ลามูลา 31
31
ยาโกบ ลารี ปี ฌางัน โกะ ซือมียา ซือรูมัฮ_ ฆือนะ ฌางัน กาวัด บือนาตัก
1ยาโกบ ดืองัยํ_ นู โกะ ลูมอฮ นานะ นะ ลาบัน มือเลา จะ_ “ยาโกบ บือเลฮ ราปัซ บือนา บารัก นะ ปะ_ ฮาบิฮ ดัฮ. นู ญา บือเลฮ กายา กะฆีนี_ กรานา บือนา บารัก นะ ปะ ซือมูฮา.” 2ยาโกบ ลีฮัจ มูคา นะ ลาบัน_ เตด บราปา บาฌิ ฌางัน ญา_ เตด ซือรูปา บือกะ ดูลู ดัฮ. 3กะฆีเตอ_ ตูฮัด บือซัยํ เดะ อาตัซ มือเลา ฌางัน ยาโกบ จะ_ “บาลิ ปี เลอ_ กะ นังฆรี นะ โกะ ญังมูญัง เดะ เกา_ รอจ กะ ลูมอฮ นะบรานะ นะ เกา. กู นะ ดูโดะ_ บือซามา ฌางัน เกา เลอ.”
4ยาโกบ ซูโรฮ ซือมียา ซืออูรัก_ ปี บลาโลก ราเชน ฌางัน เลฮา_ บรี กูญา มาแรฮ กะ ปาดัก_ นู ญา ปือบือลา กาวัด บือนาตัก. 5ญา มือเลา ฌางัน กูญา จะ_ “กู ลีฮัจ จะ_ มูคา นะ ปะ เดะ กาเญา_ ญา เตด บราปา บาฌิ ฌางัน กู_ บือกะ เดะ กาลา ดูลู ดัฮ. ตาปี ตูฮัด นะ อาโปก เดะ กู_ ญา บือเลฮ ดูโดะ บือซามา ฌางัน กู เลอ. 6กาเญา ตาฮู จะ_ กู บือกรือฌา กะ ปะ เดะ กาเญา_ ฌู ฮาบิฮ อูรัจ ดัฮ. 7ตาปี ปะ เดะ กาเญา_ ญา กีจอฮ กู_ ซาเลด รือฆา อูปัฮ นะ กู_ ซือปูโลฮ กาลี ดัฮ. ตาปี ตูฮัด เดะ อาตัซ_ ตีเมา บรี ญา บูวัจ บรี กู ซาเกะ ดัฮ. 8ดัฮ ปะ เดะ กาเญา มือเลา จะ_ ‘บือนาตัก นู บือตือเบาะ_ นะ ฌาดี รือฆา อูปัฮ นะ เกา’_ กะฆีเตอ กาวัด บือนาตัก_ ราตา อีโกยํ_ อาดา อานะ บือตือเบาะ. ดัฮ ญา มือเลา จะ_ ‘บือนาตัก นู บือตือลัก ฌูรัยๆ_ นะ ฌาดี รือฆา อูปัฮ นะ เกา’_ กะฆีเตอ บือนาตัก_ ราตา อีโกยํ_ อาดา อานะ บือตือลัก ฌูรัยๆ. 9กะฆีนี เลอ_ ตูฮัด เดะ อาตัซ_ บือเลฮ อาเมด โกะ กาวัด บือนาตัก_ นะ ปะ เดะ กาเญา_ ปาฮาฆิ ฌางัน กู ดัฮ”_ ญา จะ.
10ยาโกบ มือเลา ปูลัก จะ_ “ตานา รอจ วะตู_ นู โกะ บือนาตัก นะ บือซามา_ กู มีปี ลีฮัจ จะ_ โกะ แบะ บาปา นู นะ บือซามา ฌางัน โกะ อายา_ บือตือลัก ฌูรัยๆ ซือตืองัฮ_ บือบือติ ซือตืองัฮ_ บือตือลัก ซือตืองัฮ. 11เดะ ลาฆู มีปี อีตู_ ฮูลู บาลัก นะ ตูฮัด มือเลา ฌางัน กู จะ_ ‘ยาโกบ เออ.’ กู ตีกัฮ จะ_ ‘กู ดูโดะ ปัจ อีนี เลอ.’ 12ญา มือเลา ฌางัน กู จะ_ ‘ลีฮัจ เลอ_ โกะ แบะ บาปา ซือมูฮา_ นู บือซามา ฌางัน โกะ อายา_ ฌาดี บาปา นู บือตือลัก ฌูรัยๆ ซือตืองัฮ_ บือบือติ ซือตืองัฮ_ บือตือลัก ซือตืองัฮ. ซาเบะ กู ลีฮัจ ลาฆู ซือมูฮา_ นู ลาบัน บูวัจ ฌางัน เกา. 13กู อีนี_ ฌาดี ตูฮัด นะ ตูโปะ เบดเอน_ นู เกา อูแร มีญะ เดะ จาวัก นู ซีดี_ บือฌาญี ฌางัน กู ดัฮ โซะ อีตู. วะตู อีนี_ บีกัซ เลอ_ ตรือเบะ ปี ดัดดัด_ เดะ นังฆรี อีนี_ บาลิ ปี เลอ_ กะ นังฆรี นู เกา บือฌาดี มาแรฮ เตอ’_ ตูฮัด ญา จะ.”
14กะฆีเตอ_ ราเชน ฌางัน เลฮา_ มือเลา ฌางัน ยาโกบ จะ_ “กามี อาดา บาฮาเฆด_ อาดา ปือซากา นามา ลาฆี โปด_ เดะ รูมัฮ นะ ปะ เฆอ? 15ปะ ลีฮัจ กะ กามี_ ซือรูปา ฌาดี อูรัก บักซา อาซิก. ซาเบะ ญา ฌูวัน กามี ดัฮ. ดูเวะ นู ฌาดี รือฆา ญาวา นะ กามี_ ปะ ซูโรฮ ฮาบิฮ ดัฮ. 16โกะ บือนาตัก ซือมูฮา_ นู ตูฮัด เดะ อาตัซ อาเมด มาแรฮ_ เดะ ปะ เดะ กามี_ อีตู เลอ ฌาดี บือนา บารัก นะ กามี_ บือนา บารัก นะ นานะ นะ กามี ฌูฆา. กะฆีเตอ_ บูวัจ เลอ_ ตูโรจ นู ตูฮัด มือเลา ฌางัน เกา ดัฮ”_ กูญา จะ.
17กะฆีเตอ ยาโกบ ซียะ_ บรี โกะ อานะ บีนี นะ ญา_ ญาแญะ กะ อาตัซ อูตัย. 18ญา บาวา บือปี_ โกะ บือนาตัก นะ ญา_ นู ญา บือเลฮ_ เดะ นังฆรี ปาดัน-อารัม ดัฮ_ นะ ปี กะ นังฆรี คานาอัน_ นังฆรี นะ อีซัก_ ปะ เดะ ญา.
19ลาบัน เตอ_ ญา บือเลฮ ปี กะ โซะ อาซิก_ บีดา นะ ฆูติก บูลู นะ โกะ กาวัด กาเมก นะ ญา. ราเชน โปด_ ญา จูรี โกะ บราลา#31.19 โกะ ซือมียา ปานัย อากัน ซือตืองัฮ_ กูญา มือเลา จะ_ เดะ นังฆรี อีตู_ บราลา เดะ รูมัฮ ฌาดี ปือนานา_ ตูโญะ กะ บือนา บารัก เดะ รูมัฮ ซือมูฮา. ดัฮ ซาปา ดาปัจ บราลา อีตู_ ญา บรี ลีฮัจ จะ_ ญา นะ ซาโมจ บือนา บารัก เดะ รูมัฮ อีตู_ ฌาดี ปือซากา นะ ญา_ บือเลฮ._ เดะ รูมัฮ นะ ปะ เดะ ญา ดัฮ. 20ยาโกบ ตีปู กะ ลาบัน_ ซือมียา นังฆรี อารัม อีตู_ เตด มือญาเระ กะ ญา_ นู ญา ตือตู ฮาตี อีงัจ นะ ลารี. 21ยาโกบ อาเมด บือนา บารัก นะ ญา ซือมูฮา_ ลารี ปี ดัฮ. ญา ปี ฌรือมัก ซูงัย_ นะ บือฌาลัด ปี กะ โซะ บูเกะ_ เดะ นังฆรี กิเลอาด.
ลาบัน อูเซ ยาโกบ ดัด
22เดะ อารี นู ตีฆา_ อาดา ซือมียา มือญาเระ กะ ลาบัน จะ_ “ยาโกบ ญา จูรี ลารี ปี ดัฮ.” 23ลาบัน ญา บาวา ลูมอฮ นะบรานะ นะ ญา_ บือปี ซามา_ อูเซ โกะ ยาโกบ_ ตูโฌฮ อารี ดัฮ_ อูเซ ดัด ดัฮ_ เดะ โซะ บูเกะ เดะ นังฆรี กิเลอาด. 24ตาปี เดะ วะตู มาลับ_ ตูฮัด เดะ อาตัซ_ ญา บรี มีปี กะ ลาบัน_ ซือมียา นังฆรี อารัม_ มือเลา ฌางัน ญา จะ_ “ฌาฆา เลอ. เกา ฌางัน มือเลา มานามา_ ฌางัน ยาโกบ_ เตด จะ บาฌิ_ เฆอ จะ ฌาฮัจ_ แนฮ ซือปาตัฮ โปด.”
25กะฆีเตอ ลาบัน มาแรฮ ดัด ยาโกบ ดัฮ. ยาโกบ ญา ตืองะ รูมัฮ กาฌัก กาเยด นะ ญา_ เดะ โซะ บูเกะ ดัฮ. ลาบัน ฌางัน โกะ นะบรานะ นะ ญา_ กูญา มือนูปัก เดะ โซะ บูเกะ กิเลอาด. 26ลาบัน มือเลา ฌางัน ยาโกบ จะ “เกา บูวัจ กะฮามี ดัฮ? เกา ตีปู กู เลอ_ บาวา โกะ นานะ นีบีนี นะ กู ปี_ ลารี มาแรฮ ซือรูปา ฌาดี ปราโซฮ ดัฮ. 27บูวัจ นามา เกา มือฮือนะ ลารี เดะ กู? บูวัจ นามา เกา ตีปู กู_ เตด มือญาเระ บรี กู ตาฮู_ บีดา กู นะ บือเลฮ ซียะ อาตัจ เกา ฌางัน ลาฆู รามัย ซูกา ฮาตี_ ลาฆู มือญาญี_ ปาลู บรานา_ กาเตฮ ปือฌูลา เลอ? 28บูวัจ นามา เกา เตด ยอม บรี กู นะ จีโยบ โกะ จูจู กีลากี_ ฌางัน โกะ นานะ นีบีนี นะ กู? เกา บูวัจ กะฆีนี_ เกา บูวัจ ลาฆู บูดอ ดัฮ. 29เกา อาดา ดูโดะ เดะ ฮูโกบ เดะ ตางัน นะ กู_ ดัฮ กู นะ บูวัจ บรี เกา ฌาฮานัม โปด_ บือเลฮ. ตาปี มาลับ ฮือญา_ ตูฮัด นะ อาโปก เดะ เกา_ ญา มือเลา ฌางัน กู ดัฮ จะ_ ‘ฌาฆา บรี บาฌิ เลอ. ฌางัน มือเลา ปือมือเลา บาฌิ_ เฆอ ปือมือเลา ฌาฮัจ โปด_ กะ ยาโกบ.’ 30นู เกา จูรี ปี_ ซาเบะ บือคานะ นะ ปี กะ รูมัฮ นะ ปะ เดะ เกา_ ตาปี บูวัจ นามา เลอ_ เกา จูรี โกะ บราลา นะ กู?” ญา จะ.
31ยาโกบ ตีกัฮ กะ ลาบัน จะ_ “กรานา กู ตาโกจ จะ_ วา นะ ราปัซ โกะ นานะ นีบีนี นะ วา_ เดะ กู ดัฮ. 32ตาปี โกะ บราลา นะ วา เตอ_ วา ดาปัจ ญา อาดา เดะ ซือมียา ดีฮา_ ฌางัน บรี ซือมียา อีตู นะ ฮีโดะ เลอ. วา ฆาโดฮ นะ ซารี โซะ ฮือลด โกะ อาดี บราดี นะ กีตา. วา ดาปัจ บารัก นะ วา ปัจ ดีฮา_ อาเมด เลอ” ญา จะ. กรานา ยาโกบ เตด ตาฮู จะ_ ราเชน จูรี บารัก อีตู ดัฮ.
33ลาบัน มาโซะ ปี ซารี บารัก อีตู_ เดะ รูมัฮ กาฌัก กาเยด นะ ยาโกบ_ เดะ รูมัฮ กาฌัก กาเยด นะ เลฮา_ เดะ รูมัฮ กาฌัก กาเยด นะ ปราโซฮ นีบีนี ดูวา อูรัก_ ตาปี เตด ดาปัจ นามา โปด. กะฆีเตอ_ ญา ตรือเบะ เดะ รูมัฮ กาฌัก กาเยด นะ เลฮา_ มาโซะ กะ ดาลับ รูมัฮ กาฌัก กาเยด นะ ราเชน เลอ. 34ราเชน ญา บือเลฮ อาเมด โกะ บราลา อีตู_ ตาโรฮ เดะ ดาลับ ตือปัจ ดูโดะ นะ อูตัย_ ญา ดูโดะ ตือกัด เดะ อาตัซ บารัก อีตู. ลาบัน มือราบา ซารี เดะ รูมัฮ กาฌัก กาเยด_ ตาปี เตด ดาปัจ บราลา อีตู. 35ราเชน มือเลา ฌางัน ปะ เดะ ญา จะ_ “ฌางัน บรี ปะ มูซัยํ เลอ_ นู กู นะ บีกัซ ซาโมจ ปะ เตด บือเลฮ. กู รอจ กะ อารี นู ดารัฮ นู นะ กู มาแรฮ.” กะฆีเตอ ลาบัน ญา ซารี ดัฮ_ ตาปี เตด ดาปัจ โกะ บราลา อีตู.
36โซะ ยาโกบ ญา มูซัยํ_ อูจะ กะ ลาบัน_ มือเลา จะ_ “กู ซาลัฮ นามา เฆอ? กู บูวัจ ดูซา นามา_ นู วา บรูเซ ตูโรจ กู กะฆีนี? 37วา มาแรฮ มือราบา ซารี เดะ บือนา บารัก นะ กู ราตา. วา ดาปัจ บารัก นามา เดะ รูมัฮ นะ วา? อาเมด เลอ_ บอฮ โซะ ฮือลด โกะ อาดี บราดี นะ กู_ ฌางัน โกะ อาดี บราดี นะ วา_ บีดา กูญา นะ กรัจ ฮูโกบ ลาฆู นะ กีตา ดูวา อูรัก. 38กือมูฮา ดูวา ปูโลฮ ตาโฮด อีนี_ กู อาดา ดูโดะ ฌางัน วา. โกะ แบะ_ โกะ กาเมก_ ญา ฮอย เตด บือเลฮ มืองูโฆยํ อานะ. โกะ บือนาตัก บาปา นะ วา โปด_ กู เตด มากัด เลอ. 39นู บือนาตัก ฌาฮัจ ฆีเฆะ จูลัด มากัด ดัฮ_ กู เตด อาเมด มาแรฮ บรี กะ วา. กู ตะอาซิก ยอม รูฆี ดัฮ. นู กือนา จูรี โซะ ซียัก_ โซะ มาลับ โปด_ วา บือกีรา ฌาดี ลาฆู นะ กู ดัฮ เลอ. 40วะตู โซะ ซียัก กู กือนา ซายา มาตา อารี นู ฮางัจ โตระ_ โซะ มาลับ กู บือแฌะ โตระ_ ตีโนะ เตด ลีนา ดัฮ. 41กือมูฮา ดูวา ปูโลฮ ตาโฮด_ กู อาดา กะฆีเตอ ดัฮ. กู บือกรือฌา บีดา เกา ปัจ บือลัซ ตาโฮด_ บีดา นะ บือเลฮ ฌางัน โกะ นานะ นีบีนี นะ เกา. กู บือกรือฌา ลาฆี นัม ตาโฮด ดัฮ_ บีดา กาวัด บือนาตัก นะ เกา. เกา ซาเลด รือฆา อูปัฮ นะ กู_ ซือปูโลฮ กาลี ดัฮ. 42ตูฮัด นะ อาโปก เดะ กู_ ตูฮัด นะ อับราฮัม เตอ_ ตูฮัด นู อีซัก ตูเฮะ เตอ_ ญา อาดา บือซามา ฌางัน กู ดัฮ. ดัฮ เตด ฌาดี กะฆีเตอ_ ซูโงฮ เกา นะ โปรฮ กู เปลาๆ เลอ. ตาปี ตูฮัด ญา ลีฮัจ ลาฆู ซูซัฮ ปายัฮ นะ กู ดัฮ_ นู กู บือกรือฌา ปายัฮ โตระ เลอ. กะฆีเตอ มาลับ ฮือญา ญา อูจะ วา ดัฮ” ยาโกบ ญา จะ.
ยาโกบ ฌางัน ลาบัน_ บูวัจ ปือมือเลา บือฌาญี บือตือตู บือซามา
43กะฆีเตอ ลาบัน ญา ตีกัฮ กะ ยาโกบ จะ_ “โกะ นีบีนี อีนี ฌาดี นานะ นีบีนี นะ กู. โกะ นานะ อีนี ฌาดี จูจู นะ กู. กาวัด บือนาตัก อีนี ฌาดี กาวัด บือนาตัก นะ กู. โกะ บือนา บารัก นู เกา บือเลฮ ลีฮัจ_ ฌาดี บือนา บารัก นะ กู ซือมูฮา เลอ. อารี อีนี กู นะ บือเลฮ บูวัจ นามา_ กะ โกะ นานะ นีบีนี นะ กู อีนี เตอ_ นะ บูวัจ นามา กะ โกะ นานะ นะ กูญา ฌูฆา เฆอ? 44โฌฮ_ มาแรฮ เลอ_ บรี กีตา ตืองะ ปือมือเลา บือฌาญี บือตือตู_ กู ฌางัน เกา เลอ_ บีดา นะ ฌาดี ซะซรี เดะ ตืองัฮ กู ฌางัน เกา” ลาบัน ญา จะ.
45กะฆีเตอ ยาโกบ อาเมด บาตู ซือกือโตน_ ญา ตืองะ ฌาดี จาวัก นู ซีดี. 46ญา มือเลา ฌางัน อาดี บราดี นะ ญา จะ_ “อาเมด บาตู ซือตืองัฮ มาแรฮ เลอ.” กะฆีเตอ_ กูญา อาเมด บาตู ซือตืองัฮ_ บูวัจ ฌาดี ลูโงะ ดัฮ. กูญา มากัด บือซามา เดะ บีดิก ลูโงะ บาตู อีตู. 47ลูโงะ อีตู_ ลาบัน บรี ปือนามา จะ_ “ฌะฆาซาฮาดูทา”_ ตาปี ยาโกบ บรี ปือนามา จะ “ฆาเลด”.#31.47 ปือมือเลา “ฌะฆาซาฮาดูทา” ฌางัน ปือมือเลา “ฆาเลด” ฌาดี จะ “ลูโงะ นู ฌาดี ซะซรี” เดะ บาซา นะ กูญา ซอก ซืออูรัก. 48ลาบัน มือญาเระ จะ “ลูโงะ อีนี ฌาดี ซะซรี_ เดะ ตืองัฮ กู ฌางัน เกา เดะ อารี อีนี.” กะฆีเตอ ลูโงะ อีตู ปือนามา จะ “ฆาเลด.” 49ลาบัน บรี นามา อาซิก จะ “มิซะปา.”#31.49 ปือนามา “มิซะปา”_ ฌาดี จะ_ “ตือปัจ ฌาฆา.”_ ซาเบะ ญา มือเลา จะ “ตูฮัด บือซัยํ เดะ อาตัซ_ นะ ฌาฆา เดะ ตืองัฮ กู ฌางัน เกา_ ตานา กีตา เตด ดูโดะ บือซามา. 50ดัฮ เกา บูวัจ บรี นานะ นีบีนี นะ กู_ นะ กือนา ลาฆู ซูซัฮ ปายัฮ เตอ_ ดัฮ เกา นะ อาเมด บีนี อาซิก_ ลือเบฮ เดะ นานะ นีบีนี นะ กู เตอ_ มีเซ จะ ฮอย ซือมียา ดูโดะ บือซามา ฌางัน กามี_ ลีฮัจ เลอ_ ตูฮัด ญา ฌาดี ซะซรี เดะ ตืองัฮ กู ฌางัน เกา.”
51กะฆีเตอ_ ลาบัน มือเลา ฌางัน ยาโกบ จะ_ “ลีฮัจ เลอ_ กะ ลูโงะ บาตู อีนี เตอ_ กะ บาตู นู อาเกะ ฌาดี ปือนานา อีนี เตอ_ นู กีตา ตืองะ ดัฮ_ เดะ ตืองัฮ เกา ฌางัน กู. 52ลูโงะ บาตู อีนี_ ฌางัน ซะซรี_ บาตู ปือนานา อีนี_ ฌาดี ซะซรี_ นะ บรี อีงัจ_ นู จะ_ กู นะ เตด ลากัฮ ลูโงะ บาตู อีนี ปี_ บือลาวัด ฌางัน เกา. เกา โปด_ นะ เตด ลากัฮ ลูโงะ บาตู_ เฆอ จะ บาตู ปือนานา อีนี ฌูฆา_ มาแรฮ บือลาวัด ฌางัน กู. 53มีตา บรี ตูฮัด_ นู ฌาดี ตูฮัด นะ อับราฮัม_ ตูฮัด นะ นาโฮระ_ ตูฮัด นะ อาโปก นะ กีตา ดูวา อูรัก เตอ_ มีตา บรี ญา ฌาดี ตูฮัด_ นู กรัจ ฮูโกบ_ ลาฆู นะ กีตา” ลาบัน ญา จะ.
กะฆีเตอ_ ยาโกบ ญา อาเกะ มือเลา บือฌาญี กะฆีนี_ เดะ ปือนามา นะ ตูฮัด_ นู อีซัก_ ปะ เดะ ญา ตูเฮะ เตอ. 54ยาโกบ มือญือมัฮ บารัก มือญือมัฮ กะ ตูฮัด_ เดะ อาตัซ บูเกะ อีตู. ญา บืออาฌะ โกะ นะบรานะ นะ ญา_ บรี กูญา นะ บือเลฮ มากัด ตือโปก. กูญา โปด_ ดูโดะ มากัด_ เดะ บูเกะ อีตู_ ตือดะ จรัฮ ปาฆี.
55วะตู จรัฮ ปาฆี ดัฮ_ ลาบัน ญา บีกัซ_ ญา จีโยบ โกะ จูจู_ โกะ นานะ นีบีนี นะ ญา_ ญา มีตา เดะ ตูฮัด_ นะ บรี ซือลามัจ กะ กูญา. กะฆีเตอ_ ญา บาลิ ปี กะ รูมัฮ นะ ญา ดัฮ.
Currently Selected:
ลามูลา 31: ULBIBLE
Highlight
Share
Copy
Want to have your highlights saved across all your devices? Sign up or sign in
