ลามูลา 18
18
ตูฮัด บือฌาญี นะ บรี นานะ กีลากี กะ อับราฮัม ฌางัน ซารา
1ตูฮัด บือซัยํ เดะ อาตัซ มาแรฮ ปลีฮัจ กะ อับราฮัม_ เดะ ตืองัฮ โกะ ปูโฮด กายู กรามัจ นะ มัมเร. วะตู อีตู_ มาตา อารี ฮางัจ_ อับราฮัม ญา อาดา ดูโดะ เดะ ปีตู รูมัฮ กาฌัก กาเยด. 2กะฆีเตอ ญา ลางอฮ ปาลา_ ลีฮัจ บือฆารี กีลากี ตีฆา อูรัก_ บือดีรี โซะ ฮือลด ญา. ตานา ญา ลีฮัจ กูญา ตีฆา อูรัก อีตู_ ญา โปด บลารี ดาตัก เดะ ปีตู รูมัฮ กาฌัก กาเยด_ ปี มือฮามัจ กูญา_ ตือมะ มือญือมัฮ ฌู รอจ กะ ตานัฮ. 3ญา มือเลา จะ_ “ตกเก นะ กู เออ_ ดัฮ กู ฌาดี ซือมียา นู กือนา เดะ ฮาตี นะ เกา เตอ_ ฌางัน ลาลู ปี ลือปัซ เดะ ปราโซฮ นะ เกา เลอ. 4กะฆีเตอ กู นะ อาเมด อาเย มาแรฮ กิดีกิ_ นะ บาโซฮ กากี นะ กาเญา_ นะ บรี กาเญา บราดู รือมัย_ เดะ บาวัฮ ปูโฮด กายู อีนี เลอ. 5กู นะ ปี อาเมด บารัก มากัด มาแรฮ_ บรี กะ กาเญา_ นะ บรี กาเญา บือเลฮ บราดู รือมัย ดูลู_ บารู นะ บือเลฮ บือฌาลัด ปี ปูลัก. กะฮามีๆ โปด_ กาเญา มาแรฮ กะ ซือมียา นู ฌาดี ปราโซฮ นะ กาเญา ดัฮ”_ อับราฮัม ญา จะ.
กะฆีเตอ กูญา ตีฆา อูรัก มือเลา จะ_ “บอฮ. บูวัจ บือกะ เกา มือเลา เลอ.”
6กะฆีเตอ อับราฮัม ญา ฆางู มาโซะ ปี เดะ รูมัฮ กาฌัก กาเยด_ มียา ซารา บีนี นะ ญา_ มือเลา จะ_ “งัจบางัจ เลอ_ อาเมด ฆาโนก นู บาฌิ_ ตีฆา โทก_ มาแรฮ กือปิ_ บูวัจ โกะ ตือโปก.” 7กะฆีเตอ อับราฮัม โปด_ บลารี ปี กะ กาวัด ลือมู_ อาเมด อานะ ลือมู นู ลือมะ ซา อีโกยํ_ บรี กะ ปราโซฮ ซืออูรัก_ บรี ญา บูนอฮ บูวัจ อาเย ฆูลัย. 8ญา อาเมด อาเย ดาดา ลือมู_ ฌางัน อานะ ลือมู นู บูวัจ บรี มาซะ ดัฮ_ มาแรฮ ตืองะ โซะ ฮือลด กูญา ตีฆา อูรัก. กาลา กูญา ตืองัฮ มากัด เตอ_ ญา อาดา บือดีรี รูโซะ กูญา_ เดะ บาวัฮ ปูโฮด กายู เลอ.
9กูญา ตาญา อับราฮัม จะ_ “ซารา_ บีนี นะ เกา_ อาดา ปัจ ดีฮา?”
ญา ตีกัฮ จะ_ “อาดา เดะ ดาลับ รูมัฮ กาฌัก กาเยด.”
10กีลากี ซา อูรัก เดะ ดาลับ ตีฆา อูรัก มือเลา จะ_ “ซูโงฮ เลอ_ ตาโฮด ฮือลด_ กู นะ มาแรฮ มียา เกา ปูลัก. ซารา_ บีนี นะ เกา เตอ_ ญา นะ อาดา นานะ กีลากี ซืออูรัก.”
อีซี ซารา เตอ_ อาดา มือนีงัย โซะ ปีตู รูมัฮ กาฌัก กาเยด_ บลากัก ญา. 11โซะ อับราฮัม ฌางัน ซารา เตอ_ กูญา ตูฮา ดัฮ. ดารัฮ นู ตรือเบะ บีลัก บูลัด นะ ซารา โปด_ ฮอย ดัฮ. 12กะฆีเตอ ซารา โปด_ ญา บรีงัจ บือฆือละ เดะ ฮาตี_ จะ_ “กู ตูฮา ดัฮ โบะ. ลากี นะ กู โปด_ ตูฮา ฌูฆา ดัฮ. กู นะ อาดา ลาฆู ซูกา ฮาตี ลาฆี เฆอ?”
13ตูฮัด บือซัยํ เดะ อาตัซ ญา มือเลา ฌางัน อับราฮัม จะ_ “บูวัจ นามา ซารา ญา บือฆือละ_ มือเลา จะ_ กู ตูฮา ดัฮ_ กู นะ บือเลฮ นานะ กะฮามี เลอ? 14อาดา ลาฆู นามา เลอ_ นู ปือมือฆัฮ นะ ตูฮัด นะ บูวัจ เตด บือเลฮ? ดัฮ รอจ อารี นู บือฌาญี_ กู นะ มาแรฮ มียา เกา. มูเซด อีนี เดะ ตาโฮด ฮือลด_ ซารา นะ บือเลฮ นานะ กีลากี ซา อูรัก.”
15ตาปี ซารา เตอ_ ญา ตาโกจ_ บือปูลัซ จะ_ “กู ฮอย เตด บือฆือละ_ ตูฮัด เออ.”
ตูฮัด ตีกัฮ จะ_ “ฌางัน นะ บือปูลัซ. เกา บือฆือละ ซูโงฮ เลอ.”
อับราฮัม บือซาโวจ กะ ตูฮัด
16กะฆีเตอ_ อับราฮัม บือฌาลัด อาตัจ กูญา ตีฆา อูรัก_ บรี ตรือเบะ เดะ ตือปัจ อีตู_ บือฌาลัด ฌู บือฆารี นังฆรี โซโดม. 17ตูฮัด บือซัยํ เดะ อาตัซ มือเลา ซามา ญา จะ_ “บือฆูนา ดัฮ เฆอ_ นู กู นะ บูนี ลาฆู นู กู นะ บูวัจ เตอ_ ตีเมา บรี อับราฮัม ตาฮู? 18กรานา จะ อับราฮัม นะ ฌาดี บักซา นู บือซัยํ_ ตือฆัยํ อูรัจ โตระ. บักซา อาซิก ซือมูฮา โปด_ นะ บือเลฮ ซาโมจ ลาฆู ซือลามัจ_ กรานา ญา เลอ. 19กรานา กู บือเลฮ ปีเลฮ ญา ดัฮ_ บีดา ญา นะ บือเลฮ มือเลา กือมัซๆ ฌางัน โกะ อานะ จูจู_ ฌางัน โกะ นะบรานะ มาแรฮ ซือรูโลยํ_ บรี ปือบือลา ฌาฆา ฌาลัด นะ ตูฮัด บือซัยํ เดะ อาตัซ_ บรี บูวัจ ลาฆู บาฌิ ตือปัจ_ ลาฆู รือมัก_ บีดา ตูฮัด นะ ฮาลัย บรี กะ อับราฮัม_ บือกะ นู ญา บือฌาญี ดัฮ ฌางัน ญา”_ ตูฮัด ญา จะ.
20กะฆีเตอ ตูฮัด บือซัยํ เดะ อาตัซ มือเลา จะ_ “ซือวารา มือเลา อาดู นังฆรี โซโดม_ ฌางัน นังฆรี โกโมรา เตอ_ บูริ ตือลาลู. ดูซา นะ กูญา โปด_ บาญะ ซูโงฮ เลอ. 21กะฆีเตอ กู นะ ตูโรด ปี ลีฮัจ จะ_ กูญา อีตู บูวัจ ซาลัฮ ตูโรจ กะ ปือมือเลา อาดู_ นู มาแรฮ รอจ กะ กู เฆอ เตด? ดัฮ เตด_ กู โปด นะ บือเลฮ ตาฮู”_ ตูฮัด ญา จะ.
22โกะ กีลากี ดูวา อูรัก เตอ_ กูญา ตรือเบะ เดะ ตือปัจ อีตู_ บือฌาลัด ลีเกาะ ปี_ นะ รอจ กะ นังฆรี โซโดม_ ตาปี อับราฮัม ญา อาดา บือดีรี_ นาตี ตูงู ตูฮัด บือซัยํ เดะ อาตัซ ลาฆี เลอ. 23อับราฮัม มาโซะ มาแรฮ ดาปิก_ มือเลา ฌางัน ตูฮัด จะ_ “ตูฮัด เออ_ เกา นะ บูวัจ บรี ซือมียา บาฌิ ตือปัจ_ ฌาฮานัม มารือมา ฌางัน ซือมียา ฌาฮัจ เฆอ? 24มีเซ จะ อาดา ซือมียา บาฌิ ตือปัจ ลีมา ปูโลฮ (50) อูรัก_ ดูโดะ เดะ นังฆรี อีตู เตอ_ ตูฮัด นะ บูวัจ บรี นังฆรี อีตู รูโตฮ_ ตีเมา นะ อาเกะ ซาลัฮ_ กรานา ลีฮัจ กะ ซือมียา ลีมา ปูโลฮ อูรัก_ นู อาดา ดูโดะ เดะ นังฆรี อีตู เฆอ? 25มีตา บรี ตูฮัด ฌางัน นะ อีงัจ_ นู นะ บูวัจ ลาฆู กะฆีเตอ เลอ. ฌางัน นะ อีงัจ นู นะ บูนอฮ ซือมียา บาฌิ ตือปัจ มารือมา ฌางัน ซือมียา ฌาฮัจ_ นู นะ บูวัจ กะ ซือมียา บาฌิ ตือปัจ ซือรูปา กะ ซือมียา ฌาฮัจ. มีตา เดะ ตูฮัด_ ฌางัน นะ บูวัจ กะฆีเตอ เลอ. ตูฮัด นู ฮูโกบ ดือนียา ราตา_ นะ เตด บูวัจ ลาฆู นู บาฌิ ตือปัจ เฆอ?” ญา จะ.
26ตูฮัด บือซัยํ เดะ อาตัซ มือเลา จะ_ “เดะ นังฆรี โซโดม เตอ_ ดัฮ กู ดาปัจ ซือมียา บาฌิ ตือปัจ_ ลีมา ปูโลฮ อูรัก_ กู นะ อาเกะ ซาลัฮ นังฆรี อีตู_ ซือนังฆรี_ กรานา ลีฮัจ กะ กูญา.”
27อับราฮัม ตีกัฮ จะ_ “มีตา บราลัฮ เลอ_ กู นี ฌาดี อานะ ตานัฮ ฮาบู เลอ. กู เตด บือฆูนา นะ ตาญา ตูฮัด. ตาปี กู มาแรฮ มือเลา ฌางัน ตูฮัด ดัฮ. 28มีเซ จะ_ ลีมา ปูโลฮ อูรัก อีตู_ ปูตุซ ลีมา อูรัก ดัฮ_ ตูฮัด นะ บูวัจ บรี นังฆรี อีตู รูโตฮ เฆอ_ กรานา ฮอย ลีมา อูรัก อีตู?”
ตูฮัด ตีกัฮ จะ_ “ดัฮ กู นะ ดาปัจ ซือมียา_ ปัจ ปูโลฮ ลีมา (45) อูรัก นู บาฌิ ตือปัจ_ ตือปัจ อีตู_ กู นะ เตด บูวัจ บรี รูโตฮ.”
29ญา มือเลา ฌางัน ตูฮัด ปูลัก จะ_ “มีเซ ตูฮัด ดาปัจ ปัจ ปูโลฮ (40) อูรัก ปัจ อีตู_ ตูฮัด นะ บูวัจ กะฮามี?”
ตูฮัด ตีกัฮ จะ_ “กรานา ลีฮัจ กะ ซือมียา ปัจ ปูโลฮ อูรัก อีตู_ กู นะ เตด บูวัจ นามา เลอ.”
30กะฆีเตอ อับราฮัม มือเลา ฌางัน ตูฮัด จะ_ “มีตา ฌางัน บรี ตูฮัด มูซัยํ เลอ. กู นะ มีตา ตาญา ตูฮัด จะ_ มีเซ ดัฮ ตูฮัด ดาปัจ แนฮ ตีฆา ปูโลฮ (30) อูรัก เดะ ตือปัจ อีตู เตอ_ นะ ฌาดี กะฮามี?”
ตูฮัด ญา ตีกัฮ จะ_ “ดัฮ กู ดาปัจ ซือมียา_ ตีฆา ปูโลฮ อูรัก ปัจ อีตู_ กู นะ เตด กรัจ ฮูโกบ กูญา เลอ.”
31อับราฮัม มือเลา จะ_ “มีตา บราลัฮ เลอ_ นู กู เตด บือฆูนา นะ มือเลา ฌางัน ตูฮัด ลาฆี. มีเซ ดัฮ ดาปัจ แนฮ ดูวา ปูโลฮ (20) อูรัก_ ปัจ อีตู เตอ_ ตูฮัด นะ บูวัจ กะฮามี เลอ?”
ตูฮัด ญา ตีกัฮ จะ_ “กรานา ลีฮัจ กะ ซือมียา ดูวา ปูโลฮ อูรัก อีตู โปด_ กู นะ ตีเมา บูวัจ บรี นังฆรี อีตู ฌาฮานัม เลอ.”
32อับราฮัม มือเลา จะ_ “โอ ตูฮัด เออ_ ฌางัน บรี ตูฮัด มูซัยํ เลอ. กู นะ มือเลา ปูลัก_ ซือกาลี อีนี. มีเซ จะ_ อาดา ซือปูโลฮ (10) อูรัก ดัฮ_ ตูฮัด นะ บูวัจ นามา?”
ตูฮัด ตีกัฮ จะ_ “กรานา ลาฆู ซือมียา ซือปูโลฮ อูรัก อีตู_ กู เตด ปรูโตฮ นังฆรี อีตู ลาฆี เลอ.”
33ตานา ตูฮัด บือซัยํ เดะ อาตัซ_ มือเลา ฌางัน อับราฮัม_ ฮาบิฮ ดัฮ_ ญา ลาลู ปี. ตาปี อับราฮัม บาลิ ปี_ กะ รูมัฮ นะ ญา.
Currently Selected:
ลามูลา 18: ULBIBLE
Highlight
Share
Copy
Want to have your highlights saved across all your devices? Sign up or sign in
