บราเกะ ลารี 2
2
มูซา บือฌาดี มาแรฮ_ ญา บือซัยํ ฌาดี อูรัก มูดา
(ฮีบรู 11.23)
1อาดา กีลากี ลูมอฮ เลวี ซืออูรัก_ ปี อาเมด นีบีนี ราดารา ซา ลูมอฮ อีตู_ มาแรฮ ฌาดี บีนี นะ ญา. 2นีบีนี อีตู ญา บือโปรจ_ ดูโดะ เดะ อาปี_ บือเลฮ นานะ กีลากี. ตานา นีบีนี อีตู ลีฮัจ จะ_ นานะ อีตู บือฆาจะ_ กะฆีเตอ ญา บูนี นานะ_ รอจ กะ ตีฆา บูลัด. 3กาลา ญา ลีฮัจ จะ_ นะ บูนี ลาฆี ฮอย เตด บือเลฮ ดัฮ_ กะฆีเตอ_ ญา อาเมด ราฆา_ นู อาญัม ฌางัน ปูโฮด บรอกๆ ดัฮ_ อาเมด มาแรฮ ตาโปก ฌางัน ฆือตัฮ_ ตีเมา บรี ตีริฮ_ บอฮ นานะ อีตู เดะ ดาลับ_ บาวา บือปี ตืองะ เดะ ตืองัฮ โกะ ปูโฮด รีโยก_ เดะ บีดิก ซูงัย เลอ. 4โซะ จา นีบีนี เดะ นานะ อีตู_ ญา อาดา บือดีรี ลีฮัจ โวฮฌาโวฮ_ จะ_ อาดา ลาฆู นามา นะ บือฌาดี ฌางัน อาดี เดะ ญา.
5วะตู อีตู_ อาดา นานะ นีบีนี นะ ราฌา ฟาโร_ ญา ปี มานี เดะ ซูงัย. โกะ ปราโซฮ นีบีนี นะ ญา_ กูญา บือฌาลัด บีดิก ซูงัย. นานะ นะ ราฌา ญา ลีฮัจ_ อาดา ราฆา เดะ ตืองัฮ โกะ ปูโฮด บรอกๆ_ กะฆีเตอ ญา ซูโรฮ กูญา ปี อาเมด บาวา มาแรฮ. 6ตานา ญา บูกา ราฆา ดัฮ_ ลีฮัจ บือฆารี จะ_ อาดา นานะ ตืองัฮ มือนาแงฮ_ กะฆีเตอ นานะ ราฌา_ ญา ตือจีฮัด กะ นานะ อีตู_ มือเลา จะ_ “อีนี ฌาดี นานะ นะ บักซา ฮีบรู เลอ.” 7กะฆีเตอ_ จา เดะ นานะ อีตู_ ญา ตาญา นานะ นะ ราฌา ฟาโร จะ_ “เกา ซูกา บรี กู ปี ซารี นีบีนี บักซา ฮีบรู ซืออูรัก_ มาแรฮ ตูโลก ปือบือลา นานะ อีนี เฆอ เตด?” 8นานะ นะ ราฌา ฟาโร ญา ตีกัฮ จะ_ “ปี ซารี เลอ.”
กะฆีเตอ_ ราดารา อีตู_ ญา ปี บลาโลก มะ เดะ นานะ ดือมิ มาแรฮ. 9นานะ นีบีนี นะ ราฌา ฟาโร_ มือเลา ฌางัน นีบีนี อีตู จะ_ “อาเมด นานะ อีนี บือปี ปือบือลา ซามา เลอ. กู นะ บรี รือฆา อูปัฮ กะ เกา.” กะฆีเตอ นีบีนี อีตู_ ญา อาเมด นานะ ปี ปือบือลา ดัฮ. 10กาลา นานะ อีตู ญา บือซัยํ ดีกิ ดัฮ_ กะฆีเตอ โปด_ ญา อาเมด มาแรฮ อาตัจ บรี_ กะ นานะ นีบีนี นะ ราฌา ฟาโร. กะฆีเตอ นานะ ราฌา ซาโมจ_ ฌาดี นานะ นะ ญา_ ตืองะ ปือนามา จะ มูซา_ มือเลา จะ_ “กรานา กู อาเมด ญา มาแรฮ ดาตัก เดะ อาเย เลอ.”
มูซา ลารี ปี กะ นังฆรี มีเดียน
(ฮีบรู 11.23)
11กาลา มูซา ญา บือซัยํ ดัฮ_ อาดา ซืออารี ญา ปี ซารี โกะ นะบรานะ นะ ญา_ ลีฮัจ กูญา ตืองัฮ ฆาโดฮ บือกรือฌา ซูซัฮ โตระ. มูซา เตอ_ ญา ลีฮัจ ซือมียา อียิบ ซืออูรัก_ ตืองัฮ กาเตาะ ซือมียา ฮีบรู นู ฌาดี ซา บักซา ฌางัน ญา. 12กะฆีเตอ ญา ตีญุง ลีฮัจ กีรี กานัน จะ_ ฮอย ซาปา ดัฮ_ ญา โปด_ บูนอฮ ซือมียา บักซา อียิบ อีตู_ ตานัม เดะ ตานัฮ_ บูนี บูวัก ดัฮ.
13โซะ ปาฆี อารี นู ซา ปูลัก_ มูซา ญา ตรือเบะ ปี ลีฮัจ_ อาดา ลูมอฮ บักซา ฮีบรู_ ดูวา อูรัก_ กูญา ตืองัฮ บือกาเตาะ-กาเตาะ ซามา กูญา. กะฆีเตอ ญา มาโซะ ปี บลารัก ซือมียา นู ซาลัฮ กะฆีเตอ_ มือเลา จะ_ “เกา กาเตาะ นะบรานะ นะ เกา บูวัจ นามา เลอ?”
14ซือมียา อีตู ตีกัฮ จะ_ “ซาปา ตืองะ เกา_ บรี ฌาดี กือปาลา_ ฌาดี ซือมียา กรัจ ฮูโกบ กามี? เกา ตือตู ฮาตี นะ บูนอฮ กู_ ซือรูปา นู เกา บือเลฮ บูนอฮ ซือมียา บักซา อียิบ นู อีตู เฆอ?”
ตานา มูซา ดืองัยํ ดัฮ_ ญา ตาโกจ_ อีงัจ จะ ลาฆู อีตู กือนา มือเลา กรือจัย ปี ราตา ดัฮ. 15ตานา ราฌา ฟาโร ญา ตาฮู ลาฆู อีตู ดัฮ_ ญา มียา จือลัฮ นะ บูนอฮ มูซา บูวัก. ตาปี มูซา ญา ลารี เดะ ราฌา ฟาโร_ ปี ดูโดะ เดะ นังฆรี มีเดียน. ญา ปี ดูโดะ เดะ บีดิก ตลาฆา ตือปัจ อีตู เลอ. 16โซะ กือปาลา ซามี นะ ลูมอฮ มีเดียน_ ญา อาดา นานะ ราดารา ตูโฌฮ อูรัก_ กูญา อีตู ปาคัจ จือบุ อาเย_ บอฮ เดะ ปาโลก_ บรี กะ กาวัด แบะ_ กาวัด กาเมก_ นะ ปะ เดะ กูญา มากัด. 17วะตู อีตู_ อาดา ซือมียา ปือบือลา กาเมก มาแรฮ โปรฮ โกะ นีบีนี อีตู. กะฆีเตอ มูซา ญา บีกัซ_ ปี ตูโลก โกะ นีบีนี อีตู_ บรี โกะ บือนาตัก นะ กูญา มากัด อาเย ดัฮ.
18โกะ นีบีนี อีตู_ กูญา บาลิ ปี กะ เรอูเอน_ ปะ เดะ กูญา. กะฆีเตอ ปะ เดะ กูญา ตาญา จะ_ “บูวัจ นามา อารี อีนี กาเญา บาลิ จือปัจ เลอ?”
19กูญา ตีกัฮ จะ_ “อาดา ซือมียา ลูมอฮ อียิบ ซืออูรัก_ ญา ตูโลก กามี_ บรี ลือปัซ เดะ ลูมอฮ ซือมียา ปือบือลา กาเมก. ญา ตูโลก จือบุ อาเย บรี กะ ลูมอฮ กามี_ บีดา บรี โกะ แบะ โกะ กาเมก นะ กามี_ มากัด ฌูฆา.” 20กะฆีเตอ_ ปะ เดะ กูญา ตาญา นานะ นะ ญา จะ_ “กีลากี อีตู ดูโดะ ปัจ ดีฮา? บูวัจ นามา กาเญา ตีงัน ญา? ปี เลอ_ บลาโลก ญา_ มาแรฮ มากัด นาซี.”
21มูซา เตอ_ ญา ซูกา ฮาตี นู นะ ดูโดะ ฌางัน ญา. เรอูเอน โปด_ อาเกะ นานะ นู ปือนามา ซิบโปรา_ บรี ฌาดี บีนี นะ มูซา. 22นีบีนี อีตู_ ญา ดูโดะ เดะ อาปี_ บือเลฮ นานะ กีลากี ซืออูรัก. มูซา ตืองะ ปือนามา จะ_ เกอโชม#2.22 เดะ บาซา ฮีบรู ปือมือเลา จะ “เกอ” ฌาดี จะ_ ซือมียา มือนูปัก นังฆรี อาซิก. ปือมือเลา จะ “โชม” ฌาดี จะ_ ตือปัจ อีตู._ กรานา ญา มือเลา จะ_ “กู ฌาดี ซือมียา มาแรฮ มือนูปัก ดูโดะ เดะ นังฆรี อาซิก.”
23กาลา ลือปัซ ปี ลามา_ ราฌา นังฆรี อียิบ ญา มาตี ดัฮ. ลูมอฮ อิซราเอน_ กูญา ซูซัฮ ฮาตี โตระ_ กรานา กูญา ฌาดี ปราโซฮ. กะฆีเตอ กูญา บือซูระ บือปาโตด ซาแมน มือนาแงฮ_ กรานา ลาฆู นู กูญา ฌาดี ปราโซฮ อีนี. ซือวารา มือนาแงฮ นะ กูญา รอจ กะ ตูฮัด ดัฮ. 24ตูฮัด เดะ อาตัซ ญา ดืองัยํ ซือวารา มือนาแงฮ บือปาโตด นะ กูญา. กะฆีเตอ ตูฮัด ญา อีงัจ ดัฮ_ กะ ปือมือเลา บือฌาญี บือตือตู_ นู ญา บูวัจ ฌางัน อับราฮัม_ อีซัก_ ฌางัน ยาโกบ_ ฌูฆา. 25กะฆีเตอ_ ตูฮัด ญา ตีญุง ลีฮัจ ลูมอฮ บักซา อิซราเอน_ ญา ตาฮู ปาซัน ลาฆู นู นะ บือฌาดี ฌางัน กูญา เลอ.
Currently Selected:
บราเกะ ลารี 2: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
