ลามูลา 19
19
ลาฆู ตะอารัฮ โตระ นะ ลูมอฮ นังฆรี โซโดม
1โซะ ฮูลู บาลัก นะ ตูฮัด_ ดูวา อูรัก เตอ_ มาแรฮ รอจ กะ นังฆรี โซโดม_ เดะ วะตู ปะฮือญา. โลด ญา ตืองัฮ ดูโดะ_ เดะ ปีตู นังฆรี. ตานา โลด ลีฮัจ กูญา ดูวา อูรัก_ ญา บีกัซ ปี ซาโมจ กูญา_ มือนูโนะ ตือมะ มูคา_ รอจ กะ ตานัฮ 2มือเลา กะ กูญา จะ_ “ตกเก เออ_ กู ฌาดี ปราโซฮ นะ กาเญา เลอ. มีตา เดะ กาเญา มาโซะ กะ รูมัฮ นะ กู. โฌฮ เลอ_ มือนูปัก ปัจ อีตู_ มาลับ อีนี. กู นะ บาโซฮ กากี_ นะ กาเญา. วะตู ปาฆี_ บรี กาเญา บีกัซ บือฌาลัด ปี ปูลัก เลอ.”
ตาปี กูญา ตีกัฮ จะ_ “เตด ปายัฮ เลอ. มาลับ อีนี_ กามี นะ ตีโนะ เดะ ลามัน นังฆรี.”
3ตาปี โลด มือเลา กือมัซๆ_ บรี กูญา ปี ดูโดะ_ เดะ รูมัฮ นะ ญา. กะฆีเตอ_ กูญา อาเลฮ ปี_ มาโซะ กะ รูมัฮ นะ โลด. ญา บูวัจ บารัก มากัด_ บรี กะ กูญา_ ซาลัย ตือโปก โรตี นู ฮอย ราฆี ฌูฆา_ บรี กะ กูญา มากัด.
4ตาปี กาลา กูญา เตด ดัด ตีโนะ ลีนา ลาฆี_ ลูมอฮ กีลากี นังฆรี โซโดม อีตู_ กูญา ปาคัจ มาแรฮ บือดีรี_ กือลีลิก รูมัฮ นะ โลด. กูญา มาแรฮ ฆือนะ ซือมูฮา_ โกะ อูรัก มูดา ฌางัน โกะ อูรัก ตูฮา ฌูฆา. 5กูญา ปาคัจ บลาโลก โลด_ มือเลา จะ_ “ลูมอฮ กีลากี นู มาแรฮ ซารี เกา เตอ_ มาลับ อีนี_ ดูโดะ ปัจ ดีฮา? บาวา กูญา มาแรฮ_ บรี กะ กามี เลอ. กามี นะ บือซามา ฌางัน กูญา เลอ.”
6กะฆีเตอ โลด_ ญา ตรือเบะ โซะ ปีตู_ ปี กะ กูญา_ ซาแมน ตูโดก ปีตู รูมัฮ 7มือเลา ฌางัน กูญา จะ_ “อาดี บราดี เออ_ ฌางัน นะ บูวัจ ลาฆู ฌาฮัจ_ กะฆีเตอ เลอ. 8นี เลอ_ กู อาดา นานะ นีบีนี ราดารา_ ดูวา อูรัก_ นู เตด ดือละ ตีโนะ ฌางัน กีลากี เลอ. กู นะ อาเมด นานะ นีบีนี อีตู_ มาแรฮ บรี กะ กาเญา. กาเญา นะ บูวัจ กะฮามี ฌางัน กูญา_ ตูโรจ บือกะ ฮาตี นะ กาเญา ซูกา เลอ. ตาปี ฌางัน บูวัจ นามา โกะ กีลากี_ ดูวา อูรัก อีนี_ ซาเบะ กูญา มาแรฮ มือนูปัก_ เดะ รูมัฮ นะ กู ดัฮ”_ ญา จะ.
9ตาปี ลูมอฮ กูญา มือเลา จะ_ “เกา เตอ_ อูโนยํ ปี เลอ.”_ กูญา มือเลา มืออารับ จะ_ “อูรัก อีนี มาแรฮ ปัจ อีนี_ นะ มือนูปัก. ตาปี ญา อีงัจ นะ ฌาดี ซือมียา กรัจ ฮูโกบ เลอ. กะฆีเตอ_ กามี นะ บูวัจ ลาฆู ฌาฮัจ ฌางัน เกา_ ลือเบฮ เดะ ลาฆู นะ บูวัจ_ ฌางัน กูญา ดูวา อูรัก.”
กะฆีเตอ_ กูญา อีตู ตูละ โลด โตระๆ_ มาแรฮ ดาปิก บีดา นะ ปรูโตฮ ปีตู รูมัฮ. 10ตาปี ซือมียา นู มือนูปัก ดูวา อูรัก อีตู_ อาเงา ตางัน นะ กูญา_ รือฆัก โลด_ บรี มาโซะ เดะ รูมัฮ ฌางัน กูญา_ ตูโดก ปีตู บูวัก. 11กูญา ดูวา อูรัก บูวัจ บรี ลูมอฮ กีลากี นู อาดา เดะ ฮือลด ปีตู รูมัฮ_ มาตา บูตา ดัฮ. กูญา ซือมูฮา_ เตด จะ อูรัก มูดา ฌางัน อูรัก ตูฮา โปด_ กูญา มือราบา ซารี ปีตู_ ฌู รือมัย ฮาตี_ ตาปี เตด ดาปัจ เลอ.
นังฆรี โซโดม ฌางัน นังฆรี โกโมรา กือนา ปรูโตฮ ดัฮ
12กะฆีเตอ_ โกะ ซือมียา ดูวา อูรัก อีตู_ มือเลา ฌางัน โลด จะ_ “เกา อาดา ซือมียา อาซิก_ นู ดูโดะ ปัจ อีนี เฆอ? อาดา มือนาตู เฆอ_ นานะ กีลากี_ นานะ นีบีนี เฆอ? อาดา โกะ นะบรานะ อาซิก เดะ นังฆรี เฆอ? กือนา บาวา กูญา_ บรี ตรือเบะ เดะ ตือปัจ อีนี เลอ_ 13ซาเบะ แกะลาฆี_ กามี นะ ปรูโตฮ ตือปัจ อีนี_ บรี ฮาบิฮ. อาดา ซือวารา มืออาดู ลูมอฮ ซือมียา เดะ นังฆรี อีนี_ ฌาดี ซือวารา มือฮาโมก_ รอจ กะ ตูฮัด บือซัยํ เดะ อาตัซ. กะฆีเตอ_ ตูฮัด ซูโรฮ กามี_ บรี มาแรฮ ปรูโตฮ นังฆรี อีนี_ บรี ฮาบิฮ”_ กูญา จะ.
14กะฆีเตอ_ โลด ปี ซารี มือนาตู ดูวา อูรัก_ นู ญา นะ บือนีกัฮ_ ฌางัน นานะ นีบีนี นะ ญา. ญา มือเลา จะ_ “บีกัซ เลอ_ ตรือเบะ เดะ ตือปัจ อีนี เลอ. แกะลาฆี_ ตูฮัด บือซัยํ เดะ อาตัซ นะ บูวัจ บรี นังฆรี อีนี_ บือนาซา ฮาบิฮ.”_ ตาปี กูญา อีงัจ จะ_ ญา มือเลา ซิอูซิ.
15ตานา วะตู มูกัยํ_ ฮูลู บาลัก ดูวา อูรัก_ ปือฆางู โลด_ มือเลา จะ_ “บีกัซ เลอ. บาวา บีนี นะ เกา_ ฌางัน นานะ นีบีนี ดูวา อูรัก_ นู อาดา ปัจ อีนี เตอ_ บาวา บือปี เลอ. ตาโกจ จะ เกา นะ ฌาฮานัม_ กาลา นังฆรี อีนี_ นะ กือนา กรัจ ฮูโกบ” กูญา จะ.
16ตาปี โลด_ ญา ลามัจ นะ ปี. กะฆีเตอ_ กูญา ดูวา อูรัก_ ปือฆัก ตางัน นะ ญา_ ฌางัน บีนี_ ฌางัน นานะ นีบีนี ดูวา อูรัก_ อีเระ กูญา ปี_ ซาเบะ ตูฮัด บือซัยํ เดะ อาตัซ_ ตือจีฮัด กะ โลด. กะฆีเตอ_ โกะ ฮูลู บาลัก_ บาวา ญา บือปี_ บรี ลือปัซ เดะ นังฆรี อีตู. 17ตานา บาวา ปี โซะ ลูวัยํ นังฆรี ดัฮ_ ดูวา อูรัก อีตู ปือซัด จะ_ “ลารี เลอ_ บรี ลือปัซ เดะ ลาฆู มาตี. ฌางัน กรือแลฮ ลีฮัจ กะ โซะ บลากัก เลอ. ฌางัน บราดู_ เดะ ตือปัจ ตานัฮ ซามา อีนี ลาฆี. ลารี ปี เลอ_ กะ โซะ บูเกะ_ ตาโกจ จะ_ เกา นะ ฌาฮานัม”_ กูญา จะ.
18ตาปี โลด มือเลา ฌางัน ดูวา อูรัก จะ_ “โอ ตกเก เออ_ ฌางัน บรี ฌาดี กะฆีเตอ เลอ. 19ลีฮัจ เลอ_ กู นี เลอ_ นู ฌาดี ปราโซฮ นะ กาเญา_ ฌาดี ซือมียา นู กือนา เดะ ฮาตี นะ กาเญา. กาเญา ฮาตี บาฌิ ซูโงฮ ฌางัน กู_ ตูโลก กู บรี ฮีโดะ เลอ. ตาปี กู นะ ลารี รอจ กะ บูเกะ เตด บือเลฮ_ ตาโกจ จะ_ ลาฆู ฌาฮานัม อีตู นะ ตูโรจ กู ดัด_ นะ บูวัจ บรี กู มาตี เลอ. 20ลีฮัจ เลอ_ โซะ อีตู_ อาดา นังฆรี ซา นังฆรี_ นู ดาปิก. บรี กู ลารี ปี โซะ อีตู_ ฌาดี นังฆรี นู ดือมิ โปด. มีตา บรี กู นะ ลารี ปี_ กะ นังฆรี นู ดือมิ อีตู. กะฆีเตอ_ กู นะ ฮีโดะ_ เตด มาตี ดัฮ”_ ญา จะ.
21ฮูลู บาลัก มือเลา ฌางัน โลด จะ_ “บอฮ เลอ_ ปี บูวัจ ตูโรจ บือกะ นู เกา มีตา. กู นะ เตด ปรูโตฮ นังฆรี_ นู เกา มือเลา ซีงี. 22จือปัจๆ เลอ_ ลารี ปี กะ นังฆรี อีตู_ ซาเบะ กู นะ บูวัจ นามา ลาฆี เตด บือเลฮ_ ฌู ตือดะ เกา นะ ปี_ รอจ กะ โซะ อีตู” ญา จะ.
กะฆีเตอ_ กูญา บลาโลก ปือนามา นะ นังฆรี อีตู_ จะ โซอา#19.22 ปือนามา “โซอา”_ ฌาดี จะ_ “นู ดือมิ.”.
นังฆรี โซโดม ฌางัน นังฆรี โกโมรา_ บือนาซา ฮาบิฮ ดัฮ
23ตานา มาตา อารี ญาแญะ_ โลด มาแรฮ รอจ กะ นังฆรี โซอา ดัฮ. 24กะฆีเตอ ตูฮัด บือซัยํ เดะ อาตัซ_ บูวัจ บรี อาดา บลีรัก ฌางัน อาปี_ ฆูโฆยํ ตูโรด มาแรฮ เดะ โซะ ลาแงะ_ มาแรฮ กะ นังฆรี โซโดม ฌางัน นังฆรี โกโมรา เลอ. 25ตูฮัด_ ญา ปรูโตฮ โกะ นังฆรี อีตู_ บูวัจ บรี บือนาซา_ เดะ โซะ ตือปัจ ตานัฮ ซามา ซือมูฮา_ ฌางัน ลูมอฮ ซือมียา นังฆรี อีตู ซือมูฮา_ ฌางัน บือนา ซือมูฮา_ นู บือตูโมฮ เดะ ตานัฮ โซะ อีตู. 26ตาปี บีนี นะ โลด_ นู อาดา โซะ บลากัก โลด_ ญา อาเลฮ ปี ลีฮัจ โซะ บลากัก. ญาวา นะ บีนี_ ญา กาเลฮ ฌาดี ตีฮัก ฆารับ ดัฮ.
27วะตู บือบีฮัก นะ ซียัก_ อับราฮัม ปี กะ ตือปัจ_ นู ญา บือดีรี โซะ ฮือลด มูคา นะ ตูฮัด บือซัยํ เดะ อาตัซ. 28ญา ตีญุง ลีฮัจ บือฆารี นังฆรี โซโดม ฌางัน นังฆรี โกโมรา เตอ_ ลีฮัจ กะ ตือปัจ ตานัฮ ซามา อีตู ฌูฆา_ ลีฮัจ จะ_ อาดา อาซะ อาปี_ เดะ นังฆรี อีตู_ บือฌาฮุยํ บาญะ_ ซือรูปา อาซะ อาปี เดะ ตูกู บือซัยํ นู บือฌาฮุยํ. 29กะฆีเตอ เลอ_ ตานา ตูฮัด เดะ อาตัซ บูวัจ บรี โกะ นังฆรี_ เดะ ตือปัจ ตานัฮ ซามา อีตู_ บือนาซา ฮาบิฮ ดัฮ_ ญา อีงัจ กะ อับราฮัม_ นู บาวา โลด ตรือเบะ ปี_ บรี ลือปัซ เดะ นู บือนาซา อีตู_ วะตู ตูฮัด ปรูโตฮ โกะ นังฆรี_ นู โลด ดูโดะ อีตู.
ลาฆู บือฌาดี นะ บักซา โมอับ ฌางัน บักซา อัมโมน
30กะฆีเตอ โลด_ ญา ตรือเบะ เดะ นังฆรี โซอา_ ญาแญะ ปี กะ อาตัซ บูเกะ_ ฌางัน นานะ นีบีนี ดูวา อูรัก นะ ญา_ กรานา กูญา ตาโกจ นู นะ ดูโดะ เดะ นังฆรี โซอา. กะฆีเตอ ญา มาโซะ ปี ดูโดะ เดะ ฆูฮา_ ฌางัน นานะ นะ ญา ดูวา อูรัก. 31นานะ นู กากา มือเลา ฌางัน มิ เดะ ญา จะ_ “ปะ เดะ กีตา โปด ตูฮา ดัฮ. ฮอย ซาปา นะ มาแรฮ มีตา กีตา_ ตูโรจ กะ ฮาดัจ เดะ ดือนียา เลอ. 32บรี กีตา บืออาฌะ ปะ เดะ กีตา_ โอะ อาระ อางุน. ลือปัซ อีตู กีตา นะ ปี ตีโนะ ฌางัน ญา_ บีดา กีตา นะ บือเลฮ ฌาฆา บือแนฮ นะ กีตา_ นู ตูโรด มือนูโรด เดะ ปะ นะ กีตา.”
33เดะ มาลับ อีตู_ นานะ นีบีนี ดูวา อูรัก_ บรี กะ ปะ เดะ กูญา มากัด อาระ อางุน. กะฆีเตอ นานะ นู กากา โปด_ ปี ตีโนะ ฌางัน ปะ เดะ ญา. ปะ เดะ ญา ฮอย เตด ตาฮู จะ_ นานะ มาแรฮ ตีโนะ กาลา_ บีกัซ กาลา.
34ตานา จรัฮ ปาฆี_ นู กากา มือเลา ฌางัน อาดี จะ_ “มาลับ ฮือญา กู ตีโนะ ฌางัน ปะ เลอ. บรี กีตา อาเมด อาระ อางุน_ บรี กะ ปะ มากัด ปูลัก_ บรี กะ เกา มาโซะ ปี ตีโนะ ฌางัน ญา_ บีดา กีตา นะ บือเลฮ ปือบือลา บือแนฮ นะ กีตา_ นู ตูโรด มือนูโรด เดะ ปะ นะ กีตา.” 35กะฆีเตอ กูญา ดูวา อูรัก บรี กะ ปะ เดะ กูญา มากัด อาระ อางุน_ เดะ มาลับ อีตู ฌูฆา. นู อาดี โปด_ ปี ตีโนะ ฌางัน ปะ_ ตาปี ปะ เตด ตาฮู จะ_ นานะ มาแรฮ ตีโนะ กาลา_ บีกัซ กาลา.
36กะฆีเตอ_ นานะ ดูวา บราดี นะ โลด โปด_ บือโปรจ ฌางัน ปะ เดะ ญา ตะอาซิก. 37นานะ นู กากา เตอ_ ญา บือโปรจ นานะ กีลากี ซืออูรัก_ ปือนามา จะ_ โมอับ. ญา ฌาดี บีลาแก นะ ลูมอฮ โมอับ_ ฌู ตือดะ รอจ กะ ฮาดัจ อีนี. 38โซะ นู อาดี โปด_ ญา บือโปรจ บือเลฮ นานะ กีลากี ฌูฆา_ ปือนามา จะ_ เบนอัมมี. ญา ฌาดี บีลาแก นะ ลูมอฮ อัมโมน_ ฌู ตือดะ รอจ กะ ฮาดัจ อีนี เลอ.
Currently Selected:
ลามูลา 19: ULBIBLE
Highlight
Share
Copy
Want to have your highlights saved across all your devices? Sign up or sign in
