ลามูลา 33
33
ยาโกบ ดาปัจ เอซาว ดัฮ
1ยาโกบ ลางอฮ ปาลา ลีฮัจ บือฆารี_ อาดา เอซาว ตืองัฮ บือฌาลัด มาแรฮ_ บือซามา ฌางัน โกะ ซือมียา ปัจ ราตุซ (400) อูรัก. กะฆีเตอ_ ญา บือปือจัฮ ปาฮาฆิ โกะ นานะ_ บรี กะ เลฮา_ ฌางัน ราเชน_ ฌางัน โกะ ปราโซฮ นีบีนี_ ดูวา อูรัก ฌูฆา. 2ญา ซูโรฮ ปราโซฮ นีบีนี_ ฌางัน นานะ นะ ญา_ ปี ดูลู. ลือปัซ อีตู_ อาดา เลฮา_ ฌางัน นานะ นะ ญา. ราเชน_ ฌางัน นานะ นะ ญา_ โยเซบ เตอ_ อาดา เดะ บลากัก กาวัด เลอ. 3ญา ตะอาซิก_ ปี ดูลู เดะ ลูมอฮ กูญา. ญา ตือมะ มือญือมัฮ รอจ กะ ตานัฮ_ ตูโฌฮ กาลี_ ตือดะ รอจ กะ กากา เดะ ญา.
4ตาปี เอซาว_ ญา บลารี ตรือเบะ ปี ฮามัจ ญา_ กรด ญา_ ตือมะ มูคา_ เดะ ลีเฮ นะ ญา_ จีโยบ ญา. กูญา ดูวา อูรัก ปาคัจ มือนาแงฮ. 5ตานา เอซาว ลีฮัจ บือฆารี โกะ บีนี_ ฌางัน โกะ นานะ นะ ญา_ ญา ตาญา จะ_ “โกะ ซือมียา อีนี ฌาดี ซาปา เลอ?”
ยาโกบ ตีกัฮ จะ_ “อีนี ฌาดี ลูมอฮ นานะ_ นู ตูฮัด เดะ อาตัซ_ ฮาลัย บรี กะ กู_ นู ฌาดี ปราโซฮ นะ เกา.”
6กะฆีเตอ_ โกะ ปราโซฮ นีบีนี_ ฌางัน นานะ นะ กูญา_ มาแรฮ ดาปิก_ มือนูโนะ กะ เอซาว. 7เลฮา ฌางัน นานะ นะ ญา_ มาแรฮ ดาปิก_ มือนูโนะ ฌูฆา_ กะ เอซาว. โซะ ปือญูดัฮ_ โยเซบ ฌางัน ราเชน มาแรฮ ดาปิก_ มือนูโนะ กะ เอซาว ฌูฆา.
8เอซาว ตาญา จะ_ “ลูมอฮ ซือมียา ฌางัน โกะ กาวัด บือนาตัก_ นู กู ดาปัจ ซีงี ดัฮ เตอ_ อาดา บีดา ลาฆู นามา?”
ยาโกบ ตีกัฮ จะ_ “บีดา กู นะ ฌาดี ซือมียา นู กือนา เดะ ฮาตี กือปาลา นะ กู เลอ.”
9ตาปี เอซาว มือเลา จะ_ “มิ เออ_ กู อาดา_ ฆือนะ ดัฮ. ตาโรฮ เลอ_ บือนา บารัก นะ เกา ซือมูฮา.”
10ยาโกบ ตีกัฮ จะ_ “บูกัด กะฆีเตอ เลอ. ดัฮ กู ฌาดี ซือมียา นู กือนา เดะ ฮาตี นะ เกา_ มีตา บรี เกา นะ ซาโมจ บือนา บารัก_ นู กู มือญือมัฮ บรี กะ เกา ดัฮ. ซูโงฮ เลอ_ นู กู ลีฮัจ บือฆารี มูคา นะ เกา_ นู เกา ซาโมจ กู บาฌิ กะฆีนี ดัฮ_ ฌาดี ซือรูปา กู ลีฮัจ มูคา นะ ตูฮัด ฌูฆา. 11มีตา บรี เกา ซาโมจ บือนา บารัก_ นู กู มือญือมัฮ บรี กะ เกา_ กรานา ตูฮัด เดะ อาตัซ_ ตือจีฮัด กะ กู บาฌิ ดัฮ_ บูวัจ บรี กู อาดา ฆือนะ กะฆีนี” ญา จะ. ญา มือเลา กือมัซๆ กะฆีนี_ เอซาว โปด_ ซาโมจ ดัฮ.
12กะฆีเตอ_ เอซาว มือเลา ฌางัน ยาโกบ จะ_ “บรี กีตา บือฌาลัด ปี บือซามา. กู นะ ปี โซะ ฮือลด เกา.”
13ตาปี ยาโกบ ตีกัฮ กะ ญา จะ_ “กือปาลา นะ กู ตาฮู จะ_ นานะ นะ กู_ กูญา ฮอย อูรัจ_ ลือมัฮ ลือเตฮ ลาฆี. กู กือนา ปือบือลา กาวัด แบะ_ กาวัด กาเมก_ กาวัด ลือมู_ นู อาดา อานะ มากัด ดาดา ลาฆี. ดัฮ นะ บรี โกะ บือนาตัก บือฌาลัด ปี จือปัจๆ_ ตาโกจ จะ_ ญา นะ มาตี ฮาบิฮ ซือมูฮา. 14บรี กือปาลา นะ กู_ ปี ดูลู เดะ ปราโซฮ นะ เกา เลอ. กู นะ ตูโรจ ปี ลามัจๆ_ เดะ บลากัก_ บือกะ อูรัจ นะ โกะ บือนาตัก_ อูรัจ นะ โกะ นานะ_ ตือดะ กู นะ ปี รอจ_ กะ กือปาลา นะ กู_ เดะ นังฆรี เซอีระ”_ ญา จะ.
15กะฆีเตอ_ เอซาว มือเลา ฌางัน ยาโกบ จะ_ “กะฆีเตอ_ บรี ลูมอฮ ซือมียา นะ กู ซือตืองัฮ_ นะ ปี บือซามา ฌางัน เกา.”
ยาโกบ ตีกัฮ จะ_ “เตด ปายัฮ เลอ. นู กู ฌาดี ซือมียา นู กือนา เดะ ฮาตี นะ กือปาลา นะ กู กะฆีนี_ ฌาดี ดัฮ.”
16เดะ อารี อีตู_ เอซาว โปด บาลิ ปี ดัฮ_ นะ บือฌาลัด กะ นังฆรี เซอีระ. 17ตาปี ยาโกบ บือฌาลัด ปี_ กะ ตูโปะ ซุกคด. ญา จาจะ รูมัฮ ตือปัจ อีตู_ บูวัจ โกะ ซาเราะ_ บีดา บอฮ บือนาตัก นะ ญา. กะฆีเตอ_ ญา ตืองะ ปือนามา ตูโปะ อีตู จะ_ ซุกคด#33.17 เดะ บาซา ฮีบรู “ซุกคด”_ ฌาดี จะ “ซาเราะ.”.
ยาโกบ ปี รอจ กะ เซเคม
18ยาโกบ ญา บือฌาลัด มาแรฮ เดะ นังฆรี ปาดัน-อารัม_ ซือนัง บาฌิ ดัฮ_ มาแรฮ รอจ กะ ตูโปะ เซเคม_ เดะ โซะ นังฆรี คานาอัน. ญา ตืองะ โกะ รูมัฮ กาฌัก กาเยด นะ ญา_ ดาปิก นังฆรี อีตู. 19ตือปัจ ตานัฮ นู ญา จาจะ รูมัฮ กาฌัก กาเยด อีตู_ ยาโกบ บือลี เดะ ลูมอฮ นานะ นะ ฮามอ_ นู ฌาดี อาโปก เดะ เซเคม. ญา บือลี_ รือฆา 100 รีเงะ. 20ปัจ อีตู_ ญา บูวัจ ตือปัจ มือญือมัฮ กะ ตูฮัด_ นู ญา ตืองะ ปือนามา จะ_ เอล-เอโลเฮ-อิซราเอน#33.20 ปือนามา อีนี ฌาดี จะ_ “ตูฮัด_ นู ตูฮัด นะ อิซราเอน.”.
Currently Selected:
ลามูลา 33: ULBIBLE
Highlight
Share
Copy
Want to have your highlights saved across all your devices? Sign up or sign in
