บราเกะ ลารี 26
26
รูมัฮ บราดู รือมัย_ นู มือญือมัฮ กะ ตูฮัด
(บราเกะ ลารี 36.8-38)
1“ลือเบฮ เดะ อีตู_ เกา กือนา บูวัจ รูมัฮ มือญือมัฮ_ ฌางัน กาเยด ดีนิง_ ซือปูโลฮ กรัจ_ บูวัจ ฌางัน กาเยด ลูลู ลือมัฮ นู บาฌิ ฌางัน_ กาเยด อาญัม_ จือลุ ซี ฮีเฌา_ ซี แนบปริง_ ซี มีรัฮ ฮีตับ_ อาดา ฌางัน รูปา ฆามัยํ เครูบ_ นู ตูกัก บูวัจ บรี ลีฮัจ ดัฮ. 2กาเยด ดีนิง ซือกรัจ_ บรี ปาญัก ดูวา ปูโลฮ ลาปัด (28) ตก_ ลือฆา ปัจ ตก. กาเยด ราตา กรัจ_ บรี ซามา บายา เลอ. 3กาเยด ดีนิง ลีมา กรัจ_ กือนา จาเกาะ บรี ลือกัจ ซือมูฮา_ นู ลีมา กรัจ อีตู โปด_ กือนา จาเกาะ บรี ลือกัจ ฌูฆา. 4กือนา บูวัจ ตลีงา กาเยด ดีนิง_ ฌางัน บือนัง ซี ฮีเฌา_ ปลือกัจ เดะ บีดิก กาเยด ดีนิง โซะ ลูวัยํ_ ซา ชุด. ชุด นู ดูวา_ บอฮ เดะ บีดิก กาเยด ดีนิง โซะ ลูวัยํ_ กือนา บอฮ ตลีงา กะฆีเตอ ฌูฆา. 5กาเยด ดีนิง ซือกรัจ_ กือนา บูวัจ ตลีงา ลีมา ปูโลฮ (50)_ ตลีงา. เดะ บีดิก กาเยด ดีนิง_ ชุด นู ดูวา_ กือนา บูวัจ ตลีงา ลีมา ปูโลฮ (50) ตลีงา_ บรี รือมัก เลอ. 6กือนา บูวัจ ปือญาเกาะ มัซ_ ลีมา ปูโลฮ (50) ปือญาเกาะ_ บีดา นะ จาเกาะ กาเยด ดีนิง ดูวา บือลัฮ_ บีดา บรี ฌาดี รูมัฮ กาเยด ซือกาลี.
7“กือนา บูวัจ ดีนิง ฌางัน บูลู แบะ_ บีดา ฌาดี กาฌัก ซรือโกะ รูมัฮ มือญือมัฮ ตูฮัด โซะ ลูวัยํ_ ซือบือลัซ กรัจ ลาฆี 8กาเยด ดีนิง ซือกรัจ_ บูวัจ บรี ปาญัก ตีฆา ปูโลฮ (30) ตก ลือฆา ปัจ ตก. ซือมูฮา ซือบือลัซ กรัจ_ บรี ซามา บายา เลอ. 9กาเยด ดีนิง ลีมา กรัจ_ กือนา จาเกาะ บรี ลือกัจ. โซะ อาซิก_ กาเยด ดีนิง นัม กรัจ ซือกาลี. กาเยด ดีนิง นู นัม อีตู เตอ_ กือนา ฆาโตก ซูโซด มาแรฮ_ โซะ ฮือลด มูคา นะ รูมัฮ กาฌัก. 10กือนา บูวัจ ตลีงา_ ลีมา ปูโลฮ (50) ตลีงา_ ลือกัจ ฌางัน บีดิก ดีนิง โซะ ลูวัยํ_ ซา ชุด_ ฌางัน ตลีงา ลีมา ปูโลฮ (50) ตลีงา_ ลือกัจ ฌางัน บีดิก ดีนิง โซะ ลูวัยํ_ มาโซะ ฌางัน ชุด นู ดูวา เลอ.
11“กะฆีเตอ_ เกา กือนา บูวัจ ปือญาเกาะ มัซ ซือวะซา_ ลีมา ปูโลฮ (50) ปือญาเกาะ_ จาเกาะ เดะ ตลีงา_ จาเกาะ บรี ลือกัจ_ ฌาดี รูมัฮ ซาเราะ กาฌัก ซา รูมัฮ. 12กาเยด ดีนิง นู ลือเบฮ_ ฌาดี จะ_ บีดิก กาเยด ดีนิง นู ลือเบฮ_ ซือตืองัฮ เตอ_ กือนา ปือบียัยํ บรี โตกฆาโตก มาแรฮ_ โซะ บลากัก รูมัฮ มือญือมัฮ. 13โซะ กาเยด ดีนิง ซรือโกะ รูมัฮ มือญือมัฮ ตูฮัด_ นู ปาญัก ซือบือลัฮ ซือตก เตอ_ ปือบียัยํ บรี โตกฆาโตก มาแรฮ_ โซะ บีดิก รูมัฮ มือญือมัฮ ตูฮัด_ เตด จะ_ โซะ บีดิก อีนี_ เฆอ จะ_ โซะ บีดิก อีตู_ บีดา นะ บรี ญา ลีนง. 14เกา กือนา บูวัจ กาเยด ตูโดก รูมัฮ กาเยด กาฌัก อีตู_ ฌางัน กูเละ กาเมก บาปา_ จือลุ ซี มีรัฮ_ ซา ลาปิฮ_ ซรือโกะ ฌางัน กูเละ นู บาฌิ#26.14 กูเละ นู บาฌิ ปือมือเลา ฮีบรู นะ ตูโญะ กะ กูเละ มาโลมา_ เฆอ จะ_ กูเละ ดูโยก_ บือเลฮ ฌูฆา. ปูลัก_ ซา ลาปิฮ เลอ.
ชะ กายู
15“กายู ชะ_ นู นะ บูวัจ ดีนิง รูมัฮ มือญือมัฮ เตอ_ กือนา ซูโรฮ กายู ปือตัย_ ตืองะ บรี รือมัก. 16กายู ชะ อีตู เตอ_ บรี ปาญัก_ ซือปูโลฮ ตก_ ลือฆา ซือตก ซา ฌือกัน. 17บรี อาดา ตาฌี เดะ ชะ_ ซือบือลัฮ ดูวา ตาฌี_ บีดา บรี ชะ อีนี นะ ปรือกะ_ ลือกัจ ชะ นู อีตู. กายู ชะ_ รูมัฮ มือญือมัฮ ซือมูฮา_ กือนา บูวัจ กะฆีนี เลอ. 18เกา กือนา บูวัจ กายู ชะ_ รูมัฮ มือญือมัฮ ตูฮัด กะฆีนี_ โซะ บารัจ ดายา_ กือนา บูวัจ ดูวา ปูโลฮ (20) กือปิก เลอ. 19กือนา บูวัจ ตือปัจ มือนาฮัด ฌางัน ปีระ_ ปัจ ปูโลฮ (40) มือนาฮัด_ บีดา กายู ชะ_ ดูวา ปูโลฮ (20) กือปิก. เดะ บาวัฮ กายู ชะ_ ซา กือปิก_ บรี อาดา ตือปัจ มือนาฮัด_ ฮามัจ ซา กือปิก. ดูวา ตือปัจ มือนาฮัด_ บีดา นะ ซรือโลบ ตาฌี_ ดูวา ตาฌี. 20โซะ ซือบือลัฮ นู ดูวา นะ รูมัฮ มือญือมัฮ_ โซะ ตารา เตอ_ กือนา บูวัจ กายู ชะ_ ดูวา ปูโลฮ (20) กือปิก. 21กือนา บูวัจ ตือปัจ มือนาฮัด_ ฌางัน ปีระ_ ปัจ ปูโลฮ (40) ตือปัจ มือนาฮัด_ เดะ บาวัฮ ชะ. กือนา บูวัจ ตือปัจ มือนาฮัด ดูวา_ บาวัฮ ชะ นู อีนี_ ดูวา บาวัฮ ชะ นู อีตู ปูลัก. 22โซะ บลากัก_ บาวัฮ มาตา อารี นะ รูมัฮ มือญือมัฮ ตูฮัด_ เกา กือนา บูวัจ ชะ นัม กือปิก. 23กือนา บูวัจ ตามัฮ_ ดูวา กือปิก_ บีดา ซีกู รูมัฮ มือญือมัฮ ตูฮัด_ โซะ บลากัก. 24กายู ชะ อีตู เตอ_ โซะ บาวัฮ บรี บือปือจัฮ_ ตาปี โซะ อาตัซ ฮูโฌก_ บรี ลือกัจ ซือกาลี_ ฌางัน มัซ บือลูบัก นู ลามูลา. บูวัจ กะฆีนี_ นะ บูวัจ บรี ฌาดี ซีกู_ ดูวา ซีกู. 25กะฆีเตอ นะ อาดา ชะ กายู_ ลาปัด กือปิก_ ฆือนะ ฌางัน ตือปัจ มือนาฮัด ปีระ_ ฮามัจ ตาฌี_ นัม บือลัซ (16) ตือปัจ มือนาฮัด. เดะ บาวัฮ ชะ ซาๆ กือปิก_ อาดา ตือปัจ มือนาฮัด ฮามัจ_ ดูวา ตือปัจ มือนาฮัด.
26“เกา กือนา บูวัจ ปืองาจิก_ ฌางัน กายู ปือตัย_ ลีมา บาตัก_ บีดา กายู ชะ ดีนิง นะ รูมัฮ มือญือมัฮ ตูฮัด_ โซะ ซือบือลัฮ 27ปืองาจิก ลีมา บาตัก ปูลัก_ บีดา ชะ กายู_ ชะ ดีนิง รูมัฮ มือญือมัฮ ตูฮัด_ โซะ ซือบือลัฮ. ปืองาจิก ลีมา บาตัก_ บีดา นะ ซือและ กายู ชะ รูมัฮ มือญือมัฮ ตูฮัด_ โซะ บลากัก_ ฌาดี จะ_ โซะ บาวัฮ มาตา อารี เลอ. 28ปืองาจิก เดะ ตืองัฮ_ ฌาดี จะ_ ดูโดะ เดะ ตืองัฮ นะ กายู ชะ_ บีดา ซือกัยํ ดีนิง_ จูโจะ บรี ลือกัจ ซือกาลี. 29กือนา บูกุซ กายู ชะ อีนี ซือมูฮา_ ฌางัน มัซ_ บูวัจ ตือปัจ บูลัจ บือลูบัก_ ฌางัน มัซ_ บีดา นะ กาจิก ปืองาจิก อีตู. โกะ บาตัก โปด_ กือนา บูกุซ ฌางัน มัซ ฌูฆา. 30รูมัฮ มือญือมัฮ กาฌัก กาเยด อีตู_ เกา กือนา บูวัจ_ ตูโรจ กะ จูตอ_ บือกะ นู กู บือเลฮ ปลีฮัจ กะ เกา ดัฮ_ เดะ โซะ อาตัซ บูเกะ.
ดีนิง กาเยด
31“กือนา บูวัจ กาเยด ดีนิง ซือกรัจ_ อาญัม ฌางัน บือนัง ซี ฮีเฌา_ ซี แนบปริง_ ซี มีรัฮ ฮีตับ_ ฌางัน กาเยด ลูลู ลือมัฮ นู บาฌิ. บรี อาดา ฆามัยํ เครูบ_ นู ตูกัก กายู บือเลฮ บูวัจ จูตอ ดัฮ. 32กาเยด ดีนิง เตอ_ กือนา ฆาโตก ฌางัน ปือญาเกาะ มัซ_ โซะ จาวัก กายู ปือตัย_ ปัจ จาวัก_ นู บูกุซ ฌางัน มัซ_ อาดา ตืองะ เดะ อาตัซ ตือปัจ มือนาฮัด ปีระ_ ปัจ บาตัก. 33กาเยด ดีนิง อีตู_ เกา กือนา ฆาโตก ฌางัน ปือญาเกาะ_ บีดา นะ จาเกาะ ดีนิง. กะฆีเตอ_ อาเมด ปือตี ปือมือเลา บือฌาญี บือตือตู นะ ตูฮัด_ มาโซะ มาแรฮ เดะ ดาลับ กาเยด ดีนิง. กาเยด ดีนิง อีตู_ นะ ฌาดี กาเยด กือตัก_ นะ ฌาดี ตือปัจ ปือฮาฆิ รูมัฮ มือญือมัฮ นะ ตูฮัด_ บรี อาดา ตือปัจ นู บาฌิ บือซรี_ ฌางัน ตือปัจ นู บาฌิ บือซรี โตระ. 34ตือปัจ ดูโดะ นู บรี ตือจีฮัด เตอ_ เกา กือนา ตืองะ ตาโรฮ_ เดะ อาตัซ ปือตี ปือมือเลา บือฌาญี บือตือตู นะ ตูฮัด_ เดะ ตือปัจ นู บาฌิ บือซรี โตระ. 35กือนา ตืองะ ปาปัด โตะ_ โซะ ลูวัยํ กาเยด ดีนิง. กือนา ตืองะ ตือปัจ ตืองะ แดด_ โซะ บารัจ ดายา นะ รูมัฮ มือญือมัฮ นะ ตูฮัด_ รือมัก ฌางัน ปาปัด โตะ อีตู. เกา กือนา ตืองะ ปาปัด โตะ ตาโรฮ โซะ ตารา.
36“เกา กือนา บูวัจ ดีนิง กาเยด_ ตือปัจ ลีนง โซะ ปีตู รูมัฮ กาฌัก อีตู_ ฌางัน บือนัง ซี ฮีเฌา_ ซี แนบปริง_ ซี มีรัฮ ฮีตับ_ ฌางัน กาเยด ลูลู ลือมัฮ นู บาฌิ_ นู ตูกัก นู ปานัย_ บือเลฮ อาญัม บรี บือฆาจะ_ ฌางัน บือนัง ซี. 37กือนา บูวัจ จาวัก ลีมา บาตัก_ ฌางัน กายู ปือตัย_ บีดา นะ ปลือกัจ กาเยด ลีนง เดะ ปีตู. กือนา บูกุซ จาวัก อีตู_ ฌางัน มัซ ปือลัย. กือนา บูวัจ ปือญาเกาะ นะ ญา ฌางัน มัซ_ ตือปัจ มือนาฮัด ฌางัน มัซ ซือวะซา_ ลีมา ตือปัจ มือนาฮัด_ บีดา นะ ฮามัจ จาวัก อีตู.
Currently Selected:
บราเกะ ลารี 26: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
