บราเกะ ลารี 24
24
ปือมือเลา บือฌาญี บือตือตู_ บูวัจ บรี กือฌะ กือมัซ ดัฮ
1ตูฮัด มือเลา ฌางัน มูซา จะ_ “เกา ฌางัน อาโรน_ นาดับ_ อาบีฮู_ ฌางัน ลูมอฮ ซือมียา ซัยํบือซัยํ_ ตูโฌฮ ปูโลฮ (70) อูรัก นะ ลูมอฮ อิซราเอน_ กือนา ญาแญะ มาแรฮ_ มาโซะ ซารี ตูฮัด บือซัยํ เดะ อาตัซ_ อาเกะ มือญือมัฮ ตะเดะ ฌาโวฮ. 2บรี ซา มูซา ซืออูรัก_ มาโซะ มาแรฮ ดาปิก ตูฮัด บือซัยํ เดะ อาตัซ. โซะ โกะ ซือมียา ซิกอาซิก_ ฌางัน บรี มาโซะ มาแรฮ ดาปิก. ฌางัน บรี โกะ ลูมอฮ ซือมียา_ ญาแญะ มาแรฮ ฌางัน มูซา เลอ.”
3มูซา_ ญา บาวา ปือมือเลา นะ ตูฮัด บือซัยํ เดะ อาตัซ_ ราตา ปาตัฮ_ ฌางัน ลาฆู ฮูโกบ ซือมูฮา_ มาแรฮ มือญาเระ กะ โกะ ลูมอฮ ซือมียา ซือมูฮา_ บรี ตาฮู. โกะ ลูมอฮ ซือมียา โปด_ ตีกัฮ ฌาดี ซา ซือวารา_ จะ “ปือมือเลา ซือมูฮา นู ตูฮัด บือซัยํ เดะ อาตัซ_ มือเลา ดัฮ เตอ_ กามี นะ บูวัจ ตูโรจ เลอ.”
4กะฆีเตอ_ มูซา ญา ฆาแรฮ_ ปือมือเลา นะ ตูฮัด บือซัยํ เดะ อาตัซ ดัฮ_ ราตา ปือมือเลา. ญา บีกัซ ตะเดะ ปาฆี_ ซียะ โกะ ซือบารัก_ บูวัจ ตือปัจ มือญือมัฮ โซะ บีดิก บูเกะ_ จาจะ จาวัก บาตู_ ดูวา บือลัซ (12) บาตัก_ ตูโรจ กะ ปาลัฮ_ ดูวา บือลัซ (12) ปาลัฮ นะ ลูมอฮ อิซราเอน. 5ญา ซูโรฮ โกะ อูรัก มูดา นะ ลูมอฮ อิซราเอน_ อาเกะ ซือบารัก ตูนู มือญือมัฮ_ ฮาบิฮ ซา อีโกยํ_ อาเกะ โกะ ลือมู บาปา_ ฌาดี ซือบารัก มือญือมัฮ นู บรี ซือนัง ซือลามัจ_ กะ ตูฮัด บือซัยํ เดะ อาตัซ. 6กะฆีเตอ มูซา_ ญา อาเมด ดารัฮ ลือมู ซือตืองัฮ_ ตาโรฮ เดะ โกะ ฌับ_ ซือตืองัฮ ปรือจิ เดะ ตือปัจ มือญือมัฮ อีตู 7ญา อาเมด ซูรัจ ปือมือเลา บือฌาญี บือตือตู_ บาจา บรี โกะ ลูมอฮ ซือมียา ดืองัยํ. ลูมอฮ กูญา_ มือเลา จะ_ “ลาฆู นู ตูฮัด บือซัยํ เดะ อาตัซ มือเลา ดัฮ เตอ_ ลูมอฮ กามี นะ มือนีงัย_ นะ บูวัจ ตูโรจ ฮาบิฮ เลอ.” 8มูซา โปด_ อาเมด ดารัฮ_ ปรือจิ เดะ โกะ ลูมอฮ ซือมียา_ มือเลา จะ_ “อีนี ฌาดี ดารัฮ เดะ ปือมือเลา บือฌาญี บือตือตู_ นู ตูฮัด บือซัยํ เดะ อาตัซ บูวัจ_ ฌางัน ลูมอฮ กาเญา_ ตูโรจ กะ ปือมือเลา อีนี ซือมูฮา เลอ.”
กูญา มาโซะ มือญือมัฮ ตูฮัด_ เดะ อาตัซ บูเกะ
9กะฆีเตอ มูซา_ ฌางัน อาโรน_ อาดา นาดับ_ ฌางัน อาบีฮู_ ฌางัน โกะ ลูมอฮ ซือมียา ซัยํบือซัยํ_ ตูโฌฮ ปูโลฮ (70) อูรัก_ นะ ลูมอฮ อิซราเอน_ กูญา ญาแญะ ปี 10กูญา บือเลฮ ลีฮัจ ตูฮัด นะ ลูมอฮ อิซราเอน. อาดา ตือปัจ ตืองะ กากี_ ฌาดี ซือรูปา บือกะ อีตัด บือตือแล_ ฌรือแนฮ ซือรูปา กะ ลาแงะ เลอ. 11ตูฮัด เตด บือเลฮ กรัจ ฮูโกบ_ โกะ กือปาลา นะ ลูมอฮ อิซราเอน. กูญา บือเลฮ ลีฮัจ ตูฮัด_ ตาปี กูญา เตด มาตี_ บือเลฮ มากัด_ โอะ ลาฆี เลอ.
12ตูฮัด บือซัยํ เดะ อาตัซ_ มือเลา ฌางัน มูซา_ จะ_ “เกา กือนา ญาแญะ มาแรฮ ซารี กู_ เดะ อาตัซ บูเกะ. นาตี กู เดะ ตือปัจ อีตู_ กู นะ บรี บาตู ลีบัย_ นู อาดา ปือมือเลา ฮูโกบ_ ฌางัน ปือมือซัด_ นู กู ฆาแรฮ ตาโรฮ_ บีดา นะ อาฌัยํ ลูมอฮ กูญา.” 13มูซา บีกัซ_ มารือมา ฌางัน โยซูวา_ ซือมียา นู ตูโลก ญา_ ญาแญะ ปี กะ อาตัซ บูเกะ นะ ตูฮัด. 14ญา มือเลา ฌางัน โกะ ลูมอฮ ซือมียา ซัยํบือซัยํ อีตู_ จะ_ “นาตี กามี เดะ ตือปัจ อีนี_ ฌู ตือดะ กามี นะ บาลิ มาแรฮ_ ซารี ลูมอฮ กาเญา ปูลัก. ลีฮัจ เลอ_ อาดา อาโรน ฌางัน ฮูระ_ ดูโดะ ฌางัน ลูมอฮ กาเญา. ซาปา อาดา ลาฆู นามา โปด_ กือนา มาแรฮ ซารี กูญา ดูวา อูรัก อีนี เลอ.”
15กะฆีเตอ มูซา_ ญาแญะ ปี อาตัซ บูเกะ. กือมูวัง โปด_ ตูโดก บูเกะ อีตู ฮาบิฮ ดัฮ. 16บือซรี บือซายา นะ ตูฮัด บือซัยํ เดะ อาตัซ_ มาแรฮ ดูโดะ เดะ อาตัซ บูเกะ ซีนัย. กือมูวัง อีตู_ ตูโดก บูเกะ นัม อารี. เดะ อารี ตูโฌฮ_ ตูฮัด ญา บลาโลก มูซา_ มือเลา ดาตัก เดะ กือมูวัง. 17บือซรี บือซายา นะ ตูฮัด บือซัยํ เดะ อาตัซ_ บือฆารี เดะ มาตา นะ ลูมอฮ อิซราเอน_ ซือรูปา กะ ญาลา อาปี ฮางอซ_ เดะ อาตัซ ฮูโฌก บูเกะ. 18มูซา มาโซะ ปี เดะ กือมูวัง อีตู_ ญาแญะ ปี กะ อาตัซ บูเกะ. มูซา ญา ดูโดะ เดะ อาตัซ บูเกะ อีตู_ ปัจ ปูโลฮ (40) อารี_ ปัจ ปูโลฮ (40) มาลับ.
Currently Selected:
บราเกะ ลารี 24: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
