บราเกะ ลารี 30
30
ตือปัจ มือญือมัฮ ตูนู ซือบารัก บือบาวู
(บราเกะ ลารี 37.25-28)
1“เกา กือนา บูวัจ ตือปัจ มือญือมัฮ_ ตูนู กือมียัน นู บือบาวู. กือนา บูวัจ ฌางัน กายู ปือตัย. 2บรี ญา ปาญัก ซือตก_ ลือฆา ซือตก_ ฌาดี ปัจ ซาฆี_ ตีงี ดูวา ตก. ตือปัจ นู ซือรูปา ตาโนะ บือนาตัก_ โซะ ซีกู ตือปัจ มือญือมัฮ เตอ_ บรี ฌาดี ลูลู ซา อีตู ฌางัน กายู ตือปัจ มือญือมัฮ. 3กือนา บูกุซ ตือปัจ มือญือมัฮ อีตู_ ฌางัน มัซ นู จรัฮ บาฌิ_ เตด จะ_ โซะ อาตัซ_ เฆอ จะ_ โซะ บีดิก ซือมูฮา_ โซะ ตือปัจ นู ซือรูปา ตาโนะ ฌูฆา. กือนา บูวัจ ชะ มัซ จูแตก_ กือลีลิก ตือปัจ มือญือมัฮ. 4กือนา บูวัจ มัซ บูลัจ บือลูบัก_ ตาแปะ ตาโรฮ บาวัฮ ฆามัยํ จูแตก_ ซือบือลัฮ ซา_ รือมัก โซะ นู ซือบือลัฮ. มัซ บูลัจ บือลูบัก อีตู_ บีดา นะ จูโจะ ปืองานัยํ ตาโงก. 5กายู ปืองานัยํ อีตู เตอ_ กือนา บูวัจ ฌางัน กายู ปือตัย_ บูกุซ ฌางัน มัซ. 6กือนา ตืองะ ตือปัจ มือญือมัฮ อีตู_ โซะ ลูวัยํ ดีนิง กาเยด_ นู อาดา ดาปิก ปือตี ปือมือเลา บือฌาญี บือตือตู นะ ตูฮัด_ โซะ ฮือลด ตือปัจ ดูโดะ นู บรี ตือจีฮัด_ นู อาดา ดูโดะ โซะ อาตัซ ปือตี ปือมือเลา บือฌาญี บือตือตู_ เดะ ตือปัจ นู กู นะ บือดาปัจ ฌางัน เกา. 7กือนา บรี กะ อาโรน ตูนู กือมียัน_ เดะ อาตัซ ตือปัจ มือญือมัฮ อีตู. บีลัก ปาฆี_ กาลา กูญา ปือตัด ปลีตา โปด_ กือนา ตูนู โกะ กือมียัน ฌูฆา. 8เดะ วะตู ปะฮือญา_ กาลา อาโรน จูโจฮ ปลีตา_ บรี ญา ตูนู กือมียัน_ บรี ฌาดี กือมียัน บือบาวู ปี ซือลาลู_ โซะ ฮือลด มูคา นะ ตูฮัด บือซัยํ เดะ อาตัซ_ ฌู ตือดะ ฮาบิฮ บือแนฮ บักซา นะ กาเญา เลอ. 9ตาปี ซือบารัก บือบาวู นู บลารัก_ ฌางัน นะ ตูนู เดะ ตือปัจ มือญือมัฮ เลอ_ เฆอ จะ_ ซือบารัก ตูนู มือญือมัฮ นู อาซิก_ เฆอ จะ_ บรัซ มือญือมัฮ_ เฆอ จะ_ อูแร ซือบารัก โอะ_ มือญือมัฮ เดะ อาตัซ อีตู. 10บรี กะ อาโรน บูวัจ ลาฆู ตือบุซ ดูซา_ เดะ ตือปัจ นู ซือรูปา ตาโนะ บือนาตัก_ ซา ตาโฮด ซือกาลี. บรี ญา ซูโรฮ ดารัฮ นะ ซือบารัก มือญือมัฮ ตือบุซ ดูซา_ บูวัจ ลาฆู บาโซฮ ซาลัฮ_ บรี กะ ตือปัจ มือญือมัฮ อีตู_ ซา ตาโฮด ซือกาลี_ ปี ฌู ตือดะ ฮาบิฮ บือแนฮ บักซา นะ กาเญา. ตือปัจ มือญือมัฮ อีตู_ นะ จรัฮ บาฌิ โตระ กะ ตูฮัด บือซัยํ เดะ อาตัซ.”
ดูเวะ ตืองัฮ เชเคน บีดา ตือปัจ มือญือมัฮ
11ตูฮัด บือซัยํ เดะ อาตัซ_ มือเลา ฌางัน มูซา_ จะ 12“กาลา เกา นะ ฆาแรฮ ซูรัจ รูมัฮ นะ ลูมอฮ บักซา อิซราเอน_ บีดา นะ ตาฮู จะ_ อาดา บราปา อูรัก_ กือนา บรี กูญา ซิกมาซิก บาวา ซือบารัก บรือฆา_ มาแรฮ มือญือมัฮ กะ ตูฮัด บือซัยํ เดะ อาตัซ_ ฌาดี รือฆา ตือบุซ ญาวา_ กาลา เกา กีรา กูญา_ ตีเมา บรี บือฌาดี ปือญาเกะ งรือลา_ เดะ ลูมอฮ กูญา_ กาลา เกา กีรา กูญา. 13ราตา ซือมียา นู กีรา_ วะตู ฆาแรฮ ซูรัจ รูมัฮ_ นะ ฆาโดฮ อาเกะ มือญือมัฮ ซือบารัก กะฆีนี_ ฌาดี จะ_ ดูเวะ ตืองัฮ เชเคน#30.13 เชเคน ซา เชเคน ฌาดี บือกะ รีเงะ ปีระ_ บรัจ ซือบือลัซ (11) กรัม._ ตูโรจ กะ เชเคน นะ ตือปัจ มือญือมัฮ_ (ซา เชเคน อาดา ฆือนะ ดูวา ปูโลฮ (20) เกรัฮ) ซือตืองัฮ เชเคน_ ฌาดี ดูเวะ อาเกะ มือญือมัฮ กะ ตูฮัด บือซัยํ เดะ อาตัซ. 14ราตา ซือมียา นู ฆาแรฮ ปือนามา เดะ ซูรัจ รูมัฮ_ อูมอยํ ตะเดะ ดูวา ปูโลฮ (20) ตาโฮด ปี_ กือนา บาวา ดูเวะ มาแรฮ อาเกะ มือญือมัฮ กะ ตูฮัด. 15กาลา กาเญา บาวา ดูเวะ_ มาแรฮ อาเกะ มือญือมัฮ กะ ตูฮัด บือซัยํ เดะ อาตัซ_ บีดา นะ ตือบุซ ญาวา นะ กาเญา เตอ_ โซะ ซือมียา กายา โปด_ ฌางัน นะ มือญือมัฮ ลือเบฮ_ โซะ ซือมียา ฮาฌะ โปด_ ฌางัน นะ บรี ดีกิ ลือเบฮ เดะ อีตู. 16กือนา ปูงอจ ดูเวะ รือฆา ตือบุซ_ เดะ ลูมอฮ อิซราเอน_ บาวา ตาโรฮ_ บีดา นะ ซูโรฮ เดะ รูมัฮ ซาเราะ บือฌาญี บือดาปัจ_ บีดา ตูฮัด บือซัยํ เดะ อาตัซ_ นะ บือเลฮ บรีงัจ กะ ลูมอฮ บักซา อิซราเอน_ เดะ ลาฆู ตือบุซ ญาวา นะ กูญา.”
บาเตน มัซ ซือวะซา
17ตูฮัด บือซัยํ เดะ อาตัซ_ มือเลา ฌางัน มูซา_ จะ 18“เกา กือนา บูวัจ บาเตน มัซ ซือวะซา_ ฌางัน จรานา ฮามัจ บาเตน_ ฌางัน มัซ ซือวะซา ฌูฆา_ บีดา นะ บาโซฮ. กือนา ตืองะ บาเตน อีตู_ ตาโรฮ เดะ ซามา ตืองัฮ รูมัฮ ซาเราะ บือฌาญี บือดาปัจ_ ฌางัน ตือปัจ มือญือมัฮ. กะฆีเตอ_ กือนา จือบุ อาเย บอฮ เดะ บาเตน อีตู. 19บรี กะ อาโรน_ ฌางัน โกะ นานะ กีลากี นะ ญา_ บาโซฮ ตางัน_ บาโซฮ กากี. 20กาลา กูญา นะ มาโซะ กะ รูมัฮ ซาเราะ บือฌาญี บือดาปัจ_ กูญา ฆาโดฮ บาโซฮ ฌางัน อาเย_ ตีเมา บรี มาตี. กาลา กูญา มาโซะ มาแรฮ ดาปิก ตือปัจ มือญือมัฮ_ บูวัจ ลาฆู บือกรือฌา_ ฌาดี จะ_ อาเกะ โกะ ซือบารัก ตูนู มือญือมัฮ กะ ตูฮัด บือซัยํ เดะ อาตัซ_ 21กือนา บรี กูญา บาโซฮ ตางัน ฌางัน กากี_ ตีเมา บรี มาตี. ลาฆู อีนี_ บรี ฌาดี ฮาดัจ ฮูโกบ ปี ซือลาลู_ เดะ ญาวา นะ กูญา_ ฌาดี จะ_ อาโรน_ ฌางัน โกะ บือแนฮ บักซา นะ ญา_ ปี ซือลาลู_ ตือดะ ฮาบิฮ บือแนฮ บักซา เลอ.”
มีญะ ลือมัยํ_ ฌางัน กือมียัน บือบาวู
(บราเกะ ลารี 37.29)
22ตูฮัด บือซัยํ เดะ อาตัซ_ ญา อาดา มือเลา ฌางัน มูซา_ จะ 23“กือนา อาเมด โกะ ซือบารัก บือบาวู นู บาฌิ โตระ_ อาดา มดยอบ อาเย_ บรัจ นัม กีโล_ ฌางัน อบเชย บือบาวู_ ตีฆา กีโล_ ฌางัน ซรัย_ ตีฆา กีโล 24กายู มาแนฮ จีนา_ นัม กีโล_ ตูโรจ กะ ลาฆู ตีมัง นะ ตือปัจ มือญือมัฮ_ ฌางัน มีญะ กือดูโนด_ ปัจ ลิด. 25เกา กือนา อาเมด ซือบารัก อีนี_ มาแรฮ บูวัจ ฌาดี มีญะ ลือมัยํ นู จรัฮ บาฌิ_ ฌาดี มีญะ บาวู_ บือกะ นู อาดา ตูกัก ปานัย ฆาโวน จาโปยํ. มีญะ อีตู_ บรี ฌาดี มีญะ ลือมัยํ นู จรัฮ บาฌิ. 26กะฆีเตอ_ กือนา อาเมด มีญะ อีตู_ ลือมัยํ รูมัฮ ซาเราะ บือฌาญี บือดาปัจ_ ฌางัน ปือตี ปือมือเลา บือปาคัจ ฌูฆา_ 27ลือมัยํ ปาปัด โตะ_ ฌางัน โกะ ซือบารัก นู นะ ซูโรฮ เดะ ปาปัด โตะ_ ลือมัยํ ตือปัจ ตืองะ แดด_ ฌางัน ซือบารัก นะ ซูโรฮ เดะ ตือปัจ ตืองะ แดด_ ฆือนะ ฌางัน ตือปัจ ตูนู โกะ กือมียัน 28ตือปัจ ตูนู มือญือมัฮ ฌางัน โกะ ซือบารัก นู นะ ซูโรฮ เดะ ตือปัจ มือญือมัฮ_ อาดา โกะ บาเตน ฌางัน โกะ จรานา ฮามัจ บาเตน อีตู. 29กือนา บาโซฮ โกะ ซือบารัก อีนี_ บรี จรัฮ บาฌิ_ บีดา นะ บรี จรัฮ บาฌิ โตระ. ซือบารัก นามา นู มาแรฮ กือนา โกะ ซือบารัก อีนี โปด_ นะ จรัฮ บาฌิ ฌูฆา. 30กะฮามี โปด กือนา ลือมัยํ_ บาโซฮ_ อาโรน ฌางัน โกะ นานะ นะ ญา_ บรี จรัฮ บาฌิ_ บีดา กูญา นะ บือเลฮ ฌาดี ซามี บือกรือฌา กะ กู. 31เกา กือนา มือเลา ฌางัน ลูมอฮ อิซราเอน จะ_ ‘นี เลอ_ ฌาดี มีญะ ลือมัยํ นู จรัฮ บาฌิ_ บีดา กู_ ปี ตือดะ ฮาบิฮ บือแนฮ บักซา นะ กาเญา. 32มีญะ อีนี_ ฌางัน ลือมัยํ โกะ ซือมียา แจะบีแระ เลอ. ฌางัน จาโปยํ โกะ มีญะ อาซิก_ นู ซือรูปา มีญะ อีนี. มีญะ อีนี_ ฌาดี มีญะ นู จรัฮ บาฌิ_ กาเญา กือนา ตือตู จะ_ ฌาดี บารัก นู จรัฮ บาฌิ. 33ซาปา นะ จาโปยํ มีญะ อีนี_ เฆอ จะ_ ซาปา นะ ซูโรฮ ปรือจิ โกะ ซือมียา โซะ ลูวัยํ_ ซือมียา อีตู นะ กือนา โปรฮ_ บรี ตรือเบะ เดะ ลูมอฮ ซือมียา นะ ญา.’ ”
34ตูฮัด บือซัยํ เดะ อาตัซ_ ญา มือเลา ฌางัน มูซา จะ_ “กือนา อาเมด โกะ ซือบารัก บือบาวู_ อาดา กือมียัน_ ฌางัน บารัก บือบาวู อาซิก_ ดูวา ฌือแนฮ#30.34 บารัก บือบาวู อาซิก_ ดูวา ฌือแนฮบาซา ฮีบรู_ ฌาดี จะ_ บาซา ลามา_ บลาโลก จะ “เชเคเลด” ฌางัน “เคเลบนา” ตาปี ลูมอฮ ลาโวจ นะ บลาโลก กะฮามี_ ฮอย ซาปา ตาฮู. _ จาโปยํ ฌางัน กือมียัน นู จรัฮ บาฌิ_ บรี บรัจ ซามา บายา_ ราตา ฌือแนฮ. 35กือนา จาโปยํ_ โกะ ซือบารัก บือบาวู_ ตูโรจ บือกะ ตูกัก นู ปานัย นะ จาโปยํ_ ฆาโวน ฌางัน ฆารับ_ บรี ฌาดี ซือบารัก จรัฮ บาฌิ โตระ. 36กือนา อาเมด ซือตืองัฮ มาแรฮ_ ฌือเลาะ บรี ลูมัจ_ ตืองะ ซือตืองัฮ_ ตาโรฮ โซะ ฮือลด ปือตี ปือมือเลา บือปาคัจ_ เดะ รูมัฮ ซาเราะ บือฌาญี บือดาปัจ_ เดะ ตือปัจ นู กู นะ บือดาปัจ ฌางัน เกา. โกะ กือมียัน บือบาวู อีตู_ เกา กือนา ตือตู จะ_ จรัฮ บาฌิ โตระ. 37โกะ กือมียัน บือบาวู_ นู เกา นะ บูวัจ_ ตูโรจ โกะ ซือบารัก นะ จาโปยํ เตอ_ เกา ฌางัน บูวัจ มาแรฮ ซูโรฮ ตะอาซิก. กือนา ตือตู จะ_ อีนี ฌาดี ซือบารัก บือบาวู นู จรัฮ บาฌิ โตระ_ ซรัฮ บรี กะ ตูฮัด บือซัยํ เดะ อาตัซ. 38ซาปา บูวัจ ซือบารัก กะฆีนี_ ตาโรฮ บีดา นะ ซูโรฮ ฌาดี มีญะ บาวู_ ซือมียา อีตู นะ กือนา โปรฮ เดะ ลูมอฮ นะ ญา.”
Currently Selected:
บราเกะ ลารี 30: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
