ 3มือเลา ฌางัน กูญา ดูวา อูรัก จะ “ดัฮ ลูมอฮ กามี มาตี ฌางัน ตางัน นะ ตูฮัด บือซัยํ เดะ อาตัซ_ เดะ นังฆรี อียิบ_ กาลา นู ดูโดะ ดาปิก ปีโยะ รือบุซ ลูลู_ มากัด บรี กือญัง เตอ_ บาฌิ ลาฆี เดะ นู กาเญา บาวา กามี ตรือเบะ มาแรฮ_ กะ ตือปัจ ตานัฮ ตูโฮยํ นู ลือฆา กะฆีนี_ บีดา นะ บรี ลูมอฮ กามี ซือมูฮา ลาปัยํ มาตี เลอ.”
4กะฆีเตอ_ ตูฮัด บือซัยํ เดะ อาตัซ มือเลา ฌางัน มูซา จะ_ “ลีฮัจ เลอ_ กู นะ บรี โกะ ซือบารัก มากัด_ ตูโรด มาแรฮ ดาตัก เดะ ลาแงะ_ บือกะ ฮูฌัด_ บีดา ลูมอฮ กาเญา_ บรี โกะ ซือมียา ตรือเบะ ปี มูงอจ บีลัก อารี_ บรี ฆือนะ มากัด เดะ ดาลับ ซา อารี อีตู. กะฆีเตอ_ กู นะ ลกลีฮัจ ฮาตี นะ กูญา จะ_ นะ บูวัจ ตูโรจ กะ ปือมือเลา อาฌัยํ นะ กู_ เฆอ เตด. 5เดะ อารี นัม_ กาลา กูญา ซียะ ซือบารัก มากัด นู มูงอจ ดัฮ_ นะ บือตามัฮ ฌาดี ดูวา กาลี_ ตามัฮ เดะ ซือบารัก นู กูญา มูงอจ บีลัก อารี.”
6กะฆีเตอ มูซา ฌางัน อาโรน_ กูญา มือญาเระ กะ ลูมอฮ อิซราเอน ซือมูฮา จะ “เดะ วะตู ปะฮือญา_ กาเญา ซือมูฮา นะ บือเลฮ ตาฮู จะ_ ฌาดี ตูฮัด บือซัยํ เดะ อาตัซ เลอ_ นู บาวา ลูมอฮ กาเญา ตรือเบะ เดะ นังฆรี อียิบ. 7เดะ วะตู ปาฆี_ กาเญา นะ ลีฮัจ ลาฆู บือซรี บือซายา นะ ตูฮัด_ ซาเบะ ปือมือเลา บือซูงุจ นู กาเญา อูจะ กะ ตูฮัด บือซัยํ เดะ อาตัซ_ ตูฮัด ญา ดืองัยํ ดัฮ. กามี ดูวา อูรัก ฌาดี ซาปา เลอ_ นู ลูมอฮ กาเญา บือซูงุจ อูจะ กะ กามี?”
8มูซา มือเลา จะ “เดะ วะตู ปะฮือญา ตูฮัด นะ บรี ลูลู กะ กาเญา มากัด_ เดะ วะตู ปาฆี_ ลูมอฮ กาเญา นะ อาดา โกะ ซือบารัก มากัด ฌู กือญัง_ ซาเบะ ตูฮัด ญา ดืองัยํ ปือมือเลา บือซูงุจ นะ กาเญา_ นู กาเญา มือเลา อูจะ กะ ญา ดัฮ. กามี ดูวา อูรัก อีนี ฌาดี ซาปา เลอ? นู ลูมอฮ กาเญา บือซูงุจ เตอ_ เตด บือซูงุจ อูจะ กะ กามี_ ตาปี บือเลฮ อูจะ กะ ตูฮัด บือซัยํ เดะ อาตัซ เลอ.”
9กะฆีเตอ_ มูซา ญา มือเลา ฌางัน อาโรน_ จะ_ “กือนา มือญาเระ กะ ลูมอฮ อิซราเอน ซือมูฮา_ จะ_ ‘มาโซะ มาแรฮ ดาปิก ตูฮัด บือซัยํ เดะ อาตัซ เลอ_ ซาเบะ ญา มือนีงัย กะ ปือมือเลา บือซูงุจ นะ กาเญา ดัฮ.’ ”
10กาลา อาโรน มือเลา ฌางัน ลูมอฮ อิซราเอน ซือมูฮา เตอ_ กูญา ตีญุง ลีฮัจ ปี_ กะ ตือปัจ ตานัฮ ตูโฮยํ นู ลือฆา_ บือฆารี ลาฆู บือซรี บือซายา นะ ตูฮัด บือซัยํ เดะ อาตัซ_ ปลีฮัจ โซะ กือมูวัง. 11ตูฮัด มือเลา ฌางัน มูซา จะ 12“กู ดืองัยํ ปือมือเลา บือซูงุจ นะ ลูมอฮ อิซราเอน ดัฮ. กือนา มือเลา กะ กูญา จะ_ ‘เดะ วะตู กือลับ บูลู ลืองัน_ ลูมอฮ กาเญา นะ บือเลฮ มากัด ลูลู. รอจ วะตู ปาฆี_ กาเญา นะ บือเลฮ มากัด โกะ ซือบารัก มากัด_ ฌู กือญัง. กะฆีเตอ กาเญา นะ บือเลฮ ตาฮู จะ_ กู ฌาดี ตูฮัด บือซัยํ เดะ อาตัซ_ ตูฮัด นะ ลูมอฮ กาเญา.’ ”
13กาลา รอจ วะตู ปะฮือญา_ กาวัด บูโรก ปูโยฮ ตรือบัก มาแรฮ_ ปือนอฮ เดะ ตือปัจ ตืองะ โกะ รูมัฮ กาฌัก กาเยด. เดะ วะตู ปาฆี โปด_ อาดา อาเย ฮือโมด_ ฆูโฆยํ มาแรฮ กือลีลิก ตือปัจ ตืองะ โกะ รูมัฮ กาฌัก. 14กาลา อาเย ฮือโมด ญา ลัย ปี ดัฮ_ อาดา บือฆารี ซือรูปา บือกะ ซีซิ_ ซามา บายา บีฌี อาเย ฮือโมด ตือฆัยํ_ เดะ ตือปัจ ตานัฮ ตูโฮยํ นู ลือฆา อีตู. 15กาลา ลูมอฮ อิซราเอน ลีฮัจ_ กูญา ปาคัจ มือเลา จะ “อีนี นามา#16.15 เดะ บาซา ฮีบรู ปือมือเลา นู กูญา มือเลา นะ ตรือเบะ ซือวารา ซือรูปา บือกะ “มานา.” กะฆีเตอ กูญา บลาโลก กะ ซือบารัก อีนี จะ_ มานา. ลีฮัจ ตือนอซ 31. เลอ?” ซาเบะ กูญา เตด ตาฮู จะ ฌาดี ซือบารัก นามา. มูซา มือญาเระ กะ กูญา จะ “นี เลอ ฌาดี ซือบารัก มากัด นู ตูฮัด บือซัยํ เดะ อาตัซ บรี กะ ลูมอฮ กาเญา มากัด. 16นี เลอ นู ตูฮัด บือซัยํ เดะ อาตัซ บือเลฮ ปือซัด ดัฮ จะ ‘บรี กะ ราตา ซือมียา มูงอจ บีดา นะ มากัด บรี กือญัง_ บรี มูงอจ ซืออูรัก ซา บาเตน_ ตูโรจ บือกะ ซือมียา ดีกิ บาญะ_ นู อาดา ดูโดะ เดะ รูมัฮ กาฌัก กาเยด นะ กูญา.’ ” 17โกะ ลูมอฮ อิซราเอน โปด_ บูวัจ ตูโรจ ดัฮ. ซือตืองัฮ มูงอจ บาญะ_ ซือตืองัฮ มูงอจ ดีกิ 18ตาปี กาลา กูญา อาเมด บาเตน ซูกัจ_ ซือมียา นู มูงอจ บาญะ_ เตด ลือเบฮ_ ซือมียา นู มูงอจ ดีกิ โปด_ เตด ปูตุซ. ราตา ซือมียา มูงอจ บือเลฮ_ บือกะ นู กูญา นะ มากัด กือญัง_ ตานา บาฌิ. 19กะฆีเตอ_ มูซา ปือซัด จะ “ฌางัน บรี กะ ซือมียา ดีฮา มูงอจ ตาโรฮ ฌู ลือเบฮ รอจ โซะ วะตู ปาฆี.” 20ตาปี กูญา เตด มือนีงัย กะ มูซา_ ซือตืองัฮ มูงอจ ตาโรฮ ฌู รอจ วะตู ปาฆี. ซือบารัก มากัด อีตู โปด_ บือฮูลัจ_ บารี บูโซะ_ บูวัจ บรี มูซา ญา มูซัยํ กะ โกะ ซือมียา อีตู. 21กูญา มูงอจ บีลัก ปาฆี_ บือกะ ซือมียา ซืออูรัก นะ มากัด กือญัง_ ตานา บาฌิ. ตาปี กาลา มาตา อารี ฮางัจ ดัฮ_ ซือบารัก มากัด อีตู โปด_ ลัย ฮาบิฮ เลอ.
22วะตู รอจ กะ อารี นัม_ กูญา มูงอจ ซือบารัก มากัด_ รอจ กะ ดูวา กาลี บือตามัฮ_ ฌาดี จะ_ ซอก ดูวา บาเตน. กะฆีเตอ_ โกะ กือปาลา นะ ลูมอฮ อิซราเอน_ กูญา ปี มือญาเระ กะ มูซา_ 23มูซา มือญาเระ กะ กูญา จะ “ตูฮัด มือเลา จะ ‘มัฮปาฆี ฌาดี อารี บราดู กรือฌา_ ฌาดี อารี บราดู นู จรัฮ บาฌิ บรี กะ ตูฮัด บือซัยํ เดะ อาตัซ. นะ ซาลัย นามา กือนา ซาลัย_ นะ รือบุซ นามา โปด_ รือบุซ เลอ. บารัก นู ลือเบฮ ซือมูฮา_ กือนา ตาโรฮ ฌู รอจ กะ มัฮปาฆี.’ ” 24กาลา กูญา มูงอจ ตาโรฮ ฌู รอจ กะ มัฮปาฆี_ ตูโรจ กะ มูซา ญา ปือซัด_ ซือบารัก มากัด อีตู โปด_ เตด บารี_ เตด บูโซะ ฌาดี ฮูลัจ ลาลู. 25มูซา มือญาเระ จะ “อารี อีนี_ กือนา มากัด โกะ ซือบารัก มากัด อีตู_ ซาเบะ จะ_ อารี อีนี ฌาดี อารี บราดู กรือฌา นะ ตูฮัด บือซัยํ เดะ อาตัซ. อารี อีนี_ กาเญา นะ เตด ดาปัจ โกะ ซือบารัก มากัด อีตู_ เดะ ปาดัก ลาลู. 26กือนา มูงอจ ตาโรฮ นัม อารี_ ตาปี เดะ อารี ตูโฌฮ_ นู ฌาดี อารี บราดู กรือฌา_ ญา นะ ฮอย ลาลู เลอ.”
27กาลา รอจ กะ อารี ตูโฌฮ_ อาดา ซือมียา ซือตืองัฮ ตรือเบะ ปี มูงอจ_ ตาปี เตด ดาปัจ เลอ. 28ตูฮัด บือซัยํ เดะ อาตัซ มือเลา ฌางัน มูซา จะ “ลูมอฮ กาเญา นะ บือลาวัด ฌางัน ปือมือเลา ฮูโกบ นะ กู_ ลามา ตารา ดีฮา? 29ลีฮัจ เลอ_ ตูฮัด บือซัยํ เดะ อาตัซ_ ซียะ อารี บราดู กรือฌา บรี กะ กาเญา. กะฆีเตอ_ เดะ อารี นัม_ ตูฮัด บรี ซือบารัก มากัด_ บรี ฆือนะ เดะ ดูวา อารี. บรี ราตา ซือมียา บราดู รือมัย_ เดะ ตือปัจ นะ ญา_ ฌางัน บรี ซาปา ตรือเบะ เดะ ตือปัจ นะ ญา เดะ อารี ตูโฌฮ อีตู เลอ.” 30ซาเบะ กะฆีเตอ_ โกะ ลูมอฮ ซือมียา ซือมูฮา_ กูญา บราดู กรือฌา เดะ อารี ตูโฌฮ.
31โกะ ลูมอฮ อิซราเอน บลาโลก ปือนามา ซือบารัก มากัด อีตู จะ “มานา.#16.31 มานา ปือมือเลา อีนี ฌาดี ปือมือเลา บาซา ฮีบรู_ ฌาดี จะ “อีนี นามา?” บือกะ นู กูญา ตาญา ดัฮ เดะ ตือนอซ 15.” ฌาดี บีฌี เตฮปูเตฮ_ ซือรูปา กะ บีฌี ตาโระ ซา ฌือแนฮ#16.31 ตาโระ อีนี_ ญา ซือรูปา นู บาซา ซียับ จะ “ผักชี.”_ อาดา บือบาวู ซือรูปา ตือโปก โรตี ลีบัย_ จาโปยํ ฌางัน มีซัด มาทู 32มูซา มือเลา จะ “ตูฮัด บือซัยํ เดะ อาตัซ ปือซัด กะฆีนี จะ_ ‘กือนา ซูกัจ มานา_ ซา บาเตน_ ตาโรฮ ปี_ ฌู ตือดะ ฮาบิฮ บือแนฮ บักซา นะ กาเญา_ บีดา กูญา ซือมูฮา นะ บือเลฮ ลีฮัจ_ ซือบารัก มากัด นู กู บรี กาเญา มากัด_ เดะ ตือปัจ ตานัฮ ตูโฮยํ นู ลือฆา อีนี_ กาลา กู บาวา ลูมอฮ กาเญา ตรือเบะ เดะ นังฆรี อียิบ.’ ” 33กะฆีเตอ_ มูซา มือญาเระ กะ อาโรน จะ “อาเมด ฆูรี ซา บีฌี_ ซูกัจ มานา บรี ปือนอฮ_ ฆือนะ ซา บาเตน_ มูงอจ ตาโรฮ โซะ ฮือลด มูคา นะ ตูฮัด บือซัยํ เดะ อาตัซ ปี_ ฌู ฮาบิฮ บือแนฮ บักซา นะ กาเญา.” 34อาโรน โปด_ ตืองะ มานา อีตู_ โซะ ฮือลด ปือมือเลา บือฌาญี บือตือตู#16.34 กาลา ลูมอฮ อิซราเอน รอจ กะ บูเกะ ซีนัย_ ตูฮัด ปือซัด บรี กูญา บูวัจ ปือตี_ ฌาดี ปือตี นะ ปือมือเลา บือฌาญี บือตือตู_ บรี กูญา ตาโรฮ โกะ บาตู ลีบัย_ นู ตูฮัด บือเลฮ ฆาแรฮ ปือมือเลา ฮูโกบ ซือปูโลฮ ลาฆู_ บือซามา ฌางัน ฆูรี นู บอฮ มานา อีตู. ลีฮัจ ซูรัจ บราเกะ ลารี 25.10-22; ซูรัจ ฮีบรู 9.4._ บีดา ฌาฆา ตาโรฮ_ ตูโรจ กะ ปือมือเลา นะ ตูฮัด บือซัยํ เดะ อาตัซ_ นู ญา ปือซัด ดัฮ_ ฌางัน มูซา. 35โกะ ลูมอฮ อิซราเอน_ บือเลฮ มากัด มานา_ ปัจ ปูโลฮ (40) ตาโฮด_ ฌู มาโซะ มาแรฮ รอจ นังฆรี นู กูญา นะ ดูโดะ. ลูมอฮ กูญา มากัด มานา ฌู มาแรฮ รอจ กะ ตือกอซ นะ นังฆรี คานาอัน. 36(เดะ ซือบารัก ซูกัจ กาลา อีตู_ ซือปูโลฮ บาเตน_ ญา ซือรูปา บือกะ ซา โทก.)
Currently Selected:
บราเกะ ลารี 16: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
