ลามูลา 25
25
อับราฮัม บือนีกัฮ ฌางัน เคทูรา
(1 จรือตา 1.32-33)
1อับราฮัม ญา บือเลฮ บีนี ซืออูรัก ปูลัก ปือนามา เคทูรา 2นีบีนี อีนี บือเลฮ นานะ บาญะ อูรัก ฌางัน ญา_ ปือนามา จะ_ ซิมราน_ โยกชาน_ เมดาน_ มีเดียน_ อีชะบาก_ ฌางัน ชูอา. 3โยกชาน ฌาดี ปะ เดะ เชบา ฌางัน เดดาน. บือแนฮ นะ เดดาน ฌาดี โกะ อัดชูริม_ โกะ เลทูชิม_ ฌางัน โกะ เลอุมมิม. 4นานะ กีลากี นะ มีเดียน_ ปือนามา เอฟา_ เอเฟอ_ ฮาโนก_ อาบีดา_ ฌางัน เอนดาอา. ซือมูฮา อีนี ฌาดี โกะ อานะ จูจู นะ เคทูรา. 5อับราฮัม บือเลฮ บรี โกะ ซือบารัก ซือมูฮา นู ญา อาดา_ กะ อีซัก_ 6ตาปี ญา บรี บารัก กะ โกะ นานะ นะ ลูมอฮ บีนี มูดา นะ ญา_ กาลา ญา อาดา ฮีโดะ ลาฆี. ญา บรี ลูมอฮ กูญา บือปือจัฮ ปี เดะ อีซัก_ นานะ กีลากี นะ ญา_ ปี กะ โซะ ตีมอยํ_ โซะ นังฆรี อาตัซ มาตา อารี.
อับราฮัม มาตี_ กือนา ตานัม ดัฮ
7อูมอยํ นะ อับราฮัม_ ซือราตุซ ตูโฌฮ ปูโลฮ ลีมา (175) ตาโฮด ดัฮ. 8กาลา ญา ตูฮา โตระ_ บาญะ ตาโฮด ดัฮ_ ญา ฮาบิฮ ญาวา มาตี_ กือนา บือมุน ซือกาลี ฌางัน โกะ บีลาแก นะ ญา ดัฮ. 9โกะ นานะ นะ ญา_ จะ_ อีซัก ฌางัน อิซมาเอน_ กูญา ตานัม อับราฮัม_ เดะ ฆูฮา นะ มักเปลัฮ_ เดะ ปาดัก นะ เอโฟรน_ นานะ นะ โซฮา_ ซือมียา บักซา เฮด_ เดะ โซะ ตีมอยํ_ นะ นังฆรี มัมเร. 10บือนัก อีตู_ อับราฮัม บือลี_ เดะ ลูมอฮ บักซา เฮด ดัฮ. กูญา ตานัม ญา_ ฌางัน ซารา_ บีนี นะ ญา. 11ลือปัซ เดะ อับราฮัม มาตี ดัฮ_ ตูฮัด เดะ อาตัซ บรี ซือลามัจ_ กะ อีซัก_ นานะ นะ ญา. ญา ดูโดะ_ เดะ ตือปัจ ตลาฆา ลาฮัย-รอย.
ลูมอฮ บือแนฮ นะ อิซมาเอน
(1 จรือตา 1.28-31)
12ตะเดะ อีนี ฌาดี บือแนฮ นะ อิซมาเอน_ นานะ กีลากี นะ อับราฮัม_ นู บือโปรจ ดาตัก เดะ ฮาฆา_ นีบีนี ลูมอฮ อียิบ นู ฌาดี ปราโซฮ นะ ซารา. 13ตะเดะ อีนี ฌาดี ปือนามา โกะ นานะ กีลากี นะ อิซมาเอน_ ตูโรจ บือกะ นู กูญา บือเลฮ บือฌาดี มาแรฮ. นานะ ซูโลก ปือนามา เนบาโยด_ อาดี ปือนามา เกดาระ_ อัดบีเอน_ มิบซัม 14มีชะมา_ ดูมา_ มาซา 15ฮาดัด_ เทมา_ เยทูระ_ นาฟีชะ_ ฌางัน เกเดมา. 16กูญา อีนี ฌาดี นานะ กีลากี นะ อิซมาเอน. ปือนามา อีนี ฌาดี ปือนามา นะ ลูมอฮ กูญา_ นู บลาโลก ตูโรจ กะ โกะ ตูโปะ_ ฌางัน โกะ ลูมอฮ รูมัฮ กาฌัก กาเยด นะ กูญา_ จะ_ โกะ กือปาลา ดูวา บือลัซ อูรัก_ ตูโรจ กะ ปาลัฮ นะ กูญา 17(อูมอยํ นะ อิซมาเอน บือเลฮ ฆามะ ซือราตุซ ตีฆา ปูโลฮ ตูโฌฮ (137) ตาโฮด_ ญา บารู ฮาบิฮ ญาวา มาตี_ กือนา บือมุน ซือกาลี ฌางัน โกะ บีลาแก นะ ญา ดัฮ.) 18ลูมอฮ กูญา ดูโดะ ตะเดะ นังฆรี ฮาวีลา_ ฌู รอจ กะ นังฆรี ชูระ_ นู อาดา โซะ ฮือลด นังฆรี อียิบ_ ปี โซะ ฌาลัด นู นะ ปี กะ นังฆรี อาซีเรีย. กูญา ดูโดะ โซะ ฮือลด มูคา นะ ลูมอฮ นะบรานะ นะ กูญา.
เรเบคา ดูโดะ เดะ อาปี_ นานะ บือกือมัยํ.
19อีนี เลอ_ ฌาดี ซูรัจ ลาฆู บือแนฮ นะ อีซัก_ นานะ นะ อับราฮัม. อับราฮัม ฌาดี อาโปก เดะ อีซัก ดัฮ. 20กาลา อูมอยํ นะ อีซัก_ ปัจ ปูโลฮ (40) ตาโฮด ดัฮ_ ญา อาเมด เรเบคา มาแรฮ_ ฌาดี บีนี นะ ญา. เรเบคา ฌาดี นานะ นะ เบทูเอน_ ซือมียา นังฆรี อารัม_ นู ดูโดะ เดะ นังฆรี ปาดัน-อารัม. เรเบคา ฌาดี อาดี เดะ ลาบัน_ ซือมียา นังฆรี อารัม.
21อีซัก บือซาโวจ กะ ตูฮัด บือซัยํ เดะ อาตัซ_ ซาเบะ บีนี นะ ญา_ ฌาดี ซือมือโฆจ. ตูฮัด บูวัจ ตูโรจ_ บือกะ ลาฆู นู ญา มีตา ดัฮ_ บรี บีนี นะ ญา_ บือโปรจ เลอ. 22ตาปี_ นานะ ญา ปือแปะ_ เดะ ดาลับ โปรจ นะ เรเบคา. ญา มือเลา จะ_ “ดัฮ นะ ฌาดี กะฆีนี_ บูวัจ นามา กู อาดา ฮีโดะ ลาฆี?”.
กะฆีเตอ_ ญา ปี บือซาโวจ ตาญา ตูฮัด บือซัยํ เดะ อาตัซ. 23ตูฮัด ตีกัฮ จะ_
“อาดา ซือมียา ดูวา บักซา_ เดะ โปรจ นะ เกา เลอ.
เกา นะ ดูโดะ เดะ อาปี_ ดูวา ลูมอฮ_ นู นะ กรือจัย_ ซอก ซืออูรัก.
ลูมอฮ นู ซา_ ญา นะ ตือฆัยํ อูรัจ_ เดะ ลูมอฮ นู ซา.
นู กากา_ นะ ฌาดี ปราโซฮ นะ อาดี”_ ตูฮัด ญา จะ.
24รอจ วะตู ดูโดะ เดะ อาปี ดัฮ_ อาดา นานะ บือกือมัยํ_ เดะ โปรจ นะ ญา. 25นู กากา ตรือเบะ ลือปัซ ดูลู_ ญาวา นะ ญา มีรัฮ_ อาดา บูลู_ ปือนอฮ เดะ ญาวา. กะฆีเตอ_ กูญา ตืองะ ปือนามา จะ_ เอซาว#25.25 เอซาว ปือนามา อีนี ตูโญะ กะ ปือนามา นะ นังฆรี นู บือแนฮ นะ นานะ อีนี ดูโดะ_ ฌาดี จะ_ เซอีระ. เดะ บาซา ฮีบรู ปือมือเลา จะ เซอีระ_ ญา ดืองัยํ ซือรูปา กะ ปือมือเลา นู จะ_ บูลู.. 26เดะ บลากัก_ อาดี เดะ ญา ลือปัซ ฌูฆา_ ตางัน นะ ญา โปด_ ปือฆัก ตูแมะ นะ กากา. กะฆีเตอ_ กูญา ตืองะ ปือนามา จะ_ ยาโกบ#25.26 ปือนามา “ยาโกบ”_ ฌาดี จะ_ “ซือมียา นู ราปัซ.”. กาลา เรเบคา ดูโดะ เดะ อาปี กะฆีเตอ_ อูมอยํ นะ อีซัก_ นัม ปูโลฮ (60) ตาโฮด ดัฮ.
เอซาว เตด ปือดูลี_ ปาซัน ลาฆู นู ญา ฌาดี นานะ ซูโลก
27นานะ ดูวา อูรัก_ บือซัยํ ดัฮ. เอซาว ฌาดี ซือมียา_ นู ปานัย บรูเซ บือนาตัก เดะ ฮูตัด_ ตาปี ยาโกบ ฌาดี ซือมียา งะซืองะ_ ซูกา ดูโดะ เดะ รูมัฮ กาฌัก กาเยด. 28อีซัก ซายัก เอซาว_ ซาเบะ ซูกา มากัด ลูลู บือนาตัก เดะ ฮูตัด_ ตาปี เรเบคา ซายัก กะ ยาโกบ.
29อาดา ซืออารี_ ยาโกบ ตืองัฮ กรือฌา อาเย ฆูลัย เตอ_ เอซาว มาแรฮ ดาตัก เดะ ฮูตัด_ ญา ลาปัยํ โตระ. 30เอซาว มือเลา ฌางัน ยาโกบ จะ_ “กู ลาปัยํ โตระ เลอ. ฮาฆิ บรี กู มากัด_ อาเย ฆูลัย มีรัฮ อีตู_ ซือตืองัฮ เลอ.”_ กะฆีเตอ_ นามา นะ ญา ฌาดี_ เอโดม#25.30 ปือนามา “เอโดม”_ ฌาดี จะ_ “นู มีรัฮ.”. 31ตาปี ยาโกบ ตีกัฮ จะ_ “เกา กือนา ฌูวัน กะ กู ดูลู_ ปาซัน ลาฆู นู เกา ฌาดี นานะ ซูโลก.”
32เอซาว มือเลา จะ_ “ลีฮัจ เลอ_ กู ฆามะ นะ มาตี ดัฮ. ลาฆู นู ฌาดี นานะ ซูโลก เตอ_ เตด ฌาดี นามา เลอ.”
33ตาปี ยาโกบ ตีกัฮ จะ_ “กือนา อาเกะ บือซูปัฮ_ นะ บรี ลาฆู อีตู กะ กู ดูลู.”
กะฆีเตอ_ เอซาว มือเลา บือซูปัฮ_ ฌูวัน ลาฆู นู ฌาดี นานะ ซูโลก_ กะ ยาโกบ. 34กะฆีเตอ_ ยาโกบ อาเมด โรตี_ ฌางัน อาเย ฆูลัย กาจัก ซือตืองัฮ_ บรี กะ เอซาว. เอซาว มากัด_ โอะ กือญัง ดัฮ. ญา บีกัซ ปี. กะฆีเตอ_ ญา เตด ปือดูลี_ มือฌัฮ กะ ลาฆู นู ญา ฌาดี นานะ ซูโลก.
Currently Selected:
ลามูลา 25: ULBIBLE
Highlight
Share
Copy
Want to have your highlights saved across all your devices? Sign up or sign in
