บราเกะ ลารี 29
29
ลาฆู อาเกะ ตืองะ โกะ ซามี
(เลวี 8.1-36)
1“ตะเดะ อีนี_ ฌาดี ลาฆู นู เกา บือฆูนา นะ บูวัจ_ บีดา บาโซฮ ญาวา นะ กูญา บรี จรัฮ บาฌิ_ บีดา กูญา นะ ฌาดี ซามี_ บือกรือฌา กะ กู. ฌาดี จะ_ กือนา อาเมด ลือมู บาปา นู ตือฆัยํ อูรัจ_ ซา อีโกยํ_ กาเมก บาปา ดูวา อีโกยํ_ นู ฮอย ปะออย_ 2ตือโปก โรตี นู ฮอย ราฆี_ ตือโปก ฮอย ราฆี ฆาโวน ฌางัน มีญะ_ ตือโปก นู นีปิฮ ฮอย ราฆี_ ซาปัก มีญะ. โกะ ตือโปก ซีงี_ กือนา บูวัจ ฌางัน ฮูโฌก ตือโปก บรัซ ซาลี. 3กะฆีเตอ กือนา บอฮ โกะ ตือโปก อีนี ซือกาลี_ เดะ ดาลับ ซูเปะ_ กือนา บาวา มาแรฮ มารือมา ฌางัน ลือมู บาปา_ ฌางัน โกะ อานะ กาเมก บาปา_ ดูวา อีโกยํ. 4กือนา บาวา อาโรน_ ฌางัน โกะ นานะ กีลากี นะ ญา_ ปี เดะ ปีตู รูมัฮ กาฌัก บือฌาญี บือดาปัจ. กะฆีเตอ_ กือนา บาโซฮ ญาวา นะ กูญา_ ฌางัน อาเย. 5กือนา ปากัย บาฌู อาดา มือกรา นะ ซามี_ บรี กะ อาโรน_ ฌาดี โกะ บาฌู ปาญัก ตูโดก กากี_ ฌางัน บาฌู ซรือโกะ นะ เอโฟด_ ฌางัน เอโฟด_ ตือปัจ ตาฮัด ตาฮะ ดาดา. อาเมด กาเยด นู บูวัจ ตาลี ปีงัก_ นู อาดา ตูกัก นู ปานัย อาญัม_ บูวัจ บีดา ซูโรฮ ฌางัน เอโฟด อีตู_ อีกัจ เดะ ปีงัก ตาโรฮ. 6กือนา บอฮ กาเยด ซีปัย เดะ ปาลา นะ อาโรน_ กะฆีเตอ กือนา บอฮ กือจูบุก นู จรัฮ บาฌิ_ อาตัซ กาเยด ซีปัย ปาลา. 7กือนา อาเมด มีญะ ลือมัยํ_ อูแร เดะ อาตัซ ปาลา นะ ญา_ ลือมัยํ อาเกะ ตืองะ ญา เลอ. 8กือนา บาวา โกะ นานะ กีลากี นะ ญา มาแรฮ_ บือปากัย กาเยด บาฌู ปาญัก ตูโดก กากี บรี. 9กะฆีเตอ_ กือนา อาเมด ตาลี ปีงัก_ อีกัจ เดะ ปีงัก นะ กูญา_ เตด จะ อาโรน_ เฆอ จะ_ โกะ นานะ นะ ญา. กือนา อีกัจ โมะ_ บรี กะ กูญา. กะฆีเตอ_ กูญา โปด_ นะ ฌาดี ซามี_ ตูโรจ กะ ฮาดัจ ฮูโกบ ปี ซือลาลู. กะฆีนี เลอ_ เกา กือนา อาเกะ ตืองะ อาโรน_ ฌางัน โกะ นานะ นะ ญา.
10“เกา กือนา บาวา ลือมู บาปา_ มาแรฮ กะ โซะ ฮือลด รูมัฮ ซาเราะ บือฌาญี บือดาปัจ. บรี อาโรน ฌางัน โกะ นานะ นะ ญา_ อาเมด ตางัน ตืองะ เดะ อาตัซ ปาลา ลือมู บาปา. 11กะฆีเตอ_ กือนา บูนอฮ ลือมู บาปา อีตู_ โซะ ฮือลด มูคา นะ ตูฮัด บือซัยํ เดะ อาตัซ_ เดะ ปีตู รูมัฮ ซาเราะ บือฌาญี บือดาปัจ. 12กือนา อาเมด ฌารี_ จือลุ ดารัฮ ลือมู บาปา อีตู_ ซาปัก เดะ ตือปัจ นู ซือรูปา ตาโนะ_ เดะ ซีกู ตือปัจ มือญือมัฮ. โซะ ดารัฮ นู ลือเบฮ_ กือนา อูแร_ เดะ บีดิก ตือปัจ มือญือมัฮ. 13เกา กือนา อาเมด ลือมะ_ นู บูกุซ โกะ กือลือกะ ดาลับ_ เดะ กรือมู นู ลือกัจ ฌางัน ฮาตี_ ฌางัน รีรัย ดูวา บือลัฮ_ ฌางัน ลือมะ_ นู ลือกัจ เดะ รีรัย อีตู_ มาแรฮ ตูนู อาตัซ ตือปัจ มือญือมัฮ. 14ตาปี ลูลู_ ฌางัน กูเละ ลูลู_ ฌางัน ตาฮี นะ ลือมู อีตู_ กือนา ตูนู เดะ อาปี โซะ ลูวัยํ นังฆรี. นี เลอ_ ฌาดี ลาฆู ตูนู มือญือมัฮ_ ตือบุซ ดูซา.
15“เกา กือนา บาวา กาเมก บาปา_ ซา อีโกยํ_ มาแรฮ_ บรี กะ อาโรน ฌางัน นานะ นะ ญา_ อาเมด ตางัน ตืองะ เดะ อาตัซ ปาลา กาเมก บาปา อีตู. 16กะฆีเตอ_ กือนา บูนอฮ กาเมก อีตู_ อาเมด ดารัฮ_ ปรือจิ กือลีลิก เดะ ตือปัจ มือญือมัฮ. 17กือนา ซายัจ กาเมก อีตู_ บรี ฌาดี ซือกูตกๆ. โกะ กือลือกะ ดาลับ_ ฌางัน กากี_ กือนา บาโซฮ ฌางัน อาเย_ ตืองะ ฌางัน ลูลู_ ฌางัน ปาลา เลอ. 18กะฆีเตอ กือนา ตูนู กาเมก บาปา อีตู ฮาบิฮ ซืออีโกยํ_ เดะ อาตัซ ตือปัจ มือญือมัฮ_ ฌาดี ซือบารัก ตูนู มือญือมัฮ_ กะ ตูฮัด บือซัยํ เดะ อาตัซ_ บรี ฌาดี ซือบารัก บือบาวู_ นู ตูฮัด ญา ซูกา_ ฌาดี ซือบารัก มือญือมัฮ ฌางัน อาปี_ กะ ตูฮัด บือซัยํ เดะ อาตัซ เลอ.
19“เกา กือนา บาวา กาเมก บาปา_ นู ซา อีโกยํ ปูลัก_ มาแรฮ บรี กะ อาโรน ฌางัน นานะ นะ ญา_ อาเมด ตางัน ตืองะ เดะ อาตัซ ปาลา กาเมก บาปา อีตู. 20กะฆีเตอ_ เกา กือนา บูนอฮ กาเมก อีตู_ อาเมด ดารัฮ ซือตืองัฮ_ ลือมัยํ เดะ ฮูโฌก ตลีงา โซะ กานัน นะ อาโรน_ ฌางัน ฮูโฌก ตลีงา กานัน_ นะ โกะ นานะ นะ ญา_ ราตา อูรัก_ ฌางัน โซะ ฌารี บือซัยํ_ โซะ กานัน_ ฌางัน โซะ ฌารี บือซัยํ นะ กากี กานัน นะ กูญา ฌูฆา. กือนา อาเมด ดารัฮ นู ลือเบฮ_ ปรือจิ กือลีลิก ตือปัจ มือญือมัฮ. 21กือนา อาเมด ดารัฮ ซือตืองัฮ_ นู อาดา เดะ อาตัซ ตือปัจ มือญือมัฮ_ ฌางัน มีญะ ลือมัยํ อีตู_ ปรือจิ อาโรน ฌางัน โกะ ซือบารัก ปากัย มือกรา นะ ญา. กือนา ปรือจิ โกะ นานะ กีลากี นะ ญา_ กือนา ปรือจิ ซือบารัก ปากัย มือกรา_ นะ โกะ นานะ อีตู ฌูฆา. อาโรน ฌางัน โกะ ซือบารัก ปากัย มือกรา นะ ญา_ นะ จรัฮ บาฌิ_ ฆือนะ ฌางัน โกะ ซือบารัก ปากัย มือกรา_ นะ โกะ นานะ นะ ญา ฌูฆา.
22“เกา กือนา อาเมด ลือมะ กาเมก บาปา_ ฌางัน อีโกยํ นู ลือมะ บือซัยํ_ ฌางัน ลือมะ นู ลือกัจ ฌางัน กือลือกะ ดาลับ_ อาดา กรือมู นู ลือกัจ ฌางัน ฮาตี_ ฌางัน รีรัย ดูวา บือลัฮ_ อาดา ลือมะ นู ลือกัจ ฌางัน รีรัย_ ฌางัน ปาฮา โซะ กานัน ฌูฆา_ ซาเบะ ฌาดี กาเมก ซูโรฮ บีดา ลาฆู อาเกะ ตืองะ. 23กือนา อาเมด ฌูฆา ตือโปก โรตี ซา กือโตน_ ฌางัน ตือโปก โรตี ฆาโวน มีญะ_ ซา กือปิก_ ฌางัน ตือโปก โรตี นีปิฮ ซา กือปิก_ ดาตัก เดะ ซูเปะ ตือโปก โรตี นู ฮอย ราฆี_ นู อาดา โซะ ฮือลด มูคา นะ ตูฮัด บือซัยํ เดะ อาตัซ. 24กะฆีเตอ_ กือนา ตืองะ โกะ ซือบารัก อีตู_ เดะ ตางัน ดูวา บือลัฮ นะ อาโรน_ ฌางัน โกะ นานะ นะ ญา_ บาวา บือปี บูวัจ ลาฆู อาเกะ มือญือมัฮ_ บรี ฌาดี ซือบารัก อาเกะ มือญือมัฮ กะ ตูฮัด บือซัยํ เดะ อาตัซ. 25กือนา ซาโมจ โกะ ซือบารัก อีนี_ เดะ ตางัน นะ กูญา_ บาวา บือปี ตูนู_ เดะ อาตัซ ตือปัจ มือญือมัฮ_ บือซามา ฌางัน โกะ ซือบารัก ตูนู มือญือมัฮ_ ฌาดี ซือบารัก บือบาวู นู ตูฮัด ซูกา_ ฌาดี ซือบารัก มือญือมัฮ ฌางัน อาปี_ กะ ตูฮัด บือซัยํ เดะ อาตัซ เลอ.
26“กือนา บาวา ลูลู โซะ ตาฮะ ดาดา นะ กาเมก บาปา_ นู ฌาดี กาเมก บีดา อาเกะ ตืองะ อาโรน. กะฆีเตอ_ บูวัจ ลาฆู อาเกะ มือญือมัฮ_ ฌาดี ซือบารัก อาเกะ มือญือมัฮ กะ ตูฮัด บือซัยํ เดะ อาตัซ เลอ_ นะ ฌาดี บาฮาเฆด นะ เกา. 27กือนา บือปือจัฮ ลูลู เดะ ตาฮะ ดาดา_ นะ กาเมก บาปา_ นู ฌาดี ซือบารัก อาเกะ มือญือมัฮ อีตู_ ตาโรฮ โซะ ลูลู ปาฮา_ นะ บาฮาเฆด ลูมอฮ ซามี_ ฌาดี ซือบารัก อาเกะ มือญือมัฮ_ นู ฌาดี ซือบารัก ดาตัก เดะ กาเมก บาปา_ ซูโรฮ บีดา ฌาดี ซือบารัก อาเกะ ตืองะ_ นู ฌาดี บาฮาเฆด นะ อาโรน ฌางัน โกะ นานะ นะ ญา. 28บือนา อีนี_ ฌาดี บาฮาเฆด นู อาโรน_ ฌางัน โกะ นานะ นะ ญา_ นู กูญา นะ บือเลฮ ซาโมจ ดาตัก เดะ ลูมอฮ บักซา อิซราเอน_ ปี ซือลาลู. ซาเบะ ฌาดี บาฮาเฆด นู อาเกะ บรี กะ โกะ ซามี_ ดาตัก เดะ ลูมอฮ บักซา อิซราเอน_ ดาตัก เดะ ซือบารัก มือญือมัฮ บรี ซือนัง ซือลามัจ_ ฌาดี ซือบารัก มือญือมัฮ นะ กูญา_ นู มือญือมัฮ กะ ตูฮัด บือซัยํ เดะ อาตัซ.
29“บาฌู มือกรา นู จรัฮ บาฌิ นะ อาโรน_ นะ ฌาดี บรี กะ บือแนฮ นะ ญา_ ซือมาญัก รอจ. บรี กูญา ปากัย กาลา ซาโมจ ลาฆู ลือมัยํ_ ซาโมจ ลาฆู อาเกะ ตืองะ เลอ. 30กือนา บรี นานะ_ นู นะ ฌาดี ซามี ฆาตี อาโรน เตอ_ บือปากัย บาฌู อาดา มือกรา อีตู_ ฆือนะ ตูโฌฮ อารี_ วะตู ญา มาแรฮ กะ รูมัฮ ซาเราะ บือฌาญี บือดาปัจ_ บีดา นะ บือกรือฌา เดะ รูมัฮ นู บาฌิ บือซรี.
31“กือนา รือบุซ ลูลู_ กาเมก บาปา บีดา อาเกะ ตืองะ_ เดะ ตือปัจ นู จรัฮ บาฌิ. 32กะฆีเตอ_ บรี อาโรน ฌางัน โกะ นานะ นะ ญา_ มากัด ลูลู กาเมก บาปา อีตู_ ฌางัน ตือโปก โรตี_ เดะ ดาลับ ซูเปะ_ โซะ ปีตู รูมัฮ กาฌัก บือฌาญี บือดาปัจ. 33บรี กูญา มากัด โกะ ซือบารัก อีตู_ นู บาวา มาแรฮ มือญือมัฮ บาโซฮ ซาลัฮ_ บีดา นะ อาเกะ ตืองะ_ บาโซฮ กูญา อีตู บรี จรัฮ บาฌิ. ตาปี โกะ ลูมอฮ ซือมียา ซิกอาซิก_ ฌางัน บรี กูญา มากัด_ ซาเบะ ฌาดี ซือบารัก จรัฮ บาฌิ. 34ดัฮ ลูลู_ นู บูวัจ เดะ ลาฆู อาเกะ ตืองะ ซามี_ ฌางัน ตือโปก โรตี อีตู_ อาดา ลือเบฮ_ ฌู รอจ กะ ปาฆี ซือตืองัฮ โปด_ กือนา ตูนู ซือบารัก นู ลือเบฮ_ เดะ อาปี เลอ. ฌางัน บรี ซาปา มากัด_ ซาเบะ ฌาดี ซือบารัก นู จรัฮ บาฌิ เลอ.
35“กะฆีเตอ_ เกา กือนา บูวัจ บรี กะ อาโรน_ ฌางัน โกะ นานะ นะ ญา_ ตูโรจ กะ ปือมือเลา นู กู บือเลฮ ปือซัด เกา ดัฮ. กือนา บูวัจ ลาฆู อาเกะ ตืองะ กูญา_ บรี ฆือนะ ตูโฌฮ อารี. 36กือนา บาวา ลือมู บาปา_ มาแรฮ มือญือมัฮ_ บีลัก อารี_ ฌาดี ซือบารัก มือญือมัฮ บาโซฮ ดูซา_ บีดา บูวัจ ลาฆู บาโซฮ ดูซา. กือนา อาเกะ ซือบารัก มือญือมัฮ บาโซฮ ซาลัฮ นะ ตือปัจ มือญือมัฮ อีตู_ กือนา ลือมัยํ มีญะ เดะ ตือปัจ มือญือมัฮ อีตู_ บีดา นะ บาโซฮ บรี จรัฮ บาฌิ. 37กือนา บูวัจ ลาฆู บาโซฮ ซาลัฮ_ เดะ ตือปัจ มือญือมัฮ อีตู_ ฆือนะ ตูโฌฮ อารี_ บาโซฮ ตือปัจ มือญือมัฮ อีตู_ บรี จรัฮ บาฌิ. กะฆีเตอ_ ตือปัจ มือญือมัฮ อีตู_ นะ จรัฮ บาฌิ โตระ. โกะ ซือบารัก มานามา นู กือนา ตือปัจ มือญือมัฮ อีตู โปด_ นะ จรัฮ บาฌิ ฌูฆา.
ลาฆู อาเกะ มือญือมัฮ บีลัก อารี
(กีรา 28.1-8)
38“ตะเดะ อีนี_ ฌาดี ซือบารัก นู เกา ฆาโดฮ อาเกะ มือญือมัฮ_ เดะ อาตัซ ตือปัจ มือญือมัฮ อีตู_ บีลัก อารี ปี ซือรูโลยํ. อาดา อานะ กาเมก_ ดูวา อีโกยํ_ อูมอยํ ซา ตาโฮด. 39กือนา บาวา อานะ กาเมก ซา อีโกยํ มาแรฮ_ มือญือมัฮ วะตู จรัฮ ปาฆี. บาวา นู ซา อีโกยํ ปูลัก_ มาแรฮ มือญือมัฮ วะตู ปะฮือญา. 40มารือมา ฌางัน อานะ กาเมก นู ลามูลา อีตู_ กือนา อาเกะ มือญือมัฮ ฮูโฌก ตือโปก_ ซา กีโล_ ฆาโวน ฌางัน มีญะ นู กือปิ อีตู เตอ_ ซา ลิด_ ฌางัน อาระ อางุน_ ซา ลิด_ ฌาดี ซือบารัก โอะ มือญือมัฮ เลอ. 41กือนา อาเกะ มือญือมัฮ อานะ กาเมก_ นู ซา อีโกยํ อีตู ปูลัก_ เดะ วะตู ปะฮือญา_ อาเกะ ฆือนะ ฌางัน ซือบารัก มือญือมัฮ ตือโปก_ ฌางัน ซือบารัก โอะ มือญือมัฮ ฌูฆา_ ซือรูปา บือกะ วะตู ปาฆี_ บรี ฌาดี ซือบารัก บือบาวู นู ตูฮัด ซูกา_ ฌาดี ซือบารัก มือญือมัฮ โกะ ซือบารัก มากัด_ บรี กะ ตูฮัด บือซัยํ เดะ อาตัซ. 42อีนี เลอ_ นะ ฌาดี ซือบารัก ตูนู มือญือมัฮ ปี ซือลาลู_ ฌู ตือดะ ฮาบิฮ บือแนฮ บักซา นะ เกา_ เดะ ปีตู รูมัฮ กาฌัก บือฌาญี บือดาปัจ_ โซะ ฮือลด มูคา นะ ตูฮัด บือซัยํ เดะ อาตัซ_ เดะ ตือปัจ นู กู นะ บือดาปัจ ฌางัน กาเญา_ นะ มือเลา ฌางัน เกา เดะ ตือปัจ อีตู. 43เดะ ตือปัจ อีตู เลอ_ กู นะ ดาปัจ ลูมอฮ บักซา อิซราเอน_ รูมัฮ มือญือมัฮ อีตู นะ บือเลฮ ซาโมจ ลาฆู บาโซฮ บรี จรัฮ บาฌิ ฌูฆา_ ฌางัน ลาฆู บือซรี บือซายา นะ กู. 44กู นะ บาโซฮ รูมัฮ ซาเราะ บือฌาญี บือดาปัจ_ ฌางัน ตือปัจ มือญือมัฮ_ บรี ฌาดี ตือปัจ นู จรัฮ บาฌิ. กู นะ บาโซฮ อาโรน_ ฌางัน โกะ นานะ นะ ญา_ บรี จรัฮ บาฌิ ฌูฆา_ บีดา บรี ฌาดี ซามี บือกรือฌา กะ กู. 45กู นะ ดูโดะ เดะ ซามา ตืองัฮ ลูมอฮ บักซา อิซราเอน_ นะ ฌาดี ตูฮัด นะ กูญา 46กูญา นะ ตาฮู จะ_ กู ฌาดี ตูฮัด บือซัยํ เดะ อาตัซ_ ตูฮัด นะ กูญา_ นู บาวา กูญา ตรือเบะ เดะ นังฆรี อียิบ_ บีดา กู นะ ดูโดะ เดะ ซามา ตืองัฮ กูญา. กู นี เลอ_ ฌาดี ตูฮัด บือซัยํ เดะ อาตัซ_ ตูฮัด นะ กูญา.”
Currently Selected:
บราเกะ ลารี 29: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
