บราเกะ ลารี 21
21
ฮาดัจ ฮูโกบ ปาซัน โกะ ปราโซฮ
(ปือมือเลา ฮูโกบ 15.12-18)
1“ตะเดะ อีนี ฌาดี ฮาดัจ_ นู เกา ฆาโดฮ มือญาเระ_ บรี ลูมอฮ กูญา ตาฮู เลอ.
2“ดัฮ เกา นะ บือลี ซือมียา ลูมอฮ ฮีบรู_ ฌาดี ปราโซฮ_ ญา นะ ฆาโดฮ บือกรือฌา กะ เกา นัม ตาโฮด. ตาปี ตาโฮด นู ตูโฌฮ_ ญา นะ บือเลฮ ตรือเบะ ปี_ ลือปัซ ดัฮ_ เตด ฆาโดฮ บายัยํ รือฆา ตือบุซ. 3ดัฮ ปราโซฮ มาแรฮ แนฮ ซา อูรัก_ กือนา ปลือปัซ ญา ปี_ ซา อูรัก. ดัฮ ญา มาแรฮ ฌางัน บีนี_ ฆาโดฮ ปลือปัซ บีนี นะ ญา ปี ฌูฆา. 4ดัฮ ตกเก ซารี บีนี บรี กะ ญา_ บีนี อีตู บือเลฮ นานะ กีลากี_ นานะ นีบีนี โปด_ โกะ บีนี ฌางัน นานะ อีตู เตอ_ นะ ฌาดี นะ ตกเก. ปราโซฮ อีตู_ ญา นะ ลือปัซ ปี ซา ญาวา. 5ดัฮ ปราโซฮ อีตู มาแรฮ มือเลา บรี ซัฮ_ จะ_ ‘กู ซายัก ตกเก_ ซายัก โกะ บีนี ฌางัน นานะ นะ กู. กู เตด บือคานะ นะ ลือปัซ ปี เลอ’ 6บรี กะ ตกเก บาวา ปราโซฮ อีตู_ ปี มาโซะ ซารี ตูฮัด_ บาวา ญา ปี กะ ปีตู_ เฆอ จะ ชะ ปีตู. กะฆีเตอ บรี ตกเก ตือโบะ ตลีงา นะ ญา_ ฌางัน บือซี. ญา โปด_ นะ บือกรือฌา กะ ตกเก ฌู ตือดะ มาตี เลอ.
7“ดัฮ ซือมียา ดีฮา_ ฌูวัน นานะ นีบีนี ฌาดี ปราโซฮ_ นีบีนี เตอ_ นะ เตด ลือปัซ ปี_ ซือรูปา บือกะ ปราโซฮ กีลากี. 8ดัฮ นีบีนี อีตู_ เตด กือนา เดะ ฮาตี นะ ตกเก_ นู นะ ซาโมจ ญา ฌาดี บีนี เตอ_ ฆาโดฮ บรี กะ ซือมียา อาซิก ตือบุซ ญา ปี เลอ. ตาปี ตกเก ฮอย เตด บือเลฮ_ นู นะ ฌูวัน นีบีนี อีตู_ บรี กะ ลูมอฮ บักซา อาซิก_ ซาเบะ ตกเก ซาลัฮ บือฌาญี ฌางัน นีบีนี อีตู ดัฮ. 9ดัฮ ตกเก อาเกะ นีบีนี อีตู_ บรี ฌาดี บีนี นะ นานะ นะ ญา โปด_ บรี ญา บูวัจ กะ นีบีนี อีตู_ บือกะ ฌาดี นานะ นีบีนี นะ ญา เลอ. 10ดัฮ ญา อาเมด นีบีนี อาซิก_ มาแรฮ ฌาดี บีนี_ ฌางัน บรี ญา กูรัก โกะ ซือบารัก มากัด_ ฌางัน โกะ กาเยด บาฌู_ ฌางัน ลาฆู บือนีกัฮ ลากี บีนี_ ฌางัน บีนี นู ลามา. 11ดัฮ ญา เตด บูวัจ ลาฆู มานามา_ เดะ ตีฆา ฌือแนฮ อีนี_ ฌางัน ญา_ นีบีนี อีตู เตอ_ นะ ตีงัน ปี โปด บือเลฮ_ เตด ฆาโดฮ อาดา รือฆา ตือบุซ_ เตด ฆาโดฮ บายัยํ ดูเวะ.
ลาฆู ฮูโกบ ปรือกัด_ ปาซัน ลาฆู บูวัจ โตระๆ
12“ซาปา กาเตาะ ซือมียา ซืออูรัก บรี มาตี_ ซือมียา อีตู ฆาโดฮ กือนา กรัจ ฮูโกบ บรี มาตี ฌูฆา. 13ดัฮ ซาปา เตด ตือตู เดะ ฮาตี นะ บูนอฮ กาวัด_ ตาปี ญา มาตี ซาเบะ ตูฮัด ญา ปลือปัซ บรี มาตี ฌางัน ตางัน นะ ซือมียา อีตู_ กู นะ ตืองะ ตูโปะ ซา ตูโปะ_ บรี ซือมียา อีตู นะ ลารี ปี กะ ตือปัจ อีตู. 14ตาปี ดัฮ ซาปา ตือตู ฮาตี_ บูวัจ กือบลากัก_ บูนอฮ กาวัด รูมัฮ โปด_ กือนา รือฆัก ญา บรี ตรือเบะ เดะ ตือปัจ มือญือมัฮ นะ กู_ บีดา กรัจ ฮูโกบ บรี รอจ กะ ลาฆู มาตี.
15“ซาปา กาเตาะ เอด อาโปก นะ ญา_ ซือมียา อีตู นะ ฆาโดฮ กือนา กรัจ ฮูโกบ บรี มาตี.
16“ซาปา จูรี ซือมียา_ ปี ฌูวัน โปด บาฌิ_ เฆอ จะ อาดา ซือมียา ดาปัจ ซือมียา นู กือนา จูรี ปี_ ดูโดะ เดะ บาวัฮ ฮูโกบ นะ ซือมียา อีตู โปด บาฌิ_ ซือมียา นู จูรี อีตู_ นะ กือนา กรัจ ฮูโกบ รอจ กะ ลาฆู มาตี เลอ.
17“ซาปา ซูปัฮ อาโบยํ โกะ เอด อาโปก นะ ญา_ ซือมียา อีตู ฆาโดฮ กือนา กรัจ ฮูโกบ รอจ กะ ลาฆู มาตี.
18“ดัฮ อาดา โกะ กีลากี บือตือฆัฮ บือซามา_ โซะ ซือบือลัฮ อาเมด บาตู_ เฆอ จะ_ ตูโมะ_ ตาปี โซะ ซือบือลัฮ เตด รอจ กะ ลาฆู มาตี_ ซา ซาเกะ ตาปี ฆาโดฮ ตีโนะ เดะ รูมัฮ_ 19ดัฮ ซือมียา นู ซาเกะ อีตู ญา_ บีกัซ ปือฆัก ตูกัจ_ บือฌาลัด ตรือเบะ ปี บือเลฮ ปูลัก_ ซือมียา นู กาเตาะ อีตู โปด_ ลือปัซ เดะ ลาฆู กรัจ ฮูโกบ. ตาปี ญา นะ ฆาโดฮ บายัยํ รือฆา เตด ราซา กรือฌา_ ฌางัน รือฆา ปือบือลา ลียัก_ ฌู ตือดะ ซือมียา อีตู ลือฆา_ ซือนัง บาฌิ ปูลัก.
20“ดัฮ ซาปา กาเตาะ ปราโซฮ กีลากี นีบีนี นะ ญา_ ฌางัน กายู_ ฌู มาตี_ ซือมียา อีตู นะ ฆาโดฮ กือนา กรัจ ฮูโกบ. 21ดัฮ ปราโซฮ อีตู_ ญา อาดา ฮีโดะ ลาฆี_ ซืออารี ดูวา อารี_ บารู มาตี_ ตกเก โปด_ เตด ฆาโดฮ กือนา ลาฆู กรัจ ฮูโกบ_ ซาเบะ ปราโซฮ อีตู ฌาดี ซือรูปา บือกะ บารัก นะ ตกเก.
22“ดัฮ อาดา โกะ กีลากี บือกาเตาะ-กาเตาะ_ ปี กาเตาะ กือนา นีบีนี นู โปรจ บือซัยํ_ บูวัจ บรี กะ นีบีนี อีตู มืองูโฆยํ นานะ_ ตาปี โกะ นีบีนี ฌางัน นานะ อีตู เตด ซาเกะ นามา_ ฆาโดฮ ประ ซือมียา อีตู_ ตูโรจ กะ ลากี นะ นีบีนี อีตู นะ บลาโลก อาเมด เดะ ญา. ฆาโดฮ บายัยํ ตูโรจ กะ ซือมียา บือดะวา นะ กรัจ ฮูโกบ. 23ตาปี ดัฮ อาดา ลาฆู นู นะ บูวัจ บรี ซาเกะ_ กะฮามี โปด_ กือนา บือฮีมัจ กะฆีนี_ ฌาดี จะ_ ญาวา ฆาตี ญาวา 24มาตา ฆาตี มาตา_ ฆีฆี ฆาตี ฆีฆี_ ตางัน ฆาตี ตางัน_ กากี ฆาตี กากี 25บือกัซ ฮางอซ ฆาตี บือกัซ ฮางอซ_ ลียัก ฆาตี ลียัก_ บือกัซ บารัฮ ฆาตี บือกัซ บารัฮ.
26“ดัฮ ซาปา กาเตาะ_ กือนา บีฌี มาตา นะ ปราโซฮ_ กีลากี นีบีนี_ บูตา เตอ_ กูญา ฆาโดฮ ปลือปัซ ปราโซฮ อีตู_ ปี ลือปัซ_ กรานา มาตา นะ ญา เลอ. 27ดัฮ ซาปา บูวัจ บรี ฆีฆี นะ ปราโซฮ_ กีลากี นีบีนี_ ฆูรอก ปี เตอ_ กูญา ฆาโดฮ ปลือปัซ ปราโซฮ อีตู_ ปี ลือปัซ_ กรานา ฆีฆี นะ ญา.
ฮาดัจ ฮูโกบ ปาซัน ลาฆู ซาลัฮ กือนา นะ ตูฮัด ซือบารัก
28“ดัฮ ลือมู ตาโนะ ซือมียา_ กีลากี เฆอ จะ นีบีนี_ ฌู มาตี_ กือนา อาเมด บาตู_ ลีปัยํ ลือมู อีตู บรี มาตี. ฌางัน มากัด ลูลู นะ ญา เลอ. ตาปี ตูฮัด ลือมู อีตู_ เตด ฆาโดฮ กือนา ลาฆู กรัจ ฮูโกบ. 29ตาปี ดัฮ ลือมู อีตู_ ดือละ ตาโนะ ซือมียา ดัฮ_ อาดา ซือมียา มาแรฮ ปรีงัจ บรี กะ ตูฮัด นะ ญา ตาฮู_ ตาปี ญา เตด บือเลฮ กานัก ญา ตาโรฮ_ กะฆีเตอ ญา บือเลฮ ปี ตาโนะ กีลากี นีบีนี_ ฌู มาตี_ กือนา อาเมด บาตู ลีปัยํ ลือมู อีตู บรี มาตี_ กือนา กรัจ ฮูโกบ ตูฮัด นะ ญา_ บรี มาตี ฌูฆา. 30ดัฮ นะ บลาโลก อาเมด รือฆา ตือบุซ_ เดะ ซือมียา อีตู_ ญา ฆาโดฮ บายัยํ รือฆา ตือบุซ_ ฆาตี ญาวา นะ ญา_ ตูโรจ กะ ลาฆู นู บือเลฮ บลาโลก ดัฮ. 31ดัฮ ลือมู อีตู ตาโนะ นานะ กีลากี_ เฆอ จะ_ นานะ นีบีนี_ กือนา กรัจ ฮูโกบ_ ตูโรจ กะ ตือนอซ อีนี ฌูฆา. 32ดัฮ ลือมู อีตู_ ตาโนะ ปราโซฮ_ กีลากี นีบีนี_ นะ ซาปา_ ตูฮัด ลือมู ฆาโดฮ บรี ดูเวะ กะ ตกเก นะ ปราโซฮ อีตู_ ฌาดี รีเงะ ปีระ_ ตีฆา ราตุซ กรัม. กะฆีเตอ ฆาโดฮ อาเมด บาตู_ ลีปัยํ ลือมู อีตู บรี มาตี ฌูฆา.
33“ดัฮ ซือมียา ดีฮา_ บูกา ตลาฆา_ เฆอ จะ_ กาลี ตลาฆา_ ตาปี เตด ตูโดก_ บารู อาดา ลือมู_ เฆอ จะ_ กูดา บาซา ดือมิ_ ฆูโฆยํ ปี_ มาตี เดะ ตลาฆา อีตู_ 34ตูฮัด ตลาฆา ฆาโดฮ บายัยํ รือฆา_ ฆาตี บือนาตัก อีตู_ บรี กะ ตูฮัด บือนาตัก. บาดัด นะ บือนาตัก อีตู เตอ_ นะ ฌาดี นะ ตูฮัด ตลาฆา.
35“ดัฮ ลือมู นะ ซือมียา ดีฮา_ ตาโนะ ลือมู นะ ซือมียา อาซิก_ บรี มาตี_ กูญา ฆาโดฮ ฌูวัน ลือมู นู ฮีโดะ เตอ_ มาแรฮ ปือฮาฆิ. ลือมู นู มาตี โปด_ กือนา ปือฮาฆิ บรี ซามา บายา ฌูฆา. 36เฆอ จะ_ ดัฮ ตาฮู ดัฮ จะ_ ลือมู อีตู ดือละ ตาโนะ ดัฮ_ ตาปี ตูฮัด เตด บือเลฮ กานัก ตาโรฮ_ ตูฮัด ลือมู ฆาโดฮ บายัยํ_ ลือมู ซามา ลือมู. ลือมู นู มาตี เตอ โปด_ ฌาดี นะ ญา.
Currently Selected:
บราเกะ ลารี 21: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
