ลามูลา 30
30
ยาโกบ บลารี ปี เดะ วา ลาบัน
1กาลา ราเชน ลีฮัจ จะ_ ญา ฮอย นานะ ฌางัน ยาโกบ_ ญา โปด_ ดือกี กะ จา เดะ ญา_ มือเลา ฌางัน ยาโกบ จะ “บรี กู อาดา นานะ ฌูฆา. เตด กะฆีเตอ กู นะ มาตี.” 2กะฆีเตอ ยาโกบ ญา มูซัยํ กะ ราเชน_ มือเลา จะ “กู เลอ_ ฌาดี ซือมียา ฆาตี ตูฮัด_ นู นะ เตด บรี เกา บือเลฮ นานะ เฆอ?” 3ราเชน มือเลา จะ “บินฮา_ ปราโซฮ นีบีนี นะ กู_ อาดา ปัจ อีนี. กือนา มาโซะ ปี ซารี ญา เลอ_ ญา นะ บือเลฮ นานะ_ ตาโรฮ เดะ รีบา นะ กู_ นะ บูวัจ บรี กู อาดา นานะ กรานา นีบีนี อีนี.” 4ญา อาเกะ บินฮา_ ปราโซฮ นีบีนี นะ ญา_ บรี ฌาดี บีนี นะ ยาโกบ. ยาโกบ โปด มาโซะ ปี ซารี นีบีนี อีตู. 5กะฆีเตอ บินฮา โปด_ บือโปรจ ฌางัน ยาโกบ_ บือเลฮ นานะ กีลากี. 6ราเชน มือเลา จะ “ตูฮัด ญา กรัจ ฮูโกบ ลาฆู นะ กู_ ญา ดืองัยํ ซือวารา นู กู มีตา. ญา โปด_ บรี นานะ กีลากี กะ กู.” ซาเบะ กะฆีนี_ ญา ตืองะ ปือนามา นานะ อีตู จะ_ ดาน#30.6 ปือนามา “ดาน” ฌาดี จะ_ ญา กรัจ ฮูโกบ ดัฮ.. 7บินฮา_ ปราโซฮ นะ ราเชน บือโปรจ ปูลัก_ บือเลฮ นานะ กีลากี_ มาโซะ กะ นานะ นู ดูวา_ ฌางัน ยาโกบ. 8ราเชน เตอ_ มือเลา จะ “กู บือลาวัด มือเลา ฌางัน กากา นีบีนี เดะ กู_ ซือวารา บือซัยํ_ จะ_ กู ฌือนัฮ เดะ ญา ดัฮ.” กะฆีเตอ ญา ตืองะ ปือนามา นานะ อีตู จะ_ นับทาลี#30.8 ปือนามา “นับทาลี” ญา ดืองัยํ ซือรูปา กะ ปือมือเลา บาซา ฮีบรู จะ “บือลาวัด”.. 9กาลา เลฮา ญา บราดู บือโปรจ ดัฮ_ ญา บือเลฮ อาเกะ ซินปา_ ปราโซฮ นีบีนี นะ ญา_ บรี ฌาดี บีนี นะ ยาโกบ. 10ซินปา_ ปราโซฮ นะ เลฮา โปด_ บือเลฮ นานะ กีลากี ฌางัน ยาโกบ. 11เลฮา มือเลา จะ “บาฌิ ซูโงฮ เลอ.” ญา ตืองะ ปือนามา นานะ อีตู จะ_ กาด#30.11 ปือนามา “กาด” ฌาดี จะ “บาฌิ ซูโงฮ”.. 12ซินปา_ ปราโซฮ นะ เลฮา โปด_ บือโปรจ บือเลฮ นานะ กีลากี ฌางัน ยาโกบ_ มาโซะ กะ ดูวา อูรัก ดัฮ. 13เลฮา มือเลา จะ “กู ซูกา ฮาตี ซูโงฮ ซาเบะ โกะ ลูมอฮ นีบีนี นะ บลาโลก กะ กู จะ_ ซูกา ฮาตี.” กะฆีเตอ_ ญา ตืองะ ปือนามา นานะ อีตู จะ_ อาเซอ.#30.13 ปือนามา อาเซอ ฌาดี จะ “ซูกา ฮาตี”.
14เดะ มูเซด กือตับ ปาดี_ รูเบน ตรือเบะ ปี กะ บือนัก_ ดาปัจ โตรก ดูดาอิม#30.14 โตรก ดูดาอิม ฌาดี ตาโระ ซา ฌือแนฮ_ นู โกะ ซือมียา ฮาดัจ อีตู ปือจายา จะ_ นะ ตูโลก นีบีนี บรี บือโปรจ บือเลฮ นังซือนัง.. ญา อาเมด บูวัฮ มาแรฮ บรี กะ เลฮา มะ เดะ ญา. ราเชน เตอ_ ญา มือเลา ฌางัน เลฮา จะ “มีตา ฮาฆิ โตรก ดูดาอิม นะ นานะ กีลากี นะ จา_ บรี กะ กู ซือตืองัฮ.” 15เลฮา ตีกัฮ จะ “นู อาดี ราปัซ ลากี นะ กู ปี ดัฮ เตอ_ เตด ฆือนะ ลาฆี เฆอ_ นู นะ มาแรฮ อาเมด โตรก ดูดาอิม นะ นานะ กีลากี นะ กู ฌูฆา?” ราเชน ตีกัฮ จะ “ดัฮ บรี โตรก ดูดาอิม นะ นานะ กีลากี_ กะ กู_ กู นะ บรี ลากี นะ กู ปี ตีโนะ ฌางัน จา_ เดะ มาลับ อีนี.” 16กาลา ยาโกบ ญา บาลิ ดาตัก เดะ บือนัก_ วะตู ปะฮือญา_ เลฮา โปด_ ตรือเบะ ปี ซาโมจ มือญาเระ จะ “มาโซะ มาแรฮ ซารี กู เลอ_ ซาเบะ กู บรี โตรก ดูดาอิม นะ นานะ_ ฌาดี รือฆา อูปัฮ เกา ดัฮ.” เดะ มาลับ อีตู ยาโกบ โปด_ ตีโนะ ฌางัน เลฮา 17ตูฮัด ดืองัยํ ซือวารา นะ เลฮา. ญา โปด_ บือโปรจ_ บือเลฮ นานะ มาโซะ กะ ลีมา อูรัก ฌางัน ยาโกบ. 18โซะ เลฮา มือเลา จะ “ตูฮัด บือเลฮ บรี รือฆา อูปัฮ กะ กู_ ซาเบะ กู อาเกะ ปราโซฮ นีบีนี กะ ลากี นะ กู.” ญา ตืองะ ปือนามา นานะ อีตู จะ_ อีซาคา#30.18 เดะ บาซา ฮีบรู_ ปือมือเลา จะ “ซาคา” ฌาดี จะ “รือฆา อูปัฮ.”. 19ลือปัซ อีตู เลฮา โปด_ บือโปรจ บือเลฮ นานะ กีลากี ฌางัน ยาโกบ_ มาโซะ กะ นัม อูรัก. 20กะฆีเตอ เลฮา มือเลา จะ_ “ตูฮัด บรี บารัก บาฌิ กะ กู. วะตู อีนี ลากี นะ กู_ ญา นะ มือโอจ กะ กู_ ซาเบะ กู บือเลฮ บือโปรจ นานะ กีลากี ฌางัน ญา_ นัม อูรัก ดัฮ.” ญา ตืองะ ปือนามา นานะ อีตู จะ เซบูลุน#30.20 เดะ บาซา ฮีบรู ปือมือเลา จะ “ซาบัล” ฌาดี จะ “ลาฆู มือโอจ”.. 21ลือปัซ อีตู_ ญา โปด_ บือเลฮ นานะ นีบีนี ซืออูรัก_ ปือนามา จะ ดีนา.
22ตูฮัด ญา มือนีงัย_ บรีงัจ รอจ กะ ซือวารา นะ ราเชน_ บูวัจ บรี ญา อาดา นานะ. 23ญา โปด_ บือโปรจ_ บือเลฮ นานะ กีลากี_ มือเลา จะ “ตูฮัด บือเลฮ อาเกะ ลาฆู ซูซัฮ ปายัฮ นะ กู ปี ดัฮ.” 24กะฆีเตอ_ ญา ตืองะ ปือนามา นานะ อีตู จะ_ โยเซบ#30.24 ปือนามา โยเซบ_ ฌาดี จะ_ “ญา บือตามัฮ”._ มือเลา จะ “บรี กะ ตูฮัด บือซัยํ เดะ อาตัซ บือตามัฮ นานะ กีลากี ซืออูรัก ลาฆี บรี กะ กู.”
ยาโกบ กายา กรานา ซือบารัก นะ ลาบัน
25กาลา ราเชน ดูโดะ เดะ อาปี โยเซบ ดัฮ_ ยาโกบ ญา มือเลา ฌางัน ลาบัน จะ_ “มีตา ซูโรฮ บรี กะ กู บาลิ ปี กะ ตูโปะ นะ เอด อาโปก เดะ กู เลอ. 26กู บือกรือฌา บีดา บือเลฮ บีนี ฌางัน นานะ ดัฮ. มีตา บรี บีนี ฌางัน นานะ กะ กู_ บรี กู นะ บือปี_ ซาเบะ เกา ตาฮู จะ กู บือกรือฌา บรี กะ วา ซุจ ดัฮ.” 27ตาปี ลาบัน ตีกัฮ จะ “ดัฮ วา ฌาดี ซือมียา นู กือนา เดะ ฮาตี นะ เกา_ มีตา มือนีงัย กะ วา ซัจ. วา ตาฮู เดะ ลาฆู บือฆูรู ดัฮ จะ_ ตูฮัด บือซัยํ เดะ อาตัซ บือเลฮ บรี ซือลามัจ กะ วา_ กรานา เกา เลอ. 28เกา นะ มีตา รือฆา อูปัฮ บราปา โปด_ มือญาเระ มาแรฮ เลอ_ วา นะ บรี.” 29ยาโกบ ตีกัฮ จะ “กู บือกรือฌา บรี กะ วา กะฮามี_ โกะ บือนาตัก นะ วา เตอ_ ดูโดะ บาฌิ กะฆีเตอ. วา โปด_ ตาฮู ดัฮ เลอ 30ซาเบะ ดูลู นู กู นะ มาแรฮ เตอ_ วา อาดา โกะ บือนาตัก กิดีกิ_ ตาปี วะตู อีนี อาดา บาญะ. กู นะ บือฌาลัด ปี กะ โซะ ดีฮา_ ตูฮัด บือซัยํ เดะ อาตัซ โปด บรี ซือลามัจ กะ วา ดัฮ. ตาปี วะตู อีนี กู เตอ นะ บือเลฮ ปือบือลา โกะ ซือมียา เดะ รูมัฮ นะ กู_ กาลา เลอ?” 31กะฆีเตอ ลาบัน ตาญา จะ “วา บือฆูนา นะ บรี นามา กะ เกา?” ยาโกบ ตีกัฮ จะ “วา เตด ฆาโดฮ บรี นามา กะ กู เลอ. ตาปี ดัฮ วา นะ บูวัจ กะฆีนี_ กู นะ ปือบือลา กาวัด บือนาตัก นะ วา ลาฆี. 32อารี อีนี กู นะ ปี มือญาซัจ ลีฮัจ_ กาวัด บือนาตัก นะ วา ซือมูฮา. กู นะ ปีเลฮ กาเมก นู อาดา บือตือเบาะ_ นู อาดา บือบือติ_ ราตา อีโกยํ_ บรี ตรือเบะ เดะ กาวัด นะ วา_ ปีเลฮ อานะ กาเมก ฮีตับ ราตา อีโกยํ_ ฌางัน แบะ นู อาดา บือตือเบาะ ฌางัน นู อาดา บือบือติ_ บรี ตรือเบะ เดะ กาวัด นะ วา. บรี โกะ บือนาตัก อีนี ฌาดี รือฆา อูปัฮ นะ กู. 33นู กู บูวัจ บาฌิ ตือปัจ_ เดะ ปาซัน ปีเลฮ แบะ ฌางัน กาเมก_ นะ บือฆารี ซัฮ_ เดะ กาลา โซะ ฮือลด_ ฌาดี จะ_ วะตู วา มาแรฮ มือญาซัจ ลีฮัจ รือฆา อูปัฮ นะ กู. ดัฮ ดาปัจ นู เตด บือบือติ_ เฆอ จะ_ บือตือเบาะ_ อาดา เดะ กาวัด แบะ_ เฆอ จะ_ อานะ กาเมก นู เตด ฮีตับ_ บรี อีงัจ จะ_ กู จูรี บือนาตัก อีนี มาแรฮ.” 34ลาบัน เตอ_ ตีกัฮ จะ “บาฌิ ดัฮ. ตูโรจ บือกะ นู เกา มือเลา เลอ.” 35ตาปี เดะ อารี อีตู_ ลาบัน ญา ปีเลฮ แบะ บาปา นู บือตือลัก ฌูรัยๆ_ ฌางัน นู อาดา บือตือเบาะ_ ฌางัน แบะ อายา นู อาดา บือบือติ_ นู อาดา บือตือเบาะ_ แบะ นู อาดา บูลู ปูเตฮ โซะ ดีฮา ซือมูฮา_ ฌางัน อานะ กาเมก ฮีตับ ซือมูฮา_ มาแรฮ บรี กะ นานะ กีลากี นะ ญา ปือบือลา. 36กูญา บือปือจัฮ โกะ บือนาตัก ซือมูฮา_ บรี ฌาโวฮ เดะ ยาโกบ_ นะ บือฌาลัด ปี บือเลฮ ตีฆา อารี. กาวัด บือนาตัก นะ ลาบัน นู ลือเบฮ เตอ_ ยาโกบ โปด อาดา ปือบือลา ลาฆี เลอ.
37ยาโกบ อาเมด ดาฮัด กายู นู โดะฮีโดะ เดะ ปูโฮด กือมียัน_ ปูโฮด อาละมอน_ ฌางัน ปูโฮด เปลน#30.37 ปูโฮด ตีฆา ฌือแนฮ อีนี_ กีตา นะ ปือซือรูปา ฌางัน ปูโฮด นังฆรี ซียับ_ เตด ตือตู. มาแรฮ ปือเลาะ กูเละ ซือตืองัฮ_ บรี ปูเตฮ อาดา บือกัซ ฌูรัยๆ_ บรี ลีฮัจ กายู ปูเตฮ. 38ญา ตืองะ กายู อีตู_ เดะ ลูรอก โซะ ฮือลด กาวัด บือนาตัก_ ฌาดี จะ_ ลูรอก อาเย_ นู บือนาตัก มาแรฮ โอะ. กาลา ญา มาแรฮ โอะ อาเย_ ญา ซูกา นะ บือซามา. 39โกะ บือนาตัก โปด บือซามา โซะ ฮือลด ดาฮัด กายู อีตู. กะฆีเตอ_ กาวัด บือนาตัก_ ญา อาดา อานะ นู อาดา บือตือลัก ฌูรัยๆ_ อาดา บือตือเบาะ_ อาดา บือบือติ. 40ยาโกบ โปด_ บือปือจัฮ อานะ กาเมก บรี ตรือเบะ เดะ กาวัด นะ ญา_ บรี โกะ บือนาตัก อีตู ตีญุง ลีฮัจ กะ กาเมก บือตือลัก ฌูรัยๆ_ ฌางัน กาเมก นู ฮีตับ ราตา_ เดะ กาวัด บือนาตัก นะ ลาบัน. ตาปี กาวัด บือนาตัก นะ ญา เตอ_ ญา บือปือจัฮ บรี ดูโดะ โซะ อาซิก_ ตีเมา บรี จาโปยํ ฌางัน กาวัด บือนาตัก นะ ลาบัน. 41กาลา โกะ บือนาตัก นู ตือฆัยํ อูรัจ ญา บือซามา_ ยาโกบ โปด_ อาเมด ดาฮัด กายู อีตู_ ตืองะ เดะ ลูรอก อาเย_ บรี กะ กาวัด บือนาตัก อีตู ลีฮัจ_ บีดา บรี กะ บือนาตัก นะ บือซามา เดะ กายู อีตู. 42ตาปี โซะ บือนาตัก นู ฮอย อูรัจ_ ยาโกบ โปด_ เตด บอฮ กายู อีตู. กะฆีเตอ บือนาตัก นู ฮอย อูรัจ เตอ_ ฌาดี นะ ลาบัน_ ตาปี บือนาตัก นู ตือฆัยํ อูรัจ_ ฌาดี นะ ยาโกบ. 43ยาโกบ ดูโดะ โซะ อีตู_ ตือดะ ญา กายา บาญะ_ อาดา กาวัด บือนาตัก บาญะ_ อาดา โกะ อูตัย_ โกะ กูดา บาซา ดือมิ ซามา_ อาดา ปราโซฮ นีบีนี_ ปราโซฮ กีลากี บาญะ.
Currently Selected:
ลามูลา 30: ULBIBLE
Highlight
Share
Copy
Want to have your highlights saved across all your devices? Sign up or sign in
