ลามูลา 20
20
อับราฮัม ฌางัน ซารา เดะ นังฆรี เกรัยํ
1ตะเดะ อีตู_ อับราฮัม ฌาลัด ปี_ กะ นังฆรี โซะ บารัจ ดายา_ ปี ดูโดะ ปัจ อีตู เดะ ตืองัฮ ตูโปะ คาเดด_ ฌางัน ตูโปะ ชูระ_ ญา ปี มือนูปัก ดูโดะ เดะ นังฆรี เกรัยํ. 2อับราฮัม มือเลา ปาซัน ซารา_ บีนี นะ ญา_ จะ_ “ญา ฌาดี อาดี เดะ กู.”_ กะฆีเตอ อาบีเมเลก_ นู ฌาดี ราฌา นะ นังฆรี เกรัยํ เตอ_ ซูโรฮ ซือมียา ปี อาเมด ซารา มาแรฮ. 3ตาปี โซะ มาลับ อีตู_ ราฌา มีปี ลีฮัจ ตูฮัด เดะ อาตัซ มาแรฮ_ มือเลา ฌางัน ญา จะ_ “เกา ฆาโดฮ มาตี ซูโงฮ_ ซาเบะ นีบีนี นู เกา อาเมด มาแรฮ เตอ_ ญา ฌาดี บีนี นะ ซือมียา อาซิก ดัฮ.”
4โซะ อาบีเมเลก เตอ_ เตด บือเลฮ มาโซะ ปี มียา นีบีนี อีตู ลาฆี. กะฆีเตอ_ ญา มือเลา จะ_ “โอ ตูฮัด เออ_ ตูฮัด นะ บูนอฮ ลูมอฮ ซือมียา นู ฮอย ลาฆู ซาลัฮ เฆอ?_ 5ซือมียา อีตู ตะอาซิก_ บือเลฮ มือญาเระ กะ กู จะ_ ‘ญา ฌาดี อาดี เดะ กู’. นีบีนี อีตู โปด มือเลา ฌูฆา จะ_ ‘ญา ฌาดี กากา เดะ กู’. กู บูวัจ กะฆีนี ฌางัน ฮาตี นู รือมัก_ ฮอย ลาฆู ซาลัฮ เลอ”_ ญา จะ.
6เดะ ลาฆู มีปี อีตู_ ตูฮัด มือเลา ฌางัน ราฌา จะ_ “เออ_ กู นี ตาฮู จะ_ เกา บูวัจ ลาฆู กะฆีนี_ ฌางัน ฮาตี นู รือมัก. กะฆีเตอ_ กู นี เลอ_ นู กือตัก_ ตีเมา บรี เกา บูวัจ ดูซา_ โซะ ฮือลด กู. กะฆีเตอ_ กู เตด บรี เกา ปี กือนา ญาวา นะ ญา. 7เกา กือนา บรี นีบีนี อีตู_ ปาเระ ปี_ กะ ลากี นะ ญา. กีลากี อีตู ฌาดี ซือมียา ตูโดฮ ปือมือเลา ลาฆู นะ กู. ญา นะ บือซาโวจ กรานา เกา_ บรี เกา เตด มาตี. ตาปี ดัฮ เกา เตด บรี นีบีนี อีตู_ ปาเระ ปี กะ ลากี นะ ญา_ เกา กือนา ตาฮู จะ_ เกา นะ มาตี ซูโงฮ_ ฌางัน ลูมอฮ ซือมียา นะ เกา_ ซือมูฮา”_ ตูฮัด ญา จะ.
8กะฆีเตอ_ ราฌา ญา บีกัซ วะตู บือบีฮัก มาตา อารี นะ ตรือเบะ. ญา บลาโลก โกะ ลูมอฮ ปราโซฮ นะ ญา_ บรี ตาฮู ลาฆู อีนี ซือมูฮา_ กะ กูญา. กูญา โปด_ ปาคัจ ตาโกจ โตระ. 9กะฆีเตอ_ ราฌา ปาเงน อับราฮัม มาแรฮ_ ตาญา จะ_ “เกา เลอ_ เกา บูวัจ นามา กะ กามี?_ กู บูวัจ ดูซา ลาฆู นามา กะ เกา_ นู เกา บูวัจ บรี กู_ ฌางัน นังฆรี นะ กู_ ดูซา บาญะ_ กะฆีนี ดัฮ? เกา เตอ_ บูวัจ ลาฆู นู ฮอย เตด ตือปากัย เลอ.” 10ราฌา มือเลา ลาฆี_ ฌางัน อับราฮัม จะ_ “เกา อีงัจ กะฮามี เลอ_ นู เกา บูวัจ กะฆีนี?”_ ราฌา ญา จะ.
11อับราฮัม ตีกัฮ จะ_ “กู บูวัจ กะฆีเตอ_ ซาเบะ กู อีงัจ จะ_ โซะ อีนี_ ฮอย ซือมียา ตูเฮะ กะ ตูฮัด ลาลู. กูญา นะ บูนอฮ กู_ ซาเบะ กูญา นะ อาเมด บีนี นะ กู. 12กะฆีเตอ ฌูฆา_ ญา เตอ_ ฌาดี อาดี เดะ กู ซูโงฮ เลอ. อาดา ปะ แนฮ ซา_ ตาปี มะ ซอก ซา อูรัก. กะฆีเตอ_ ญา เตอ_ บือเลฮ ฌาดี บีนี นะ กู ดัฮ. 13กาลา ตูฮัด บาวา กู_ บรี บือฌาลัด มาแรฮ_ ดาตัก เดะ รูมัฮ นะ ปะ เดะ กู_ กู มือเลา ฌางัน บีนี นะ กู จะ_ ‘เกา กือนา ฮาตี บาฌิ ฌางัน กะ กู กะฆีนี_ จะ_ โซะ ดีฮา นู กีตา นะ ปี_ บรี เกา มือเลา จะ_ ญา ฌาดี กากา เดะ กู เลอ’ ”_ ญา จะ.
14กะฆีเตอ ราฌา อาบีเมเลก_ ญา อาเมด กาวัด กาเมก_ กาวัด ลือมู_ ฌางัน ปราโซฮ กีลากี นีบีนี_ มาแรฮ_ บรี กะ อับราฮัม. ญา บาวา ซารา_ บีนี นะ อับราฮัม มาแรฮ_ อาตัจ ปาเระ กะ ญา ฌูฆา. 15ราฌา มือเลา ฌางัน อับราฮัม จะ_ “ลีฮัจ เลอ_ นังฆรี นะ กู ซือมูฮา_ อาดา โซะ ฮือลด มูคา นะ เกา ดัฮ. เกา นะ ปี ดูโดะ เดะ ตือปัจ ดีฮา เดะ นังฆรี_ ซูกา ฮาตี นะ เกา เลอ”_ ญา จะ. 16ราฌา มือเลา ฌางัน ซารา จะ_ “กู บือเลฮ บายัยํ กะ กากา เดะ เกา_ รีเงะ ปีระ อีนี_ ซือรีบู รีเงะ_ ฌาดี รือฆา บายัยํ ญาวา นะ เกา_ นะ บรี ซือมียา ซือมูฮา_ นู อาดา บือซามา ฌางัน เกา_ ลีฮัจ จะ_ เกา บาฌิ ดัฮ_ เตด กือนา นามา. นะ บรี ราตา ซือมียา_ ลีฮัจ จะ_ ลาฆู นะ เกา_ ซือลือซัย ดัฮ”_ ราฌา ญา จะ.
17กะฆีเตอ_ อับราฮัม บือซาโวจ กะ ตูฮัด. ตูฮัด โปด_ ญา ปือบือลา อาบีเมเลก_ ฌางัน บีนี นะ ญา_ ฌางัน โกะ ปราโซฮ นีบีนี นะ ญา ฌูฆา_ บรี ซือนัง ญาวา_ บรี กูญา ดูโดะ เดะ อาปี_ นานะ ลือปัซ บาฌิ ดัฮ. 18ซาเบะ ตูฮัด บือซัยํ เดะ อาตัซ บูวัจ บรี_ โกะ นีบีนี เดะ รูมัฮ นะ ราฌา อาบีเมเลก_ นะ ดูโดะ เดะ อาปี_ ฮอย เตด ลือปัซ ดัฮ. ตูฮัด บูวัจ กะฆีเตอ_ ซาเบะ ลาฆู นะ ซารา_ บีนี นะ อับราฮัม.
Currently Selected:
ลามูลา 20: ULBIBLE
Highlight
Share
Copy
Want to have your highlights saved across all your devices? Sign up or sign in
