บราเกะ ลารี 23
23
ราตา อูรัก กือนา บูวัจ บรี รือมัก
1“ฌางัน บาวา ลาฆู มืออูปัย_ ปี จรือตา กะ กาวัด. ฌางัน มาโซะ บือซามา ฌางัน ซือมียา ฌาฮัจ_ ฌาดี ซะซรี ฮาตี ฌาฮัจ. 2ฌางัน บูวัจ ลาฆู ฌาฮัจ_ ตูโรจ โกะ ซือมียา บาญะ_ นู กูญา บูวัจ เตอ. ฌางัน ฌาดี ซะซรี เดะ ลาฆู บือดะวา_ มาโซะ โกะ ซือมียา บาญะ_ นะ บูวัจ บรี ฮอย ลาฆู บาฌิ ตือปัจ. 3ฌางัน มาโซะ ลัฮบือลัฮ_ ฌางัน โกะ ซือมียา ฮาฌะ_ เดะ ลาฆู บือดะวา นะ กูญา.
4“กาลา เกา ดาปัจ ลือมู_ เฆอ จะ กูดา บาซา ดือมิ_ นะ ซือตรู_ ญา ซือซัจ มาแรฮ_ กือนา บาวา บือปี อาตัจ กะ ตูฮัด นะ ญา_ บรี บือเลฮ เลอ. 5กาลา ลีฮัจ กูดา บาซา ดือมิ_ นะ ซือมียา นู บือชี กะ เกา_ ญา รือบัฮ ซาเบะ ปือโดะ บารัก บรัจ_ ฌางัน นะ เตด ปือดูลี. กือนา ตูโลก ซือมียา อีตู_ อาเกะ กูดา ปือบีกัซ เลอ.
6“เกา ฌางัน บือปูลัซ ลาฆู บาฌิ ตือปัจ_ ตีเมา ซือมียา ฮาฌะ ซาโมจ ลาฆู บาฌิ ตือปัจ_ เดะ ลาฆู บือดะวา นะ ญา_ บือกะ ญา บือฆูนา นะ ซาโมจ. 7เกา กือนา ลารี บรี ฌาโวฮ_ เดะ ลาฆู ตูโดฮ นู เตด กือนา ลาฆู. ฌางัน บูนอฮ ซือมียา นู ฮอย ลาฆู ซาลัฮ_ ฌางัน ซือมียา นู บาฌิ ตือปัจ_ ซาเบะ กู นะ เตด บรีงัจ จะ_ ซือมียา บูวัจ ฌาฮัจ เตอ_ ฌาดี ซือมียา บาฌิ ตือปัจ. 8ฌางัน ซาโมจ โกะ ซือบารัก ปือซูวะ เลอ_ ซาเบะ จะ_ บารัก ปือซูวะ บูวัจ บรี ซือมียา มาตา บาฌิ_ ฌาดี ซือมียา มาตา บูตา_ ฆามะ บูวัจ บรี ลาฆู บือดะวา นะ ซือมียา บาฌิ ตือปัจ_ กาเลฮ เลอ.
9“เกา ฌางัน ปรือกัด ซือมียา บักซา อาซิก_ ซาเบะ กาเญา ตาฮู ฮาตี นะ ลูมอฮ ซือมียา บักซา อาซิก ดัฮ_ ซาเบะ จะ กาเญา โปด_ ดือละ ฌาดี ลูมอฮ ซือมียา บักซา อาซิก_ เดะ นังฆรี อียิบ_ เดะ กาลา ดูลู.
ตาโฮด บราดู กรือฌา_ ฌางัน อารี บราดู กรือฌา
10“กือมูฮา นัม ตาโฮด_ กือนา ปรุยๆ ปาดี_ กือตับ ปาดี เดะ บือนัก นะ เกา. 11ตาปี เดะ ตาโฮด นู ตูโฌฮ เตอ_ ฌางัน กือตับ_ ปือบียัยํ บรี กะ บือนัก อีตู_ จรัฮ ฮอย นามา_ บีดา บรี โกะ ซือมียา ฮาฌะ เดะ ลูมอฮ บักซา นะ เกา_ ปูงอจ มากัด. ซือบารัก นู ลือเบฮ เตอ โปด_ บรี กะ บือนาตัก มากัด ฌูฆา. โซะ กือโบด บูวัฮ อางุน_ ฌางัน กือโบด บูวัฮ กือดูโนด_ เกา กือนา บูวัจ บือกะฆีเตอ ฌูฆา.
12“กือนา บือกรือฌา ลาฆู นะ เกา_ นัม อารี. ตาปี เดะ อารี ตูโฌฮ เตอ_ กือนา บราดู กรือฌา เลอ_ บีดา เกา_ ฌางัน ลือมู_ ฌางัน กูดา บาซา ดือมิ นะ เกา_ นะ บือเลฮ บราดู รือมัย. โกะ นานะ โกะ ปราโซฮ นะ เกา_ ฌางัน โกะ ลูมอฮ บักซา อาซิก_ นะ บือเลฮ บราดู รือมัย ฌูฆา เลอ. 13โกะ ลาฆู ซือมูฮา_ นู กู ซูโรฮ เกา ดัฮ เตอ_ กือนา ฌาฆา ปือฆัก บรี กือฌะ. ฌางัน ซือโบจ ตรือเบะ ปือนามา นะ ตูฮัด อาซิก เลอ_ ฌางัน บรี ดืองัยํ ปือนามา นะ โกะ ตูฮัด อีตู_ ตรือเบะ เดะ มูโลจ นะ เกา.
ลาฆู บรามัย บีลัก ตาโฮด_ ตีฆา กาลี บรามัย
(บราเกะ ลารี 34.18-26; ปือมือเลา ฮูโกบ 16.1-17)
14“กือนา ตูเฮะ กะ ลาฆู บรามัย มือญือมัฮ กะ กู_ ซือตาโฮด ตีฆา กาลี. 15กือนา ตูเฮะ ลาฆู บรามัย_ มากัด ตือโปก โรตี นู ฮอย ราฆี. เกา กือนา มากัด ตือโปก โรตี ฮอย ราฆี_ ตูโฌฮ อารี_ ตูโรจ บือกะ นู กู ปือซัด เกา ดัฮ_ ตูโรจ วะตู นู บือเลฮ ตืองะ ดัฮ_ เดะ บูลัด อาบีบ. ซาเบะ จะ_ เดะ บูลัด อีตู เกา บือเลฮ ตรือเบะ มาแรฮ เดะ นังฆรี อียิบ เลอ. ฌางัน บรี ซาปา มาแรฮ กะ โซะ ฮือลด กู_ ฮอย นามา เดะ ตางัน. 16กือนา ตูเฮะ กะ ลาฆู บรามัย กือตับ ปาดี_ อาเกะ มือญือมัฮ บูวัฮ ลามูลา นู เกา บือเลฮ บือกรือฌา เตอ_ นู เกา บือเลฮ ปรุยๆ เดะ บือนัก. เกา กือนา ตูเฮะ ลาฆู บรามัย ปูงอจ ปาดี ฮาบิฮ_ กาลา เกา มูงอจ ปาดี เดะ บือนัก นู เกา บือเลฮ ตานัม 17บรี โกะ กีลากี ราตา อูรัก นะ เกา_ มาโซะ ซารี ตูฮัด_ นู ตูฮัด บือซัยํ เดะ อาตัซ_ ซา ตาโฮด ตีฆา กาลี กะฆีเตอ.
18“ฌางัน อาเกะ มือญือมัฮ โกะ ดารัฮ_ ดาตัก เดะ บือนาตัก มือญือมัฮ นะ กู_ มารือมา ฌางัน ตือโปก โรตี อาดา ราฆี_ เฆอ จะ_ ปลือปัซ บรี อาดา ลือมะ เดะ ลาฆู มากัด บรามัย นะ กู_ อาดา ลือเบฮ ฌู รอจ กะ ปาฆี.
19“กือนา บาวา บือนา นู บาฌิ โตระ เดะ กาวัด_ นะ บารัก ปือนานัม ลามูลา_ ดาตัก เดะ ตือปัจ ตานัฮ นะ เกา_ มาแรฮ กะ รูมัฮ มือญือมัฮ ตูฮัด บือซัยํ เดะ อาตัซ_ ตูฮัด นะ เกา.
“ฌางัน รือบุซ ลูลู อานะ แบะ_ ฌางัน อาเย ดาดา นะ มะ เดะ ญา เลอ.
กูญา นะ ราปัซ ปือบือลา คานาอัน_ ตือกอซ นังฆรี นู บือฌาญี
20“ลีฮัจ เลอ_ กู ซูโรฮ ฮูลู บาลัก นะ กู_ บือฌาลัด โซะ ฮือลด เกา_ บีดา ฌาฆา เกา_ ตืองัฮ บือฌาลัด_ บาวา บือปี รอจ กะ ตือปัจ ตานัฮ นู กู บือเลฮ ซียะ ตาโรฮ ดัฮ. 21กือนา อาเมด บอฮ เดะ ฮาตี_ มือนีงัย กะ ปือมือเลา นะ ฮูลู บาลัก อีตู. ฌางัน บาตัฮ ฌางัน ญา_ ซาเบะ ญา นะ เตด อาเกะ ซาลัฮ เกา เลอ_ กรานา จะ_ ญา อาดา ปือนามา นะ กู_ เดะ ญาวา ญา.
22“ดัฮ เกา มือนีงัย ซือวารา นะ ญา โงฮซูโงฮ_ บูวัจ ราตา ฌือแนฮ นู กู ปือซัด ดัฮ_ กู นะ ฌาดี ซือตรู ฌางัน โกะ ซือตรู นะ เกา_ นะ บือลาวัด โกะ ซือมียา นู บือลาวัด ฌางัน เกา.
23“กาลา ฮูลู บาลัก นะ กู ปี โซะ ฮือลด เกา_ บาวา เกา_ ปี รอจ กะ ลูมอฮ อาโมรี_ ลูมอฮ เฮด_ ลูมอฮ เปรีซี ลูมอฮ คานาอัน_ ลูมอฮ ฮีวี_ ฌางัน ลูมอฮ เยบูซี_ กะฆีเตอ กู นะ บูวัจ บรี โกะ ลูมอฮ อีตู ฌาฮานัม ฮาบิฮ_ 24ฌางัน ปี มือญือมัฮ โกะ บราลา นะ กูญา_ เฆอ จะ บือกรือฌา_ เฆอ จะ_ บูวัจ ตูโรจ บือกะ กูญา บูวัจ. ตาปี กือนา ปรูโตฮ โกะ บารัก มือญือมัฮ นะ กูญา_ กาเตาะ โกะ จาวัก นู มือฆัฮ นะ กูญา_ บรี ฮาโจยํ ฮาบิฮ เลอ. 25กือนา บือกรือฌา กะ ตูฮัด บือซัยํ เดะ อาตัซ_ ตูฮัด นะ เกา_ กะฆีเตอ ญา นะ บรี ซือลามัจ กะ ซือบารัก มากัด_ ฌางัน อาเย นะ เกา. กู โปด_ นะ บูวัจ บรี โกะ ปือญาเกะ แนฮฌือแนฮ ลือแงะ ปี_ เดะ ตืองัฮ ลูมอฮ นะ เกา. 26นะ ฮอย ลาฆู มืองูโฆยํ นานะ_ เฆอ จะ_ ฌาดี ซือมือโฆจ_ เดะ นังฆรี นะ เกา. กู นะ บูวัจ บรี เกา อาดา อูมอยํ ปาญัก.
27“กู นะ บูวัจ บรี อาดา ลาฆู บราซา ตาโกจ โตระ_ ปี โซะ ฮือลด เกา_ นะ บรี ลาฆู กือลาจุ บือฌาดี ฌางัน ลูมอฮ นังฆรี ซือมูฮา_ นู เกา นะ บือตือโปฮ เตอ. กู นะ บรี โกะ ซือตรู ซือมูฮา นะ เกา_ อาเลฮ บลากัก_ ลารี เดะ ลูมอฮ นะ เกา. 28กู นะ ซูโรฮ บรี กาวัด ปาลา ฮาตู_ ปี โซะ ฮือลด เกา_ นะ โปรฮ ลูมอฮ ฮีวี_ ลูมอฮ คานาอัน_ ลูมอฮ เฮด_ ปี บรี ลือปัซ เดะ มูคา นะ เกา. 29กู นะ เตด โปรฮ กูญา บรี ลือปัซ_ เดะ ดาลับ ซา ตาโฮด_ ตาโกจ จะ_ นังฆรี นะ ฮอย ซาปา ปือบือลา. กะฆีเตอ โกะ บือนาตัก นะ บือตามัฮ บาญะ ซือรูโลยํ_ บือลาวัด ฌางัน เกา. 30ตาปี กู นะ โปรฮ กูญา_ บรี ลือปัซ เดะ ฮือลด มูคา นะ เกา_ ซือกาลี ดีกิ_ ซือกาลี ดีกิ_ ฌู ตือดะ ลูมอฮ นะ เกา บือตามัฮ บาญะ ซือรูโลยํ_ บือเลฮ ปือบือลา นังฆรี อีตู_ ฌาดี นะ ตะอาซิก 31กู นะ บูวัจ บรี ตือกอซ นะ เกา_ อาดา ตือตู_ ตะเดะ ลาโวจ มีรัฮ_ ปี ฌู รอจ กะ ลาโวจ นะ ลูมอฮ ฟีลิซะเตีย_ ตะเดะ ตือปัจ ตานัฮ ตูโฮยํ นู ลือฆา_ ปี รอจ กะ ซูงัย ยูเฟรติด. ซาเบะ กู นะ ซรัฮ โกะ ลูมอฮ นังฆรี อีตู_ บรี ดูโดะ เดะ ตางัน นะ เกา_ บรี เกา โปรฮ กูญา_ ตรือเบะ ปี ลือปัซ มูคา เลอ. 32เกา ฌางัน บูวัจ ปือมือเลา บือฌาญี บือตือตู ฌางัน กูญา_ เฆอ จะ_ ฌางัน โกะ ดาโตะ บราลา นะ กูญา เลอ. 33กูญา นะ ดูโดะ เดะ นังฆรี นะ เกา_ เตด บือเลฮ_ ตาโกจ จะ_ กูญา นะ บืออาฌะ บรี เกา บูวัจ ลาฆู ดูซา ฌางัน กู_ ซาเบะ จะ_ ดัฮ เกา นะ บือกรือฌา กะ ดาโตะ บราลา นะ กูญา_ ลาฆู อีนี โปด_ นะ ฌาดี ปือญรัจ_ นาตี ฌรัจ เกา_ ซูโงฮ เลอ.”
Currently Selected:
บราเกะ ลารี 23: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
