บราเกะ ลารี 19
19
ลูมอฮ อิซราเอน มาโซะ รอจ กะ บูเกะ ซีนัย
1มาโซะ กะ บูลัด ตีฆา_ กีรา ตะเดะ นู ลูมอฮ อิซราเอน กูญา ตรือเบะ เดะ นังฆรี อียิบ เตอ_ กูญา มาแรฮ รอจ กะ ตือปัจ ตานัฮ ตูโฮยํ นู ลือฆา นะ ซีนัย. 2กาลา กูญา ตรือเบะ เดะ ตูโปะ เรฟีดิม_ มาแรฮ รอจ กะ ตือปัจ ตานัฮ ตูโฮยํ นู ลือฆา นะ ซีนัย_ ลูมอฮ กูญา โปด_ ตืองะ โกะ รูมัฮ กาฌัก กาเยด นะ กูญา_ เดะ ตือปัจ ตานัฮ ตูโฮยํ นู ลือฆา อีตู. โกะ ลูมอฮ อิซราเอน_ กูญา บราดู_ ตืองะ โกะ รูมัฮ กาฌัก_ ดูโดะ โซะ ฮือลด บูเกะ อีตู เลอ. 3กะฆีเตอ_ มูซา ญาแญะ ปี อาตัซ บูเกะ_ บือดาปัจ ฌางัน ตูฮัด. ตูฮัด บือซัยํ เดะ อาตัซ_ ญา บลาโลก ตะเดะ อาตัซ บูเกะ จะ_ “กือนา มือญาเระ กะ บักซา นะ ยาโกบ_ ฌาดี ลูมอฮ อิซราเอน_ กะฆีนี จะ_ 4‘ลูมอฮ กาเญา บือเลฮ ลีฮัจ ลาฆู บือกรือฌา_ นู กู บูวัจ ดัฮ_ กะ ลูมอฮ อียิบ เลอ_ ปาซัน นู กู อาเกะ ฌูโญก กาเญา_ บือกะ เดะ ซายะ บูโรก ราฌา วาลี เตอ_ บีดา นะ บาวา กาเญา มาแรฮ รอจ กะ กู เลอ. 5ซาเบะ กะฆีนี_ ดัฮ กาเญา นะ มือนีงัย กะ ซือวารา นะ กู_ อาดา ฌาฆา ปือมือเลา บือฌาญี บือตือตู นะ กู เตอ_ กาเญา นะ ฌาดี ปือซากา บรือฆา บาฌิ นะ กู_ นู กู ปีเลฮ ดัฮ_ เดะ ตืองัฮ โกะ ลูมอฮ บักซา ซือมูฮา. กรานา จะ_ ดือนียา อีนี ซือมูฮา ฌาดี นะ กู. 6ตาปี กาเญา นะ ฌาดี ลูมอฮ ซามี_ ฌาดี บักซา นู จรัฮ บาฌิ นะ กู.’ ปือมือเลา อีนี เตอ_ เกา ฆาโดฮ มือญาเระ บรี กะ ลูมอฮ อิซราเอน ดืองัยํ เลอ.”
7กะฆีเตอ มูซา_ ญา บลาโลก โกะ ลูมอฮ ซือมียา ซัยํบือซัยํ_ นะ ลูมอฮ ซือมียา_ จรือตา ลาฆู อีนี ซือมูฮา_ นู ตูฮัด บือซัยํ เดะ อาตัซ ซูโรฮ ญา_ บรี กะ กูญา ดืองัยํ. 8โกะ ลูมอฮ ซือมียา_ กูญา ตีกัฮ มารือมา จะ_ “ลาฆู ราตา ฌือแนฮ_ นู ตูฮัด บือซัยํ เดะ อาตัซ มือเลา เตอ_ กามี ซือมูฮา นะ บูวัจ ตูโรจ เลอ.”
กะฆีเตอ มูซา_ ญา บาวา ปือมือเลา นะ โกะ ลูมอฮ ซือมียา ปี มือญาเระ กะ ตูฮัด. 9กะฆีเตอ ตูฮัด บือซัยํ เดะ อาตัซ_ ญา มือเลา ฌางัน มูซา จะ_ “กู นี เลอ_ นะ มาแรฮ ซารี เกา_ ฌางัน กือมูวัง นู ตือบัน เตอ_ บีดา โกะ ซือมียา นะ บือเลฮ ดืองัยํ_ วะตู กู มือเลา ฌางัน เกา_ บรี กูญา นะ บือเลฮ ปือจายา กะ เกา ปี ซือรูโลยํ.”
โกะ ลูมอฮ ซือมียา บาโซฮ ญาวา บรี จรัฮ
ตานา มูซา ญา บาวา ปือมือเลา นะ โกะ ซือมียา_ มือญาเระ กะ ตูฮัด บือซัยํ เดะ อาตัซ 10ตูฮัด_ ญา มือเลา ฌางัน มูซา จะ_ “ปี มือญาเระ กะ โกะ ซือมียา_ บรี กูญา บาโซฮ ญาวา บรี จรัฮ บาฌิ_ เดะ อารี อีนี_ ฌางัน มัฮปาฆี. บรี กูญา บาโซฮ โกะ กาเยด บาฌู นะ กูญา_ บรี จรัฮ บาฌิ ฌูฆา. 11กือนา ซียะ ญาวา บรี จรัฮ บาฌิ_ เดะ อารี ตีฆา_ กรานา จะ_ เดะ อารี ตีฆา เตอ_ ตูฮัด บือซัยํ เดะ อาตัซ_ นะ ตูโรด มาแรฮ เดะ อาตัซ บูเกะ ซีนัย_ โซะ ฮือลด มูคา นะ โกะ ลูมอฮ ซือมียา ซือมูฮา. 12กือนา บูวัจ ตือกอซ_ บรี โกะ ลูมอฮ ซือมียา_ กือลีลิก บูเกะ_ ปือซัด กูญา กือมัซๆ จะ_ ‘กาเญา ซือมูฮา_ กือนา ฌาฆา ญาวา บรี บาฌิ_ ฌางัน ปี กะ อาตัซ บูเกะ เลอ_ เฆอ จะ_ ปือเตาะ กือนา บีดิก บูเกะ อีตู. ซาปา กือนา บูเกะ อีตู เตอ_ นะ ฆาโดฮ มาตี เลอ. 13ฌางัน บรี กะ ตางัน นะ กาเญา ปือเตาะ เดะ ซือมียา กะฆีเตอ_ ตาปี กือนา อาเมด บาตู ลีปัยํ กูญา เฆอ จะ_ ปานัฮ ฌางัน ปรูลู ปานัฮ บูวัก_ เตด จะ_ นะ ฌาดี บือนาตัก เฆอ จะ_ อูมัจ ซือมียา. ฌางัน นะ บรี กูญา ฮีโดะ.’ กาลา บูงี ซือลูนัย ปาญัก_ บรี กูญา มาแรฮ กะ บูเกะ เลอ.”
14มูซา เตอ_ ญา ตูโรด ดาตัก เดะ อาตัซ บูเกะ_ มาแรฮ บือดาปัจ ฌางัน โกะ ลูมอฮ ซือมียา_ บรี กูญา บาโซฮ โกะ ญาวา บรี จรัฮ บาฌิ. กูญา โปด_ บาโซฮ โกะ กาเยด บาฌู บรี จรัฮ ซามา. 15กะฆีเตอ ญา มือเลา ฌางัน โกะ ลูมอฮ ซือมียา จะ_ “กาเญา ซือมูฮา_ กือนา ซียะ ญาวา บรี บาฌิ_ เดะ อารี ตีฆา. ฌางัน นะ ญาแปะ นีบีนี เลอ.”
16ตานา รอจ กะ ปาฆี อารี นู ตีฆา_ อาดา กีลัจ ฌางัน ฆูโตยํ_ อาดา ฌางัน กือมูวัง ตือบัน ตูโดก บูเกะ อีตู_ ฌางัน ซือวารา ซือลูนัย นู บูริ โตระ_ ฌู โกะ ซือมียา นู ดูโดะ เดะ ตูโปะ รูมัฮ กาฌัก_ ปาคัจ ตือกือฌุจ ญาวา กือตัยํ. 17กะฆีเตอ มูซา_ ญา บาวา โกะ ซือมียา_ ตรือเบะ เดะ ตูโปะ รูมัฮ กาฌัก_ ปี บือดาปัจ ฌางัน ตูฮัด. ลูมอฮ กูญา เตอ_ มาแรฮ บือดีรี เดะ บีดิก บูเกะ เลอ. 18เดะ บูเกะ ซีนัย เตอ_ อาดา อาซะ ตูโดก ปือนอฮ ฮาบิฮ_ ซาเบะ ตูฮัด บือซัยํ เดะ อาตัซ_ ญา ตูโรด เดะ อาตัซ บูเกะ ฌางัน อาปี_ อาซะ ซือบุยํ_ ซือรูปา กะ อาซะ นู ตรือเบะ เดะ ตูกู บือซัยํ_ บูวัจ บรี บูเกะ อีตู บรีเงาะ ฮาบิฮ เลอ. 19ตานา ซือวารา ซือลูนัย ดรัซ บูงี บือซัยํ_ มูซา โปด_ ญา มือญาเระ กะ ตูฮัด_ กะฆีเตอ ตูฮัด ญา ตีกัฮ กะ ญา ฌางัน ซือวารา ฆูโตยํ เลอ. 20ตูฮัด บือซัยํ เดะ อาตัซ เตอ_ ญา ตูโรด มาแรฮ เดะ ฮูโฌก บูเกะ ซีนัย_ บลาโลก มูซา_ บรี ญา ญาแญะ กะ ฮูโฌก บูเกะ. มูซา โปด ญาแญะ ปี ดัฮ. 21ตูฮัด บือซัยํ เดะ อาตัซ_ ญา มือเลา ฌางัน มูซา จะ_ “เกา กือนา ตูโรด ปี_ ปือซัด กือมัซๆ กะ โกะ ซือมียา_ ตีเมา บรี กูญา นะ มาโซะ ตือลือปัซ รอจ กะ กู_ กรานา กูญา ซูกา นะ ลีฮัจ_ ตาโกจ จะ_ กูญา นะ ฌาฮานัม บาญะ อูรัก เลอ. 22มีเซ โกะ ซามี_ นู นะ มาโซะ ปี บือดาปัจ ฌางัน กู เตอ_ บรี กูญา บาโซฮ ญาวา บรี จรัฮ บาฌิ_ ตาโกจ จะ_ ตูฮัด บือซัยํ เดะ อาตัซ นะ กรัจ ฮูโกบ กูญา.”
23โซะ มูซา_ ญา มือญาเระ กะ ตูฮัด บือซัยํ เดะ อาตัซ จะ_ “โกะ ซือมียา นะ ญาแญะ กะ อาตัซ บูเกะ ซีนัย_ ฮอย เตด บือเลฮ_ ซาเบะ ตูฮัด ตะอาซิก บือเลฮ ปือซัด กะ ลูมอฮ กามี จะ_ ‘กือนา กือตัก กือลีลิก ตือกอซ บูเกะ อีตู_ บรี กะ บูเกะ นะ ฌาดี ตือปัจ จรัฮ บาฌิ เลอ.’ ” 24ตูฮัด บือซัยํ เดะ อาตัซ_ ญา มือเลา ฌางัน มูซา จะ_ “ตูโรด ปี ดัดๆ. วะตู เกา ปาเระ ญาแญะ กะ อาตัซ เตอ_ บาวา อาโรน มาแรฮ ฌูฆา_ ตาปี ฌางัน บรี โกะ ซามี เฆอ จะ โกะ ลูมอฮ ซือมียา มาแรฮ ตือลือปัซ ตือกอซ_ ฌู รอจ กะ ตูฮัด บือซัยํ เดะ อาตัซ_ ตาโกจ จะ_ ตูฮัด นะ กรัจ ฮูโกบ กูญา.” 25มูซา โปด_ ญา ตูโรด ปี มือญาเระ กะ โกะ ซือมียา บือกะฆีเตอ เลอ.
Currently Selected:
บราเกะ ลารี 19: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
