ลามูลา 24
24
ลาฆู บือนีกัฮ นะ อีซัก ฌางัน เรเบคา
1อับราฮัม ตูฮา_ อูมอยํ บาญะ ตาโฮด ดัฮ. ตูฮัด บือซัยํ เดะ อาตัซ_ บือเลฮ บรี ซือลามัจ กะ ญา_ บรี บือนา บาฌิ ซือมูฮา. 2อับราฮัม ญา อาดา ปราโซฮ_ ซืออูรัก_ นู ตูฮา เดะ กาวัด. ญา ฌาดี ซือมียา ฮัจลีฮัจ_ บือนา โกะ บารัก นะ อับราฮัม_ ซือมูฮา. อับราฮัม มือเลา ฌางัน ปราโซฮ อีตู จะ_ “มาแรฮ เลอ_ บอฮ ตางัน นะ เกา_ เดะ บาวัฮ ปาฮา นะ กู#24.2 นู บูวัจ กะฆีนี ฌาดี ฮาดัจ นะ กูญา_ กาลา อีตู_ นู ฌาดี ลาฆู อาเกะ บือฌาญี บรี ตือตู ซูโงฮ_ นู นะ ฮอย เตด ซาเลด ลาลู.. 3เกา กือนา อาเกะ มือเลา บือซูปัฮ_ เดะ ปือนามา นะ ตูฮัด บือซัยํ เดะ อาตัซ_ นู ฌาดี ตูฮัด โซะ ลาแงะ_ ตูฮัด โซะ ดือนียา เตอ_ บรี เกา บือฌาญี จะ_ เกา นะ เตด อาเมด นีบีนี นะ บักซา คานาอัน_ นู กู ตืองัฮ มือนูปัก ดูโดะ อีนี_ บรี ฌาดี บีนี_ นะ นานะ นะ กู. 4เกา เลอ_ กือนา ปี กะ นังฆรี นะ กู_ ซารี นีบีนี_ เดะ ลูมอฮ นะบรานะ นะ กู เตอ_ บรี ฌาดี บีนี นะ อีซัก_ นานะ นะ กู”_ ญา จะ.
5ปราโซฮ อีตู มือญาเระ กะ ญา จะ_ “ดัฮ นีบีนี อีตู_ ตีเมา นะ ตูโรจ กู_ มาแรฮ โซะ อีนี_ กู นะ บูวัจ กะฮามี เลอ?_ นะ บาวา นานะ นะ เกา บาลิ_ กะ นังฆรี นู เกา ตีงัน มาแรฮ ดัฮ เฆอ?”
6อับราฮัม ตีกัฮ จะ_ “ฌางัน บาวา นานะ กีลากี นะ กู บือปี_ กะ โซะ อีตู เลอ. 7ตูฮัด บือซัยํ เดะ อาตัซ เตอ_ นู ตูฮัด เดะ ลาแงะ โซะ อาตัซ_ ญา บือเลฮ บาวา กู ตรือเบะ_ เดะ รูมัฮ ปะ เดะ กู_ เดะ นังฆรี นะ กู. ญา เลอ_ นู มือเลา ฌางัน กู_ อาเกะ มือเลา บือซูปัฮ จะ_ นะ บรี นังฆรี อีนี_ กะ บือแนฮ นะ กู เตอ. ญา เตอ_ นู นะ บรี ฮูลู บาลัก นะ ญา ปี ดูลู เดะ เกา_ นะ บรี เกา บือเลฮ นีบีนี ซืออูรัก_ เดะ โซะ อีตู_ ฌาดี บีนี นะ นานะ นะ กู. 8ตาปี_ ดัฮ นีบีนี อีตู_ ญา ตีเมา ตูโรจ เกา_ เกา นะ ลือปัซ เดะ ลาฆู นู เกา อาเกะ มือเลา บือซูปัฮ ดัฮ. ตาปี ฌางัน บาวา นานะ นะ กู_ บาลิ ปาเระ ปี กะ โซะ อีตู เลอ”_ อับราฮัม ญา จะ.
9กะฆีเตอ_ ปราโซฮ อีตู_ บอฮ ตางัน นะ ญา_ เดะ บาวัฮ ปาฮา นะ อับราฮัม_ กือปาลา นะ ญา_ ญา อาเกะ มือเลา บือซูปัฮ_ ปาซัน ลาฆู อีตู.
10กะฆีเตอ_ ปราโซฮ อีตู_ ญา อาเมด บือนา บารัก นู บาฌิ นู บรือฆา นะ อับราฮัม_ แนฮฌือแนฮ_ ปือโดะ เดะ บลากัก อูตัย_ ซือปูโลฮ อีโกยํ_ ตรือเบะ ปี ดัฮ_ รอจ กะ นังฆรี นะ นาโฮระ_ เดะ โซะ นังฆรี เมโซโปเตเมีย. 11ญา บรี โกะ อูตัย บราดู_ ตูกู ลูโตจ_ ดาปิก ตลาฆา_ เดะ ลูวัยํ นังฆรี อีตู. ฌาดี วะตู ปะฮือญา ดัฮ_ นู โกะ ลูมอฮ นีบีนี นะ มาแรฮ จือบุ อาเย. 12กะฆีเตอ_ ปราโซฮ อีตู_ ญา บือซาโวจ จะ_ “โอ ตูฮัด บือซัยํ เดะ อาตัซ_ ตูฮัด นะ อับราฮัม_ นู ฌาดี กือปาลา นะ กู เตอ_ กู มีตา เดะ ตูฮัด_ บรี ตูฮัด ซายัก กือฌะ กือมัซ กะ อับราฮัม_ กือปาลา นะ กู. อารี อีนี_ บรี กู ดาปัจ ลาฆู บาฌิ เลอ. 13ลีฮัจ เลอ_ กู บือดีรี ดาปิก มาตา อาเย อีนี_ อาดา โกะ ลูมอฮ นานะ ราดารา_ นะ นังฆรี อีนี_ กูญา มาแรฮ จือบุ อาเย. 14วะตู กู นะ มือเลา ฌางัน นีบีนี ราดารา_ ซืออูรัก_ มีตา บรี ญา ปือตูโรด ปีโยะ อาเย นะ ญา_ บรี กะ กู นะ โอะ อาเย เตอ_ ดัฮ นีบีนี อีตู มือเลา จะ_ ‘โอะ เลอ_ กู นะ จือบุ อาเย_ บรี กะ กาวัด อูตัย นะ เกา ฌูฆา.’_ กะฆีเตอ_ นะ บรี ลีฮัจ จะ_ นีบีนี อีตู เลอ_ นู ตูฮัด ปีเลฮ ดัฮ_ บรี ฌาดี บีนี นะ อีซัก_ ปราโซฮ นะ เกา. กะฆีเตอ_ กู นะ ตาฮู จะ_ เกา ซายัก กือฌะ กือมัซ_ กะ กือปาลา นะ กู”_ ญา จะ.
15ปราโซฮ อีตู_ ญา บือซาโวจ เตด กือตะ ฮาบิฮ_ อาดา นีบีนี ราดารา ซืออูรัก_ ปือนามา เรเบคา_ ญา มาแรฮ รอจ ดัฮ. ญา เตอ_ ฌาดี นานะ นะ เบทูเอน_ นู ฌาดี นานะ นะ มิละคา_ บีนี นะ นาโฮระ_ อาดี เดะ อับราฮัม. 16นีบีนี อีตู_ ฌาดี ราดารา นู บือฆาจะ_ เตด ดือละ บือซามา ฌางัน กีลากี ลาฆี. ญา ตาโงก ปีโยะ อาเย มาแรฮ_ ตูโรด ปี กะ มาตา อาเย_ จือบุ อาเย บรี ปือนอฮ เดะ ปีโยะ นะ ญา_ ญาแญะ มาแรฮ ปูลัก. 17ปราโซฮ อีตู บลารี จือปัจๆ_ นะ ดาปัจ ฌางัน ญา_ มือเลา จะ_ “มีตา อาเย โอะ_ เดะ ปีโยะ นะ เกา_ กิดีกิ เลอ.”
18นีบีนี อีตู มือเลา จะ_ “จา เออ_ โอะ เลอ.” ญา ปือตูโรด ปีโยะ อาเย จือปัจๆ_ บอฮ เดะ ตางัน_ บรี กะ ญา โอะ. 19ตานา ญา โอะ ฮาบิฮ ดัฮ_ นีบีนี อีตู มือเลา จะ_ “กู นะ จือบุ อาเย_ บรี กะ โกะ อูตัย นะ เกา โอะ บรี กือญัง_ ราตา อีโกยํ เลอ.”
20ญา อูแร อาเย เดะ ปีโยะ จือปัจๆ_ บอฮ เดะ กูบัก นู อูตัย นะ โอะ. ญา บลารี ปี_ จือบุ อาเย เดะ ตลาฆา ปูลัก_ ตือดะ ลูมอฮ อูตัย โอะ_ กือญัง ฮาบิฮ ดัฮ. 21ปราโซฮ อีตู_ ญา เตด มือเลา นามา. ญา ฌือเงาะ ลีฮัจ_ นะ บือเลฮ ตาฮู จะ_ ตูฮัด บือซัยํ เดะ อาตัซ บูวัจ ลาฆู กือนา ดัฮ เฆอ.
22โกะ อูตัย โอะ ฮาบิฮ ดัฮ_ ปราโซฮ อีตู โปด_ อาเมด จีเจด มัซ_ บรัจ 6 กรัม_ ฌางัน ฆือลัก มัซ ซือฆู_ บรัจ 120 กรัม_ บอฮ เดะ ตางัน กะ นีบีนี อีตู ฌูฆา. 23ญา ตาญา จะ_ “เกา ฌาดี นานะ นะ ซาปา?_ อาดา ตือปัจ มือนูปัก_ เดะ รูมัฮ นะ ปะ เดะ เกา เฆอ?”
24นีบีนี อีตู ตีกัฮ จะ_ “กู อีนี_ ฌาดี นานะ นะ เบทูเอน_ นู ฌาดี นานะ นะ มิละคา_ นู ฌาดี บีนี นะ นาโฮระ. 25เดะ รูมัฮ กามี_ อาดา ตือปัจ มือนูปัก. อาดา รูโปจ ฌางัน บารัก มากัด บรี กะ โกะ บือนาตัก ฌูฆา.”
26กะฆีเตอ_ ปราโซฮ อีตู มือนูโนะ มือญือมัฮ กะ ตูฮัด บือซัยํ เดะ อาตัซ_ 27มือเลา จะ_ “ปูฌี ตูฮัด บือซัยํ เดะ อาตัซ เลอ_ ตูฮัด นะ อับราฮัม_ กือปาลา นะ กู. ญา เลอ_ นู ซายัก กือฌะ กือมัซ_ นู บูวัจ ลาฆู รือมัก ซูโงฮ_ กะ กือปาลา นะ กู ดัฮ. ญา บาวา กู_ รอจ กะ นะบรานะ_ นะ กือปาลา นะ กู”_ ญา จะ.
28กะฆีเตอ_ นีบีนี อีตู_ ญา บลารี ปี_ มือญาเระ ลาฆู อีนี_ เดะ รูมัฮ นะ มะ เดะ ญา. 29เรเบคา ญา อาดา กากา กีลากี ปือนามา ลาบัน. ลาบัน เตอ_ ญา บลารี ปี_ ดาปัจ ปราโซฮ อีตู_ เดะ มาตา อาเย โซะ ลูวัยํ ตูโปะ. 30กาลา ญา บือเลฮ ลีฮัจ จีเจด ฌางัน ฆือลัก อีตู_ เดะ ตางัน นะ อาดี เดะ ญา ดัฮ_ ญา ดืองัยํ ปือมือเลา นะ อาดี_ นู จะ_ “ซือมียา อีตู มือเลา กะ กู_ กะฆีเตอ ดัฮ”_ ลาบัน บารู ปี ซารี กีลากี อีตู_ ดาปัจ ญา ดัฮ_ ตืองัฮ บือดีรี_ ฌางัน โกะ อูตัย_ เดะ มาตา อาเย_ 31มือเลา จะ_ “มาแรฮ เลอ. เกา ฌาดี ซือมียา_ นู ตูฮัด บือซัยํ เดะ อาตัซ บรี ซือลามัจ ดัฮ. ฌางัน บือดีรี_ โซะ ลูวัยํ. มาแรฮ เลอ_ ดูโดะ เดะ รูมัฮ นะ กู. กู บือเลฮ ซียะ ตือปัจ มือนูปัก_ ซียะ กานัก อูตัย ฌูฆา ดัฮ”_ ญา จะ.
32กะฆีเตอ_ ปราโซฮ อีตู มาแรฮ มาโซะ ปี กะ ดาลับ รูมัฮ. ลาบัน ตูโลก อูฆัย บารัก_ เดะ บลากัก โกะ อูตัย. ญา บรี รูโปจ_ ฌางัน บารัก มากัด_ กะ โกะ อูตัย. ญา บรี อาเย_ บรี บาโซฮ กากี นะ ปราโซฮ อีตู_ ฌางัน กากี นะ ลูมอฮ ซือมียา นะ ญา. 33ญา อาเมด นาซี มาแรฮ_ บรี กะ กูญา มากัด. ตาปี ปราโซฮ อีตู มือเลา จะ_ “กู ตีเมา มากัด นาซี ลาฆี. กู ฆาโดฮ มือญาเระ_ ลาฆู นะ กู ดูลู.”
ลาบัน ตีกัฮ จะ_ “บอฮ_ เกา มือญาเระ เลอ.”
34กะฆีเตอ_ ปราโซฮ อีตู มือเลา จะ_ “กู นี ฌาดี ปราโซฮ นะ อับราฮัม. 35ตูฮัด บือซัยํ เดะ อาตัซ_ บือเลฮ บรี ซือลามัจ กะ ตกเก นะ กู_ บาญะ ดัฮ_ บรี ญา ฌาดี บือซัยํ ดัฮ. ตูฮัด บือเลฮ บรี ญา อาดา กาวัด กาเมก_ กาวัด แบะ_ กาวัด ลือมู_ บาญะ. อาดา ปีระ_ อาดา มัซ. อาดา ปราโซฮ กีลากี นีบีนี_ บาญะ. อาดา อูตัย บาญะ_ กูดา บาซา ดือมิ บาญะ ฌูฆา. 36วะตู ซารา_ บีนี นะ ตกเก กู_ ตูฮา ดัฮ_ ญา ดูโดะ เดะ อาปี_ นานะ กีลากี_ นานะ นะ ญา เลอ. ญา เตอ_ บือเลฮ บรี บือนา บารัก นะ ญา_ ซือมูฮา_ กะ นานะ อีตู. 37ตกเก นะ กู เตอ_ บูวัจ บรี กู อาเกะ มือเลา บือซูปัฮ_ จะ_ ‘ฌางัน อาเมด นีบีนี ลูมอฮ คานาอัน_ นู กู มือนูปัก ดูโดะ อีนี_ บรี ฌาดี บีนี บีดา นานะ นะ กู. 38ตาปี เกา กือนา ปี_ กะ รูมัฮ นะ อาโปก เดะ กู_ กะ ลูมอฮ นะบรานะ นะ กู_ ซารี บีนี บรี กะ นานะ อีตู’ ญา จะ. 39กู มือเลา ฌางัน ญา จะ_ ‘ตาโกจ จะ_ นีบีนี อีตู ตีเมา ตูโรจ กู.’ 40ตาปี ญา มือเลา ฌางัน กู จะ_ ‘ตูฮัด บือซัยํ เดะ อาตัซ_ นู กู ตูเฮะ อีนี เตอ_ ญา นะ ซูโรฮ ฮูลู บาลัก นะ ญา_ ปี ซามา ฌางัน เกา_ นะ ตูโลก ลาฆู นะ เกา บรี ซือลือซัย. เกา นะ อาเมด นีบีนี ซืออูรัก_ ดาตัก เดะ โกะ นะบรานะ นะ กู_ เดะ รูมัฮ นะ อาโปก เดะ กู เลอ_ บรี ฌาดี บีนี บีดา นานะ นะ กู. 41กะฆีเตอ_ ตานา เกา รอจ กะ รูมัฮ นะ ลูมอฮ นะบรานะ นะ กู_ เกา นะ ลือปัซ เดะ ลาฆู เกา มือเลา บือซูปัฮ ดัฮ. ดัฮ กูญา ตีเมา บรี นีบีนี อีตู กะ เกา_ เกา ลือปัซ เดะ ปือมือเลา บือซูปัฮ ดัฮ_ กะฆีเตอ เลอ.’ ตกเก นะ กู_ ญา มือเลา กะฆีเตอ ดัฮ.”
42ปราโซฮ อีตู มือเลา ลาฆี จะ “อารี อีนี เลอ_ กู มาแรฮ รอจ กะ มาตา อาเย ดัฮ_ มือเลา จะ_ ‘โอ ตูฮัด บือซัยํ เดะ อาตัซ_ ตูฮัด นะ อับราฮัม_ ตกเก นะ กู เตอ_ มีตา เดะ ตูฮัด_ บรี ตูโลก เดะ ลาฆู_ นู กู ตูโรจ เตอ_ บรี ซือลือซัย บาฌิ ดัฮ เลอ. 43วะตู อีนี เลอ_ กู ตืองัฮ บือดีรี_ เดะ บีดิก มาตา อาเย อีนี. ดัฮ อาดา นีบีนี ราดารา ซืออูรัก_ มาแรฮ จือบุ อาเย_ กู นะ มีตา อาเย โอะ_ เดะ ปีโยะ นะ ญา. 44ดัฮ ญา มือเลา ฌางัน กู จะ_ “โอะ เลอ. กู นะ จือบุ อาเย_ บรี กาวัด อูตัย นะ เกา_ นะ โอะ ฌูฆา เลอ”_ มีตา เดะ ตูฮัด บือซัยํ เดะ อาตัซ_ บรี นีบีนี อีตู_ ฌาดี นีบีนี นู ตูฮัด ปีเลฮ ดัฮ_ บรี ฌาดี บีนี นะ นานะ นะ ตกเก นะ กู เลอ’ ”_ ญา จะ.
45ปราโซฮ อีตู มือเลา ลาฆี จะ_ “กู มือเลา กะฆีนี เดะ ดาลับ ฮาตี กู_ เตด ดัด ฮาบิฮ ดัฮ_ ลีฮัจ เลอ_ เรเบคา มาแรฮ_ ตาโงก ปีโยะ_ เดะ บาฮู นะ ญา_ ตูโรด ปี กะ มาตา อาเย_ จือบุ อาเย ดัฮ. กู มือเลา ฌางัน ญา จะ_ ‘มีตา อาเย บรี กู นะ โอะ ดีกิ เลอ.’ 46ญา งูฆางู ปือตูโรด ปีโยะ เดะ บาฮู นะ ญา_ มือเลา จะ_ ‘โอะ เลอ. กู นะ จือบุ อาเย_ บรี อูตัย นะ เกา โอะ ฌูฆา.’_ กะฆีเตอ กู โอะ ซูดัฮ ดัฮ. ญา ปี จือบุ อาเย_ บรี โกะ อูตัย โอะ ฌูฆา. 47กะฆีเตอ_ กู ตาญา ญา จะ_ ‘เกา ฌาดี นานะ นะ ซาปา เลอ?’_ ญา ตีกัฮ จะ_ ‘กู ฌาดี นานะ นะ เบทูเอน_ นู ปะ มะ เดะ ญา ฌาดี นาโฮระ_ ฌางัน มิละคา’_ ญา จะ.
“กะฆีเตอ_ กู บอฮ จีเจด อีตู_ เดะ ฮีโดก นะ ญา_ บอฮ ฆือลัก อีตู_ เดะ ตางัน นะ ญา ฌูฆา. 48กะฆีเตอ_ กู มือนูโนะ มือญือมัฮ กะ ตูฮัด บือซัยํ เดะ อาตัซ_ บรี ซือลามัจ กะ ญา_ นู ฌาดี ตูฮัด นะ อับราฮัม_ ตกเก นะ กู. ญา เตอ_ บาวา กู เดะ ฌาลัด รือมัก_ มาแรฮ รอจ กะ นานะ นีบีนี_ นะ โกะ นะบรานะ นะ อับราฮัม_ บรี ฌาดี บีนี นะ นานะ นะ ญา ดัฮ. 49กะฆีเตอ เลอ_ บรี มือญาเระ จะ_ กาเญา นะ บูวัจ บือกะ ลาฆู ซายัก กือฌะ กือมัซ_ ลาฆู รือมัก ซูโงฮ_ ฌางัน ตกเก นะ กู เฆอ? ดัฮ บูกัด กะฆีเตอ_ มือญาเระ กะ กู เลอ_ บรี กู นะ อาเลฮ ปี_ โซะ กานัน เฆอ_ โซะ กีรี เฆอ?”_ ญา จะ.
50กะฆีเตอ_ ลาบัน ฌางัน เบทูเอน_ ตีกัฮ จะ_ “ลาฆู อีนี มาแรฮ เดะ ตูฮัด บือซัยํ เดะ อาตัซ เลอ. กามี นะ ตีกัฮ จะ_ ลาฆู บาฌิ_ เฆอ จะ_ ลาฆู ฌาฮัจ_ เตด บือเลฮ เลอ. 51ลีฮัจ เลอ_ อาดา เรเบคา ปัจ อีนี. อาเมด บือปี เลอ_ บรี ญา ฌาดี บีนี บรี กะ นานะ นะ ตกเก นะ เกา เลอ_ ตูโรจ กะ ปือมือเลา นะ ตูฮัด บือซัยํ เดะ อาตัซ”_ กูญา จะ.
52กาลา ปราโซฮ นะ อับราฮัม_ ดืองัยํ ปือมือเลา นะ กูญา ดัฮ_ ญา มือนูโนะ ตือมะ รอจ กะ ตานัฮ_ มือญือมัฮ กะ ตูฮัด บือซัยํ เดะ อาตัซ. 53ญา อาเมด โกะ บารัก นะ บือปากัย_ โกะ ปีระ โกะ มัซ_ ฌางัน กาเยด บือปากัย_ เดะ บือนา บารัก นะ ญา_ มาแรฮ บรี กะ เรเบคา. อาดา ซือบารัก บือปากัย นู มาฮัน_ นู ญา บรี กะ กากา เดะ ญา_ กะ มะ เดะ ญา ฌูฆา. 54ญา ฌางัน ลูมอฮ ซือมียา นะ ญา_ มากัด_ โอะ_ บราดู รือมัย ปัจ อีตู_ ซา มาลับ. ตานา กูญา บีกัซ โซะ ปาฆี_ ปราโซฮ อีตู มือเลา จะ_ “บรี กู บาลิ ปี_ กะ ตกเก นะ กู เลอ.”
55ตาปี กากา เดะ เรเบคา_ ฌางัน มะ เดะ ญา_ ตีกัฮ จะ_ “บรี นานะ นีบีนี ดูโดะ ฌางัน กามี_ ซือปูโลฮ อารี ดูลู. ลือปัซ อีตู_ บรี ญา ปี โปด_ บือเลฮ.”
56ปราโซฮ อีตู มือเลา จะ_ “ฌางัน บรี กู นะ นาตี ลามา เลอ. ตูฮัด บือซัยํ เดะ อาตัซ_ ตูโลก บรี ลาฆู นะ กู ซือลือซัย บาฌิ ดัฮ. มีตา ซูโรฮ กู ปี_ บีดา กู นะ ปี รอจ กะ ตกเก นะ กู เลอ”_ ญา จะ.
57กูญา ตีกัฮ จะ_ “กามี นะ บลาโลก นีบีนี อีตู_ ตาญา ญา ดูลู.” 58กูญา บลาโลก เรเบคา มาแรฮ_ ตาญา จะ_ “เกา ซูกา นะ ปี_ ฌางัน ซือมียา อีนี เฆอ?”
ญา ตีกัฮ จะ_ “กู นะ ปี ฌูฆา เลอ.”
59กะฆีเตอ_ กูญา อาตัจ เรเบคา_ อาดี เดะ ญา_ ปี ฌางัน ปราโซฮ นะ อับราฮัม_ ฌางัน ลูมอฮ ซือมียา นะ ญา. อาดา นีบีนี นู ฌาดี กากา อีปัย_ ปี ซามา. 60กูญา มีตา เดะ ตูฮัด_ นะ บรี ซือลามัจ กะ เรเบคา_ มือเลา ฌางัน ญา จะ_ “มิ เออ_ บรี เกา ฌาดี เอด_ นะ ลูมอฮ ซือมียา บือรีบู-รีบู_ บือละซา-ละซา เลอ. บรี ลูมอฮ บือแนฮ นะ เกา_ ฌือนัฮ เดะ ลูมอฮ ซือมียา_ นู บือชี กะ กาเญา เลอ”_ กูญา จะ.
61กะฆีเตอ_ เรเบคา ฌางัน ลูมอฮ ปราโซฮ นีบีนี นะ ญา_ บีกัซ_ ญาแญะ อูตัย ตรือเบะ ปี. ปราโซฮ อีตู บาวา เรเบคา บือปี_ ตูโรจ ฌาลัด นะ ญา.
62กาลา อีตู_ อีซัก ตรือเบะ ปี เดะ ตูโปะ ตลาฆา ลาฮัย-รอย_ มาแรฮ ดูโดะ เดะ โซะ บารัจ ดายา. 63โซะ มาตา อารี แฌะบือแฌะ_ ญา ตรือเบะ ปี ฌาลัด เดะ ปาดัก_ บีดา นะ บรี ฮาตี นะ ญา บือแฌะ. ญา ลางอฮ ปาลา_ ลีฮัจ บือฆารี โกะ อูตัย บือฌาลัด มาแรฮ. 64ตานา เรเบคา ลีฮัจ บือฆารี อีซัก_ ญา ตูโรด เดะ อูตัย นะ ญา 65ตาญา ปราโซฮ อีตู จะ_ “ซือมียา โซะ อีตู_ นู บือฌาลัด เดะ บือนัก_ นะ บือดาปัจ ฌางัน กีตา เตอ_ ญา ฌาดี ซาปา เลอ?”
ปราโซฮ อีตู ตีกัฮ จะ_ “ฌาดี ตกเก นะ กู เลอ.”
กะฆีเตอ_ เรเบคา อาเมด กาเยด มาแรฮ_ ตูโดก มูคา นะ ญา. 66ปราโซฮ อีตู มือญาเระ กะ อีซัก_ ลาฆู ซือมูฮา_ นู ญา บูวัจ ดัฮ. 67กะฆีเตอ_ อีซัก อาเมด เรเบคา มาแรฮ_ มาโซะ กะ รูมัฮ กาฌัก กาเยด นะ ซารา_ มะ เดะ ญา_ บรี ฌาดี บีนี นะ ญา_ ญา ซายัก ซูโงฮ เลอ. กะฆีเตอ_ นู อีซัก ซาโมจ ลาฆู ปูโฌะ ฮาตี_ ซาเบะ มะ เดะ ญา มาตี เตอ_ วะตู อีนี_ ญา ซือนัง ฮาตี ดัฮ เลอ.
Currently Selected:
ลามูลา 24: ULBIBLE
Highlight
Share
Copy
Want to have your highlights saved across all your devices? Sign up or sign in
