ลามูลา 32
32
ยาโกบ ตาโกจ นะ ดาปัจ เอซาว_ กากา เดะ ญา
1กาลา ยาโกบ บือฌาลัด ปี ลาฆี_ อาดา ลูมอฮ ฮูลู บาลัก นะ ตูฮัด มาแรฮ ดาปัจ ญา. 2กาลา ยาโกบ ลีฮัจ โกะ ฮูลู บาลัก อีตู เตอ_ ญา มือเลา จะ_ “อีนี เลอ_ ฌาดี ตูโปะ รูมัฮ บือปรัก นะ ตูฮัด.” กะฆีเตอ ญา บลาโลก ตือปัจ อีตู ฌาดี ปือนามา จะ_ มาฮะนายิม.#32.2 ปือนามา “มาฮะนายิม” เดะ ตือนอซ อีนี_ ฌาดี จะ_ “ดูวา กาวัด ตาฮัน.”
ยาโกบ อาตัจ ซือบารัก บีดา ตีเมา บรี เอซาว มูซัยํ
3ยาโกบ ญา ซูโรฮ ซือมียา ซือตืองัฮ_ ปี โซะ ฮือลด ญา_ นะ บรี กูญา บือดาปัจ ฌางัน เอซาว_ กากา เดะ ญา_ เดะ โซะ นังฆรี เซอีระ_ นู ฌาดี นังฆรี เอโดม. 4ยาโกบ ปือซัด กูญา จะ_ “กาเญา กือนา มือเลา ฌางัน เอซาว_ กือปาลา นะ กู_ กะฆีนี จะ_ ‘ยาโกบ_ ปราโซฮ นะ เกา_ ญา มือเลา กะฆีนี จะ_ กู บือเลฮ ปี มือนูปัก ดูโดะ ฌางัน ลาบัน_ วา เดะ กีตา ดัฮ_ รอจ กะ วะตู อีนี. 5กู อาดา กาวัด ลือมู_ กาวัด กูดา บาซา ดือมิ_ กาวัด แบะ_ กาวัด กาเมก_ อาดา ลูมอฮ ปราโซฮ กีลากี นีบีนี. กะฆีเตอ_ กู ซูโรฮ ซือมียา ปี มือญาเระ กะ กือปาลา นะ กู_ บีดา กู นะ ฌาดี ซือมียา นู กือนา เดะ ฮาตี นะ เกา เลอ’ ”_ ญา จะ.
6โกะ ปือญูโรฮ บาลิ มาแรฮ_ มือญาเระ กะ ยาโกบ จะ_ “กามี ดาปัจ เอซาว_ กากา เดะ เกา ดัฮ. ญา ตืองัฮ มาแรฮ_ นะ บือดาปัจ ฌางัน เกา. ญา บาวา ลูมอฮ ซือมียา ปัจ ราตุซ (400) อูรัก มาแรฮ ซามา.”
7กะฆีเตอ_ ยาโกบ_ ญา ตาโกจ_ ฆาโดฮ ฮาตี โตระ. ญา ปาฮาฆิ โกะ ซือมียา ซือมูฮา นู มาแรฮ ซามา_ โกะ กาวัด แบะ_ กาวัด กาเมก_ โกะ กาวัด ลือมู_ โกะ อูตัย เตอ_ บือปือจัฮ ฌาดี ดูวา กาวัด. 8ญา อีงัจ จะ_ “ดัฮ เอซาว มาแรฮ ดาปัจ ซา กาวัด ดัฮ_ บูวัจ บรี ฌาฮานัม ฮาบิฮ_ นะ อาดา ซา กาวัด อาซิก อีตู_ นู บือเลฮ ลารี ลือปัซ เลอ.”
9ยาโกบ บือซาโวจ จะ_ “โอ ตูฮัด นะ อับราฮัม_ แจ เดะ กู เตอ_ จะ_ ตูฮัด นะ อีซัก_ อาโปก เดะ กู. โอ ตูฮัด บือซัยํ เดะ อาตัซ_ นู มือเลา ฌางัน กู จะ_ ‘บาลิ ปี เลอ_ กะ นังฆรี นะ เกา_ กะ ลูมอฮ นะบรานะ นะ เกา. กู นะ ตูโลก เกา_ บรี ซือนัง บาฌิ’_ เกา จะ. 10กู เตด ปาโตจ นะ ซาโมจ ลาฆู ซายัก กือฌะ กือมัซ_ ฌางัน ลาฆู ฮาตี รือมัก_ นู ตูฮัด บรี กะ ปราโซฮ นะ ตูฮัด เลอ. มีเซ จะ ลาฆู ดีกิ ตอจ โปด_ กู เตด ปาโตจ นะ ซาโมจ เลอ. กรานา กู ฌรือมัก ซูงัย จอแดน อีนี ปี ดัฮ_ อาดา ซา ตูกัจ นะ กู เลอ. ตาปี วะตู อีนี_ กู มาแรฮ ฌาดี ดูวา กาวัด ดัฮ. 11มีตา เดะ ตูฮัด_ บรี กู นะ ลือปัซ_ เดะ ตางัน นะ เอซาว_ กากา เดะ กู. กู ตาโกจ จะ_ ญา นะ มาแรฮ บูนอฮ กามี ซือมูฮา_ บูนอฮ โกะ มะ_ ฌางัน โกะ นานะ ฌูฆา. 12ตาปี ตูฮัด มือเลา ดูลู ดัฮ จะ ‘กู นะ บูวัจ บรี เกา ดูโดะ ซือนัง_ นะ บูวัจ บรี ลูมอฮ บือแนฮ นะ เกา_ อาดา บาญะ_ ซือรูปา โกะ บีฌี ตานัฮ เดะ ปาตัย_ นู กีรา เตด กือนา เลอ’ ”_ ญา จะ.
13กะฆีเตอ_ ยาโกบ ดูโดะ ปัจ อีตู_ ซา มาลับ. ญา อาเมด บือนา บารัก นะ ญา ซือตืองัฮ_ นะ มือญือมัฮ บรี กะ เอซาว_ กากา เดะ ญา. 14อาดา แบะ อายา ดูวา ราตุซ (200) อีโกยํ_ ฌางัน แบะ บาปา ดูวา ปูโลฮ (20) อีโกยํ_ อาดา กาเมก อายา ดูวา ราตุซ (200) อีโกยํ_ ฌางัน กาเมก บาปา ดูวา ปูโลฮ (20) อีโกยํ. 15อาดา อูตัย อายา ตีฆา ปูโลฮ (30) อีโกยํ_ ฌางัน โกะ อานะ นะ ญา. อาดา ลือมู อายา ปัจ ปูโลฮ (40) อีโกยํ_ ฌางัน ลือมู บาปา ซือปูโลฮ อีโกยํ. อาดา กูดา บาซา ดือมิ_ อายา ดูวา ปูโลฮ อีโกยํ_ ฌางัน บาปา ซือปูโลฮ อีโกยํ. 16โกะ กาวัด บือนาตัก อีนี_ ยาโกบ กีเรบ ฌางัน ปราโซฮ นะ ญา_ ซอก ซือกาวัดๆ. ญา มือเลา ฌางัน โกะ ปราโซฮ จะ_ “กาเญา กือนา ฌาลัด ปี_ โซะ ฮือลด กู. บรี ปี ซอก ซือกาวัด_ ฌาโวฮ เดะ กาวัด_ ดีกิ ตอจ เลอ”_ ญา จะ. 17ญา ปือซัด กะ ปราโซฮ เดะ กาวัด ลามูลา จะ_ “ตานา เอซาว_ กากา เดะ กู_ มาแรฮ ดาปัจ เกา_ ญา ตาญา เกา จะ_ ‘เกา ฌาดี ปราโซฮ นะ ซาปา? เกา ตืองัฮ นะ ปี กะ ดีฮา? กาวัด บือนาตัก อีนี_ ฌาดี นะ ซาปา?’ 18เกา กือนา ตีกัฮ กะ ญา จะ_ ‘กาวัด บือนาตัก อีนี_ ฌาดี นะ ยาโกบ_ ปราโซฮ นะ เกา. ญา กีเรบ กาวัด บือนาตัก อีนี_ บรี มือญือมัฮ กะ เอซาว_ กือปาลา นะ กู. อีซี ญา โปด_ ตืองัฮ บือฌาลัด มาแรฮ_ โซะ บลากัก ดัฮ’ ”_ ญา จะ.
19ยาโกบ ปือซัด กะฆีนี_ ฌางัน ปราโซฮ_ เดะ กาวัด นู ดูวา_ เดะ กาวัด นู ตีฆา_ ฌางัน ปราโซฮ ซือมูฮา_ นู บาวา กาวัด บือนาตัก ปี. ญา มือเลา จะ_ “ตานา กาเญา ดาปัจ เอซาว_ กือนา มือเลา กะฆีเตอ เลอ_ กะ ญา. 20กาเญา กือนา มือเลา ฌูฆา_ นู จะ ‘ยาโกบ_ ปราโซฮ นะ เกา_ ญา ตืองัฮ บือฌาลัด มาแรฮ ดัฮ_ เดะ บลากัก’ ”_ ญา จะ.
ยาโกบ อีงัจ จะ_ “นู กู บรี โกะ บือนาตัก อีนี กะ ญา เตอ_ นะ บรี ญา บาฌิ ฌางัน กู เฆอ?_ เดะ บลากัก_ กาลา กู ลีฮัจ มูคา นะ ญา_ ญา นะ ซาโมจ กู_ บรี บาฌิ เฆอ?”
21กะฆีเตอ_ กาวัด บือนาตัก นู ญา บรี อีตู_ ปี ดูลู เดะ ญา_ ตาปี อีซี ญา ตะอาซิก_ ดูโดะ เดะ ลูมอฮ รูมัฮ กาฌัก_ โซะ มาลับ อีตู.
ยาโกบ บือลาวัด ฌางัน ซือมียา ซืออูรัก เดะ เปนีเอน
22มาลับ อีตู_ ยาโกบ บีกัซ ดัฮ_ บาวา โกะ บีนี ดูวา อูรัก_ โกะ ปราโซฮ นีบีนี ดูวา อูรัก_ โกะ นานะ ซือบือลัซ อูรัก_ บรี ฌรือมัก ปี_ กะ โซะ ซรือบัก ซูงัย ยับบอก. 23ญา บาวา กูญา ฌรือมัก ปี_ เดะ ซูงัย อีตู_ ฌางัน โกะ บือนา บารัก นะ ญา_ ซือมูฮา. 24ยาโกบ ญา ดูโดะ ซา อูรัก ญา. อาดา ซือมียา ซืออูรัก_ บือลาวัด บือรีฆะ ฌางัน ญา_ ตือดะ มูกัยํ. 25กาลา ซือมียา อีตู ลีฮัจ จะ_ ญา อาเมด ฌือนัฮ เดะ ยาโกบ เตด บือเลฮ ดัฮ. กะฆีเตอ_ ตานา กูญา บือลาวัด บือซามา_ ญา ปือเตาะ ยาโกบ_ เดะ โซะ บูกู ปาฮา_ บูวัจ บรี ตูลัก บูกู อีตู รืองัก ดัฮ. 26ซือมียา อีตู มือเลา จะ_ “ปลือปัซ บรี กู ปี เลอ. ซรือปะ นะ จรัฮ ปาฆี ดัฮ.”
ตาปี ยาโกบ ตีกัฮ จะ_ “กู ตีเมา นะ บรี เกา ปี ดูลู_ ตือดะ เกา นะ บรี ซือลามัจ กะ กู.”
27ซือมียา อีตู มือเลา ฌางัน ยาโกบ จะ_ “เกา ปือนามา นามา?”
ญา ตีกัฮ จะ_ “กู ปือนามา ยาโกบ.”
28กะฆีเตอ_ ซือมียา อีตู มือเลา จะ_ “ตะเดะ อีนี_ ปือนามา นะ เกา_ บูกัด ‘ยาโกบ’ ดัฮ_ ตาปี นะ บลาโลก ปือนามา จะ_ ‘อิซราเอน’#32.28 ปือนามา “อิซราเอน”_ ฌาดี จะ_ “ซือมียา นู บือลาวัด ฌางัน ตูฮัด.”_ ซาเบะ เกา บือลาวัด ฌางัน ตูฮัด ดัฮ_ บือลาวัด ฌางัน ซือมียา ฌูฆา_ ตือดะ เกา ฌือนัฮ ดัฮ.”
29กะฆีเตอ_ ยาโกบ ตาญา ซือมียา อีตู จะ_ “มีตา บรี เกา มือญาเระ ปือนามา นะ เกา กะ กู.”
ตาปี ซือมียา อีตู มือเลา จะ_ “บูวัจ นามา_ เกา ตาญา ปือนามา นะ กู?”_ กะฆีเตอ_ ญา บรี ซือลามัจ กะ ยาโกบ_ โซะ อีตู. 30กะฆีเตอ_ ยาโกบ ตืองะ ปือนามา กะ ตูโปะ อีตู จะ_ เปนีเอน#32.30 ปือนามา “เปนีเอน” เฆอ “เปนูเอน”_ ฌาดี จะ_ “มูคา นะ ตูฮัด.”_ มือเลา จะ_ “กู บือซูวา มูคา ฌางัน ตูฮัด ดัฮ_ ตาปี ญา ตาโรฮ บรี กู ฮีโดะ ลาฆี.”
31กาลา ยาโกบ ลาลู เดะ เปนูเอน ปี_ มาตา อารี โปด_ ญาแญะ ดัฮ. ยาโกบ ญา ฌาลัด เตาะอูเตาะ_ ซาเบะ ญา ซาลัฮ อูรัจ โซะ ปาฮา ดัฮ. 32กะฆีเตอ_ รอจ กะ ฮาดัจ อีนี_ ลูมอฮ บักซา อิซราเอน ตีเมา มากัด อูรัจ บูกู ปาฮา_ ซาเบะ ตูฮัด ปือเตาะ ยาโกบ_ เดะ บูกู ปาฮา นะ ญา ดัฮ.
Currently Selected:
ลามูลา 32: ULBIBLE
Highlight
Share
Copy
Want to have your highlights saved across all your devices? Sign up or sign in
