บราเกะ ลารี 3
3
มูซา เดะ ปูโฮด กายู นู อาดา อาปี มือญาลา
(บราเกะ ลารี 6.2—7.7; 11.1-4; 12.35-36)
1มูซา ญา ปือบือลา กาวัด แบะ_ กาวัด กาเมก_ นะ เยโทร ปะ มือตูฮา นะ ญา_ นู ฌาดี ซามี นะ ลูมอฮ มีเดียน. อาดา ซืออารี_ ญา บาวา กาวัด แบะ กาวัด กาเมก_ ปี ลือปัซ เดะ ตือปัจ ตานัฮ ตูโฮยํ นู ลือฆา_ ปี ฌู รอจ กะ บูเกะ นะ ตูฮัด_ ฌาดี จะ_ บูเกะ โฮเรบ. 2ฮูลู บาลัก นะ ตูฮัด บือซัยํ เดะ อาตัซ โปด_ ปลีฮัจ กะ มูซา_ ฌาดี บือกะ มือญาลา อาปี_ ตรือเบะ เดะ รือโปะ กายู ซา ปูโฮด. มูซา ตีญุง ลีฮัจ บือฆารี ปูโฮด กายู อาดา อาปี บลือกัจ ตาปี เตด ฮางอซ เลอ. 3มูซา มือเลา จะ “กู นะ ซีงัฮ ลีฮัจ ลาฆู นู ปือและ อีนี จะ ซาเบะ นามา รือโปะ กายู ญา เตด ฮางอซ เลอ.”
4กาลา ตูฮัด บือซัยํ เดะ อาตัซ ลีฮัจ ญา อาเลฮ มาแรฮ ลีฮัจ_ ญา มือเลา ตรือเบะ มาแรฮ ดาตัก เดะ รือโปะ กายู อีตู จะ “มูซา_ มูซา เออ.”
มูซา ญา ตีกัฮ จะ “กู นี เลอ.”
5กะฆีเตอ ตูฮัด มือเลา จะ “ฌางัน มาโซะ มาแรฮ ดาปิก กะ ตือปัจ อีนี. กือนา อูฆัย ปะตาปะ นะ เกา ตรือเบะ เลอ_ ซาเบะ จะ_ ตือปัจ นู เกา บือดีรี อีนี_ ฌาดี ตือปัจ ตานัฮ นู บาฌิ บือซรี.” 6กะฆีเตอ ตูฮัด มือเลา ปูลัก จะ “กู นี_ ฌาดี ตูฮัด นะ ปะ เดะ เกา_ ฌาดี ตูฮัด นะ อับราฮัม_ ตูฮัด นะ อีซัก_ ฌาดี ตูฮัด นะ ยาโกบ.” มูซา เตอ_ ญา ตูโดก มูคา นะ ญา_ กรานา ตาโกจ_ เตด บรานี นะ ตีญุง ลีฮัจ ตูฮัด.
7ตูฮัด บือซัยํ เดะ อาตัซ มือเลา จะ_ “กู ลีฮัจ ลาฆู ซูซัฮ_ นะ โกะ ลูมอฮ ซือมียา นะ กู_ นู ดูโดะ เดะ นังฆรี อียิบ_ ดัฮ. กู ดืองัยํ ซือวารา บือซูระ นะ กูญา_ กรานา ลาฆู ปรือกัด นะ ลูมอฮ โกะ กือปาลา ปราโซฮ. กู ตาฮู ลาฆู ซูซัฮ แนฮฌือแนฮ นะ กูญา. 8กู ตูโรด มาแรฮ_ บีดา นะ ตูโลก กูญา_ บรี ลือปัซ เดะ ตางัน นะ ลูมอฮ อียิบ_ นะ บาวา กูญา ตรือเบะ เดะ นังฆรี อีตู_ ปี กะ นังฆรี นู ลือฆา ปือนอฮ บาฌิ_ ฌาดี นังฆรี นู อาดา โกะ อาเย ดาดา ลือมู_ ฌางัน โกะ มีซัด มาทู_ มือนีแลฮ บาญะ_ ฌาดี จะ_ ปี กะ ตือปัจ ดูโดะ นะ ลูมอฮ คานาอัน_ ลูมอฮ เฮด_ ลูมอฮ อาโมรี_ ลูมอฮ เปรีซี_ ลูมอฮ ฮีวี_ ฌางัน ลูมอฮ เยบูซี. 9วะตู อีนี ซือวารา บือซูระ นะ ลูมอฮ อิซราเอน_ มาแรฮ รอจ กะ กู ดัฮ. กู บือเลฮ ลีฮัจ_ ลาฆู ปรือกัด นู ลูมอฮ อียิบ บูวัจ กะ กูญา ดัฮ. 10กะฆีเตอ_ วะตู อีนี_ ปี เลอ_ กู นะ ซูโรฮ เกา ปี ซารี ราฌา ฟาโร_ บีดา นะ บือเลฮ บาวา โกะ ลูมอฮ ซือมียา นะ กู_ ฌาดี จะ_ บักซา อิซราเอน_ ตรือเบะ เดะ นังฆรี อียิบ.”
11โซะ มูซา ญา มือเลา จะ “กู ฌาดี ซาปา เลอ_ นู นะ มาโซะ ปี ซารี ฟาโร_ บาวา โกะ ลูมอฮ อิซราเอน ตรือเบะ เดะ นังฆรี อียิบ?” 12ตูฮัด ญา มือเลา จะ “กู นะ ดูโดะ ฌางัน เกา ซูโงฮ เลอ. อีนี เตอ_ ฌาดี ปือนานา บรี กะ เกา ตาฮู จะ_ กู ซูโรฮ เกา ปี_ ฌาดี จะ_ กาลา เกา บาวา โกะ ลูมอฮ ซือมียา ตรือเบะ เดะ นังฆรี อียิบ ดัฮ_ กาเญา ซือมูฮา นะ มาแรฮ มือญือมัฮ กะ ตูฮัด เดะ บูเกะ อีนี.”
ตูฮัด บรี ตาฮู ปือนามา นู ซีดี นะ ญา
13โซะ มูซา มือญาเระ กะ ตูฮัด จะ “กาลา กู ปี ซารี ลูมอฮ อิซราเอน_ มือญาเระ กะ กูญา จะ ‘ตูฮัด นะ โกะ บีลาแก นะ กาเญา เตอ_ ญา ซูโรฮ กู มาแรฮ ซารี กาเญา’_ กูญา โปด_ นะ ตาญา กู จะ ‘ตูฮัด อีตู_ ญา ปือนามา นามา?’_ กู นะ ตีกัฮ กะ กูญา กะฮามี?” 14ตูฮัด มือเลา ฌางัน มูซา จะ “กู ฌาดี บือกะ นู กู ฌาดี.”_ กะฆีเตอ ตูฮัด มือเลา จะ “ปี มือญาเระ กะ ลูมอฮ บักซา อิซราเอน จะ ‘ตูฮัด นู ปือนามา จะ_ กู ฌาดี#3.14 เดะ บาซา ฮีบรู_ ปือมือเลา จะ “กู ฌาดี” ญา ดืองัยํ ดาปิกๆ ซือรูปา กะ ปือนามา จะ “ยัฮเวฮ”. _ ญา ซูโรฮ กู มาแรฮ ซารี ลูมอฮ กาเญา.’ ” 15ตูฮัด มือเลา ฌางัน มูซา ปูลัก จะ “เกา กือนา มือเลา ฌางัน ลูมอฮ บักซา อิซราเอน จะ ‘ตูฮัด บือซัยํ เดะ อาตัซ#3.15 โซะ อีนี_ ปือนามา อีนี ญา ซือรูปา บือกะ “ตูฮัด นู อาดา ฮีโดะ” เฆอ จะ “ตูฮัด นู ฌาดี.”_ ตูฮัด นะ โกะ บีลาแก นะ กาเญา_ จะ_ ตูฮัด นะ อับราฮัม_ ตูฮัด นะ อีซัก_ ตูฮัด นะ ยาโกบ เตอ_ ญา เลอ_ นู ซูโรฮ กู มาแรฮ ซารี กาเญา.’ นี เลอ ฌาดี ปือนามา นะ กู_ ปี ซือลาลู_ นี เลอ_ ฌาดี ปือนานา นะ กู_ ตือดะ ฮาบิฮ บือแนฮ บักซา นะ กาเญา. 16เกา กือนา บือมุน โกะ ลูมอฮ ซือมียา ซัยํบือซัยํ นะ อิซราเอน_ มือเลา กะ กูญา จะ ‘ตูฮัด บือซัยํ เดะ อาตัซ_ ตูฮัด นะ โกะ บีลาแก นะ กาเญา_ ตูฮัด นะ อับราฮัม_ ตูฮัด นะ อีซัก_ ฌางัน นะ ยาโกบ เตอ_ ญา ปลีฮัจ กะ กู_ มือเลา จะ_ “กู ตูงู ลีฮัจ กาเญา ซือมูฮา ดัฮ_ บือเลฮ ลีฮัจ ลาฆู โตระๆ_ นู กูญา บือเลฮ บูวัจ กะ กาเญา_ เดะ นังฆรี อียิบ. 17กู บือเลฮ มือเลา บือฌาญี ดัฮ จะ_ กู นะ บาวา กาเญา ซือมูฮา ปี_ บรี ลือปัซ เดะ ลาฆู ซูซัฮ เดะ นังฆรี อียิบ_ ปี กะ นังฆรี นะ ลูมอฮ คานาอัน_ ลูมอฮ เฮด_ ลูมอฮ อาโมรี_ ลูมอฮ เปรีซี_ ลูมอฮ ฮีวี_ ฌางัน ลูมอฮ เยบูซี_ ฌาดี นังฆรี นู อาดา โกะ อาเย ดาดา ลือมู_ ฌางัน โกะ มีซัด มาทู_ มือนีแลฮ บาญะ เลอ.” ’ 18กูญา นะ มือนีงัย กะ ปือมือเลา นะ เกา_ กะฆีเตอ เกา ฌางัน โกะ ซือมียา ซัยํบือซัยํ_ นะ ลูมอฮ อิซราเอน_ กือนา ปี ซารี ราฌา นะ ลูมอฮ อียิบ มือเลา จะ ‘ตูฮัด บือซัยํ เดะ อาตัซ_ ตูฮัด นะ ลูมอฮ ฮีบรู_ ญา ปลีฮัจ กะ ลูมอฮ กามี ดัฮ. วะตู อีนี_ มีตา บรี กามี บือฌาลัด ปี_ กะ ตือปัจ ตานัฮ ตูโฮยํ นู ลือฆา_ ตีฆา อารี_ บีดา นะ อาเกะ บือนาตัก_ มือญือมัฮ กะ ตูฮัด บือซัยํ เดะ อาตัซ_ ตูฮัด นะ กามี เลอ.’ 19ตาปี กู นี_ ตาฮู ดัฮ จะ_ ราฌา เดะ นังฆรี อียิบ_ ญา ตีเมา บรี ลูมอฮ กาเญา ปี_ ดัฮ ฮอย ตางัน นู มือฆัฮ_ ปรือกัด ญา. 20กู นะ อาเงา ตางัน กาเตาะ นังฆรี อียิบ บรี บือนาซา_ ฌางัน ลาฆู ปือและ แนฮฌือแนฮ_ นู กู นะ บูวัจ เดะ ซามา ตืองัฮ นังฆรี อีตู. ลือปัซ อีตู_ ราฌา โปด_ นะ ยอม ปลือปัซ ลูมอฮ กาเญา. 21กู นะ บรี ลูมอฮ ซือมียา อีนี_ ฌาดี ซือมียา นู กือนา เดะ ฮาตี นะ ลูมอฮ อียิบ. กะฆีเตอ_ กาลา กาเญา ตรือเบะ ปี โปด_ นะ เตด ฆาโดฮ ปี ซา ญาวา เลอ. 22บรี โกะ นีบีนี ราตา อูรัก_ มีตา เดะ กาวัด รูมัฮ_ มีตา เดะ โกะ นีบีนี นู ดูโดะ ดาปิก_ จะ_ มีตา โกะ บารัก ปากัย นู ฌาดี โกะ ปีระ_ โกะ มัซ_ ฌางัน โกะ กาเยด บาฌู. กาเญา กือนา อาเมด โกะ ซือบารัก ปากัย อีตู_ บือปี ปากัย โกะ นานะ กีลากี นีบีนี นะ กาเญา. กะฆีเตอ เลอ_ กาเญา นะ ราปัซ อาเมด โกะ ซือบารัก นะ ลูมอฮ อียิบ.”
Currently Selected:
บราเกะ ลารี 3: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
