บราเกะ ลารี 18
18
ปือมือเลา ตูโญะ นะ เยโทร
(ปือมือเลา ฮูโกบ 1.9-18)
1เยโทร_ นู ฌาดี ซามี นะ ลูมอฮ มีเดียน_ ฌาดี ปะ มือตูฮา นะ มูซา_ ญา บือเลฮ ดืองัยํ ลาฆู บือกรือฌา แนฮฌือแนฮ_ นู ตูฮัด บือเลฮ บูวัจ บีดา มูซา_ ฌางัน อิซราเอน_ ลูมอฮ ซือมียา นะ ญา_ กาลา ตูฮัด บือซัยํ เดะ อาตัซ บาวา ลูมอฮ อิซราเอน ตรือเบะ เดะ นังฆรี อียิบ. 2โซะ เยโทร_ ปะ มือตูฮา นะ มูซา_ บือเลฮ ซาโมจ ซิบโปรา_ บีนี นะ มูซา_ ปาเระ มาแรฮ_ ลือปัซ เดะ นู มูซา อาตัจ ญา_ บาลิ ปาเระ ดัฮ_ 3มารือมา ฌางัน นานะ ดูวา บราดี นะ ญา. นู ซืออูรัก ปือนามา เกอโชม (ซาเบะ มูซา มือเลา จะ “กู ฌาดี ซือมียา บักซา อาซิก#18.3 เดะ บาซา ฮีบรู_ ปือมือเลา จะ “ซือมียา บักซา อาซิก” ตรือเบะ ซือวารา จะ “เกอ.” ลีฮัจ ซูรัจ บราเกะ ลารี 2.22._ นู มือนูปัก ดูโดะ เดะ นังฆรี นะ กาวัด เลอ.”) 4นู ซืออูรัก ปือนามา เอลีเอเซอ#18.4 เดะ บาซา ฮีบรู ปือมือเลา จะ “เอลี” ฌาดี จะ “ตูฮัด นะ กู”_ โซะ “เอเซอ” ฌาดี จะ “ตูโลก.” (ซาเบะ ญา มือเลา จะ “ตูฮัด นะ อาโปก เดะ กู_ ญา ตูโลก กู ดัฮ_ บรี กู ลือปัซ เดะ ปือดัก นะ ราฌา ฟาโร.”) 5เยโทร_ ปะ มือตูฮา นะ มูซา_ บาวา บีนี ฌางัน นานะ ดูวา บราดี อีตู_ มาแรฮ ซารี มูซา_ เดะ ตือปัจ ตานัฮ ตูโฮยํ นู ลือฆา_ เดะ ตือปัจ นู กูญา บือเลฮ ตืองะ โกะ รูมัฮ กาฌัก กาเยด_ โซะ บูเกะ นะ ตูฮัด. 6เยโทร ซูโรฮ ซือมียา ปี มือญาเระ กะ มูซา จะ “กู นี เลอ_ เยโทร_ ปะ มือตูฮา นะ เกา_ กู ตืองัฮ มาแรฮ ซารี เกา_ บาวา บีนี ฌางัน นานะ ดูวา บราดี นะ ญา มาแรฮ ซามา.” 7มูซา ญา ตรือเบะ ปี ฮามัจ ปะ มือตูฮา_ ตือมะ มือญือมัฮ ซาแมน จีโยบ ญา. กูญา ดูวา อูรัก_ ปาคัจ บือตาญา-ตาญา จะ_ ซือนัง บาฌิ เฆอ. กะฆีเตอ_ กูญา ปาคัจ มาโซะ กะ รูมัฮ กาฌัก กาเยด. 8มูซา จรือตา บรี กะ ปะ มือตูฮา ดืองัยํ ลาฆู ราตา ฌือแนฮ_ นู ตูฮัด บือซัยํ เดะ อาตัซ บือเลฮ บูวัจ กะ ราฌา ฟาโร ฌางัน ลูมอฮ อียิบ_ ซาเบะ ญา ลีฮัจ กะ ลูมอฮ อิซราเอน_ ปาซัน ลาฆู ซูซัฮ ปายัฮ ซือมูฮา_ นู บือฌาดี เดะ ลูมอฮ อิซราเอน เดะ ตืองัฮ ฌาลัด_ นู ตูฮัด บือเลฮ ตูโลก กูญา บรี ลือปัซ เดะ ลาฆู ฌาฮานัม กะฮามี. 9เยโทร โปด_ ซูกา ฮาตี นู บือเลฮ ดืองัยํ ลาฆู ตือจีฮัด ซือมูฮา_ นู ตูฮัด บือซัยํ เดะ อาตัซ บือเลฮ บูวัจ_ กะ ลูมอฮ อิซราเอน_ กาลา ตูฮัด ตูโลก กูญา บรี ลือปัซ เดะ ตางัน นะ ลูมอฮ อียิบ.
10เยโทร ญา มือเลา จะ “ซือลามัจ เลอ_ ตูฮัด บือซัยํ เดะ อาตัซ_ นู ตูโลก กาเญา บรี ลือปัซ เดะ ตางัน นะ ลูมอฮ อียิบ_ ฌางัน ตางัน นะ ราฌา ฟาโร. ญา ตูโลก โกะ ลูมอฮ ซือมียา บรี ลือปัซ เดะ ตางัน นะ ลูมอฮ อียิบ เลอ. 11วะตู อีนี กู ตาฮู ดัฮ จะ_ ตูฮัด บือซัยํ เดะ อาตัซ_ ญา บือซัยํ ลือเบฮ เดะ โกะ ตูฮัด ซือมูฮา_ ซาเบะ ญา บือเลฮ ตูโลก กูญา_ วะตู ลูมอฮ อียิบ ปรือกัด กูญา_ ฌางัน ฮาตี งันตืองัน.” 12เยโทร_ ปะ มือตูฮา นะ มูซา โปด_ บาวา ซือบารัก ตูนู มือญือมัฮ_ ฌางัน โกะ บือนาตัก อาเกะ มือญือมัฮ กะ ตูฮัด. โซะ อาโรน_ ฌางัน โกะ ซือมียา ซัยํบือซัยํ นะ ลูมอฮ อิซราเอน_ มาแรฮ มากัด บือรามัย ฌางัน ปะ มือตูฮา นะ มูซา_ โซะ ฮือลด มูคา นะ ตูฮัด.
ลาฆู ตืองะ ซือมียา บือดะวา กรัจ ฮูโกบ
(ปือมือเลา ฮูโกบ 1.9-18)
13จรัฮ ปาฆี_ มูซา ตรือเบะ ดูโดะ กรัจ ฮูโกบ_ บรี โกะ ลูมอฮ ซือมียา. ลูมอฮ กูญา บือดีรี กือลีลิก มูซา_ ตะเดะ ปาฆี_ ฌู รอจ กะ ปะฮือญา. 14กาลา ปะ มือตูฮา นะ มูซา ลีฮัจ ลาฆู บือกรือฌา นะ มูซา_ บีดา โกะ ลูมอฮ ซือมียา อีตู_ ญา มือเลา จะ “เกา บูวัจ ลาฆู กะฮามี เลอ_ ฌางัน โกะ ลูมอฮ ซือมียา? ซาเบะ นามา_ เกา ดูโดะ บือกรือฌา ซา เกา_ อาดา โกะ ลูมอฮ ซือมียา ซือมูฮา โปด_ บือดีรี กือลีลิก เกา_ ตะเดะ ปาฆี ฌู รอจ กะ ปะฮือญา?” 15มูซา ญา ตีกัฮ กะ ปะ มือตูฮา จะ “ซาเบะ โกะ ลูมอฮ ซือมียา มาแรฮ ซารี กู_ บีดา บรี กู ตาญา ตูฮัด. 16กาลา อาดา ลาฆู บือตือฆัฮ_ กูญา มาแรฮ ซารี กู_ กู โปด นะ กรัจ ฮูโกบ_ ลาฆู นะ ซือมียา ฌางัน กาวัด รูมัฮ_ อาฌัยํ กูญา บรี ตาฮู ฮาดัจ ฮูโกบ นะ ตูฮัด ฌางัน ปือมือเลา ฮูโกบ นะ ญา.” 17โซะ ปะ มือตูฮา นะ มูซา_ มือเลา กะ ญา จะ “เกา บูวัจ กะฆีนี เตด บาฌิ. 18เกา_ ฌางัน โกะ ลูมอฮ ซือมียา นู มาแรฮ ซารี เกา เตอ_ ฆามะ นะ ปือนัจ ฮาตี_ ซาเบะ ลาฆู บือกรือฌา อีนี_ ญา บรัจ โตระ_ ลือเบฮ เดะ อูรัจ นะ เกา. เกา เตด บียัซ นะ บูวัจ ซืออูรัก บือเลฮ. 19มือนีงัย กะ กู ซือตืองัฮ เลอ. กู นะ บรี ปือมือเลา อาฌัยํ กะ เกา. มีตา บรี ตูฮัด ดูโดะ บือซามา ฌางัน เกา. เกา กือนา ฌาดี ซือมียา ฆาตี โกะ ลูมอฮ ซือมียา โซะ ฮือลด มูคา นะ ตูฮัด_ บาวา ลาฆู บือดะวา ซือมูฮา_ มาแรฮ มือญาเระ กะ ตูฮัด_ 20อาฌัยํ กูญา บรี ตาฮู_ ลาฆู ฮาดัจ ฮูโกบ ฌางัน ปือมือเลา ฮูโกบ_ บรี กูญา กราลา ฌาลัด นู กูญา ฆาโดฮ ตูโรจ ปี เตอ_ ฌางัน ลาฆู มานามา นู กูญา ฆาโดฮ นะ บูวัจ เลอ. 21ลือเบฮ เดะ อีตู_ เกา กือนา ปีเลฮ ซือมียา นู ปานัย ซือตืองัฮ_ เดะ ลูมอฮ ซือมียา ซือมูฮา_ ฌาดี ซือมียา นู บรีงัจ ตาโกจ เดะ ตูฮัด_ นู ปือจายา ฮาตี บือเลฮ_ เตด ซูกา ลาฆู ปือซูวะ. กือนา อาเกะ ตืองะ ซือมียา กะฆีนี_ บรี ฌาดี กือปาลา ปือบือลา ซือมียา บือรีบู อูรัก ซือตืองัฮ_ ซือราตุซ อูรัก ซือตืองัฮ_ ลีมา ปูโลฮ อูรัก ซือตืองัฮ_ ซือปูโลฮ อูรัก ซือตืองัฮ. 22บรี กูญา กรัจ ฮูโกบ ลาฆู บือดะวา นะ โกะ ลูมอฮ ซือมียา_ ปี ซือรูโลยํ. โซะ ลาฆู บือดะวา นู ซัยํบือซัยํ โปด_ บรี กูญา มาแรฮ มือญาเระ กะ เกา_ ตาปี ลาฆู บือดะวา นู มิดือมิ_ บรี กูญา กรัจ ฮูโกบ ตะอาซิก_ บูวัจ บรี ลาฆู บือกรือฌา นะ เกา_ ญา รีฮัน. ลูมอฮ กูญา นะ ตูโลก ตาโงก บารัก บรัจ_ บือซามา ฌางัน เกา 23ดัฮ บูวัจ กะฆีนี_ ดัฮ ตูฮัด ญา ซูโรฮ เกา กะฆีเตอ ฌูฆา_ เกา นะ ตาฮัด บือเลฮ. โกะ ลูมอฮ ซือมียา ซือมูฮา อีนี โปด_ นะ ปี กะ ตือปัจ ดูโดะ นะ กูญา_ ฌางัน ลาฆู ซือนัง ซือลามัจ.”
24มูซา โปด_ ปือจายา กะ ปือมือเลา นะ ปะ มือตูฮา ญา_ บูวัจ ตูโรจ บือกะ นู ปะ มือตูฮา มือเลา ราตา ฌือแนฮ. 25มูซา ญา ปีเลฮ ซือมียา นู ปานัย ซือตืองัฮ_ ดาตัก เดะ ลูมอฮ อิซราเอน ซือมูฮา_ อาเกะ ตืองะ ฌาดี กือปาลา โกะ ลูมอฮ ซือมียา_ ฌาดี ซือมียา ปือบือลา ซือรีบู อูรัก ซือตืองัฮ_ ซือราตุซ อูรัก ซือตืองัฮ_ ลีมา ปูโลฮ อูรัก ซือตืองัฮ_ ซือปูโลฮ อูรัก ซือตืองัฮ. 26โกะ ซือมียา อีตู_ กรัจ ฮูโกบ ลาฆู บือดะวา นะ โกะ ลูมอฮ ซือมียา ปี ซือรูโลยํ_ ตาปี ลาฆู บือดะวา นู ยัฮปายัฮ_ กูญา บาวา ปี มือญาเระ กะ มูซา_ โซะ ลาฆู บือดะวา มิดือมิ_ กูญา กรัจ ฮูโกบ ตะอาซิก เลอ. 27มูซา อาตัจ ปะ มือตูฮา นะ ญา บาลิ ปี. ปะ มือตูฮา โปด_ บาลิ ปี กะ นังฆรี นะ ญา.
Currently Selected:
บราเกะ ลารี 18: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
