ลามูลา 17
17
ปือนานา นะ ปือมือเลา บือฌาญี บือตือตู
1ตานา อับราม อูมอยํ นะ ญา_ ซือมีลัด ปูโลฮ ซือมีลัด (99) ตาโฮด ดัฮ_ ตูฮัด บือซัยํ เดะ อาตัซ มาแรฮ ปลีฮัจ กะ ญา_ มือเลา จะ_ “กู นี เลอ_ ฌาดี ตูฮัด นู มือฆัฮ. เกา กือนา บูวัจ ตูโรจ โซะ ฮือลด มูคา นะ กู_ ฌาดี ซือมียา บาฌิ ซือมูฮา เลอ. 2กู นะ ตืองะ ปือมือเลา บือฌาญี บือตือตู นะ กู_ ฌางัน เกา_ นะ บรี บือแนฮ นะ เกา_ พรัด บาญะ ปี ซือรูโลยํ เลอ”_ ตูฮัด ญา จะ.
3อับราม มือญือมัฮ_ ตูโนะ ตือมะ รอจ กะ ตานัฮ. กะฆีเตอ ตูฮัด เดะ อาตัซ มือเลา ฌางัน ญา จะ_ 4“อีนี ฌาดี ปือมือเลา บือฌาญี บือตือตู นู กู บูวัจ ดัฮ ฌางัน เกา_ ฌาดี กะฆีนี เลอ. เกา เลอ_ นะ ฌาดี อาโปก นะ โกะ ลูมอฮ บักซา บาญะ. 5ตะเดะ อีนี_ นะ เตด ซือโบจ ปือนามา นะ เกา จะ_ อับราม#17.5 ปือนามา “อับราม”_ ฌาดี จะ_ “อาโปก นู กูญา มือโอจ.”_ ตาปี นะ ซือโบจ จะ_ อับราฮัม#17.5 ปือนามา “อับราฮัม”_ ฌาดี จะ_ “อาโปก นะ ลูมอฮ ซือมียา บาญะ.” เลอ. กรานา กู นะ บรี เกา ฌาดี อาโปก นะ ลูมอฮ ซือมียา_ บาญะ บักซา. 6กู นะ บูวัจ บรี เกา อาดา บือแนฮ_ พรัด บาญะ ซือรูโลยํ. กูญา นะ ฌาดี ซือมียา บาญะ บักซา. นานะ นะ กูญา ซือตืองัฮ_ นะ ฌาดี ราฌา.
7“ปือมือเลา บือฌาญี บือตือตู นะ กู อีนี_ นะ ฌาดี ปือมือเลา บือฌาญี บือตือตู_ ซือมาญัก รอจ. อาดา เดะ ตืองัฮ กู ฌางัน เกา_ ฌางัน บือแนฮ นะ เกา_ ตูโรด มือนูโรด ฌูฆา. กู นะ ฌาดี ตูฮัด นะ เกา_ ตูฮัด นะ บือแนฮ นะ เกา ฌูฆา. 8นังฆรี คานาอัน นู เกา ตืองัฮ มือนูปัก ดูโดะ อีนี_ ซือมูฮา_ กู นะ บรี กะ เกา_ นะ ฌาดี นังฆรี นะ เกา_ นังฆรี นะ บือแนฮ นะ เกา_ ซือลาลู. กู นะ ฌาดี ตูฮัด นะ กูญา อีตู เลอ”_ ตูฮัด ญา จะ.
9ตูฮัด เดะ อาตัซ มือเลา ฌางัน อับราฮัม จะ_ “เกา เลอ_ กือนา ตูโรจ กะ ปือมือเลา บือฌาญี บือตือตู นะ กู. เกา ฌางัน บือแนฮ นะ เกา โปด_ กือนา ตูโรจ_ ซือมาญัก รอจ เลอ. 10อีนี ฌาดี ลาฆู ปือมือเลา บือฌาญี บือตือตู นะ กู_ บือกะ กู ฌางัน เกา_ ฌางัน บือแนฮ นะ เกา_ กาเญา กือนา บูวัจ ตูโรจ เลอ_ จะ_ บรี โกะ กีลากี นะ กาเญา_ ซาโมจ ลาฆู กรัจ กูเละ ซูแลว_ ราตา ซือมียา. 11กาเญา กือนา กรัจ กูเละ ซูแลว นะ กาเญา_ นะ ฌาดี ปือนานา นะ ปือมือเลา บือฌาญี บือตือตู_ เดะ ตืองัฮ กู ฌางัน กาเญา. 12กาลา นานะ กีลากี นะ กาเญา_ อูมอยํ ลาปัด อารี ดัฮ_ ญา ฆาโดฮ ซาโมจ ลาฆู กรัจ. โกะ กีลากี_ ราตา ซือมียา_ นู ฌาดี บือแนฮ นะ กาเญา เตอ_ นู ดูโดะ เดะ อาปี เดะ รูมัฮ นะ กาเญา โปด บาฌิ_ นู กาเญา บือลี เดะ ซือมียา บักซา อาซิก_ นู บูกัด บือแนฮ นะ เกา โปด บาฌิ. 13ซือมียา นู ดูโดะ เดะ อาปี_ เดะ รูมัฮ นะ เกา เตอ_ ซือมียา นู เกา บือลี_ ฌางัน ดูเวะ เตอ_ กูญา กือนา ซาโมจ ลาฆู กรัจ เลอ. ปือมือเลา บือฌาญี บือตือตู นะ กู_ อาดา เดะ ญาวา กาเญา_ ฌาดี ปือมือเลา บือฌาญี บือตือตู นู อาดา ซือมาญัก รอจ เลอ. 14ดัฮ อาดา กีลากี_ นู ดีฮา เตด ซาโมจ ลาฆู กรัจ เตอ_ ซือมียา อีตู นะ กือนา กรัจ บรี ปูตุซ_ เดะ ลูมอฮ ซือมียา นะ ญา. ญา บูวัจ บรี ปือมือเลา บือฌาญี บือตือตู นะ กู_ ปูตุซ ดัฮ”_ ตูฮัด ญา จะ.
15ตูฮัด เดะ อาตัซ มือเลา ฌางัน อับราฮัม ลาฆี จะ_ “ปาซัน ซารัย_ บีนี นะ เกา เตอ_ ฌางัน บลาโลก ปือนามา นะ ญา จะ_ ซารัย_ ลาฆี_ ตาปี กือนา บลาโลก ปือนามา นะ ญา จะ_ ซารา#17.15 ซารา เดะ บาซา ฮีบรู_ ฌาดี จะ_ นานะ นีบีนี นะ ราฌา.. 16กู นะ บรี ซือลามัจ กะ ญา_ นะ บรี เกา อาดา นานะ กีลากี_ เดะ ญา. ซูโงฮ_ กู นะ บรี ซือลามัจ กะ ญา. ญา นะ ฌาดี เอด_ นะ ซือมียา บาญะ บักซา. นานะ นะ ญา ซือตืองัฮ_ นะ ฌาดี ราฌา”_ ตูฮัด ญา จะ.
17กะฆีเตอ_ อับราฮัม ตูโนะ มือญือมัฮ ตือมะ รอจ กะ ตานัฮ. ญา บรีงัจ บือฆือละ เดะ ฮาตี จะ_ “กาลา กีลากี อูมอยํ ซือราตุซ (100) ตาโฮด_ ญา นะ บือเลฮ นานะ เฆอ? ซารา เตอ_ นู อูมอยํ ซือมีลัด ปูโลฮ (90) ตาโฮด ดัฮ_ นะ ดูโดะ เดะ อาปี บือเลฮ เฆอ?” 18กะฆีเตอ_ อับราฮัม มือเลา ฌางัน ตูฮัด จะ_ “โอ มีตา เดะ ตูฮัด_ บรี ตูฮัด ซาโงะ อิซมาเอน_ ฌาดี นานะ นู ซูโงฮ นะ กู_ โซะ ฮือลด มูคา นะ ตูฮัด เลอ.”
19ตูฮัด เดะ อาตัซ ตีกัฮ จะ_ “โงฮซูโงฮ เตอ_ ซารา_ บีนี นะ เกา_ ญา นะ ดูโดะ เดะ อาปี_ นานะ กีลากี กะ เกา. เกา กือนา ตืองะ_ ปือนามา นานะ อีตู จะ_ อีซัก#17.19 อีซัก เดะ บาซา ฮีบรู_ ฌาดี จะ_ “ญา ฆือละ.”. กู นะ ตืองะ ปือมือเลา บือฌาญี บือตือตู นะ กู_ ฌางัน ญา_ ฌางัน บือแนฮ นะ ญา_ นะ ฌาดี ปือมือเลา บือฌาญี บือตือตู_ นู อาดา ปี ซือลาลู เลอ. 20โซะ อิซมาเอน เตอ_ กู ดืองัยํ ลาฆู นู เกา มีตา ดัฮ. กะฆีเตอ_ กู นะ บรี ซือลามัจ กะ ญา_ นะ บรี ญา_ บือตามัฮ อาดา บือแนฮ บาญะ. ญา นะ ฌาดี อาโปก นะ ราฌา_ ดูวา บือลัซ อูรัก. กู นะ บูวัจ บรี ญา ฌาดี บักซา นู บือซัยํ. 21ตาปี ปือมือเลา บือฌาญี บือตือตู นะ กู_ กู นะ ตืองะ ตาโรฮ ฌางัน อีซัก. ญา เตอ_ นู ซารา นะ ดูโดะ เดะ อาปี_ บรี ฌาดี นานะ นะ เกา_ เดะ ตาโฮด ฮือลด_ เดะ มูเซด อีนี เลอ”_ ตูฮัด ญา จะ.
อับราฮัม บูวัจ ลาฆู กรัจ
22กาลา ตูฮัด เดะ อาตัซ มือเลา ฌางัน อับราฮัม_ ฮาบิฮ ดัฮ_ ญา ญาแญะ ปี_ ตีงัน อับราฮัม ปี ดัฮ. 23กะฆีเตอ_ เดะ อารี อีตู เลอ_ อับราฮัม อาเมด อิซมาเอน_ นานะ นะ ญา เตอ_ ฌางัน ลูมอฮ ปราโซฮ_ นู ดูโดะ เดะ อาปี เดะ รูมัฮ นะ ญา_ ลูมอฮ ปราโซฮ นู ญา บือลี ดัฮ เตอ_ ลูมอฮ กีลากี เดะ รูมัฮ นะ ญา ซือมูฮา_ ญา บูวัจ ลาฆู กรัจ กูเละ ซูแลว นะ กูญา_ ตูโรจ บือกะ นู ตูฮัด บือเลฮ มือเลา ฌางัน ญา ดัฮ. 24กาลา อับราฮัม อูมอยํ นะ ญา_ ซือมีลัด ปูโลฮ ซือมีลัด (99) ตาโฮด ดัฮ_ ญา ซาโมจ ลาฆู กรัจ. 25อิซมาเอน_ นานะ นะ ญา_ อูมอยํ ตีฆา บือลัซ (13) ตาโฮด ดัฮ_ บารู ญา ซาโมจ ลาฆู กรัจ กะฆีเตอ. 26เดะ อารี อีตู เลอ_ อับราฮัม ฌางัน อิซมาเอน_ นานะ นะ ญา_ ซาโมจ ลาฆู กรัจ มารือมา ดัฮ. 27ลูมอฮ กีลากี เดะ รูมัฮ นะ ญา_ ฌางัน โกะ ซือมียา_ นู ดูโดะ เดะ อาปี เดะ รูมัฮ นะ ญา ฌูฆา_ ฌางัน โกะ ซือมียา นู ญา บือลี_ เดะ อูรัก บักซา อาซิก เตอ_ กูญา ซือมูฮา_ ซาโมจ ลาฆู กรัจ มารือมา ดัฮ เลอ.
Currently Selected:
ลามูลา 17: ULBIBLE
Highlight
Share
Copy
Want to have your highlights saved across all your devices? Sign up or sign in
