บราเกะ ลารี 22
22
ฮาดัจ ฮูโกบ_ ปาซัน ลาฆู บรี ซือบารัก ปาเระ
1“ดัฮ ซาปา จูรี ลือมู_ เฆอ จะ_ กาเมก_ ปี บูนอฮ_ เฆอ จะ_ ฌูวัน_ บรี กะ ซือมียา อีตู ฆาตี ลือมู_ ลีมา อีโกยํ ฆาตี ลือมู ซา อีโกยํ_ กาเมก ปัจ อีโกยํ ฆาตี กาเมก ซา อีโกยํ. 2ดัฮ ซาปา ลีฮัจ อูรัก ปือญูรี ตืองัฮ กาลี จือลัฮ_ มือฮือนะ มาโซะ วะตู มาลับ_ ดัฮ กาเตาะ อูรัก ปือญูรี อีตู มาตี_ ซือมียา นู กาเตาะ ฮอย ลาฆู ซาลัฮ เลอ. 3ดัฮ มาตา อารี ญาแญะ ดัฮ_ ซือมียา นู กาเตาะ นะ อาดา ลาฆู ซาลัฮ. ตาปี อูรัก ปือญูรี อีตู_ ฆาโดฮ บายัยํ รือฆา. ดัฮ ญา ฮอย นามา นะ บายัยํ บรี_ ญา ฆาโดฮ ฌูวัน ญาวา ฌาดี ปราโซฮ_ บีดา บายัยํ รือฆา บือนาตัก นู ญา จูรี ปี เตอ. 4ดัฮ รีฆะ ซือบารัก นู จูรี ปี เตอ_ อาดา ฮีโดะ ลาฆี_ เดะ ตางัน นะ ญา_ เตด จะ ฌาดี ลือมู_ เฆอ จะ_ กูดา บาซา ดือมิ_ เฆอ จะ_ กาเมก โปด_ อูรัก ปือญูรี อีตู เตอ_ ฆาโดฮ บายัยํ ดูเวะ_ บรี ดูวา กาลี บายัยํ เลอ.
5“ซาปา ปลือปัซ บรี กะ บือนาตัก_ มากัด โกะ ซือบารัก เดะ บือนัก_ เฆอ จะ_ เดะ กือโบด บูวัฮ อางุน_ บือนาซา ดัฮ_ เฆอ จะ_ ปลือปัซ บือนาตัก นะ ญา_ ปี มากัด โกะ ซือบารัก เดะ บือนัก นะ กาวัด_ ญา ฆาโดฮ บายัยํ รือฆา นู บือนาตัก นะ ญา มากัด. ฆาโดฮ บรี ซือบารัก นู บาฌิ เดะ กาวัด_ เดะ บือนัก นะ ญา_ โกะ ซือบารัก นู บาฌิ เดะ กาวัด_ เดะ กือโบด บูวัฮ อางุน นะ ญา_ ฌาดี รือฆา ฆาตี บารัก นู บือนาซา.
6“ดัฮ จูโจฮ อาปี_ เดะ ลูโงะ ดูรี_ ญา งรือลา ปี บลือกัจ ลูโงะ ปาดี_ เฆอ จะ_ ปูโฮด ปาดี นู เตด บือเลฮ กือตับ ลาฆี_ เฆอ จะ_ บลือกัจ เดะ บือนัก ฮางอซ ฮาบิฮ_ ซือมียา นู จูโจฮ อาปี เตอ_ ฆาโดฮ บายัยํ รือฆา นู บือนาซา นอฮปือนอฮ เลอ.
7“ดัฮ ซาปา กีเรบ ดูเวะ_ เฆอ จะ_ โกะ ซือบารัก_ เดะ กาวัด รูมัฮ_ ตาปี โกะ ซือบารัก กือนา จูรี เดะ รูมัฮ อีตู_ ดัฮ รีฆะ อูรัก ปือญูรี บือเลฮ_ ปือญูรี อีตู ฆาโดฮ บายัยํ_ ฆาตี ฌาดี ดูวา กาลี บายัยํ เลอ. 8ดัฮ รีฆะ อูรัก ปือญูรี เตด บือเลฮ_ กือนา บรี กะ ตูฮัด รูมัฮ มาแรฮ ซารี ตูฮัด_ บีดา นะ ลีฮัจ จะ_ อีซี ญา ตะอาซิก_ บือเลฮ จูรี โกะ ซือบารัก นะ กาวัด รูมัฮ_ เฆอ เตด.
9“เดะ ลาฆู บือดะวา ราตา ฌือแนฮ_ เตด จะ_ ฌาดี ลาฆู ลือมู_ กูดา บาซา ดือมิ_ กาเมก_ เฆอ จะ_ กาเยด บาฌู_ เฆอ จะ_ โกะ ซือบารัก แนฮฌือแนฮ นู ลือแงะ ปี ดัฮ_ นู ซือมียา นะ มือเลา จะ_ ซือบารัก อีตู_ ซือบารัก อีนี_ ฌาดี นะ ญา_ กือนา บาวา ลาฆู บือดะวา อีตู_ ปี ซารี ตูฮัด. ญา นะ กรัจ ฮูโกบ จะ_ ซาปา ซาลัฮ. ซือมียา อีตู_ ฆาโดฮ บายัยํ รือฆา ซือบารัก อีตู_ ฌาดี ดูวา กาลี บายัยํ_ กะ กาวัด รูมัฮ นะ ญา.
10“ดัฮ ซาปา กีเรบ กูดา บาซา ดือมิ_ เฆอ จะ ลือมู_ เฆอ จะ กาเมก_ เฆอ จะ โกะ บือนาตัก แนฮฌือแนฮ_ ฌางัน กาวัด รูมัฮ_ ตาปี บือนาตัก อีตู ญา มาตี_ เฆอ จะ ซาเกะ_ เฆอ จะ อาดา ซือมียา กือโปก ตรือเบะ เดะ กานัก อีตู_ ฮอย ซาปา ลีฮัจ_ 11ฆาโดฮ บรี กะ ซือมียา นู ซาโมจ ซือบารัก กีเรบ อีตู_ บือซูปัฮ ฌางัน กาวัด รูมัฮ_ โซะ ฮือลด มูคา นะ ตูฮัด บือซัยํ เดะ อาตัซ_ บีดา ลีฮัจ จะ_ อีซี ญา จูรี ซือบารัก นะ กาวัด รูมัฮ ซูโงฮ_ เฆอ เตด. กะฆีเตอ ตูฮัด ซือบารัก อีตู_ ญา ฆาโดฮ ซาโงะ ปือมือเลา ซูปัฮ นะ กาวัด. กาวัด โปด_ เตด ฆาโดฮ บายัยํ รือฆา ฆาตี. 12ตาปี ดัฮ_ บือนาตัก อีตู กือนา จูรี ปี_ กาลา นู ซือมียา ซาโมจ ซือบารัก กีเรบ ญา อาดา ฌูฆา_ ซือมียา นู ซาโมจ ซือบารัก กีเรบ_ ฆาโดฮ บายัยํ กะ ตูฮัด นู กีเรบ เลอ. 13ดัฮ อาดา บือนาตัก ฌาฮัจ มาแรฮ ฆีเฆะ บือนาตัก อีตู มาตี_ กือนา อาเมด บาดัด_ มาแรฮ มือญาซัจ ลีฮัจ_ บรี ฌาดี ซะซรี. กะฆีเตอ ซือมียา นู ซาโมจ ซือบารัก กีเรบ_ เตด ฆาโดฮ บายัยํ ฆาตี บือนาตัก นู กือนา ฆีเฆะ อีตู.
14“ดัฮ ซาปา มีญับ บือนาตัก เดะ กาวัด รูมัฮ_ บือปี ดัฮ_ ซาเกะ โตระ_ เฆอ จะ มาตี_ เดะ วะตู นู ตูฮัด บือนาตัก อีตู_ ฮอย เตอ_ ซือมียา มีญับ ฆาโดฮ บายัยํ รือฆา นอฮปือนอฮ เลอ. 15ดัฮ ตูฮัด บือนาตัก อีตู_ อาดา ฌูฆา_ ซือมียา นู มีญับ_ เตด ฆาโดฮ บายัยํ ดัฮ_ ฌาดี ซือบารัก นู ซีวา_ กือนา กีรา ซา รือฆา ซีวา เตอ เลอ.
ฮาดัจ ฮูโกบ ปาซัน ปรางัย ฌางัน ลาฆู ปือจายา
16“ดัฮ ซาปา ตีปู นีบีนี_ นู เตด บือเลฮ ลากี ลาฆี_ นู เตด บือเลฮ บือตูนัง ลาฆี_ ปี ตีโนะ บือซามา ฌางัน นีบีนี อีตู_ ซือมียา อีตู นะ ฆาโดฮ บายัยํ รือฆา จรานา. ฆาโดฮ ซาโมจ นีบีนี อีตู_ มาแรฮ ฌาดี บีนี นะ ญา. 17ดัฮ ปะ เดะ ญา ตีเมา บรี_ นู นะ อาเกะ นีบีนี อีตู บรี ฌาดี บีนี นะ ซือมียา อีตู โปด_ ญา ฆาโดฮ บายัยํ ดูเวะ_ รือฆา จรานา_ ตูโรจ กะ ฮาดัจ มีตา นีบีนี_ นู เตด ดือละ บือเลฮ ลากี อีตู ฌูฆา.
18“โซะ นีบีนี บรูบัจ อาเย ลือมู เตอ_ เกา ฌางัน บรี ญา ฮีโดะ ดัฮ เลอ.
19“ซาปา ตีโนะ บือซามา ฌางัน บือนาตัก_ ซือมียา อีตู ฆาโดฮ กือนา บูนอฮ_ รอจ กะ มาตี.
20“ซาปา อาเกะ บือนาตัก_ มือญือมัฮ กะ ตูฮัด แนฮฌือแนฮ_ ลือเบฮ ซา ตูฮัด บือซัยํ เดะ อาตัซ แนฮ ซา_ ซือมียา อีตู ฆาโดฮ กือนา บูวัจ บรี ฌาฮานัม ฮาบิฮ เลอ.
21“เกา ฌางัน ปรือกัด_ บูวัจ โตระๆ_ โกะ ซือมียา บักซา อาซิก เลอ_ ซาเบะ ลูมอฮ กาเญา ดือละ ฌาดี ซือมียา บักซา อาซิก_ ดูโดะ เดะ นังฆรี อียิบ. 22ฌางัน บูวัจ โตระๆ_ นีบีนี ฌานา_ เฆอ จะ_ นานะ ฮอย เอด อาโปก เลอ. 23ดัฮ เกา บูวัจ โตระๆ_ เดะ ลาฆู มานามา เตอ_ บารู กูญา บือซูระ รอจ กะ กู_ กู โปด_ นะ มือนีงัย ปือมือเลา บือซูระ ลาฆู ซูซัฮ นะ กูญา เลอ. 24กู นะ บืออีเซด ฌู ฮางอซ_ นะ บูนอฮ กาเญา ฌางัน ปือดัก. โกะ บีนี นะ กาเญา นะ ฌาดี ฌานา_ โกะ นานะ นะ กาเญา_ นะ ฌาดี นานะ นู ฮอย อาโปก เลอ.
25“ดัฮ อาดา ซือมียา นะ กู นู ดีฮา_ นู ฌาดี ซือมียา ฮาฌะ_ นู ดูโดะ ฌางัน เกา เตอ_ ดัฮ เกา บรี ญา มีญับ ดูเวะ ปี_ ฌางัน อีงัจ จะ_ เกา ฌาดี ตกเก. ฌางัน กีรา บูงา เดะ กูญา. 26ดัฮ เกา ซาโมจ บาฌู ซรือโกะ นะ กาวัด รูมัฮ_ ฌาดี ซือบารัก บรี ซะซรี เดะ ปือมือเลา บือฌาญี_ กือนา อาตัจ บาฌู ซรือโกะ อีตู ปาเระ_ ดูลู เดะ มาตา อารี นะ ฆูโฆยํ 27ซาเบะ กูญา ฆามะ อาดา บาฌู ซรือโกะ อีตู_ แนฮ ซือกรัจ_ ฌาดี ซือบารัก ตูโดก ญาวา. เตด กะฆีเตอ_ วะตู ตีโนะ ญา นะ อาเมด นามา ซาโปจ? กาลา ญา บือซูระ ลาฆู ซูซัฮ กะ กู_ กู นะ มือนีงัย_ ซาเบะ กู ฌาดี ซือมียา ฮาตี ตือจีฮัด.
28“ฌางัน ซูปัฮ ตูฮัด_ ฌางัน อาโบยํ ซือมียา ปือบือลา บักซา นะ เกา เลอ.
29“ฌางัน ลามัจ นะ อาเกะ มือญือมัฮ_ โกะ ปูโฮด บูวัฮ นู ปือนอฮ บาฌิ นะ เกา_ ฌางัน อาเย บูวัฮ แนฮฌือแนฮ นะ เกา.
“กือนา อาเกะ มือญือมัฮ นานะ ซูโลก นะ เกา กะ กู. 30โซะ ลือมู_ แบะ_ กาเมก นะ เกา_ กือนา บูวัจ บือกะฆีเตอ ฌูฆา. บรี กะ อานะ บือนาตัก อีตู_ ดูโดะ ฌางัน มะ เดะ ญา_ ตูโฌฮ อารี. รอจ กะ อารี ลาปัด_ กือนา บาวา มาแรฮ มือญือมัฮ กะ กู.
31“กาเญา ฌาดี ซือมียา จรัฮ บาฌิ นู ซรัฮ บรี กะ กู. ซาเบะ กะฆีเตอ_ ลูลู บือนาตัก_ นู กือนา ฆีเฆะ มาตี เดะ บือนัก_ กาเญา ฌางัน มากัด เลอ. กือนา บูวัก บรี กะ อาซู มากัด.
Currently Selected:
บราเกะ ลารี 22: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
