บราเกะ ลารี 27
27
ตือปัจ มือญือมัฮ
(บราเกะ ลารี 38.1-7)
1“เกา กือนา บูวัจ ตือปัจ มือญือมัฮ_ ฌางัน กายู ปือตัย_ บรี ปาญัก ลีมา ตก_ ลือฆา ลีมา ตก_ บรี ฌาดี ปัจ ซาฆี_ ตีงี ตีฆา ตก. 2กือนา บูวัจ ตือปัจ นู ซือรูปา ตาโนะ บือนาตัก_ ปลือกัจ ตาโรฮ_ ปัจ บือดาฮะ_ นะ ตือปัจ มือญือมัฮ_ บรี ฌาดี ซา ลูลู อีตู_ ฌางัน ตือปัจ มือญือมัฮ. กือนา บูกุซ ตือปัจ มือญือมัฮ อีตู_ ฌางัน มัซ ซือวะซา. 3เกา กือนา บูวัจ ปีโยะ_ บีดา บอฮ ฮาบู_ บูวัจ โกะ ซือโนะ_ โกะ ฌับ_ โกะ ปือญาเกาะ_ ฌางัน จาปัฮ ฮามัจ อาปี_ ฌาดี ซือบารัก ซูโรฮ บีดา ตือปัจ มือญือมัฮ. ซือมูฮา เกา กือนา บูวัจ ฌางัน มัซ ซือวะซา. 4กะฆีเตอ_ อาเมด มัซ ซือวะซา_ บูวัจ ปืออีริ_ บีดา ตือปัจ มือญือมัฮ อีตู_ บูวัจ ตือปัจ บูลัจ บือลูบัก_ ฌางัน มัซ ซือวะซา_ ปลือกัจ เดะ ปัจ บือดาฮะ นะ ปูกัจ. 5เกา กือนา บูวัจ ปืออีริ อีตู_ ดูโดะ เดะ บาวัฮ บีดิก_ กือลีลิก โซะ ตือปัจ มือญือมัฮ_ บรี ปาญัก ตูโรด มาแรฮ_ ฌู รอจ บือเลฮ ฆามะ ซามา ตืองัฮ นะ ตือปัจ มือญือมัฮ. 6เกา กือนา บูวัจ กายู ปืองานัยํ_ ตาโงก ตือปัจ มือญือมัฮ. กือนา บูวัจ ฌางัน กายู ปือตัย_ บูกุซ ฌางัน มัซ ซือวะซา. 7กายู ปืองานัยํ อีตู_ กือนา จูโจะ เดะ ตือปัจ บูลัจ_ เดะ วะตู ตาโงก กายู ปืองานัยํ_ นะ ดูโดะ บีดิก ตือปัจ มือญือมัฮ_ ซือบือลัฮ ซา. 8กือนา บูวัจ ตือปัจ มือญือมัฮ อีตู_ บูวัจ ฌางัน ปาปัด_ ตาปี โซะ ดาลับ ตือปัจ มือญือมัฮ_ บรี ฆรูเฮา_ ตูโรจ กะ จูตอ_ นู บือเลฮ ปลีฮัจ กะ เกา ดัฮ_ เดะ อาตัซ บูเกะ_ กือนา บูวัจ กะฆีเตอ.
ลามัน รูมัฮ มือญือมัฮ ตูฮัด
(บราเกะ ลารี 38.9-20)
9“เกา กือนา บูวัจ ลามัน รูมัฮ มือญือมัฮ ตูฮัด. บรี กะ ปาฆัยํ โซะ บารัจ ดายา_ อาดา กาเยด กือตัก_ บูวัจ ฌางัน กาเยด ลูลู ลือมัฮ นู บาฌิ_ ปาญัก ซือราตุซ (100) ตก. 10บรี อาดา จาวัก ดูวา ปูโลฮ (20) บาตัก_ ฌางัน ตือปัจ มือนาฮัด มัซ ซือวะซา_ ฮามัจ จาวัก ดูวา ปูโลฮ (20) บาตัก. ตาปี ปือญาเกาะ ลือกัจ จาวัก_ ฌางัน ตือปัจ บราดัด ตาฮัด จาวัก อีตู_ กือนา บูวัจ ฌางัน ปีระ. 11บือกะฆีเตอ ฌูฆา_ ซือบือลัฮ ตารา_ บรี อาดา กาเยด ดีนิง_ ปาญัก ซือราตุซ (100) ตก_ ซือรูปา_ ฌางัน จาวัก ดูวา ปูโลฮ (20) บาตัก_ ฌางัน ตือปัจ มือนาฮัด มัซ ซือวะซา_ ดูวา ปูโลฮ (20) ตือปัจ มือนาฮัด. ปือญาเกาะ_ ฌางัน ตือปัจ บราดัด ตาฮัด จาวัก เตอ_ กือนา บูวัจ ฌางัน ปีระ. 12โซะ นู ลือฆา นะ ลามัน_ โซะ บาวัฮ มาตา อารี_ บรี อาดา กาเยด ดีนิง ลีนง ปาญัก_ ลีมา ปูโลฮ (50) ตก_ ฌางัน จาวัก ซือปูโลฮ บาตัก_ ฌางัน ตือปัจ มือนาฮัด_ ฮามัจ จาวัก_ ซือปูโลฮ ตือปัจ มือนาฮัด. 13โซะ นู ลือฆา นะ ลามัน_ โซะ อาตัซ มาตา อารี_ บรี ปาญัก ลีมา ปูโลฮ (50) ตก. 14กาเยด ดีนิง โซะ บีดิก ปีตู ซือบือลัฮ_ บรี ปาญัก ลีมา บือลัซ (15) ตก_ อาดา จาวัก ตีฆา บาตัก_ ฌางัน ตือปัจ มือนาฮัด ฮามัจ จาวัก_ ตีฆา ตือปัจ มือนาฮัด. 15โซะ ซือบือลัฮ ปูลัก_ บรี อาดา กาเยด ดีนิง ลีนง_ ปาญัก ลีมา บือลัซ (15) ตก_ อาดา จาวัก ตีฆา บาตัก_ ฌางัน ตือปัจ มือนาฮัด ฮามัจ จาวัก_ ตีฆา ตือปัจ มือนาฮัด. 16บรี อาดา กาเยด ดีนิง ลีนง เดะ ปีตู_ ปาญัก ดูวา ปูโลฮ (20) ตก. กาเยด อีตู กือนา อาญัม ฌางัน บือนัง ซี ฮีเฌา_ ซี แนบปริง_ ซี มีรัฮ ฮีตับ_ ฌางัน กาเยด ลูลู ลือมัฮ นู บาฌิ_ นู อาดา ตูกัก นู ปานัย_ จือลุ ซี บรี บือฆาจะ. อาดา ฌางัน จาวัก ปัจ บาตัก_ ฌางัน ตือปัจ มือนาฮัด ฮามัจ จาวัก_ ปัจ ตือปัจ มือนาฮัด. 17จาวัก กือลีลิก ซือมูฮา_ บรี อาดา ตือปัจ บราดัด ตาฮัด จาวัก_ บรี ลือกัจ ซือกาลี_ บูวัจ ฌางัน ปีระ. กือนา บูวัจ ปือญาเกาะ ฌางัน ปีระ_ ตือปัจ มือนาฮัด ฮามัจ จาวัก อีตู_ บูวัจ ฌางัน มัซ ซือวะซา. 18โซะ นู ปาญัก นะ ลามัน เตอ_ นะ ฌาดี ซือราตุซ (100) ตก. โซะ นู ลือฆา_ ลีมา ปูโลฮ (50) ตก_ ตีงี ลีมา ตก_ กือตัก ฌางัน กาเยด ลูลู ลือมัฮ นู บาฌิ_ อาดา ตือปัจ มือนาฮัด มัซ ซือวะซา. 19โกะ ซือบารัก ซูโรฮ ซือมูฮา_ นะ รูมัฮ มือญือมัฮ_ ฆือนะ ฌางัน บาตู ปืออูโกยํ_ บีดา ปาฆัยํ นู กือตัก ลามัน ซือมูฮา_ กือนา บูวัจ ฌางัน มัซ ซือวะซา.
มีญะ บีดา ปลีตา
(เลวี 24.1-4)
20“เกา กือนา ปือซัด ลูมอฮ บักซา อิซราเอน_ บรี กูญา บาวา มีญะ กือดูโนด_ นู จรัฮ บาฌิ_ กือปิ ตาโรฮ ดัฮ_ บีดา บรี ลาฆู จรัฮ_ บีดา นะ บรี ปลีตา อีตู_ ซูโลฮ จรัฮ ซือรูโลยํ. 21เดะ รูมัฮ กาฌัก บือฌาญี บือดาปัจ_ โซะ ลูวัยํ ดีนิง_ นู อาดา โซะ ฮือลด ปือตี ปือมือเลา บือฌาญี บือตือตู_ บรี อาโรน ฌางัน โกะ นานะ นะ ญา_ ฮัจลีฮัจ ตือปัจ ตืองะ แดด อีตู_ ดูโดะ ซา โซะ ฮือลด มูคา นะ ตูฮัด บือซัยํ เดะ อาตัซ_ ตะเดะ วะตู กือลับ_ รอจ กะ ปาฆี. บรี ฌาดี ฮาดัจ ปี ซือลาลู_ นู ลูมอฮ บักซา อิซราเอน_ ฆาโดฮ บูวัจ ตูโรจ_ ฌู ตือดะ ฮาบิฮ บือแนฮ นะ กูญา เลอ.
Currently Selected:
บราเกะ ลารี 27: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
