บราเกะ ลารี 20
20
ปือมือเลา ฮูโกบ ซือปูโลฮ ลาฆู
(ปือมือเลา ฮูโกบ 5.1-22)
1ตูฮัด ญา มือเลา ปือมือเลา ซือมูฮา กะฆีนี จะ 2“กู นี เลอ_ ฌาดี ตูฮัด บือซัยํ เดะ อาตัซ_ ตูฮัด นะ เกา_ นู บาวา เกา_ ตรือเบะ เดะ นังฆรี อียิบ_ ฌาดี จะ_ ตรือเบะ เดะ ลาฆู ฌาดี ปราโซฮ.
3“ฌางัน บรี อาดา ตูฮัด นู อาซิก ลือเบฮ เดะ กู เลอ.
4“ฌางัน บูวัจ บราลา บีดา ตะอาซิก_ นู ฌาดี ฆามัยํ บือนา บารัก มานามา_ นู อาดา เดะ ลาแงะ โซะ อาตัซ_ เฆอ จะ_ เดะ ดือนียา โซะ บาวัฮ_ เฆอ จะ_ เดะ อาเย โซะ บาวัฮ ดือนียา เลอ. 5ฌางัน ตือมะ มือญือมัฮ_ เฆอ จะ_ บือกรือฌา กะ บราลา อีตู_ กรานา กู_ นู ฌาดี ตูฮัด บือซัยํ เดะ อาตัซ_ ตูฮัด นะ เกา_ ฌาดี ตูฮัด นู ซายัก ตือลาลู_ นู กรัจ ฮูโกบ โกะ นานะ_ กรานา ลาฆู ซาลัฮ นะ โกะ อาโปก_ ปี ตือดะ รอจ กะ โกะ จูจู_ โกะ จีแจะ_ นะ ซือมียา นู บือชี กะ กู. 6ตาปี กู ปลีฮัจ ลาฆู ซายัก นู กือฌะ กือมัซ_ กะ ซือมียา นู ซายัก กู_ บูวัจ ตูโรจ กะ ฮาดัจ ฮูโกบ นะ กู_ ปี ตือดะ ฮาบิฮ บือแนฮ บักซา ซือมียา เลอ.
7“ฌางัน ซือโบจ ตรือเบะ ปือนามา นะ ตูฮัด บือซัยํ เดะ อาตัซ_ ตูฮัด นะ เกา_ เดะ ลาฆู เตด บือฆูนา_ กรานา ซือมียา นู ซือโบจ ปือนามา นะ ตูฮัด เดะ ลาฆู เตด บือฆูนา เตอ_ ตูฮัด บือซัยํ เดะ อาตัซ นะ กรัจ ฮูโกบ ซูโงฮ เลอ.
8“กือนา อีงัจ รอจ กะ อารี บราดู กรือฌา จะ_ ฌาดี อารี นู จรัฮ บาฌิ เลอ. 9กือนา บือกรือฌา ลาฆู ซือมูฮา นะ เกา_ เดะ ดาลับ นัม อารี อีตู เลอ. 10ตาปี เดะ อารี ตูโฌฮ_ ฌาดี อารี บราดู กรือฌา บรี กะ ตูฮัด บือซัยํ เดะ อาตัซ_ ตูฮัด นะ เกา. เดะ อารี อีตู_ ฌางัน บูวัจ ลาฆู บือกรือฌา นามา โปด_ เตด จะ_ อีซี เกา ตะอาซิก_ เฆอ จะ_ โกะ นานะ กีลากี นีบีนี นะ เกา_ เฆอ จะ_ โกะ ปราโซฮ กีลากี นีบีนี นะ เกา_ เฆอ จะ_ โกะ บือนาตัก ซูโรฮ_ ฌางัน โกะ ซือมียา นังฆรี อาซิก นู มือนูปัก ดูโดะ เดะ ตูโปะ นะ เกา ฌูฆา. 11ซาเบะ จะ_ เดะ ดาลับ นัม อารี เตอ_ ตูฮัด บือซัยํ เดะ อาตัซ_ ญา บือฌาดี ลาแงะ ฌางัน ดือนียา_ ลาโวจ_ ฌางัน บือนา ซือมูฮา นู อาดา เดะ ตือปัจ อีตู เลอ_ ตาปี เดะ อารี ตูโฌฮ_ ญา บราดู ดัฮ. ซาเบะ กะฆีเตอ_ ตูฮัด ญา บรี ซือลามัจ เดะ อารี บราดู กรือฌา_ ตืองะ ฌาดี อารี นู จรัฮ บาฌิ.
12“กือนา มือโอจ กะ เอด อาโปก นะ เกา_ บีดา อูมอยํ นะ เกา นะ ปาญัก_ อาดา ดูโดะ ลามาๆ เลอ_ เดะ ตือปัจ ตานัฮ_ นู ตูฮัด บือซัยํ เดะ อาตัซ_ ตูฮัด นะ เกา_ ญา ตืองัฮ บรี กะ เกา เลอ.
13“ฌางัน นะ บูนอฮ ซือมียา เลอ.
14“ฌางัน นะ บือกาเซฮ ลากี บีนี กาวัด เลอ.
15“ฌางัน นะ ปี มือญูรี บารัก นะ กาวัด เลอ.
16“ฌางัน นะ ฌาดี ซะซรี นู มืออูปัย_ ตูโดฮ กะ กาวัด รูมัฮ นะ เกา เลอ.
17“ฌางัน ฮาลูบา โกะ ซือบารัก เดะ รูมัฮ นะ กาวัด_ ฌางัน ฮาลูบา บีนี นะ กาวัด_ เฆอ จะ_ ปราโซฮ กีลากี นีบีนี นะ ญา_ เฆอ จะ_ ลือมู ฌางัน อานะ กูดา นะ ญา_ เฆอ จะ_ ซือบารัก มานามา นะ กาวัด รูมัฮ นะ เกา เลอ.”
18ตานา โกะ ซือมียา ซือมูฮา บือเลฮ ลีฮัจ กีลัจ_ บือเลฮ ดืองัยํ ฆูโตยํ_ บือเลฮ ดืองัยํ ซือวารา ซือลูนัย_ บือเลฮ ลีฮัจ อาซะ ตรือเบะ เดะ บูเกะ กะฆีเตอ ดัฮ_ กูญา ปาคัจ ตาโกจ_ ญาวา กือตัยํ_ บือดีรี ฌาโวฮ เลอ. 19กะฆีเตอ กูญา มือเลา กะ มูซา จะ_ “เกา เลอ_ กือนา มือเลา จรือตา กะ กามี_ กามี นะ ดืองัยํ_ ตาปี ฌางัน นะ บรี ตูฮัด มือเลา ฌางัน ลูมอฮ กามี_ ตาโกจ จะ_ กามี นะ ฆาโดฮ มาตี เลอ.”
20มูซา เตอ_ ญา มือเลา ฌางัน โกะ ลูมอฮ ซือมียา จะ_ “ฌางัน นะ ตาโกจ เลอ_ กรานา จะ_ ตูฮัด ญา ตูโรด มาแรฮ นะ ลกลีฮัจ ฮาตี นะ กาเญา_ บีดา ลูมอฮ กาเญา นะ บรีงัจ ตาโกจ เดะ ญา_ ฮอย เตด ปี บูวัจ ดูซา เลอ.” 21โกะ ลูมอฮ ซือมียา เตอ_ กูญา บือดีรี โวฮฌาโวฮ_ ตาปี มูซา มาโซะ ปี ดาปิก นู กือลับ ฮีตับ_ เดะ ตือปัจ นู ตูฮัด ญา ดูโดะ อีตู เตอ.
ปือมือเลา ฮูโกบ ปาซัน ตือปัจ มือนืองะ ซือบารัก_ มือญือมัฮ กะ ตูฮัด
22ตูฮัด บือซัยํ เดะ อาตัซ_ มือเลา ฌางัน มูซา จะ “กือนา มือญาเระ กะ บือแนฮ บักซา อิซราเอน กะฆีนี จะ ‘กาเญา บือเลฮ ลีฮัจ ดัฮ จะ_ กู มือเลา ฌางัน ลูมอฮ กาเญา ดาตัก เดะ ลาแงะ. 23กาเญา ฌางัน บูวัจ ฆามัยํ บราลา_ ฌางัน โกะ ปีระ_ ตาโรฮ บีดา มือญือมัฮ บือซามา ฌางัน กู_ เฆอ จะ_ บูวัจ ฆามัยํ บราลา ฌางัน มัซ_ บีดา ญาวา ตะอาซิก. 24กือนา อาเมด ตานัฮ_ บูวัจ ตือปัจ ตูนู บารัก มือญือมัฮ บีดา กู. เดะ อาตัซ ตือปัจ มือญือมัฮ อีตู_ กือนา อาเมด กาเมก_ ฌางัน ลือมู นะ เกา_ อาเกะ มือนืองะ บรี ฌาดี ซือบารัก ตูนู มือญือมัฮ ปือฮาบิฮ_ กือนา มือนืองะ ซือบารัก มือญือมัฮ นู บรี ซือนัง ซือลามัจ_ บีดา กู. เดะ ราตา ตูโปะ_ นู กู บรี อีงัจ รอจ กะ ปือนามา นะ กู_ กู นะ มาแรฮ ซารี เกา_ บรี ซือลามัจ กะ เกา. 25ตาปี_ ดัฮ นะ บูวัจ ตือปัจ มือญือมัฮ ฌางัน บาตู_ บีดา กู_ ฌางัน บูวัจ ฌางัน บาตู นู ปือตัด บาฌิ ดัฮ_ ซาเบะ ดัฮ เกา ซูโรฮ โกะ ซือบารัก ปือตัด บาตู อีตู_ เกา นะ บูวัจ บรี บาตู อีตู อาดา ลาฆู ซาลัฮ. 26ฌางัน นะ ญาแญะ ปี_ กะ ตือปัจ มือญือมัฮ นะ กู_ โซะ ฌาลัด ตางา_ บีดา ตีเมา บรี ลาฆู ญักตือลาญัก นะ เกา นะ บือฆารี บือเลฮ เดะ ตือปัจ อีตู.’ ”
Currently Selected:
บราเกะ ลารี 20: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
